ފަރަގު މީޑިއާ

އިސްލާމީ މަރުކަޒުގެ މުންނާރުގެ ވަށައިގެން ބިންމަތީގައި ވަރަށް ރީތި މަސްފެންގަނޑެއް، އެ މަރުކަޒު ހުޅުވި އިރު އޮތްކަމަށް ވެއެވެ. ނަމަވެސް ދުވަސްކޮޅެއް ފަހުން އެ ފެންގަނޑު އޭގެ އަސްލު ނެތި އޮތީ ވަށައިގެން އޮންނަ ހަތަރެސްކަން ވަޅުގަނޑެއްގެ ގޮތުގައެވެ. ވާރޭ ވެހޭ ދުވަސްވަރު މުންނާރު ދޮވިގެން ފައިބާ ހިރަފުސް ފެންތައް އެ ތަނަށް އެޅި ހަޑިވުން ނޫންކަމެއް ނުވެއެވެ.

ނަމަވެސް މިއަދު އެ ސަރަހައްދު އެ ވަނީ ކުޑަކުދީން ގޮވައިގެން ބަލައިލާން ދާނެ ރީތި ތަނަކަށް ބަދަލުވެފައެވެ. އެ ފެންގަނޑު ޒަމާނީ ފެންވަރަކަށް ހެދުމަށް ފަހު، އިފުތިތާޙުކުރުމަށް ޓަކައި މި އަދު ހެނދުނު 11:15ގައި ބޭއްވި ކުޑަކުޑަ އިޙުތިފާލެއްގައި އެ ތަން ވަނީ ރަސްމީކޮށް އިފްތިތާޙުކޮށްފައެވެ. އަދި އެ ތަންމަރާމާތުކުރާން ޙަވާލުވި ކުންފުނިކަމަށްވާ ސްޓެލްކޯގެ ފަރާތުން ރަސްމީކޮށް އަލުން އެ ތަން އިސްލާމީ ކަންތައްތަކާ ބެހޭ ވުޒާރާއާ ވަނީ ޙަވާލުކުރައްވައިފައެވެ.

މަސްފެންގަނޑު ޙަވާލުކުރެއްވި ރަސްމިއްޔާތުގައި އިސްލާމީ ވަޒީރު ވާހަކަފުޅުދައްކަވަނީ.<br>

އިސްލާމީ މަރުކަޒުގެ މުންނާރުގެ ވަށައިގެން އޮންނަ މަސްފެންގަނޑު މަރާމާތުކުރުމުގެ މަސައްކަތް ސްޓެލްކޯއިން ފެށީ އެ ކުންފނީގެ އިޖުތިމާއީ ޒިންމާގެ ދަށުން މި ދިޔަ މަހުގެ ތެރޭގައެވެ. މި މަސްފެންގަނޑު މަރާމާތުކޮށް ނިންމައި އިސްލާމީ ކަންތައްތަކާ ބެހޭ ވުޒާރާއާ އަލުން ހަވާލުކުރެއްވީ ސްޓެލްކޯގެ މެނޭޖިންގ ޑިރެކްޓަރ އަލްފާޟިލް ޙުސައިން ފަހުމީއެވެ. ވުޒާރާގެ ފަރާތުން ޙަވާލުވެވަޑައިގަތީ ވަޒީރު ޑރ. މުޙަންމަދު ޝަހީމް ޢަލީ ސަޢީދެވެ.

މި ރަސްމިއްޔާތުގައި ވަޒީރު ޑރ. ޝަހީމް ވިދާޅުވީ، ސްޓެލްކޯގެ އިސްނެންގެވުމެއްގެ މަތީން އެ ކުންފުނީގެ އިޖުތިމާއީ ޒިންމާގެ ދަށުން ކުރިއަށް ވުރެ މާރީތިކޮށް ސްޓެލްކޯއިން އެ ފެންގަނޑު ހަދައިފައިވާ ކަމަށެވެ. އަދި އެ ސަރަހައްދަކީ ގިނަ އަދަދެއްގެ ކުޑަ ކުދީންނާއި މީހުން ޖަމާވާ ސަރަހައްދެއްކަމަށްވާތީ، އެ ތަނުގެ ރީތިކަން ދެކި، އެ ހިތްހަމަޖެހުން އެ ފަރާތްތަކުން ލިބިގަންނާނެކަމަށް ޑރ. ޝަހީމް ވަނީ ވިދާޅުވެފައެވެ.

