ފަރަގު ޓީމު

ތިލަދުންމަތީ އުތުރުބުރީ އަތޮޅު ކައުންސިލަކީ ވަރަށް ޙަރަކާތްތެރި ކައުންސިލެކެވެ. އެ ކައުންސިލާއި އަތޮޅުގެ ހުރހައި ކައުންސިލްތަކެއްގެ މުވައްޒިފުންގެ ޤާބިލިއްޔަތު އިތުރުކުރެއްވުމަށް ޓަކައު ގިނަ މަސައްކަތްތަކެއް އަބަދުވެސް އެ ކައުންސިލުން ކުރައްވާކަން ވަނީ ފާހަގަކުރެވިފައެވެ.

ދާދި ފަހުން ވެސް ވަނީ  މި ފަދަ ޕްރޮގްރާމެއް ސިވިލް ސަރވިސް ކޮމިޝަނާއި އެ ކައުންސިލާ ގުޅިގެން ހިންގަވއިފައެވެ. މި ދިޔަ އޮކްޓޫބަރު މަހު 30ން ނޮވެންބަރުމަހު 02 ވަނަ ދުވަހުގެ ނިޔަލަށް ހއ. އަތޮޅު ކައުންސިލްގައި ބެއްވި މި ތައްމަރީނު ޕްރޮގްރާމް އިއްޔެ ވަނީ ނިންމައިލައްވައިފައެވެ. މި ޕްރޮގްރާމް އަމާޒުކުރައްވައިފައި ވަނީ ހއ. އަތޮޅުގެ ރަށު ކައުންސިލްތަކުގެ ސިވިލް ސަރވިސް މުވައްޒަފުންނާއި ދިއްދޫ މުއައްސަސާތަކުގެ މުވައްޒަފުންނަށެވެ. މުވައްޒަފުންގެ ޤާބިލިއްޔަތު އިތުރުކުރުމަށް ޓަކައި ހިންގެވި މި ޕްރޮގްރާމްގެ ނިމުން ފާހަގަކުރެއްވުމުގެ ގޮތުން އިއްޔެ ވަނީ ޚާއްޞަ ރަސްމިއްޔާތެއް ވެސް ބާއްވަވައިފައެވެ.  

ހަތަރު ދުވަހުގެ މުއްދަތަށް ހިންގެވި މި ތަމްރީނު ޕްރޮގްރާމްގައި ހއ. އަތޮޅުގެ ރަށު ކައުންސިލްތަކުން 21 މުވައްޒަފަކު ބައިވެރިވެފައިވެއެވެ. އަދި ދިއްދޫގައި ހުރި ދައުލަތުގެ އެކި މުއައްސަސާތަކުންނާއި އަތޮޅު ކައުންސިލްގެ މުވައްޒަފުންނާ އެކު ޖުމްލަ 43 މުވައްޒަފަކު މި ތަމްރީނު ޕްރޮގްރާމުގައި ބައިވެރިވެފައިވެއެވެ.

މި ތަމްރީނު ޕްރޮގްރާމް ހިންގަވައިދެއްވީ ސިވިލް ސަރވިސް ކޮމިޝަންގެ ސީނިއަރ ޓްރެއިނިން އެންޑް ޑިވެލޮޕްމަންޓް އެގްޒެކްޓިވް އިބްރާހިމް ރަޝީދެވެ.

ހއ. އަތޮޅު ކައުންސިލްގެ ޖަލްސާކުރާ މާލަމުގައި ބޭއްވި ތަމްރީމު ޕްރޮގްރާމްގެ ނިމުން ފާހަގަކުރެއްވުމުގެ ގޮތުންނާއި ބައިވެރީންނަށް ހަނދާނީ ލިޔުން ދެއްވުމަށް ޓަކައި އިއްޔެ ހއ. އަތޮޅު ކައުންސިލުގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ހއ. ދިއްދޫ މެޖިސްޓްރޭޓް ކޯޓުގެ ޗީފް އެޑްމިނިސްޓްރޭޓަރ އަލްއުސްތާޛް މުޙައްމަދު ޢަތީޤެވެ.