ޢަޒީޒު ޖަމާލު

2024ވަނަ އަހަރުގެ އާންމު އިންތިހާބުގައި ޣާނާގެ ރައްޔިތުން އެބައިމީހުންގެ ރައީސަކަށް އިންތިޚާބުކުރައްވާ ކޮންމެ ބޭފުޅަކާ ގައުމުގެ ރިޔާސަތު [އަމާނާތްތެރިކަމާއި އިޚުލާޞްތެރިކަމާއެކު] ހަވާލުކުރައްވާނެކަމަށް ވައުދުވެވަޑައިގެން ރައީސް ނާނާ އައްޑޯ ޑަންކުވާ އަކުފޯ އަޑޯ ވާހަކަފުޅު ދެއްކެވުމަކީ ޣާނާގެ ރައްޔިތުންނަށް ލިބުނު ވަރަށް ބޮޑު ހިތްހަމަޖެހުމެކެވެ. އަކުފޯ އަޑޯ ވިދާޅުވީ ސުލްހަވެރިކަމާއި އަމާންކަމާ އެކު ވެރިމކަމުގެ އެންމެހައި ކަންކަން ބަދަލުކުރެއްވުމަކީ އެ މަނިކުފާނުގެ ވަޢުދުފުޅެއްކަމަށެވެ.

ނޮވެމްބަރު މަހުގެ ދެވަނަ ދުވަހު ބޭއްވި އަންލޯ ހޮގްބެޗުޓް ޒާ މައުރަޒުގެ ބޮޑު ދަރުބާރުގައި ވާހަކަފުޅުދައްކަވަމުން އަކުފޯ އަޑޯ ވިދާޅުވީ 2024 ޑިސެމްބަރު 7ގައި ބާއްވާ އިންތިޚާބު މިނިވަން، އިންސާފުވެރި، ހާމަކަން ބޮޑު، ސުލްހަވެރި ގޮތެއްގައި ކުރިއަށް ގެންދަވާނެކަމަށް ވެސް ވަޢުދުވެވަޑައިގަތެވެ.

އަދި އެ ދަރުބާރުގައި އަކުފޯ އަޑޯ ދެއްކެވިވާހަކަފުޅު ކުރިއަށް ގެންދަވަމުން، އެ މަނިކުފާނުގެ މުޅި ރިޔާސީ ދައުރުގައި އަންލޯގެ ވެރީންނާއި ޣާނާގެ ރައްޔިތުން އެ މަނިކުފާނަށް ދެއްވި ދެ ގޮތެއް ނުވާ އެއްބާރުލުމާއި، އޭނާއަށް ކުރެއްވި ހެޔޮ ދުޢާއަށް ޓަކައި އެ ހުރިހައި ފަރާތްތަކަށް ވެސް ޝުކުރު އަދާކުރެއްވިއެވެ.

މީގެ އިތުރަށް، އެމަނިކުފާނުގެ ވެރިކަމުގައި މުޅި ގައުމުގައި ސުލްހަ ދަމަހައްޓަވައިފައިވާތީ ޣާނާގެ ހުރިހާ ރައްޔިތުންނަށް ވެސް ހިތުގެ އަޑީން ޝުކުރުއަދާކުރެއްވިއެވެ.

އަޅުގަނޑުމެން އެންމެންނަށްވެސް އެނގޭ ފަދައިން، ސުލްހަ ނެތި، އެކަށީގެންވާ ތަރައްޤީއެއް ނުލިބޭނެ. އަޅުގަނޑުމެންނަށް މިހާރު މި ލިބެމުންދާ ހަމަޖެހުމަކީ، ޑިސެމްބަރު މަހު ހަތްވަނަ ދުވަހުގެ އިންތިޚާބަށް އަޅުގަނޑުމެން ގެންދާނެ ހަމަޖެހުމެއް."

"އަޅުގަނޑު އަންލޯގެ ރައްޔިތުންނާއި ވޯލްޓާ ސަރަހައްދުގެ ރައްޔިތުންނާއި ޣާނާގެ ރައްޔިތުންނަށް ޔަގީންކަން ދޭން ބޭނުންވަނީ، އިންތިޚާބު، ޑިސެމްބަރު މަހު ބާއްވާ އިންތިޚާބަކީ މިނިވަން، އިންސާފުވެރި، ހާމަކަން ބޮޑު، ސުލްހަވެރި އިންތިޚާބަކަށް ވާނެ ކަމަށް."

"އަދި ޑިސެމްބަރު މަހު ހަތްވަނަ ދުވަހު އަޅުގަނޑުގެ ފަހަށް ޣާނާގެ ރައްޔިތުން އިޚުތިޔާރުކުރާ ކޮންމެ މީހަކަށް ޤައުމީ ލީޑަޝިޕްގެ ދަނޑި ޙަވާލުކުރާނަން."

ރައީސް އަކުފޯ އަޑޯގެ މި ތަގުރީރު އަޑުއެހުމަށް ފަހު ރައްޔިތަކު ކުރި ކޮމެންތެއްގައި ބުނެފައިވަނީ މި ވަޢުދު ނުވަތަ އިޢުލާން މީގެ ކުރީން ވެސް އަޑުއަހައިފައި ވީނަމަވެސް، ސުޕްރީމް ކޯޓާއި އިންތިޚާބާ ބެހޭ އޮފީހުގައި ޤާނޫނު އަސާސީއާ ޚިލާފު ކަންކަން ހިނގާކަމަށެވެ. އަދި މުޖުތަމައުގައި ކުށްތައް ގިނަވެ، ޣާނާގެ ސަލާމަތަށް ނުރައްކާ ވެފައިވާކަމަށެވެ. މިއީ ޣާނާގައި ހުންނަ އެމެރިކާގެ އެމްބަސީއިން އެ ގައުމުގެ ޑިމޮކްރަސީ ރައްކާތެރިކޮށް، އިންތިޚާބީ އެއްވެސް ހަމަނުޖެހުމެއް ހިނގިޔަ ނުދިނުމަށް ޓަކައި ކުރާ މަސައްކަތުގައި ވިސާގެ ޝަރުތުތައް ހަރުކަށިކޮށްފައިވާ އެއް ސަބަބުކަމަށް ވެސް އޭނާ ބުނެފައި ވެއެވެ. އޭނާ ބުނި ގޮތުގައި ރައިސް އަކުފޯ އަޑޯ ވެވަޑައިގަތް ވަޢުދު، ޣާނާގެ ރައްޔިތުން ގަބޫލުކުރާނީ މިނިވަން އިންސާފުވެރި އިންތިޚާބެއް ކަށަވަރުކޮށްދީ، އެއްވެސް ނުފޫޒެއް ޚުދުމުޚުތާރުކަމެއް ނެތި އިންތިޚާބު ބާއްވައި ނިމުނީމައެވެ.