ފަރަގު މީޑިއާ

އިންޑޮނޭޝިއާގެ އިރުމަތީ ނޫސާ ތުންގާރާ ޕުރޮވިންސުގައި ހުންނަ އަލިފާން ފަރުބަދައެއްކަމަށްވާ ލެވެތޯބީ ލަކީލަކީ އަލިފާން ފަރުބަދަ މި ދިޔަ ބުރާސްފަތި ދުވަހު ގޮވާން ފަށައި އޭގެ ގެއްލުންތައް އެތައް ބަޔަކަށް ފޯރަމުން ދިޔަކަމަށް ވިޔަސް މިހާރު އިންޑޮނޭޝިއާއަށް ވަޑައިގެން އުޅުއްވާ ދިވެހި އިމާމުންނަށް އެ ކަމުގެ އަސަރެއް ނުފޯރައެވެ. އިމާމުންގެ ތެރޭގައި ހިމެނޭ ދެ ބޭފުޅާކާ "ފަރަގު މީޑިއާ"ގެ ފަރާތުން ވާހަކަދައްކައިލުމުން އެ އަލިފާން ފަރުބަދަ ގޮވާކަމުގެ މަޢުލޫމާތު ވެސް ލިބިވަޑައިގެންފައިވާކަމަކަށް ނުވިއެވެ. ހުރިހައި ދިވެހީން ވެސް ތިބީ ގަދަވެ ހެޔޮ ޙާލުގައިކަމަށް ވިދާޅުވިއެވެ.

ނަމަވެސް ގޮވާން ފަށައިފައިވާ އަލިފާންފަރުބަދައިން ނުކުންނަ ދުން 10 ކިލޯމީޓަރު (32 ހާސް އަށް ސަތޭކަ ފޫޓު)ގެ އުހަށް އަރަމުންދާކަމަށް އިންޑޮނީޝިޔާގެ ކަމާ ބެހޭ އިދާރާތަކާ ޙަވާލާދީ ރޮއިޓާރސްއިން ވަނީ ހާމަކޮށްފައެވެ. އެ އަލިފާން ފަރުބަދަ ގޮވާން ފެށުމާ އެކު، ނުރައްކާ އޮތް ސަރަޙައްދުގައިވާ އަވަށްތަކުގައި ދިރިއުޅޭ 16,000އެއްހާ ރައްޔިތުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ވަނީ ފަށައިފައެވެ. ނޮވެންބަރު 8ވަނަ ދުވަހު ވެސް އެ އަލިފާން ފަރުބަދަ ތިން ފަހަރަކު ގޮވައިފައިވާކަމަށާއި އަލިފާން ފަރުބަދައިން އަޅިއާއި ދިޔައި އަލިފާން ފައިބަމުންދާކަމުގައި އެ ޤައުމުގެ އަލިފާން ފަރުބަދަތަކާ ބެހޭ އިދާރާއިން ހާމަކުރިއެވެ. އަދި އަލިފާން ފަރުބަދައާ ކައިރި ސަރަހައްދުތަކުގައި ހުރި އަވަށްތަކުގެ އިމާރާތްތަކަށް ބޮޑެތި ގެއްލުންތަކެއް ލިބެމުންދާކަމަށާއި މިހައި ތަނަށް ވެސް ބޮޑެތި ގެއްލުންތަކެއް ލިބިފައިވާކަމަށް އެ އިދާރާއިން ހާމަކޮށްފައިވެއެވެ.

"ލެވޮތޮބީ ލަކިލަކީ ފަރުބަދައިގެ ހުޅަނގާއި އިރުހުޅަނގުން ދިޔައި އަލިފާނާއި ހޫނު އަޅި އަދިވެސް ދަނީ ފައިބަމުން." އިންޑޮނީޝިޔާގެ އަލިފާންފަރުބަދަތަކާ ބެހޭ އިދާރާގެ ވެރިޔާ އެންޗި މުޙަންމަދު ވަފީދު ވިދާޅުވެފައިވެއެވެ. އެ ކަމާ ގުޅިގެން, އަލިފާން ފަރުބަދައިގެ ވަށައިގެންވާ ނުވަ ކިލޯމީޓަރުގެ ސަރަޙައްދަކީ ނުރައްކާތެރި ސަރަޙައްދެއްގެ ގޮތުގައި އިންޑޮނޭޝިއާ ސަރުކާރުން ވަނީ ކަނޑައަޅައިފައެވެ. މުޙަންމަދު ވަފީދު ވިދާޅުވީ, އެ ސަރަޙައްދުގައި ދިރިއުޅޭ މީހުންރައްކާތެރި ހިސާބުތަކަށް ބަދަލުކުރާން އަދިވެސް މަސައްކަތްކުރައްވަމުން ގެންދަވާކަމަށެވެ.

އަލިފާން ފަރުބަދައިން ފައިބަމުންދާ ދިޔައި އަލިފާނާއި އަޅީގެ ނުރައްކާ އޮތް ސަރަޙައްދުތަކުގައި ދިރިއުޅޭ 10,700އަށްވުރެ ގިނަ މީހުން މިހާތަނަށް ރައްކާތެރި ހިސާބުތަކަށް ބަދަލު ކޮށްފައިވާ ކަން ވާފިދު ހާމަކުރެއްވިއެވެ. އިންޑޮނީޝިޔާގައި ހުންނަ ބޮޑު އަލިފާން ފަރުބަދައެއް ކަމުގައިވާ ލެވޮތޮބީ ލަކި-ލަކީ ގޮވަން ފެށުމާ ގުޅިގެން ރައްކާތެރިކަމުގެ ފިޔަވަޅުތައް ވަނީ އަޅާން ފަށައިފިއެވެ. ހުސްވި ހަފުތާގައި އެ އަލިފާން ފަރުބަދަ ގޮވާންފެށުމާ އެކު ހިނގި ހާދިސާތަކުގައި މިހާތަނަށް ނުވަ މީހުން ވަނީ މަރުވެސްވެފައެވެ. މަރުވެފައި ވަނީ, އަލިފާން ފަރުބަދަ ކައިރީގައި ހުންނަ އަވަށްތަކެއްގައި ދިރިއުޅޭ ބަޔެކެވެ.

ދިވެހިރާއްޖެއިން މިހާރު އިންޑޮނޭޝިއާއަށް ޒިޔާރަތްކުރައްވަމުން ގެންދަވާ އިމާމުންނާއި ޚަޠީބުންގެ ވަފުތަކަށް، މާތް ﷲގެ ރަޙުމަތްފުޅުން، އެ ކަމުގެ އެއްވެސް އަސަރެއް ނުފޯރައެވެ. އެ ބޭފުޅުން އިންޑޮނޭޝިއާގެ އުޚުއްވަތްތެރި ރައްޔިތުންގެ އިޙުތިރާމާއި ލޯބިވެތި މެހުމާނުދާރީގައި އުފަލާއެކު، އެކި ކަމާކެމިތައް ވަރަށް އަވަދިނެތި ފުރިހަމަކުރައްވަމުން އެބަ ގެންދަވައެވެ. މި ހުރިހައި ބޭފުޅުން ވެސް މި ހަފުތާގެ ތެރޭގައި މާލެ ވަޑައިގަންނަވާނެކަމަށް "ފަރަަގު މީޑިއާ"އަށް މަޢުލޫމާތު ލިބިފައިވެއެވެ. (ގިނަ މަޢުލޫމާތު: ރޮއިޓަރސްއިން)