ފަރަގު އެކެޑަމީ

މަގުމަތީގެ އަދަބުތަކާއި ގަވާއިދާއި ގާނޫނަށް ޙުރުމަތްތެރިކޮށް ހިތުމަކީ އިސްލާމީ އަދަބުތަކުގެ ތެރޭގައި ހިމެނޭ ކަންކަމެވެ. މި ކަންކަމަކީ ގޭތެރެއިންނާއި އިސްކޫލުގެ ތަޢުލީމީ ނިޒާމުގެ ތެރެއިން ކޮންމެ މީހެއްގެ ޅަފަތުގައި އެނގޭން ޖެހެނެ މަޢުލޫމާތަކާއި ލިބޭން ޖެހޭނެ ތަރުބިއްޔަތެކެވެ. ނަމަވެސް ކޮންމެ މީހަކު ދިހަ ބާރަ އަހަރު ތަޢުލީމީ ނިޒާމުގެ ތެރެއިން މުޖުތަމަޢަށް ނިކުންނައިރު މި އަދަބާއި ސުލޫކު ދަސްވެފައި ހުންނަ ކަމަކަށް ނުވެއެވެ. އެހެން ކަމުން އާންމު ގޮތެއްގައި މަގު ބޭނުންކުރާ ފަރާތްތައް އެއްގަމު ދަތުރުފަތުރުގެ ގާނޫނާއި ގަވާއިދުތަކަށް އަހުލުވެރިކުރުވުމަށާއި، މަގުމަތީގެ ސަލަމަތާއި ރައްކާތެރިކަން ކަށަވަރުކުރުމަށް ޓަކައި ގިނަ ކަންތައްތަކެއް ކުރައްވާން ފުލުހުންނަށް ޖެހެއެވެ.

މި ކަމަށް ޓަކައި "ފަހިރާސްތާ"ގެ ނަމުގައި ޚާއްޞަ ޕްރޮގްރާމެއް ރާއްޖޭގެ އެކި ރަށްރަށުގައި ދެތެރެދޭތެރެއިން ފުލުހުން ހިންގަވައެވެ. މި ސިލްސިލާ ޕްރޮގުރާމްގެ ތެރެއިން މި ފަހަރުގެ ޙަރަކާތް ހިންގަވައިފައިވަނީ ހައްދުންމަތީގައެވެ.

މި މަހުގެ ތިންވަނަ ދުވަހުން ފެށިގެން ހަތްވަނަ ދުވަހުގެ ނިޔަލަށް މާމެންދުވާއި ކުނަހަންދުވާއި ހިތަދުވާއި ލ. އަތޮޅުގައި ފާލަމުން ގުޅިފައިވާ ސަރަހައްދުގެ ރަށްރަށުގައި ހިންގެވި މި ޕްރޮގްރާމަކީ ފުލުހުންގެ "ޓްރެފިކް ޕޮލިސް އެންޑް ރޯޑް ޕޮލިސް މެނޭޖްމަންޓް"އާއި ލ. އަތޮޅު ޕޮލިސް ގުޅިގެން ހިންގެވި ޕްރޮގްރާމެކެވެ.

މި ރަށްރަށުގައި ވަކިވަކިން ކުރިއަށް ގެންދިޔަ ދަންފަޅިތަކުގެ ތެރެއިން އިސްކޫލު ދަރިވަރުންނަށާއި ބެލެނިވެރީންނާއި އެކިއެކި މުއައްސަސާތަކުގެ މުވައްޒަފުންނަށް މައުލޫމާތު ދެއްވައިފައިވެއެވެ. މި ދެއްވި މަޢުލޫމާތުގެ ތެރޭގައި އެއްގަމު ދަތުރުފަތުރުގެ ގާނޫނަށް އަހުލުވެރިކޮށް މަގުމަތީގެ ސަލަމާތާއި ރައްކާތެރިކަމަށް ކުރެވޭނެ ކަންކަމުގެ މައުލޫމާތު ހިމެނެއެވެ.

