ފަރަގު މީޑިއާ

އިސްލާމީ ދަޢުވާއާއި އިސްލާމީ ރިސާލަތު އުންމަތަށް ފޯރުކޮށްދިނުމުގައްޔާއި އިމާމުކަމުގެ މަސްއޫލިއްޔަތު އަދާކުރެއްވުމުގައި އިމާމުން އަދާކުރައްވާ ދައުރާއި އިމާމުންގެ މަސައްކަތް ބައްލަވައިލައްވައި އިތުރު ތަމްރީނާއި ތަޖުރިބާދެއްވުމުގެ މަސައްކަތް އިސްލާމީ ކަންތައްތަކާ ބެހޭ ވުޒާރާއިން ވަރަށް ފޯރިއާއެކު ގެންދަވަނީ ކުރައްވަމުންނެވެ. އެނގިވަޑައިގަންނަވާނޭ ފަދައިން އިމާމުންނަށް އިތުރު ތަމްރީނާއި ތަޢުލީމުގެ ފުރުސަތުތައް ހޯއްދަވައިދެއްވުމަކީ ރައީސް ޑރ. މުޙައްމަދު މުޢިއްޒުގެ ސަރުކާރުން ވަރަށް އިސްކަމެއް ދެއްވައިފައިވާކަމެކެވެ.

މި ވަޢުދުފުޅު ފުއްދެވުމަށް ޓަކައި އިސްލާމީ ކަންތައްކާ ބެހޭ ވަޒީރު ގެންދަވަނީ އިސްލާމީ އެކި ގައުމުތަކަށް އިމާމުންނާއި ޚަޠީބުން ފޮނުއްވާން ފައްޓަވައިފައެވެ. މި ގޮތުން އެންމެ ފަހުން ފޮނުއްވި 15 އިމާމުންނާއި ޚަޠީބުން އިންޑޮނޭޝިއާގައި ހަފުތާއެއްހައި ދުވަސް ހޭދަކުރެއްވުމަށް ފަހު، މެލޭޝިއާ މަގުން މިއަދު ވަރަށް ލަސް ވަގުތެއްގައި އޭގެ ތެރެއިން 13 ބޭފުޅުން މާލެ ވަޑައިގަންނަވާނެއެވެ. އެއް ބޭފުޅަކު މެލޭޝިއާގައި އަދި އަނެއް ބޭފުޅަކު އިންޑޮނޭޝިއާގައި ދެ ދުވަހަކު މަޑުކޮށްލައްވާނެއެވެ.

މި ދަތުރާ ބެހޭ ގޮތުން ވާހަކަދައްކަވަމުން، މެހުމާނުންނަށް މެހުމާނުދާރީއަދާކުރުމާއި އިޙުތިރާމުކޮށް ކަމޭ ހިތުމުގައި ވެސް އިންޑޮނޭޝިއާގެ ރައްޔިތުންނާ ފައިހަމަ ކޮށްލެވޭނޭ އެހެން ގައުމެއް އަދި ދިމާވެފައި ނުވާކަމަށް ބައެއް އިމާމުން ވިދާޅުވެފައިވެއެވެ.

އިންދޮނޭޝިއަގައި އިމާމުންނާއި ޚަޠީބުން ފުރިހަމަކުރެއްވި ތަމްރީނުތަކަށް ފަހު ފޮޓޯއަކަށް ހުއްޓިލައްވައިގެން

އިމާމުން މި ފަހަރު އިންޑޮނޭޝިއާއަށް ކުރި ދަތުރުގެ ހުރިހައި އިންތިޒާމުތަކެއް ހަމަޖެއްސީ އަޤުލް އިސްލާމީ މަރުކަޒުގެ ފަރާތުންނެވެ. އެ މުއައްސަސާގެ ފަރާތުން ހިންގާ އެތައް މުއައްސަސާއަކަށް އިމާމުން ދަތުރުފުޅުކުރައްވައި މަޢުލޫމާތު ހޯއްދެވިއެވެ.

މުޙަންމަދިއްޔާ ފައުންޑޭޝަންނަކީ އެ ފައުންޑޭޝަންގެ ފަރާތުން އެތައް ޔުނިވަރސިޓީއަކާއި އެތައް ހޮސްޕިޓަލެއް ހިންގާ ބިޔަ ބޮޑު މުއައްސަސާއެކެވެ. މި ތަންތަނުގެ ޙަރަކާތްތައް ބިނާކޮށްފައި ހުންނަނީ ބޭކާރު ތަކެތި ކިޔަވައިދީގެން އޭ ހޯދައިދިނުމުގެ ބަދަލުގައި ދުނިޔެއާއި އާޚިރަތުގެ ކާމިޔާބީ ހޯދާނެ ގޮތުގެ މައްޗަށް ދަރިވަރުން ބިނާކުރުމުމައްޗަށެވެ.

ތަމްރީނުތައް ފުރިހަމަ ކުރެއްވިކަމުގެ ލިޔުމާއި ހަދިޔާ ޙަވާލުކުރައްވަނީ<br>

ޤުރުއާނާ ބެހޭ މަރުކަރުތަކުގައި ވެސް ތިލާވަތުކުރުމާއި ޙިފުޒުކުރުމުގެ އިތުރަށް ޤުރުއާން ތަދައްބުރުކުރުމާ ބެހޭ ފެކަލްޓީތައް ވެސް ހުރެއެވެ. މި ފަދަ މުގައްރަރުތަކަށް ކިޔަވައިދޭ ގޮތަށް ހަދައިފައި ހުންނަ ބޯޑިންގެ އިސްކޫލުތަކުން ނިމިގެން  ނުކުންނަ ކޮންމެ ދަރިވަރަކީ މީހުންނަށް އިޢޙުތިރާމްކުރާ، ސުލޫކު ރަނގަޅު ކިޔަމަންތެރި ދަރިވަރެކެވެ. ދިރިއުޅުމުގައި ކުރާން ޖެހޭ އެންމެހައި ޢާންމު ކަންކަން އަމިއްލަޔަށް ކުރާން އެނގެއެވެ.

ދިވެހިރާއްޖެއިން ބަލައިގަންނާންޖެހޭ ރަނގަޅު ވަރަށް ގިނަ ކަންތައްތަކެއް އިންޑޮނޭޝިއާއިން ފެންނަކަމަށް އިމާމުން ވިދާޅުވެއެވެ. އިންޑޮނޭޝިއާއަށް މި ފަހަރު އިމާމުންނާއި ޚަޠީބުން ކުރެއްވި ދަތުރަކީ އާދަޔާ ޚިލާފު ގިނަ ތަޖުރިބާއެއް ލިބުނު ދަތުރެއްކަމަށް އެ ދަތުރުގައި ބައިވެރިވެވަޑައިގަތް ބައެއް ޚަޠީބުން ވިދާޅުވިއެވެ.