ފަރަގު މީޑިއާ

ނަސްރުގެ ދުވަހުގެ މުނާސަބަތުގައި ރޭ ދަރުބާރުގޭ ރަންނަބަނޑޭރި މާލަމުގައި ބޭއްވެވި ރަސްމީ ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙަންމަދު މުޢިއްޒު ސިފައިންނާއި ފުލުހުން އިތުރުކުރުމަށް ޤައުމީ ޚިދުމަތުގެ ޕްރޮގްރާމެއް ސްކޫލް ނިމޭ ދަރިވަރުންނަށް އަމާޒުކޮށް ހިންގެވުމަށް ނިންމަވާފައިވާކަމަށް ވިދާޅުވިއެވެ. އެ މަނިކުފާނު މިހެން ވިދާޅުވެފައިވާ އިރު، ރާއްޖޭގެ މިނިވަންކަމާއި ސިޔާދަތު ދެމެހެއްޓެވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވަނީ ހަރުދަނާ ސިޔާސަތުތަކެއްކަމަށް ހަމަ އެ ޖަލްސާގައި ކުރީގެ ރައީސް އަލްއުސްތާޒު މައުމޫން އަބްދުލްޤައްޔޫމް ވަނީ ވިދާޅުވެފައެވެ. މިއީ ރައީސުލްޖުމްހޫރިއްޔާ ޑރ. މުޙަންމަދު މުޢިއްޒު ރާއްޖޭގެ މިނިވަންކަމާއި އިސްތިޤުލާލާއި ސިޔާދަތު ޙިމާޔަތްކުރައްވާން ގެންގުޅުއްވާ ސިޔާސަތަށް ލިބިވަޑައިގަތް ވަރަށް ބޮޑު ތާއީދެއްކަމަށް މުޙައްލިލުން ލަފާކުރައްވައެވެ.

ނަސްރުގެ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ރަސްމީ ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ އެމަނިކުފާނު ކޮންމެ ދުވަހެއްވެސް ހޭދަކުރައްވަނީ ޤައުމުގެ މިނިވަންކަމުގެ ހިމާޔާތުގައިކަމަށެވެ. އަދި އެ މަގުން މަސައްކަތްކުރައްވާ އިރު، އަސްކަރީ އަދި ދިފާޢީ ބާރު އިތުރުކުރެއްވުމަށް ޓަކައި ގިނަގުން މަސައްކަތްޕުޅުތަކެއް ކުރައްވަމުން ގެންދަވާކަމަށް ވެސް އެ މަނިކުފާނު ވަނީ ވިދާޅުވެފައެވެ. އެ މަނިކުފާނު ރޭ ވެސް ވަޢުދުވެވަޑައިގަތީ އަސްކަރީ އަދި ދިފާޢީ ބާރު ވަރުގަދަކުރެއްވުމަށް ޓަކައި ކުރައްވާ މަސައްކަތްޕުޅުގައި ޒަމާނާ އެއްގޮތަށް މުހިންމު ފެންވަރަކަށް [އެ ޚިދުމަތް] ތަރައްޤީކުރައްވާނެކަމަށެވެ. ކޯސްޓް ގާޑުގެ ވަރުގަދަކުރުމަށް ސްޕެޝަލް ސްކޮޑްރަންއެއް ފެށިފައި ވާކަމަށާއި، ކޯސްޓްގާޑު ޑަބަލްކުރުމުގެ ޕްރޮގްރާމްގެ ތެރެއިން ދެ ގުނައަށް އެ އަރުމާދު ބޮޑުކުރެއްވުމުގެ މަސައްކަތްޕުޅު ވެސް ވަނީ ފެށިފައިކަމަށް ވެސް އެ މަނިކުފާނު ވަނީ ވިދާޅުވެފައެވެ. ރައީސުލްޖުމްހޫރިއްޔާ ވިދާޅުވީ ސިފައިންގެ [ޚިދުމަތް] އިތުރަށް ތަރައްޤީކުރެއްވުމަށް ޓަކައި، ސިފައިންގެއަށް ވަންނަ މީހުންގެ އަދަދު ވެސް އިތުރުކުރަންޖެހޭކަމަށެވެ. އަދި ސަރުކާރުން ބޭނުންފުޅުވަނީ ކޮންމެ އަހަރަކު ވެސް އިތުރު 1000 ސިފައިން ސިފައިންގެ ޚިދުމަތަށް އަލަށް ނެރުއްވާން ކަމަށެވެ.

