ނާޒިމާ ސަމީރު

މުރަނގަފަތަކީ ހަށިގަނޑަށް އެތައް ގިނަ ފައިދާ ތަކެއް ލިބޭ އެއްޗެކެވެ. ތަފާތު ގިނަ ދިރާސާތަކާއި ޑޮކްޓަރުންގެ ބުނުންތަކުން މުރަނގަފަތަކީ އެކި ގޮތްގޮތުން ހަށިގަނޑަށް ފައިދާހުރި ފަތެއްކަން އަހަރެމެންގެ ތެރެއިން ގިނަ މީހުނަށް އެނގެއެވެ. ނަމަވެސް އެ ފައިދާ ހަށިގަނޑަށް ލިބޭނީ ފަތުގެ ފައިދާ ލިބޭ ގޮތަށް ކެއުމުންނެވެ. ވިސްނައިލާން ޖެހޭ ކަމަކީ އަހަރެމެންގެ ތެރެއިން ގިނަ މީހުނަށް މުރަނގަފަތް މި ކެވެނީ ހަށިގަނޑަށް އެންމެ ފައިދާހުރި ގޮތަށްހެއްޔެވެ؟

ހެލްތުލައިން ޑޮޓްކަމް (healthline.com)ގައި ވަނީ މުރަނގަފަތް ކެއުމުން ހަށިގަނޑުގެ ލޭ ރަނގަޅުކޮށްދީ ކާތަކެތި ހަޖަމުކުރުމަށް ފަސޭހަކޮށްދޭނެކަމަށެވެ. އަދި ވިޓަމިން އޭ އާއި ވީޓަމިން ބީ، ވިޓަމިން ސީ، ކެލްސިއަމް، ޕްރޮޓީންސް، ފައިބާ، އަޔަން (ދަގަނޑުގެބައި) އެހެން ގިނަ ތަރުކާރީއަށް ވުރެ މުރަނގަފަތުގައި މާ ގިނަކަމަށެވެ.

މުރަނގަ ފަތް ތެލުލީމާ އޭގެ ފައިދާކޮޅު ގެއްލުމުގެ އިތުރަށް ތެލުން ލިބޭ ގެއްލުންތަކެއް ވެސް ލިބޭނެއެވެ.<br>

މީގެ އިތުރަށް ހަށިގަނޑުގެ ދިފާއީ ބާރު ވަރުގަދަކޮށްދިނުމާއި ހިތުގެ ބަލިތަކުން ދުރުކޮށްދިނުމާއި ބޮލުގެ އިސްތަށިގަނޑާއި ގައިގެ ހަމުގެ ދުޅަހެޔޮކަން އިތުރުކޮށްދިނުމުގައި ވެސް މުރަނގަފަތް އެހީތެރިވެދޭކަމަށް ހެލްތުލައިން ޑޮޓްކަމްގައި ލިޔެފައި ވެއެވެ. އަދި ހަށިގަނޑުގައި ހިމެނޭ ވިހަ މާއްދާތައް މަދުކޮށްދީ ސަރުބީޖެހުން ކުޑަކޮށްދީ, ހަށިގަނޑުގެ ދިފާއީ ބާރު ވަރުގަދަކޮށްދެއެވެ. މިއީ ޖަނަވާރުންނަށް ޓެސްޓްކޮށް އޭގެ ނަތީޖާ ފެނިފައިވާ ކަންކަންކަމުގައި އެ ލިޔުމުގައި ވެއެވެ. ނަމަވެސް މި ފައިދާ ހަށިގަނޑަށް ލިބޭނީ މުރަނގަފަތް ކާންވީ ރަނގަޅު ގޮތުގައި ކެއުމުންނެވެ.

އަހަރެމެންގެ ތެރެއިން ގިނަ މީހުނަށް މުރަނގަފަތް މީރުވަނީ ބޮޑު ތެޔޮގަނޑެއްގެ ތެރޭގައި ތެއްލީމައެވެ. އޭރުން އޭގެ ހުރިހާ ފައިދާއެއް ދިޔައީއެވެ. އޭގެ އިތުރަށް ތެލުގައި ތެއްލުމުން ހަށިގަނޑަށް ލިބެނީ އިތުރު ގެއްލުމެވެ. އޭގައި ހުންނަ ތެލުގެ ސަބަބުން ސަރުބީޖެހުން އިތުރު ވެއެވެ. ތެއްލައިގެން ނޫނަސް ހަށިގަނޑަށް ފައިދާ ހުރި ގޮތުގައި މުރަނގަފަތް  ކެވޭނެއެވެ. ބިސްގަނޑު އަޅައިގެންނާއި ކުޅި ފޮޅި ފަދަ އެއްޗިހި ފިހާ އިރު އެއަށް އަޅައިގެންނާއި އަދި ބަތްކާއިރު ރޯ މުރަނގަފަތް ކެއުމަކީ ވެސް ވަރަށް ގިނަ ފައިދާ ލިބޭނެ ގޮތްތަކެވެ. މި ނޫނަސް މުރަނގަފަތުން ރަނގަޅު ފައިދާކުރާނެ ގޮތްގޮތައް ހުންނާނެއެވެ.

ކިތަންމެ ގިނަ ފައިދާއެއް ލިބޭ ތަރުކާރީއެއް ނަމަވެސް އެ ފައިދާ ހަށިގަނޑަށް ކުރާނީ ރަނގަޅު ގޮތަށް ތައްޔާރުކޮށްގެން ކެއުމުންނެވެ. ހަށިގަނޑަށް ފައިދާ ހުރި އެއްޗެއް ކެއަސް އެއިން ގެއްލުންތައް ލިބޭ ގޮތްތައް ވެސް ހުރެއެވެ. ވީމާ މުރަނގަފަތް ކާންވީ އެއިން ސިއްޙަތަށް ފައިދާ ލިބޭނެ ގޮތަށެވެ. ވިސްނައިލާށެވެ! މުރަނގަފަތް ތިޔަ ކަނީ ހަށިގަނޑަށް ފައިދާ ހުރި ގޮތަށްހެއްޔެވެ؟

__________________________________