ފަރަގު މީޑިއާ

ސަރުކާރުގެ އިދާރާތަކުގައި މަސައްކަތްކުރައްވާ މުވައްޒަފުންގެ ފެންވަރު މަތިކޮށްދެއްވުމަށް ޓަކައި ދައުލަތުގެ ކަމާ ގުޅުން ހުރި އިދާރާތަކުން ގިނަ މަސައްކަތްތަކެއް ކުރައްވައެވެ. އެ މަސައްކަތްތަކުގެ ނަތީޖާ ކޮންމެވެސް ވަރަކަށް ފެނުނުކަމަށް ވިޔަސް އުންމީދުކުރާ ވަރުގެ ބޮޑު ބަދަލެއް ފެންނަކަމަށް ދަންނަވާން ދައްޗެވެ.

ސިވިލް ސަރވިސް ކޮމިޝަނުން މަދަނީ މުވައްޒަފުންގެ ފެންވަރު މަތިކުރުމަށް ގިނަ ތަމްރީނުޕްރޮގްރާމްތަކެއް ހިންގަވާކަމަށް ވެއެވެ. އަދި ޚާއްޞަކޮށް ދިވެހިބަހުގެ އެކެޑަމީއިން ދިވެހިބަސް ހެޔޮ ގޮތުގައި ބޭނުންކުރާނެ ގޮތް ދޭތެރެ ދޭތެރެއިން ދައުލަތުގެ އެކި އިދާރާތަކަށް ހިންގަވައެވެ. އެ މަސައްކަތްތަކާ އެއް މިންވަރަކަށް ދައުލަތުގެ ލިޔެކިޔުންތަކުން ނަތީޖާ ފެންނަލެއް ކުޑަކަމަށް އެ ކަންކަން ދިރާސާކުރައްވާ ފަރާތްތަކުން ވިދާޅުވެއެވެ.

ހަގީގަތުގައި ކިތަންމެ މޮޅު ބޭފުޅުންތަކެއް ކިޔަވައިދެއްވިކަމަށް ވިޔަސް އެ ކަމުން އެންމެ އެދެވޭ ނަތީޖާ ފެންނާނީ އުނގެނޭ ފަރާތްތަކުން، ދިވެހިބަސް ހެޔޮ ގޮތުގައި ނޫނީ ބޭނުންނުކުރުމުގެ ޢަޒުމެއް ކަނޑައަޅައި ހެޔޮ ގޮސް އަބަދު ވެސް ދަސްކުރާން މަސައްކަތްކޮށްގެންނެވެ. މި ގޮތަށް ޢަޒުމު ކަނޑައަޅުއްވައިގެން ދައުލަތުގެ ކޮންމެ މުވައްޒަފަކު ވެސް މަސައްކަތްކުރައްވާ ނަމަ، ހުރިހައި މުވައްޒަފުންނަކީ، ދިވެހިބަހުގެ އެކެޑަމީއިން އުންމީދުކުރައްވާ ފަދަ ހުނަރުވެރި މުވައްޒަފުންނަށް ވާނެއެވެ.

ދާދި ފަހުން ވެސް މި ވަނީ ސަރުކާރުގެ އިދާރާތާކާއި ކުންފުނިތަކުގެ މުވައްޒަފުންނަށް ޚާއްސަކޮށްގެން ދިވެހިބަހާއި ތާރީޚުގެ ކުރު މުއްދަތުގެ ކޯހެއް ދިވެހިބަހުގެ އެކެޑަމީއިން ހިނގަވައިފައެވެ. 2024 ނޮވެންބަރު 17 ވީ އާދިއްތަ ދުވަހުން ފެށިގެން ނޮވެންބަރު 21 ބުރާސްފަތި ދުވަހުގެ (އިއްޔެގެ) ނިޔަލަށް ހިންގެވި މި ކޯހަކީ 10ގަޑިއިރުގެ ތަމްރީނު ޕްރޮގްރާމެކެވެ.

