ފަރަގު މީޑިއާ

ހުޅުމާލޭ ދެވަނަ ފިޔަވަހީގައި 5000 އަކަފޫޓުގެ ބިމެއްގައި ސަރުކާރުން ގާއިމްކުރައްވައިފައިވާ ބުޅާ ހިޔާވަހި މާދަމާ ހުޅުވައިގެން ބުޅަލަށް ޚާއްޞަ އަޅައިލުމާއި އޯގާވެރިކަމެއް ދެއްވައިގެން ބަލަހައްޓަވާން ނިންމެވިކަމީ ވަރަށް ގިނަ ކަންކަމަށް ޙައްލު އަންނާނެ ކަމެކެވެ. ހަމަ ގައމު ވެސް މާލޭގައި ފެންބޮޑުވާ ކޮންމެ ފަހަރަކު ބުޅަލުގެ ނަޖިހުގެ ތެރޭގައި އުޅޭކަށް ދެން ނުޖެހޭނެތާއެވެ. މިއީ ޖަނަވާރުންނަށް، ޚާއްޞަކޮށް ބުޅަލަށް ލޯބިކުރާ ފަރާތްތަކަށް އުފާވެރި ޚަބަރަކަށް ވާނެއެވެ. މިއީ މާލޭ ސިޓީ ކައުންސިލަށް ސަރުކާރުން އެއްބާރުލެއްވުން ދެއްވައި ކައުންސިލާއި ސަރުކާރާ ގުޅިގެން ކުރެވުނު މަސައްކަތެއްގެ ނަތީޖާއެވެ. މި ފުރުޞަތުގައި ޖަނަވާރުންނާ ބެހޭ ވަޒީރަށާއި މާލޭ ކައުންސިލްގެ މޭޔަރާއި މެންބަރުންނަށާއި ރައީސުލްޖުމްހޫރިއްޔާއަށް ތަހުނިޔާ އަރިސްކުރަމެވެ.

މާލެ ސިޓީގައި ބުޅާ ގިނަވެ، ނުބެލެހެއްޓި، ޢާއްމު ދިރިއުޅުމަށް އުނދަގޫވާވަރަށް އެކަން ދިޔައިރުވެސް މާލެ ސިޓީ ކައުންސިލްގެ ފުރަތަމަ ތިން ދައުރުގައި ވެސް އެ ކަމަށް ސަމާލުކަން ދެއްވައިފައެއް ނުވެއެވެ. މިހާރުގެ  ރައީސުލްޖުމްހޫރިއްޔާ ޑރ. މުޢިއްޒު މާލޭ މޭޔަރުކަމަށް 2021ވަނަ އަހަރު ކުރެއްވި ކެމްޕޭނުގައި، ރައްޔިތުންގެ ކަންބޮޑުވުމެއްގެ ގޮތުގައި، އަދި ޙައްލު ނުކުރެވި ދިގުލައިފައިވާ މި މައްސަލަ ޙައްލުކުރައްވާން މަސައްކަތް ފައްޓަވާނެކަމަށް ވިދާޅުވިއެވެ. މޭޔަރުކަމާ ޙަވާލުވެ ވަޑައިގަތުމާއެކު، ޑރ. މުޢިއްޒު ވަނީ، މާލޭ ސިޓީގައި ގިނަވަމުންދާ ބުޅާތައް ވަކީން ރަނގަޅަށް ބެލެހެއްޓޭނެ ގޮތަށް ހަމަޖެއްސެވުމަށް ޓަކައި، ބުޅަލަށް ހިޔާވައްސެއް ޤާއިމްކުރާނެ ބިމެއް ހަމަޖައްސަވައިދެއްވުމަށް 2021ވަނަ އަހަރު ސަރުކާރުގައި އެދިވަޑައިގެންފައެވެ. ނަމަވެސް އޭރުގެ ސަރުކާރުން އެ ކަމަށް އެއްވެސް އެއްބާރުލެއްވުމެއް ނުދެއްވިކަމަށް އެނގިފައި ވެއެވެ. އަދި މާލޭގެ އެއްވެސް ސަރަޙައްދަކުން ބުޅަލުގެ ހިޔާވަހިކަމަށް ޚާއްޞަ ބިމެއް ހަމަޖައްސައެއް ނުދެއްވިކަމަށް ވެއެވެ. ސަރުކާރުގެ އެއްބާރުލެއްވުން ނުލިބި މި ކަން ދިގުލައި ދާން ފެށުމުން، އޭރު މޭޔަރަކަށް ހުންނެވި ޑރ. މުޢިއްޒު މި ކަން ޙައްލުކުރެވޭނެ މަގެއް ފެނޭތޯ، ބޮޑުތަކުރުފާނުމަގު، މަސްވެރީންގެ ޕާކު އޮތް ސަރަޙައްދުން އެ ކަމަށް ޖާގައެއް ޚާއްޞަ ކުރެއްވޭތޯ ވެސް 2023ވަނަ އަހަރު މަސައްކަތްޕުޅުކުރެއްވިއެވެ. 2023 ނޮވެމްބަރ 17ގައި، ރާއްޖޭގެ ރައީސުލްޖުމްހޫރިއްޔާކަމާ ޙަވާލުވެވަޑައިގެން، ދިރޭތަކެއްޗަށް އޯގާތެރިވެ ބެލެހެއްޓުމަށް ޓަކައި ވަކި ވުޒާރާއެއް ޚާއްޞަކުރެއްވިއެވެ. ދަނޑުވެރިކަމާއި ދިރޭތަކެއްޗަށް އެހީވާ ވުޒާރާއެވެ.

