ޢަޒީޒު ޖަމާލު

ޣައްޒާއަކީ މިއަދު އިންސާނީ ކާރިސާއެއް ކުރިމަތިވެފައިވާ މުޖުތަމަޢެކެވެ. އިސްލާމީ މުޖުތަމަޢާއި މުޅި ދުނިޔޭގެ ލޯތަކުގެ ކުރިމަތީގައި ހިންގަމުން ގެންދިޔަ އަދި މިހާރު ވެސް ހިންގަމުން ގެންދާ ލާއިންސާނީ ޢުދުވާންގެ ސަބަބުންނެވެ.

ޣައްޒާގެ ޞިއްޙީ އިދާރާއިން ޚަބަރުދެއްވައިފައިވާ ގޮތުގައި ފާއިތުވެ ދިޔަ 24 ގަޑިއިރުގެ ތެރޭގައި ވެސް، އިސްރާއީލުން މެދުކެނޑުމެއް ނެތި ދެމުން ގެންދާ ޢުދުވާނުގެ ސަބަބުން ފަލަސްތީނުގެ 33 މީހުން ޝަހީދުވެ 156 މީހުން، ޒަޚަމްވެފައިވެއެވެ.

އިސްރާއީލުގެ ސިފައިން ޚައްޒާއަށް ކާބޯތަކެއްޗާއި އެހެނިހެން އަސާސީ ތަކެތި ވެއްދުމުގެ ފުރުސަތު ހަނިކުރަމުން އެ ކަމަށް ހުރަސްއަޅުމުންދަނީއެވެ. އިސްރާއީލުގެ ބޭނުމަކީ ބާރުގަދަ ހަތިޔާރުން އެ މީހުން ހިތް ފުރޭވަރަށް ފަލަސްތީނުގެ ރައްޔިތުން ޝަހީދު ނުކުރެވޭތީ ރައްޔިތުން ބަނޑަށް ޖައްސައިގެން ބަނޑުހައިހޫނުކަން ޢާންމުކޮށްގެން ފަލަސްތީނުގެ ހުރިހައި ރައްޔިތުން ޝަހީދުކޮށްލުމެވެ.

އިސްރާއީލުގެ އަނިޔާވެރިކަމާއި ޢުދުވާނުގެ ސަބަބުން ޣައްޒާގެ އިންސާނީ ޙާލަތު "ވަރަށް އަވަހަށް ބަނޑުހައިހޫނުކަމަށް ބަދަލުވެ، މުޅި މުޖުތަމަޢު އެކީއެކަށް ބަނޑަށް ޖެހިދާނެ"ކަމަށް ދުނިޔޭގެ ކާނާގެ ޕްރޮގްރާމް (ޑަބްލިޔުއެފްޕީ)އިން އިންޒާރުދެއެވެ.

ފަލަސްތީނުގެ ރެފިއުޖީންނާ ބެހޭ އިދާރާ (އުންރްވާ)އާ ގުޅުން ކަނޑައިލާން އިސްރާއީލުން ނިންމައި، އެ ކަން ރަސްމީކޮށް މިހާރު ވަނީ އދ. އަށް ރަސްމީކޮށް އަންގައިފައެވެ. މި އިދާރާ ބަލައިނުގަންނާން އިސްރާއީލުން ނިންމި ނިންމުމުގެ ހަގީގީ މަގުސަދަކީ ފަލަސްތީނު ރައްޔިތުންނަށް އިންސަނީ އެހީލިބޭނެ މަގުތައް ހުރިހައި ދިމާއަކުން ވެސް ބަންދުކުރުމެވެ. އދ.ގެ މި އިދާރާ އިސްރާއީލުން ގަބޫލުނުކުރާ ނަމަ، އިސްރާއީލުން އުންރްވާއަށް އެއްވެސް އެހީތެރިކަމަކާއި އެއްބާރުލުމެއް ދޭކަށް ނުޖެހޭނެއެވެ. މިއަދުގެ ޙާލަތު އޮތް ގޮތުން އިސްރާއީލުގެ ރުހުމާ ނުލައި ފަލަސްތީނުގެ ސަރަހައްދަށް އެއްވެސް އެއްޗެއް ނުވެއްދޭނެއެވެ. ނަތީޖާއަކަށްވާނީ މިހާރަށް ވުރެ އަވަހަށް ފަލަސްޠީނުގެ މުޅި މުޖުތަމަޢު ބަނޑުހައިހޫނުކަމުގައި ޝަހީދުވެގެންދިޔުމެވެ. އިސްރާއީލުގެ މުޅި މަގުސަދަކީ ވެސް މިއީއެވެ.

ޙައިރާންވާން ޖެހޭކަމަކީ، ފަލަސްޠީނާއި މުޤައްދަސް ޙަރަމްފުޅުތައް ޙިމާޔަތްކުރުމުގެ މަސްއޫލިއްޔަތު އަދާކުރުން އެ ބަޔެއްގެ ކިބައިގައި އޮތް މުސްލިމުންގެ ކުރިމަތީގައި މި އަނިޔާވެރިކަން ހިނގަމުން ދާއިރު، އެ ޢުދުވާނަށް ހުރަސްއަޅައި އެ ތަންތަން ދިފާޢުކުރުމުގެ ބާރު ލިބިފައިވާ ގައުމުތަކުގެ ވެރީން ހިމޭނުން ތިއްބަވާކަމެވެ.

ޣައްޒާގައި އިސްރާއީލުން ހިންގަމުން ގެންދާ ނަސްލުހޭދުގައި އޮކްޓޯބަރ 7، 2023އިން ފެށިގެން މިހާތަނަށް މަދުވެގެން 43،374 ފަލަސްތީނު މީހުން ޝަހީދުވެ 102،261 މީހުން ޒަޚަމްވެފައިވެއެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުން މަރުވެފައިވަނީ ގާތްގަނޑަކަށް 1،139 މީހުންނެވެ އަސީރުންގެ ގޮތުގައި ހިފަހައްޓައިފައިވާނީ އެންމެ 200 ވަރަކަށް މީހުންނެވެ.

ލުބުނާނުގައި އިސްރާއީލުން ޢުދުވާނު ފެށިފަހުން އިސްރާއީލުން ދިން ހަމަލާތަކުގައި މަދުވެގެން 2،897 މީހުން މަރުވެ 13،402 މީހުން ޒަޚަމްވެފައިވާކަމަށް ލުބުނާނުގެ ޞިއްޙަތާ ބެހޭ ވުޒާރާ ވިދާޅުވެފައިވެއެވެ. (މަޢުލޫމާތު: އަލްޖަޒީރާ)

______________________________________