ރައީސުލްޖުމްހޫރިއްޔާ ވިދާޅުވީ ސިފައިންނާއި ފުލުހުންގެ ޚިދުމަތަށް ބޭނުންވާ މީހުން ތަމްރީންކުރެއްވުމަށް ޓަކައި އިސްކޫލް ނިމޭ ދަރިވަރުންގެ ތެރެއިން ވަޒީފާއެއް ނުލިބި ނުވަތަ މަތީ ތައުލީމުގެ ފުރުސަތު ނުލިބޭ ކުދީންގެ އަދަދު ދެ ހާހުން މަތީގައި އުޅޭ އިރު، އެ ފަދަ ކުދީންނަށް އަމާޒުކުރައްވައިގެން ޤައުމީ ޚިދުމަތުގެ ޕްރޮގްރާމެއް 2025ގައި ފައްޓަވާން ނިންމަވައިފައިވާކަމަށެވެ. ރައީސުލްޖުމްހޫރިއްޔާ ވިދާޅުވީ ޤައުމީ ޚިދުމަތުގެ ޕްރޮގްރާމްގައި އުމުރުން 16 އަހަރު ފުރިފައިވާ ކުދީންނަށް ބައިވެރިވެވޭނެކަމަށާއި، އެކަމަށް ޓަކައި ޤާނޫނެއް ވެސް އެކުލަވައިލައްވާނެކަމަށެވެ. އަދި އެ ޕްރޮގްރާމް ހިންގެވުމަށް ޓަކައި އަންނަ އަހަރުގެ ބަޖެޓުގައި ވެސް 400 މިލިއަން ރުފިޔާ ހިމަނުއްވައިފައިވާކަމަށާއި، ކުރިއަށް އޮތްތަނުގައި ކޮންމެ އަހަރަކުވެސް އެ ޕްރޮގްރާމަށް 400 މިލިއަން ރުފިޔާ ބަޖެޓްކުރައްވާނެކަމަށް ވެސް ރައީސުލްޖުމްހޫރިއްޔާ ރެ ވަނީ ވިދާޅުވެފައެވެ. ރައީސުލްޖުމްހޫރިއްޔާ ވިދާޅުވީ ޤައުމީ ޚިދުމަތުގެ އެ ޕްރޮގްރާމްގެ ސަބަބުން ސިފައިންގެއަށް 4000 މީހުން އަދި ފުލުހުންގެ ޚިދުމަތަށް ވެސް 1000 މީހުން ކޮންމެ އަހަރަކު އަލަށް ގުޅޭނެކަމަށެވެ.

ނަސްރުގެ ދުވަހުގެ މުނާސަބަތުގައި ރޭ ބޭއްވި ޚާއްޞަ ޖަލްސާގައި 1988 ވަނަ އަހަރު ރާއްޖެއަށް ދިން އުދުވާނީ ހަމަލާއިން ނަސްރު ހޯދުމުގައި ފާހަގަކޮށްލެވޭފަދަ މަސައްކަތްތަކެއްކޮށްދެއްވި ކުރީގެ ޗީފް އޮފް ޑިފެންސް ފޯސް، މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް ނިޝާން ޢަސްކަރީގެ ވެރިކަމުގެ އިއްޒަތް ވަނީ އަރުވައިފިއެވެ.

ނިޝާން އަސްކަރީގެ ވެރިކަމުގެ ޢިއްޒަތް، މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އެރުވުމަށް ރައީސުލްޖުމްހޫރިއްޔާ ކަނޑައެޅުއްވީ، ދިވެހި ޤައުމާއި ރައްޔިތުންގެ ސަލާމަތަށް ޓަކައި އަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށް ޓަކައި ކޮށްދެއްވި މަސައްކަތްޕުޅުތަކާއި، ޚާއްޞަކޮށް، 1988 ނޮވެންބަރު މަހުގެ ތިންވަނަ ދުވަހު ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.

ރޭގެ ޖަލްސާގައި ރާއްޖޭގެ ދިފާޢާ ބެހޭ ވަޒީރު މުޙަންމަދު ޣައްސާން މައުމޫން ވިދާޅުވީ ދިވެހި އަސްކަރިއްޔާ ދެމި އޮތްހައި ހިނދަކު މި ރާއްޖޭގެ މިނިވަންކަމާ ސިޔާދަތާ އިސްތިޤްލާލު ޙިމާޔަތްކުރައްވާނެކަމަށެވެ.

"ދިވެހި ރައްޔިތުންނަށް މިރޭ އަޅުގަނޑު ދޭ ޔަގީންކަމަކީ ދިވެހި އަސްކަރިއްޔާ ދެމިއޮތްހާ ހިނދަކު މި ރާއްޖޭގެ މިނިވަންކަމާ ސިޔާދަތާ އިސްތިޤްލާލު ޙިމާޔަތްކުރުމަށް، ސިފައިންގެ ހުވާގައި ވާގޮތަށް ލެޔާ ފުރާނައިން ޤުރުބާންވާނެކަމުގެ ޔަގީންކަން." އެ މަނިކުފާނު ވިދާޅުވިއެވެ.