އަދި މަގުމަތީގައި ހަރަކާތްތެރިވާ އިރު ތިމާ އާއި އަނެކުންގެ ސަލާމަތަށް ވިސްނައިގެން ހަރަކާތްތެރިވުމަށާއި މަގުމަތީގައި ހިނގާ އެކްސިޑެންޓުތައް މަދުކުރުމާ ގުޅޭ ގޮތުން މައުލޫމާތުދެއްވައިފައިވެއެވެ. އަދި ބައެއް މަގުތަކުގައި އުޅަނދު ދުއްވުމަށް ޓަކައި ތާރުއަޅައިފައި ވީނަމަވެސް ކަނޑައެޅިފައިވާ ސްޕީޑު ލިމިޓަށް ވުރެ ބާރަށް ނުދުއްވުމަށާއި ތިމާ ފަދައިން އަނެކަކީ ނުފަރިތަ މީހަކަށް ވެދާނެކަމަށް ވިސްނައިގެން އުޅަނދު ދުއްވުމަށާއި ހަލިމަގު ފަދަ ބޮޑެތި މަގުތަކުގައި އުޅަނދު ދުއްވާ އިރު ވިސްނާންޖެހޭ ކަންކަމުގެ މައުލޫމާތުވެސް ހިއްސާކޮށްފައިވެއެވެ.

އޭގެ އިތުރުން، މަގުމަތީގެ ސަލާމަތާއި ރައްކާތެރިކަން ދެމެހެއްޓޭނީ އެންމެން ގުޅިގެން މަސައްކަތްކޮށްގެން ކޮންމެ މީހަކު ވެސް އެ މީހެއްގެ ފަރުދީ ޒިންމާ އަދާކޮށްގެން ކަމަށްވާއިރު ތިމާގެ ގާތްމީހުން، ރަހުމަތްތެރިން އަދި ދަރިންނަށް ވެސް މިފަދަ މައުލޫމާތު ހިއްސާކޮށްދިނުމަކީ މުހިންމުކަމެއްގެ ގޮތުގައި ފާހަގަކޮށް، އެކަމުން މުޅި މުޖުތަމައަށް ކުރާނެ ފައިދާތަކާ ގުޅޭގޮތުންވެސް މައުލޫމާތު ހިއްސާކޮށްފައިވެއެވެ.

އަދި މަގުމަތީގެ ސަލާމަތަށްޓަކައި ހެދިފައިވާ ގާނޫނުތަކަށް ބޯލަނބައި ކަފިހި ހުރަސްތައް ހެދިފައިވާ ބޭނުންތައް ހިއްސާކޮށްފައިވެއެވެ. އަދި މަގުމަތީގެ ސަލަމަތާއި ރައްކާތެރިކަމަށްޓަކައި ރަށުތެރޭގައި ވީސީޕީ ޖަހައިގެން ފުލުހުން ކުރަމުންގެންދާ މަސައްކަތްތަކުގެ މައުލޫމާތު ހިއްސާކޮށްފައިވެއެވެ. މަގުމަތިން މީހުންނާ ބައްދަލުކޮށް މަގުމަތީގެ ސަލަމާތާއި ރައްކާތެރިކަމާ ގުޅޭގޮތުން މައުލޫމާތު ހިއްސާކޮށްފައިވާއިރު މިފަދަ މައުލޫމާތުތައް ހިމެނޭ ލިޔުންތައް ވެސް ވަނީ ބައްސަވައިފައެވެ.

ސްކޫލު ދަރިވަރުންނަށް މައުލޫމާތުދިނުމަށް ކުރިއަށް ގެންދިޔަ ސެޝަނުގައި ކޮންމެ ކުއްޖަކުވެސް މަގުމަތީގައި އުޅޭއިރު ސަމާލުކަންދޭންޖެހޭ ކަންކަމާއި، އެކުއްޖެއްގެ ސަލާމަތަށް ކުރެވޭނެ ކަންކަމުގެ މައުލޫމާތުގެ އިތުރުން ޓްރެފިކް ނިޝާންތަކުން ދޭހަވަނީ ކޮންކަމެއްކަން ދަރިވަރުންގެ އުމުރާ ގުޅޭގޮތަށް ހިއްސާކޮށްފައިވެއެވެ. އަދި ޓްރެފިކް މޮނީޓަރުން މަގުމަތީގައި ހަރަކާތްތެރިވާއިރު އަންގާ އެންގުންތަކާ އެއްގޮތަށް އަމަލުކުރުމަށް ދަރިވަރުންނަށް ނަސޭހަތްތެރިވެފައިވެއެވެ.

މި ޕްރޮގްރާމުގެ ތެރެއިން ގިނަ އަދަދެއްގެ ރައްޔިތުންނަށާއި މުއައްސަސާތަކުގެ މުވައްޒަފުންނަށާއި 300އަށް ވުރެ ގިނަ ދަރިވަރުންނަށް މައުލޫމާތުދީފައިވެއެވެ.