ފަރަގު މީޑިއާ  

ދިވެހިރާއްޖޭގެ އިސްލާމީ ޔުނިވަރސިޓީއާއި ދިވެހިބަހުގެ އެކެޑަމީ ގުޅިގެން އިއްޔެއިން ފެށިގެން  ބާއްވާ "އިޤްރައު އައި.ޔޫއެމް ހައިބްރިޑް ފޮތް މަޢުރަޒަކީ ފޮތްކިޔާން ލޯބިކުރާ މީހުންނަށް ލިބޭ ވަރަށް މުހިންމު ފުރުޞަތެކެވެ.

ތެދުފުޅެކެވެ. ދިވެހިރާއްޖެއަކީ ކިޔުންތެރިކަމަށް ލޯބިކުރާ މީހުން މަދު ގައުމެއްކަން އަޅުގަނޑުމެން ގިނަ މީހުން ގަބޫލުކުރަމުއެވެ. ނަމަވެސް ތަހުޒީބު މުޖުތަމަޢެއް ބިނާކުރާން އަޅުގަނޑުމެން އެދޭ ނަމަ، ފޮތްތެރިކަން ކުރިއަރުވާން އެބަޖެހެއެވެ. އިއްޔެ ހުލުވި ފޮތް މަޢުރަޒަކީ މި ކަމަށް މަގުފަހިކޮށްދޭނެ މަޢުރަޒެއްކަމަށް ވާނެއެވެ. އާދޭހެވެ! އާންމުކޮށް ފޮތް ފިހާރަތަކުން ލިބޭ އަގަށް ވުރެ ހެޔޮ އަގެއްގައި ފޮތް ގަންނާން ލިބުމަކީ ގިނަ ބަޔަކު ފޮތް ގަންނާން ޝައުޤުވެރިވާނޭ ކަމެކެވެ.

މިއީ ރަނގަޅު ފުރުޞަތެކެވެ. ފުރުޞަތުގެ ބޭނުންކޮށްގެން ހެޔޮ އަގުގައި ފޮތް ގަންނާން މި ފުރުޞަތުގެ ބޭނުންކުރަމާ ހިންގަވާށެވެ! އިއްޔެއިން ފެށިގެން މި މަހު 16ވަނަ ދުވަހުގެ ނިޔަލަށް ބާއްވާ ފޮތް މަޢުރަޒުގައި ދިވެހިބަހުގެ އެކެޑަމީގެ ފޮތް ފިހާރައިން ލިބޭން ހުންނަ ކުޑަކުދީންނާ ގުޅޭ ފޮތްތަކާއި، ތާރީޚީ ފޮތްތަކާއި، ބަހާއި އަދަބިއްޔާތުގެ ފޮތްތަކާއި ވާހަކައާއި ނާވިލު ލިބޭން އެބަ ހުއްޓެވެ. މި ފޮތްތަކުގެ ތެރޭގައި "ދިވެހިބަހުގެ ގަވައިދު 1،2،3،4"އާއި "ބަހުގެ ހަމައިގެ އަތްމަތީ ފޮތް"، "ފަހުބަސް"، "ޖަމީލުގެ ޑްރާމާތައް" ފަދަ އެތައް ފޮތެއް ހިމެނެއެވެ. މީގެ އިތުރަށް ދިވެހިރާއްޖޭގެ ރަސްރަސްކަލުންނާ ރަނިރަނިކަނބަލުންގެ ގިނަ މައުލޫމާތުތަކެއް ހިމެނޭ "ދިވެހިރާއްޖޭ ރަހުންނާއި ރަނީން" ދިވެހި  ބަހުންނާއި އިނގިރޭސިބަހުން ލިބޭން އެބަހުއްޓެވެ.

އެކެޑަމީގެ ރައީސް ޑރ. އަޝްރަފް ޢަބްދުއްރަޙީމް ފޮތް މަޢުރަޒެއްގައި (ފައިލް ފޮޓޯ)<br>

ދިވެހިބަހުގެ އެކެޑަމީގެ ފޮތް ފިހާރައިން ލިބޭން ހުރި ހުރިހައި ފޮތެއް މި މައުރަޒުގައި ވިއްކާން ހުރީ، ދިވެހިބަހުގެ އެކެޑަމީން އާންމުކޮށް ފޮތް ވިއްކާ އަގުތަކަށް ވުރެ މާ ހެޔޮ އަގުތަކެއްގައެވެ. ދިވެހިބަހުގެ އެކެޑަމީގެ ފޮތްތަކުގެ އިތުރަށް ދިވެހިރާއްޖޭގެ އިސްލާމީ ޔުނިވަރސިޓީގެ ފޮތްތަކާއި އެކިއެކި އެހެން ފަރާތްތަކުގެ ފޮތްތައް ވެސް މި މައުރަޒުގައި ވިއްކާން އެބަ ހުއްޓެވެ.

މި ފޮތް މައުރަޒު ކުރިއަށްދާނީ މި ހިނގާ ނޮވެންބަރު މަހު 13އިން 16އަށް ކޮންމެ ދުވަހެއްގެ ހެނދުނު 9:00ން މެންދުރު 12:00އަށާއި، މެންދުރުފަހު 14:00ން 18:00އަށްކަމަށާއި އަދި ރޭގަނޑު 20:00ން 22:00އަށް ދިވެހިރާއްޖޭގެ އިސްލާމީ ޔުނިވަރސިޓީގެ މައި މާލަމުގައިކަމަށް ޚަބަރު ލިބިފައި ވެއެވެ.

ވީމާ ފުރުޞަތުގެ ބޭނުންކުރަމާ ހިންގަވާށެވެ! އަގުހެޔޮކޮށް ފޮތްކޮޅެއް ގަނެލައިގެން އަޅުގަނޑުމެންގެ ދަރީންގެ ހިތްތަކުގައި ހިޔުންތެރިކަމުގެ ޝައުޤު އުފެއްދޭތޯ މަސައްކަތްކުރަމާ ހިންގަވާށެވެ!

____________________________________