ކޯހަށް އިޢުލާނުކުރެއްވީ ކޮންމެ އިދާރާއަކުން ތިން ބައިވެރިންނަށް ބައިވެރިވެވޭ ގޮތަށް، ޖުމްލަ 100 މުވައްޒަފަކަށް ފުރުސަތު ދޭ ގޮތަށެވެ. ނަމަވެސް ސަރުކާރުގެ އިދާރާތަކާއި ކުންފުނިތަކުން މި ކޯހަށް ދެއްވި ތަރުހީބެއްގެ ބޮޑުކަމުން ދިވެހިބަހުގެ އެކެޑަމީއިން ނިންމެވީ ކޯހުގައި ބައިވެރިވާން އެދުނު ހުރިހައި މުވައްޒަފުންނަށް ފުރުސަތުދޭށެވެ.

މި ކުރު ކޯހުން ހާޞިލުކުރައްވާން އެކެޑަމީއިން ބޭނުންފުޅުވި މަގުސަދަކީ ދިވެހިބަހުގެ ހަމަތަކާއި ގަވާއިދުތަކާއި އުސޫލުތަކާ އެއްގޮތަށް ލިޔެކިޔުންތައް ބެހެއްޓުމާއި އަދަބު އިހުތިރާމާ އެކު މުއާމަލާތުކުރާނެ ގޮތްތައް މުވައްޒަފުންނަށް އޮޅުންފިލުވައިދިނުމާއި ދިވެހިރާއްޖޭގެ ތާރީޚުގެ މުހިންމު ކަންކަމުގެ މައުލޫމާތު ދިނުމެވެ.

އާންމުކޮށް އިޢުލާންކޮށްގެން، މުޅި ރާއްޖެއަށް ހުޅުވައިލައިގެން، ދައުލަތުގެ އިދާރާތަކާއި ކުންފުނިތަކުގެ މުވައްޒަފުންނަށް ޚާއްސަކޮށްގެން ދިވެހިބަހުގެ އެކެޑަމީން ދާދިވަރުކޮށާއި (އޮންލައިންކޮށާއި) ކިލާހަށް ހާޒިރުވެ، ކިޔަވާ އުސޫލުން ހިންގި މި ކޯހުގައި ކިލާހަށް ހާޒިރުވެގެން 20 ބައިވެރިޔަކު، އަދި ދާދިވަރުކޮށް 322 ބައިވެރިން ބައިވެރިވެ ސެޓިފިކެޓް ހާސިލްކޮށްފައިވެއެވެ.

މި ކޯހުގެ ކިލާސްތައް ކުރިއަށް ގެންދެވުނީ ފަސް ދަންފަޅިއަށް ބަހައިލައިގެންކަމަށާއި ކިޔަވައިދެވުނު ބައިތަކުގެ ތެރޭގައި ދިވެހިރާއްޖޭގެ ތާރީޚުގެ މުހިންމު ކަންކަމުގެ މައުލޫމާތާއި، ލަފުޒު ވަކިކޮށް ލިޔުމުގެ ގަވާއިދު އޮޅުންފިލުވައިދިނުމާއި ސުކުނާއި ފިލިތައް އޮޅުންފިލުވައިދިނުމާއި ދިވެހިބަހުގެ ދަރަޖަތައް ބޭނުންކުރާ ގޮތް އޮޅުންފިލުވައިދިނުމާއި ސާފު ރީތި ބަހުން އިބާރާތްކުރާނެ ގޮތް ކިޔައިދީ، މި ބައިތަކަށް ކޯހުގެ ބައިވެރީން އަހުލުވެރިކުރުވައިފައިވާކަމަށް ދިވެހިބަހުގެ އެކެޑަމީއިން ޚަބަރުދެއްވައެވެ.

މި ކޯހުގައި ކިޔަވައިދެއްވީ ދިވެހިރާއްޖޭގައި ތިއްބެވި މި ދާއިރާގެ އެންމެ ޤާބިލު މުދައްރިބުންގެ ތެރޭގައި ހިމެނިވަޑައިގަންނަވާ ޤާބިލު ބޭފުޅުންކަމަށް އެނގިފައިވެއެވެ.