ފަރަގު މީޑިއާ

ދިވެހިރާއްޖޭގެ ޤައުމީ ޔުނިވަރސިޓީގެ ސްޓޫޑެންޓް ޔޫނިއަންއާއި ދިވެހިރާއްޖޭގެ އިސްލާމީ ޔުނިވަރސިޓީގެ ދަރިވަރުންގެ ގުޅުމުން އިންތިޒާމްކޮށްގެން ފަލަސްޠީނާ ބެހޭ ގޮތުން ހޭލުންތެރިކުރުމުގެ ޚާއްޞަ ޕްރޮގްރާމެއް ފެށިކަމީ މަތީ ތަޢުލީމުގެ ދަރިވަރުން ފަލަސްތީނުގެ މައްސަލައަށް ސަމާލުކަންދޭކަމުގެ ހެތްކެކެވެ. އަދި މި ޕްރޮގްރާމުގެ ތެރެއިން މަތީތަޢުލީމުގެ ދަރިވަރުންނާއި ޢާންމުންގެ މެދުގައި ވެސް ފަލަސްތީނުގެ ޤަޟިއްޔާއާ މެދު ހޭލުންތެރިކަން އިތުރުވެ، އެ މައްސަލައިގައި މުސްލިމުންގެ ހައިސިއްޔަތުން ބައިވެރިވުމުގެ ޝައުޤު އުފެދޭނެއެވެ.

މި ކަމަށް ޓަކައި ރާއްޖޭގައި ހުރި ހަމައެކަނި ދެ ޔުނިވަރސިޓީގެ ދަރިވަރުން އިސްނަގައިގެން ފެށި ސިލްސިލާ ޕްރޮގްރާމުތަކުގެ ޕްރަތަމަ ޕްރޮގްރާމް ޚާއްޞަ ފޯރަމެއްގެ ގޮތުގައި ރޭ ވަނީ ބާއްވައިފައެވެ. ދިވެހިރާއްޖޭގެ ގައުމީ ޔުނިވަރސިޓީގެ އިދާރީ މަރުކަޒުގެ މައި އޮޑިޓޯރިއަމުގައި ރޭ ބޭއްވި މި ފޯރަމުގައި ޚާއްސަ ޕެނަލް މަޝްވަރާއެއް ވެސް ވަނީ ބާއްވައިފައެވެ. މި މަޝްވަރާގައި މަޢުލޫމާތު ދެއްވައިފައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީއެއްގެ ޑީނެއްކަމުގައިވާ އައްޝައިޚުއްދުކްތޫރު ޢަބްދުއްސައްތާރު ޢަބްދުއްރަޙްމާނާއި އެ ޔުނިވަރސިޓީގެ އިސް ދާރިސެއްކަމުގައިވާ، ތާރީޚީ ޢިލްމުވެރިޔާ، އަލްފާޟިލް މުޙައްމަދު ދީދީއާއި ދިވެހިރާއްޖޭގެ އިސްލާމީ ޔުނިވަރސިޓީގެ ލެކްޗަރަރ ޑރ. ޢަލީ ރިޒާ އަޙްމަދެވެ.

ފަލަސްޠީނަށް ދިމާވެފައިވާ ޙަލާތާ ގުޅޭ ގޮތުން ބޭއްވި ފޯރަމްގައި އެ ކަމާ ގުޅޭ މުހިންމު މަޢުލޫމާތުތަކެއް ވަނީ ހާމަކޮށްފައެވެ. އަދި ފަލަސްޠީނަށް ޔަހޫދީން ދެމުންގެންދާ ލާއިންސާނީ ޢުދުވާނީ ޙަމަލާތައް ފެށުނު ގޮތާ ބެހޭ ވީޑިއޯ ހުށަހެޅުމަކާއި ޕަވަރޕޮއިންޓް ހުށަހެޅުންތަކެއް ވެސް ވަނީ ދައްކައިފައެވެ. އަދި މި ކަމާ ގުޅޭ ގޮތުން ދަރިވަރުން ވެސް މަޢުލޫމާތުދީ ވާހަކަދައްކައިފައިވެއެވެ. މީގެ އިތުރަށް ޕެނަލްގައި ތިއްބެވި ތިން ބޭފުޅުން ވަނީ އެކި ފަރާތްތަކުން މި މައްސަލައިގައި ކުރިމަތިކުރެއްވި ހުރިހައި ސުވާލަކަށް ޢިލްމީ ގޮތުން ޖަވާބުދެއްވައިފައެވެ.

މި ފޯރަމު ބައްލަވައިލެވުމަށް ޓަކައި އިސްލާމީ ކަންތައްތަކާ ބެހޭ ވަޒީރު ޑރ. މުޙަންމަދު ޝަހީމް ޢަލީ ސަޢީދާއި ގައުމީ ޔުނިވަރސިޓީގެ ވައިސް ޗާންސެލާރ ޑރ. ޢާއިޝަތު ޝެހެނާޒު އާދަމާއި އިސްލާމީ ވުޒާރާގެ ދެ ސްޓޭޓް މިނިސްޓަރުންނާއި މިނިސްޓަރުގެ ބައެއް ނާއިބުން ވެސް ޙާޒިރުވެވަޑައިގަތެވެ. އަދި ދެ ޔުނިވަރސިޓީގެ އިސް ބައެއް އެހެން ވެރީން ވެސް ޙާޒިރުވެވަޑައިގަތެވެ. އަދި ފަލަސްތީނުގެ ޢާއިލާއެއް ވެސް މި ފޯރަމް ބަލައިލުމަށް ޓަކައި ހާޒިރުވިކަން ފާހަގަކުރެވެއެވެ.