އަދި ހަމަ މި ފަދައިން މާލޭގައި އެންމެ އިސްކަން ދެއްވައިގެން ޙައްލު ހޯއްދަވާ، އެއް ކަމެއްގެ ގޮތުގައި، ބުޅަލުގެ ހިޔާވަހި ބިނާކުރުން ހިމަނުއްވައި، ހުޅުމާލޭ ދެވަނަ ފިޔަވަހީން އެ ކަމަށް ޚާއްޞަ ބިމެއް ސަރުކާރުން ހަމަޖެއްސެވިއެވެ. ބުޅަލުގެ ހިޔާވައްސަށް ބޭނުންވާ ބިން ހަމަޖެއްސުމަށް ފަހު، ކަމާ ބެހޭ ވުޒާރާއާއި މާލޭ ސިޓީ ކައުންސިލް ގުޅިގެން ބުޅަލުގެ ހިޔާވަހި ގާއިމުކުރެވޭނެ މާލީ އެހީއާ ވަސީލަތްތައް ސަރުކާރުން ހަމަޖައްސަވައިދެއްވިއެވެ.

ކޮންމެއަކަސް މާލޭގައި އެތައް އަހަރެއް ވަންދެން ރައްޔިތުންނަށް ކަންބޮޑުވުމަކަށް ވެފައި އޮތް، ބުޅާ ގިނަވުމުގެ މި މައްސަލަ  މި އަދު މި ހުޅުވޭ ބުޅަލުގެ ހިޔާވަހީގެ ސަބަބުން ކުރިއަށް އޮތް ދެތިންމަހެއްގެ ތެރޭގައި ޙައްލު ކުރެވޭނެކަމަށް ލަފާކުރެވެއެވެ. މިއީ ސަރުކާރާއި މާލޭ ސިޓީ ކައުންސިލް ގުޅިގެން ނިންމައިފައިވާ ވަރަށް ރަނގަޅު ނިންމުމެވެ. މީފެ ފަހުން އިރާދަކުރެއްވިއްޔާ މާލޭގެ މަގުތައް ހަޑިވެ ނަޖިސްވުން ކުޑަވާނެއެވެ. އަދި އޯގާތެރިކަމާއި އަޅައިލުމާ އެކު ބުޅާ ބެލެހެއްޓުން ވެސް އިންތިޒާމު ކުރެވޭނެއެވެ.  ބުޅަލުގެ ހިޔާވަހީގައި އޯގާތެރިކަމާއެކު ބުޅާ ބަލަހައްޓައި، ކާންބޯންދީ، ބޭސްފަރުވާ ކުރެވޭނެ އިންތިޒާމާއި، އެ ކަމަށް ޚާއްޞަ ތަމްރީނު ލިބިފައިވާ މީހުންނާއި، ޑޮކްޓަރުން ވެސް ތިބޭނެއެވެ.

ނިންމައިލަމުން ވެސް ރައީސުލްޖުމްހޫރިއްޔާއަށާއި ޖަނަވާރުންނާ ބެހޭ ވަޒީރަށާއި މާލޭ ކައުންސިލްގެ މޭޔަރާއި މެންބަރުންނަށާއި   ތަހުނިޔާ އަރިސްކުރަމެވެ. އުންމީދުކުރެވެނީ ދިވެހި ރައްޔިތުންގެ ތެރެއިން ގެދޮރުވެރިކަން މުހުތާދުވާ އެންމެންނަށް ހިޔާވަހިކަން ހޯއްދަވައިދެއްވާން ސަރުކާރން ކުރައްވާ މަސައްކަތްޕުޅުގެ ސަބަބުން ދިވެހިރައްޔިތުންނަށް ވެސް ކައިރި ކުރިމަގެއްގައި ދާއިމީ ހިޔާވަކިކަމެއް ލިބޭނެ މަގު މާތް ﷲ ފަހިކޮށްދެއްވާނެކަމަށެވެ.