މަސްފެންގަނޑު އިފުތިތާޙުކުރި ރަސްމިއްޔާތުގައި ބައިވެރިވެވަޑައިގަތް ބައެއް ބޭފުޅުން<br>

އެ މަސްފެންގަނޑު ހަލާކުވެފައިވާތާ ވަރަށް ގިނަ ދުވަސްވެފައިވާކަމަށާއި ކުރު މުއްދަތެއްގެ ތެރޭގައި ސްޓެލްކޯއިން އެ ތަން މަރާމާތުކޮށް، އިސްލާމީ މަރުކަޒަށް 40 އަހަރުވުމާ ގުޅިގެން ބާއްވާން ނިންމަވައިފައިވާ ޖަލްސާގެ ކުރީން އެ ތަން އަލުން ޙަވާލުކޮށްދެއްވި ކަމަށްޓަކައި ވެސް ޑރ. ޝަހީމް ވަނީ ޝުކުރުއަދާކުރައްވައިފައެވެ.

މި ޙަފުލާގައި ވާހަކަފުޅުދައްކަވަމުން ސްޓެލްކޯގެ މެނެޖިންގ ޑިރެކްޓަރ އަލްފާޟިލް ޙުސައިން ފަހުމީ ވިދާޅުވީ ސައްތައިންސައްތަ ދިވެހީން މަސައްކަތް ކުރަމުންދާ ސްޓެލްކޯގެ މުވައްޒަފުން، ގައުމީ އަދި ދީނީ ތަރިކަތައް ހަލާކުވެގެންދާ ތަން ބަލާން ބޭނުންނުވާކަމަށެވެ. އެ ތަނުގެ މަރާމާތުގެ މަސައްކަތް މުވައްޒަފުންގެ އެދުމުގެ މަތީން ފެށީ އިސްލާމީ މަރުކަޒުގެ މުންނާރުގެ ރީތިކަން އަނބުރައި ގެނައުމަށް ޓަކައިކަމަށާއި ދިވެހިންގެ ތާރީޚާއި ސަގާފަތާ ގުޅޭ އެ ތަން ރައްކާތެރިކަމާ އެކު ދެމެހެއްޓުމަކީ އެ ބޭފުޅުންގެ އުންމީދެއްކަމަށް ވެސް ފަހުމީ ވަނީ ވިދާޅުވެފައެވެ.

މި މަސައްކަތްކުރުމުގެ ފުރުސަތު ސަރުކާރާއި މިނިސްޓްރީން ދެއްވިކަމަށް ޓަކައްޔާއި އަދި އެހައި ފުރިހަމަކޮށް މަސައްކަތްކޮށް ނިންމައިދިންކަމަށް ޓަކައި އެ އިސްލާމީކަންތައްތަކާ ބެހޭ ވަޒީރަށާއި މަސައްކަތުގައި ބައިވެރިވި ސްޓެލްކޯގެ ހުރިހައި މުވައްޒަފުންނަށް ވެސް ފަހުމީ ވަނީ ޝުކުރުއަދާކުރައްވައިފައެވެ.

މިހާރު އިސްލާމީ މަރުކަޒުގެ މުންނާރުގެ ވަށައިގެންވާ މަސްފެންގަނޑަކީ ހަވީރު ފިންޏަށް ކުޑަކުދީން ގޮވައިގެން ޒިޔާރަތްކޮށްލާން ރަނގަޅު ތަނަކަށް އެ ވަނީ ބަދަލުވެފައެވެ. މި ބައިބޯ މާލޭގައި މީހުން ހިތްހަމަޖައްސައިލައި ހަދައިލާނެ މާ ގިނަ ތަންތަން ނެތް އިރު، މި މަސްފެންގަނޑު މި ހިމެނުނީ މި ކަމަށް ވެސް ކޮންމެވެސް ވަރެއްގެ އެހީތެރިކަމެއް ލިބިދޭނެ ހިތްގައިމު ތަނަކަށެވެ. ވީމާ، މި ހިތްގައިމު މަސްފެންގަނޑު ބައްލަވައިލައްވާން ތިޔަ ބޭފުޅުންގެ ތުއްޕުޅު ބޭފުޅުން ގޮވައިގެން ވަޑައިގަންނަވާނޭކަމާ މެދަކު އަޅުގަނޑުމެން ޝައްކެއް ނުކުރަމެވެ.

___________________________