ޑރ. ޢަބްދުލްޣަފޫރު ޢަބްދުއްރަޙީމް

ދިއްލީގެ މިސްކިތެއްގެ އިމާމަކަށް މުއްލާ ސާހިބަކު އުޅުއްވިއެވެ. މި މިސްކިތުގެ އިމާމުކަމުގެ އިތުރަށް ކޮންމެ ދުވަހަކު ކުދީންނަށް ޤުރުއާން ކިޔަވައިދިނުމަކީ ވެސް އޭނާގެ މަސައްކަތެކެވެ. މި ހުރިހައި ޚިދުމަތްތަކުގެ ބަދަލުގައި އޭނާއަށް ލިބޭ މުސާރައަކީ މަހަކު ފަންސަވީސް ރުފިޔާއާއި، މިސްކިތުގައި ހުންނާނެ ކޮޓަރިއަކާއި ދެ އިރުގެ ކޮއްތެވެ. ޒުވާން މުއްލާ ސާހަބު އޭނާއަށް ލިބޭ ކުޑަކުޑަ މުސާރައަށް ހިތްހަމަ ޖައްސައިލައިގެން އުޅުނެވެ. އޭނާ ޚިޔާލުކުރަނީ "މި މިސްކިތަކީ އަހަރެން ދިރިއުޅޭން އޮތް ތަނެވެ. މި ތަނުގައި އުޅެގެން އަހަރެންގެ ދަރިފުޅުގެ ތައުލީމު ފުރިހަމަ ކޮށްދޭނަމެވެ. އަހަންނަށް ތަނަވަސް ދިރިއުޅުމެއް ނުލިބުނަސް އަހަރެންގެ ދަރިފުޅަށް މުސްތަޤުބަލުގައި ދިރިއުޅުމެއް ހޯދައިދޭނަމެވެ."

ނަމަވެސް މިސްކިތަށް އަންނަ މީސްތަކުން މި އިމާމު މުއްލާ ސާހިބާ މެދު ކަންތައްތައް ކުރަނީ މާ ރަނގަޅު ގޮތަކަށް ނޫނެވެ. މިސްކިތަށް ނަމާދަށް އަންނަ ކޮންމެ މީހަކު މުއްލާޖީ ހަދަނީ އެ މީހެއްގެ ނޯކަރަކަށެވެ. ދާދި ކުދިކުދި ކަންތައްތަކާ ކޮންމެ މީހަކު އޭނައާ ދިމާކޮށްލައެވެ. އެއްޗެތި ގޮވައި ނިކަމެތިކޮށް ހިތައެވެ. ބައެއް މީހުން މިސްކިތުގައި އަޅާ ކުނަލާ ހުރެ، އަނެއްބައި މީހުން ފެންނަގާ ދާންޏާ ހުރެ، އަދި މި ނޫން ވެސް ކިތަންމެކިތަންމެ ކަމަކާ މީހުން އޭނާދެކެ ރުޅިއަރައިގެން އުޅެއެވެ.

އޭނާއަށް ލިބޭ ކުޑަ މުސާރައިގެ ސަބަބުން އޭނާއަށް ކެތްކޮށްލައިގެން ހުރެވިދާނެއެވެ. ނަމަވެސް އޭނާއާ މެދު މިހައި އިހާނެތި ގޮތަކަށް ކަންތައް ކުރުމަކީ ކެތްކުރެވޭ ވަރު ކަމަކަށް ނުވިއެވެ. އެންމެ ފަހުން އޭނާ ނިންމީ އަބަދު މިސްކިތުގައި އުޅޭ ދިރިއުޅުން ދެން އުޅެވޭން ނެތްކަމަށެވެ. އަދި ކީއްހެއްޔެވެ؟ ކޮންމެވެސް އެހެންކަމެއް ހޯދާންވީއެވެ. ނަމަވެސް ކުއްލި ގޮތަކަށް މިސްކިތް ދޫކޮށްލުމަކީ ގޯސްކަމެއްކަމަށް ފެނުނެވެ. އެ ގޮތަކީ މިސްކިތުގެ އިމާމުކަން ދޫކޮށްލައިފި ނަމަ މިސްކިތުން އޭނާއަށް ލިބިފައިހުރި ކޮޓަރިގަނޑު އޭނާގެ އަތުން އަތުލެވޭނެއެވެ. ރަށު ތެރެއިން ތަނަކުން އުޅޭނެ އެހެން ތަންކޮޅެއް ހޯދުމަކީ އޭނާއަށް ވެވޭން ނެތްކަމެކެވެ.

