ފަރަގު އެކެޑަމީ

އެކި ފަހަރު މަތީން ތަކުރާރުކޮށް ދަންނަވައިފައިވާނޭ ފަދައިން ތިލަދުންމަތީ އުތުރުބުރީ އަތޮޅު ކައުންސިލަކީ ވަރަށް ޙަރަކާތްތެރި ކައުނސިލެއްކަމާ މެދަކު ބަހުސްކުރާނެ ޖާގައެއް މިހާރަކު ނެތެވެ. ތިލައުތުރު ރަންތާޖު ޤުރުއާން މުބާރާތް ނިމުމާއެކު ދެން ފެށުނީ މުވައްޒަފުންގެ ޤާބިލިއްޔަތު އިތުރުކުރުމުގެ ތަމްރީނުތަކެކެވެ. އެއާ ވިދިގެން ފެށިގެން މިހާރު ކުރިއަށް އެ ގެންދަނީ ފުޓުސަލް މުބާރާތެކެވެ.

މިއިން ކޮންމެ ޙަރަކާތަކީ އެ ކަމަށް ޓަކައި ބަޔަކު ތަދުބީރުތަކެއްކޮށް ޙަރަކާތްތަކެއް ހިންގައި ޖިސްމާނީ ގޮތުން ވެސް މަސައްކަތްތަކެއް ކުރާންޖެހޭނެ ކަމެއްކަން ކަށަވަރެވެ. މިހާރު ކުރިއަށް އެ ގެންދަވަނީ "ތިލައުތުރު ފުޓުސަލް މުބާރާތް 2024"ގެ ނަމުގައި ކުރިއަށް ގެންދަވާ ކުޅިވަރު މުބާރާތެކެވެ. އެހެންވީމާ ތިލައުތުރު ކައުންސިލުން އިންސާނީ ތަރައްގީގެ ހުރިހައި ދިމާއަކަށް ނަޒަރު ހިންގާކަން އެބަ އެނގެއެވެ. އަޅުގަނޑުމެންނަށް ދެންނެވޭން އޮތީ ތަހުނިޔާއެވެ.

 ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން އެ އަތޮޅު ކެލާގައި ބާއްވާ މި ފުޓުސަލް މުބާރާތް ބާއްވަނީ ދެ ގްރޫޕަކަށް ބަހައިލައިގެންނެވެ. މި މުބާރާތުގައި ހއ. އަތޮޅުގެ 10 ޓީމެއް ބައިވެރިވެފައިވާކަމަށް ޚަބަރު ލިބިފައި ވެއެވެ.

ކެލާ ފުޓްސަލް ދަނޑުގައި އިއްޔެ ހަވީރު ކުޅުނު ގްރޫޕް އޭގެ މެޗުން މޮޅުވީ ބާރަށެވެ. އެއީ އެންމެ ފަހުގެ ޗެމްޕިއަން ވަށަފަރު އަތުން 3-2 ގެ ނަތީޖާއަކުންނެވެ.  މި މެޗުގެ ފުރަތަމަ 45 މިނިޓުގައި ބާރަށުން ލަނޑެއް ޖަހައި ކުރި ހޯދިއެވެ. މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ޝަމާއިލެވެ. ދެވަނަ 45 މިނިޓުގައި ބާރަށުގެ ކެޕްޓަން އަބްދުﷲ މިސްބާހު ވަނީ އެ ޓީމަށް ފުރަތަމަ 45 މިނިޓުގައި ލިބުނު ކާމިޔާބީ ފުޅާކޮށްދީފައެވެ . އޭގެ ފަހުން ވަށަފަރު ޓީމުގެ އަބްދުﷲ ސިނާން ކާމިޔާބުކުރި ލަނޑާއެކު ވަށަފަރުން ފަރަގު ކުޑަކުރިއެވެ.  ނަމަވެސް، އަޙްމަދު ޝަޒީމް ވަނީ ބާރަށަށް އިތުރު ލަނޑެއް ޖަހައިދީފައެވެ. މި މެޗުގައި ވަށަފަރުން ކާމިޔާބުކުރި ދެވަނަ ލަނޑު އެ ޓީމަށް ޖަހައިދިނީ ސާޖިދު ރަޝީދެވެ.

މި މުބާރާތުގައި އިއްޔެ ހަވީރު ގްރޫޕް ބީގައި ހިމެނޭ ތުރާކުނާއި ކެލާ ބައްދަލުކުރި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ކާމިޔާބުނުކުރެވި އެއްވަރުވެގެންނެވެ. އެކަމަކު މި މެޗުގައި ދެ ޓީމަށް ވެސް ވަނީ ލަނޑު ޖަހާނެ ގިނަ ފުރުސަތުތަކެއް ލިބިގެންގޮސްފައެވެ. މީގެ އިތުރަށް ރޭ ކުޅުނު "ގްރޫޕް އޭ"ގެ މެޗުން ފިއްލަދޫ މޮޅުވީ މުރައިދޫން ލަޖެއް ޖަހައިފައި ވަނިކޮށް  ފަހަތުން އަރައި ތިން ލަނޑު ޖަހައި، 3-1 ގެ ނަތީޖާއަކުންނެވެ.  

މި މުބާރާތުގައި ރޭ ކުޅުނު ފަހު މެޗުގައި "ގްރޫޕް ބީ"ގައި ހިމެނޭ އިހަވަންދޫން ވަނީ އުތީމު ބަލިކޮށްފައެވެ. އެއީ ފަހަތުން އަރައި 3-1ގެ ނަތީޖާއަކުންނެވެ.