މި ފޯރަމަށް އިޝާރަތްކުރައްވައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ފަލަސްޠީނުގެ މުސްލިމުންނާ ދެކޮޅަށް އިސްރާޢީލުގެ ޔަހޫދީން ހިންގަމުންދާ ޤަތުލުޢާންމުގެ ވާހަކަތައް އަދުގެ ދަރިވަރުންނަށް ކިޔައިދީ ފަލަސްޠީނާ މެދު ލޯބި އުފެއްދުމަކީ މުހިންމުކަމެއްކަމަށެވެ.

ވަޒީރު ޑރ. މުޙައްމަދު ޝަހީމް އަލީ ޞަޢީދު ވިދާޅުވީ ފަލަޞްޠީނުގެ މުސްލިމުންގެ ޙައްޤުގައި ކުރާންޖެހޭ އެންމެ މުހިންމު ކަމަކީ އެ ޤައުމަށް ދިމާވެފައިވާ ނިކަމެތިކަމަކީ ކޮންމެ މުސްލިމަކު ވެސް އެ ކަމާ ހިތާމަކޮށް ކަންބޮޑުވާންޖެހޭ، އަދި މުސްލިމް އުންމަތަށް ދިމާވެފައިވާ މުހިންމު މައްސަލައެއްކަން އަދުގެ ދަރިވަރުންނަށް ކިޔައިދިނުންކަމަށެވެ. އަދި މި މައްސަލަ ޢިލްމީ ހަމަތަކުން ކިޔައިދީ، ހޭލުންތެރިކަން އުފެއްދުން މުހިންމުކަމަށް ވެސް ވަޒީރު ވިދާޅުވިއެވެ. އަދި ފަލަސްޠީންގެ ބިމާއި އެ ބިމުގައިވާ މުސްލިމުންގެ މުޤައްދަސް މިސްކިތްކަމުގައިވާ އަލްމަސްޖިދުލްއަޤްޞާއާ މެދު ދަރިވަރުންގެ ހިތްތަކުގައި ލޯބި ޖެއްސުމަކީ ވެސް މުހިންމު ކަމެއްކަން ވަޒީރު ފާހަގަކުރެއްވިއެވެ.

ވަޒީރު ވަނީ ފަލަސްޠީނަށް ދިމާވެފައިވާ ޙަލަތާމެދު ހޭލުންތެރިކުރުމަށް ރާއްޖޭގެ މައި ދެ ޔުނިވަރސިޓީގެ ސްޓޫޑެންޓް ޔޫނިއަނުން އިންތިޒާމްކޮށްގެން ފޯރަމެއް ބޭއްވުމުން އެ ދެ ޖަމިއްޔާއަށް ޝުކުރުއަދާކޮށްފައެވެ. އަދި މި ފޯރަމަކީ މަތީ ތަޢުލީމު ޙާސިލްކުރާ ދަރިވަރުންތަކެއް އިސްނަގައިގެން ރާއްޖޭގައި ބޭއްވި މިފަދަ ފުރަތަމަ ފޯރަމުކަން ވަޒީރު ފާހަގަކުރެއްވިއެވެ.

ފަލަސްޠީންގެ މުސްލިމުންނާ ދެކޮޅަށް ޔަހޫދީން ޢުދުވާނީ ޙަމަލާތަކެއް މި ފަހަރު ދޭން ފަށައިފައިވަނީ މި ދިޔަ އަހަރުގެ އޮކްޓޫބަރުމަހު ހަތްވަނަ ދުވަހުއެވެ. ޙަމަލާތައް ދޭން ފަށައިފައިވާތާ އަހަރަކަށް ވުރެ ގިނަ ދުވަސްވެފާވާއިރު، 44،000 އަށް ވުރެ ގިނަ ރައްޔިތުން މިހާތަނަށް ވަނީ ޝަހީދުކޮށްލައިފައެވެ. މި ކަމާ ގުޅިގެން އިސްރާއީލުގެ ބޮޑުވަޒީރު ބިންޔާމީން ނަތަންޔާހޫއާއި އެ މީހުންގެ ކުރީގެ ދިފާޢީ ވަޒީރު ޔުއާބު ގަލާންޓް ހިފައިހައްޔަރުކުރާން ބައްިނަލްއަގުވާމީ ޖިނާއީ ކޯޓުން މި ދިޔަ ބުރާސްފަތިދުވަހު ވަނީ އަމުރެއް ވެސް ނެރެފައެވެ. ނަމަވެސް މިހާތަނަށް މި ދެ މީހުން ކުރެ އެކަކު ވެސް ހައްޔަރުކުރިކަމެއް އެނގޭކަށް ނެތެވެ.

___________________________________