އޭނާ މިސްކިތުގެ އިމާމުކަން ކުރަމުން ރަށުގެ މެޑިކަލް ކޮލެޖަކަށް ވަދެއްޖެއެވެ. ވަރަށް ހިމޭންކަމާ އެކު ސިއްރުން ކަހަލަ ގޮތަކަށް ބޭސްވެރިކަމުގެ ތަޢުލީމު ޙާސިލުކުރާން ފެށިއެވެ. ބޭސްވެރިކަމުގެ ތަޢުލީމު ޙާސިލުކޮށް ފުރިހަމަ ކުރެވުނީ ފަސް އަހަރު ދުވަހުންނެވެ. މި ފަސްއަހަރު ދުވަހުގެ ތެރޭގައި މިސްކިތުގެ މީސްތަކުން މީނާއާ މެދު އަމަލުކުރަމުން ދިޔަ ނުބައި ގޮތްތަކަށް ކެތްތެރިވެ، ރީތި ގޮތަކަށް ކަންތައްތައްކުރަމުން ގެންދިޔައެވެ. މީނާ މިސްކިތުން ވަކިވުމަށް ކާމިޔާބުކުރުމަށް ޓަކައި މި ގޮތަށް ކެތްތެރިވެގެން އުޅުން އޭނާ އިޚްތިޔާރުކުރިއެވެ. ދެރަކަމާއި ނިކަމެތިކަމުގެ ދިރިއުޅުމަކުން ވަކިވެގަތުމަށް ޓަކައި އެތަކެއް އަހަރު ވަންދެން ނިކަމެތި އިހާނެތި ގޮތްތަކަށް ކެތްކޮށްގެން ރީތި އަޚުލާޤަކަށް ކަންތައް ކުރުން ބޭނުންވިއެވެ.

އެންމެ ފަހުން މެޑިކަލް ކޮލެޖުން ޑޮކްޓަރީކަމުގެ ސަނަދު ޙާސިލްވުމުގެ ވަގުތު އަތުވެއްޖެއެވެ. އެ ވަގުތު އައި ހިނދު މިސްކިތުގެ ވެރީންނަށް ޝުކުރުއަދާކޮށް މިސްކިތުގެ އިމާމުކަމުން އިސްތިޢުފާދިނެވެ. އަދި ޓައުން ތެރެއިން ތަނެއް ކުއްޔަށް ހިފައިގެން ބޭސްކޮށްދޭ ތަނެއް ހުޅުވިއެވެ. މީނާގެ ދިރިއުޅުމުގެ ހިތި ތަޖުރިބާތައް، އަދި ދިރިއުޅުމުގެ މުސްތަޤުބަލަށް ޓަކައި މެދުނުކެނޑި ދިގު މުއްދަތަކަށް ކުރާން ޖެހުނު މަސައްކަތްތަކުން އޭނާއަށް ވަރަށް ބޮޑު އެއްޗެއް ދަސްވިއެވެ. މީނާ ހުޅުވި ކްލިނިކްގައި ވަރަށް ހުޝިޔާރުކަމާއި މުރާލިކަމާ އެކު، މަސައްކަތްކުރަމުން ގެންދިޔައެވެ. ހަމައެކަނި ހަމަސް ދުވަސް ފަހުން ގެއެއް ކުއްޔަށް ހިފައިގެން އަނބި ދަރީން ގޮވައިގެން ފަސޭހަކަމާ އެކު ދިރިއުޅެވޭ ވަރަށް އޭނާއަށް އާމްދަނީ ލިބޭންފެށިއެވެ.

އެއް އަހަރުގެ ފަހުން އޭނާއަށް މެޑިކަލް ކޮލެޖުގައި ލެކްޗަރަރެއްގެ މަޤާމް ލިބުނެވެ. މި ގޮތުން އޭނާގެ ދިރިއުޅުން ދުވަހެއް ދުވަހަކަށް ވުރެ ހަރުދަނާވަމުން ދިޔައެވެ. އިއްޔެގެ މުއްލާ ސާހަބު މިހާރުގެ ޑޮކްޓަރު ސާހަބަށް ވެގެން ދިރިއުޅުން ވޭތުކުރާން ފެށިއެވެ. މިހާ ތަނަށް އައި އިރު އޭނާއަށް ވަނީ ޢިއްޒަތްތެރިކަން ވެސް ލިބިފައެވެ. އަދި ދިރިއުޅުމުގެ މާލީ ތަނަވަސްކަން ވެސް ލިބިފައެވެ.

ދިރިއުޅުމުގައި ދިމާވާ އުނދަގޫ ހިތްދަތި ޙާލަތްތަކަކީ ވިސްނުންތެރިކަމާ އެކު، ކަންތައް ކުރެވިއްޖެ ނަމަ ދިރިއުޅުމުގެ އާ ރޮނގުތަކެއް ހޯދިދާނެ ކަމެކެވެ.

_______________________________