ފަރަގު މީޑިއާ

ރާއްޖޭގައި ވުނަދާނަ ބޭންކެއް ޤާއިމުކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މި ބޭންކް މެދުވެރިކޮށް ކުޑަ ފައިދާއެއްގައި ތަރައްޤީގެ މުހިންމު މަޝްރޫއުތަކަށާއި އަމިއްލަ ބޮޑެތި ވުނަތަކަށް ލޯނު ލިބޭނެ މަގު ތަނަވަސްކުރެއްވުމަކީ ސަރުކާރުގެ އަމާޒެކެވެ. މި ކަމަށް ޓަކައި ދިވެހިރާއްޖޭގެ ތަރައްގީގެ ބޭންކެއް މި ދިޔަ އޮގަސްޓުމަހު ރައީސުލްޖުމްހޫރިއްޔާ ރަސްމީކޮށް އުފެއްދެވިއެވެ. މި ބެންކަށް ބޭނުންވާ އިދާރީ ކަންކަން ހަމަޖައްސަވައި މަގާމުތަކަށް ވެރީން ހަމަޖެއްސެވުމަށް ފަހު، މި ބޭންކު އީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ ވަނީ އިފްތިތާޙުކޮށްދެއްވައިފައެވެ. މޯލްޑިވްސް ޑިވެލޮޕްމަންޓް ބޭންކް ލިމިޓެޑްގެ ނަމުގައި މުޅިން އަލަށް ދިވެހިރާއްޖޭގައި ވުނަދާނަ ބޭންކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފެއްދެވީ މިއަހަރުގެ މެއިމަހުގެ 16 ވަނަ ދުވަހުއެވެ. ބޭންކުގެ ބޯޑަށް (ހިންގާ ކޮމެޓީއަށް) ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ތިން މެންބަރުން ވަނީ އޮގަސްޓުމަހުގެ 21 ވަނަ ދުވަހު އައްޔަންކުރައްވައިފައެވެ. އަދި ދުނިޔޭގެ މާލީ ދެ ތަޖުރިބާކާރުންކަމަށްވާ އަރޫނީ ގޫނަތިލަކަ ވަނީ ބޭންކުގެ ޗެއަރޕަރސަންކަމަށް ހަމަޖައްސަވައިފައެވެ. މީގެ އިތުރަށް ނޮއެލް ގްރެގަރ ޕެޓަރސަން-ޖޯންސް ވަނީ ސީއީއޯކަމަށް މި ދިޔަ އޮގަސްޓުމަހުގެ 26 ވަނަ ދުވަހު ޢައްޔަންކުރައްވައިފައެވެ.

އިޤުތިޞާދީ ތަރައްޤީއާއި ވިޔަފާރިއާބެހޭ ވަޒީރު އަލްފާޟިލް މުޙައްމަދު ސަޢީދު ވިދާޅުވެފައިވަނީ ދިވެހިރާއްޖެއާ ބައިނަލްއަޤްވާމީ މާލީ އިދާރާތަކާއި ވުނޭރުންނާ ގުޅިގެން ތަރައްޤީގެ މަޝްރޫއުތަކަށް ބޭނުންވާ ފައިސާ ރާއްޖެއަށް ފަހިކުރުމުގެ ބައިވެރިއަކަށް މޯލްޑިވްސް ޑިވެލޮޕްމެންޓް ބޭންކުވާނޭކަމަށެވެ. ދިވެހިރާއްޖޭގެ ޑިވެލޮޕްމަންޓް ބޭންކަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމުގެ ބޭނުމުގައި އުފެއްދެވި ބޭންކެއްކަމަށް ސަރުކާރުން ވިދާޅުވެއެވެ.

ޑިވެލޮޕްމެންޓް ބޭންކު އޮފް މޯލްޑިވްސް ރަސްމީކޮށް އިފްތިތާޙުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އެ ބޭންކުގެ ސީ.އީ.އޯ ނޮއެލް ގްރެގަރ ޕެޓަރސަން-ޖޯންސް ވިދާޅުވެފައިވަނީ ތަރައްޤީވެފައިވާ ޤައުމަކަށްވުމަށް ރާއްޖެއިންކުރާ ދަތުރުގައި ޑިވެލޮޕްމެންޓް ބޭންކު އޮފް މޯލްޑިވްސް މުހިންމު ދައުރެއް އަދާކުރާނެކަމަށެވެ. އަދި ދިވެހިރާއްޖޭގެ އިޤުތިޞާދު އައު އުސްމިންތަކަކަށް ގެންދިޔުމުގައި އެ ބޭންކުން މުހިންމު ދައުރެއް އަދާކުރާނެ ކަމަށެވެ. ސީއީއޯ ވިދާޅުވީ ރާއްޖެއަށް މާލީ ދަތިތަކާއި ޢިމާރާތްކުރުމުގެ ދާއިރާގައި އިންވެސްޓްމެންޓް މަދުވުންފަދަ ދަތިތައް ދިމާވާކަމަށާއި ރާއްޖޭގެ ދަރަނިވެސް ވަރަށް ބޮޑުކަމަށެވެ. އެހެންނަމަވެސް ޑިވެލޮޕްމެންޓް ބޭންކާ އެކު މާލީ ޙާލަތު ރަނގަޅުކޮށް، މަޝްރޫޢުތަކަށް އިންވެސްޓަރުން ހޯދައިދީ ޢިމާރާތްކުރުމުގެ ދާއިރާ ފުޅާކުރެވޭނެކަމަށް ނޮއެލް ގްރެގަރ ވިދާޅުވިއެވެ.

ޑީބީއެމްގެ ސީއީއޯ ވިދާޅުވީ 2040 ވަނަ އަހަރު އަންނަންވާއިރަށް ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަޞައްވުރަށް ވާޞިލްވުމުގައި ޑީބީއެމްއިން މުހިންމު ދައުރެއް އަދާކުރާނެ ކަމަށެވެ. ދިވެހިރާއްޖޭގެ ޑިވެލޮޕްމަންޓް ބޭންކަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ދަތިތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމުގެ ބޭނުމުގައި އުފެއްދެވި ބޭންކެއްކަމަށް ސަރުކާރުން ވަނީ ހާމަކުރައްވައިފައެވެ.

ވުނަ     ނ.     ފައިދާ ނުވަތަ މަންފާ ނެރުމުގެ ނިޔަތުގައި މާލީ ނުވަތަ ވިޔަފާރީގެ ހަރަކާތަކަށް ޚަރަދުކުރާ ފައިސާ ނުވަތަ މުދަލަކަށް ކުރާ ހޭދަ ނުވަތަ އެ ފަދަ ކަމެއްގައި ވާ ހިއްސާ.

ވުނަދާނަ  ނއ.     ވިޔަފާރިވެރި.

ވުނޭރު    ނ.     ފައިދާ ނުވަތަ މަންފާ ނެރުމުގެ ނިޔަތުގައި މާލީ ނުވަތަ ވިޔަފާރީގެ ހަރަކާތަކަށް ފައިސާ ޚަރަދުކުރާ ނުވަތަ މުދަލަކަށް ހޭދަކުރާ ނުވަތަ އެ ފަދަ ކަމެއްގައި ހިއްސާ ވާ މީހާ.

ތަރައްގީ   ނ.     (1) ތަނެއް ނުވަތަ ކަމެއް ކުރިޔަށްދާދިއުން. (2) ހެޔޮބަދަލުތައް އަންނަ އައުން.