ފަރަގު އެކެޑަމީ

އިމާމުންނާއި ޚާޠީބުންނަށް ދުނިޔޭގެ އެކި ގައުމުތަކުން ތަމްރީނާއި ތަޖުރިބާ ހޯއްދަވައިދެއްވުމަށް ޓަކައި އިސްލާމީ ކަންތައްތަކާ ބެހޭ ވުޒާރާއިން ފަހިކުރައްވަމުން ގެންދަވާ ފުރުޞަތުތަކުގެ ތެރެއިން 15 އިމާމަކާއި ޚަޠީބަކު ރޭ 11:20ގައި އިންޑޮނޭޝިޔާއަށް ފުރައިވަޑައިގެންފިއެވެ. މިއީ އިސްލާމީ ކަންތައްތަކާ ބެހޭ ވުޒާރާއިން މި އަހަރު ހޯއްދެވި ވަރަށް ބޮޑު ކާމިޔާބީއެކެވެ.

މި ދަތުރުގައި އެ ބޭފުޅުން މި މަހުގެ 12ވަނަ ދުވަހުގެ ނިޔަލަށް އިންޑޮނޭޝިއާގައި ހޭދަކުރައްވާނެއެވެ. މި ދަތުރުގައި ފުރައިވަޑައިގަންނަވާ އިމާމުންނާއި  ޚަޠީބުންނާ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އިއްޔެ ބައްދަލުރައްވައި ދަތުރުގެ ބޭނުން ހެޔޮ ގޮތުގައި ހިއްޕެވުމަށާއި، ލިބިވަޑައިގަންނަވާ ތަޖުރިބާއާއި ޢިލްމާއި މަޢުލޫމާތުތަކުގެ ބޭނުން ޢަމަލީ މައިދާނުގައި ހިއްޕެވުމަށް ނަސޭހަތްތެރިވެލައްވާފައެވެ. އަދި ރާއްޖެއިން ބޭރުގައި އުޅުއްވާއިރު އިމާމުންގެ ޙައިސއްޔަތު އެނގޭ ފަދަ ގޮތަކަށް ހެދުންކޮޅު ތުރުކުރެއްވުމަށާއި ސުލޫކާއި އަޚުލާޤު ރަނގަޅަށް ބެހެއްޓެވުމަށް އިލްތިމާސްކުރެއްވިއެވެ.

އިންޑޮނޭޝިއާގެ ދަތުރުގެ ބައިވެރީން ފުރައިވަޑައިގަތުމުގެ ކުރީން، ވެލާނާ އިންޓަރނޭޝަނަލް އެއަރޕޯޓުގައި ފޮޓޯއަކަށް ހުއްޓިވަޑައިގެން<br>

މިއަހަރުގެ މިހައި ތަނަށް އިތުރު ތަމްރީނަށް 100 އިމާމުންނާއި ޚަޠީބުން ރާއްޖޭން ބޭރަށް ފޮނުވާފައިވާކަން ފާހަގަކޮށްލެވެއެވެ. އޭގެ ތެރޭގައި ސަޢުދީ ޢަރަބިއްޔާއަށާއި، ބުރޫނާއީއާއި މެލޭޝިޔާއަށް ވެސް އިމާމުން ފޮނުވާފައިވާކަން ފާހަގަކޮށްލެވެއެވެ.

އިމާމުންނަށް އިތުރު ތަމްރީނާއި ތަޢުލީމުގެ ފުރުސަތުތައް ހޯއްދަވައިދެއްވުމަކީ ރައީސް ޑރ. މުޙައްމަދު މުޢިއްޒުގެ ސަރުކާރުން ވަރަށް އިސްކަމެއް ދެއްވާފައިވާކަމެއްކަން ފާހަގަކޮށްލެވެއެވެ. މި ފަދަ ފުރުސަތުތައް ފަހިވުމުގައި އިސްލާމީ ކަންތައްތަކާ ބެހޭ ވަޒީރާއި އިސްލާމީ ދުނިޔެއާ އޮންނަ ގުޅުމުގެ ބަދަހިކަމުންކަން ފާހަގަކޮށްލެވެއެވެ. އިސްލާމީ ކަންއަތކާ ބެހޭ ވަޒީރަކީ އިސްލާމީ ދުނިޔޭގެ އެންމެ ނުފޫޒުގަދަ 500 ޢިލްމުވެރީންގެ ތެރޭގައި ހިމެނިވަޑައިގަންނަވާބޭފުޅެއްކަން ފާހަގަކޮށްލެވެއެވެ.