134 ބައިވެރީންނާ އެކު ތިލައުތުރު ރަންތާޖު ޤުރްއާން މުބާރާތް މިއަދު ނިންމައިލައިފި

26 Oct 2024 | 16:42

ތިލައުތުރު ރަންތާޖު ޤުރުއާން މުބާރާތުގައި ބައިވެރިއަކު ޤުރުއާން ކިޔަވަނީ (ފޮޓޯ: ތިލައުތުރު އަތޮޅު ކައުންސިލް)

ފަރަގު މީޑިއާ

ތިލަދުންމަތީ އުތުރުބުރީ ރަށުކައުންސިލްތަކަށް އަމާޒުކޮށްގެން ކޮންމެ އަހަރަކު ވެސް ބާއްވާ ތިލައުތުރު ރަންތާޖު ޤުރްއާން މުބާރާތް މި އަހަރު އޮތީ ހއ. އުތީމުގައެވެ. ހއ. އުތީމު ބޮޑުތަކުރުފާނުގެ ހަނދާނީ މަރުކަޒުގައި ބުރާސްފަތިދުވަހު 13:00 ގައި ފެށި މި މުބާރާތް ފަށްޓަވައި ދެއްވީ ތިލަދުންމަތީ އުތުރުބުރީ އަތޮޅު ކައުންސިލްގެ ރައީސް އަލްފާޟިލް މޫސާ ޝަފީޤެވެ. މުބާރާތުގައި ދަރިވަރުން ކާމިޔާބުކަމާ އެކު ކިޔަވައި، މުބާރާތް ނިމި، މިއަދު ވަނީ މުބާރާތުގެ ނަތީޖާ ފާޅުކޮށް ވަނަވަނައަށް އައި ފަރާތްތަކަށް އިނާމު ވެސް ދީފައެވެ.

މި އަހަރުގެ މުބާރާތުގައި 13 ރަށުން 134 ބައިވެރީން ބައިވެރިވެފައިވެއެވެ. މި މުބާރާތް ބޭއްވެނީ ރަށު ކައުންސިލްތަކުން ހޮވެއްޔެއް ނުވަތަ މުބާރާތެއް ބާއްވައި އެ ހޮވެލީން ނުވަތަ މުބާރާތުން ހޮވިގެން އެ ރަށެއް ތަމްސީލުކުރާ ބައިވެރީންގެ މެދުގައެވެ. މި ބުބާރާތް ފެންވަރު ރަނގަޅު މުބާރާތެއްގެ ގޮތުގައި ނިމިގެން ދިޔައީ މި ސަބަބާ ހުރެއެވެ.

ތިލައުތުރު ޤުރުއާން މުބާރާތުގައި އެއްވަން ހޯދި ދިއްދޫގެ ބައިވެރީން ށަރަފުވެރިމެހުމާނާއެކު ފޮޓޯއަކަށް ހުއްޓިލައިގެން (ފޮޓޯ: ތިލައުތުރު އަތޮޅު ކައުންސިލް)<br>

މި މުބާރާތަކީ ތިލަދުންމަތީ އުތުރުބުރީ ރައްޔިތުންގެ ހިތްތަކުގައި ކީރިތި ޤުރްއާން ކިޔެވުމަށް ލޯބިޖައްސައި ޤުރްއާން ކިޔެވުމުގެ ފަންނު އާލާކޮށް، ދިރުވައި ފެތުރުމުގެ މާތް މަޤްޞަދުގައި އަހަރަކު އެއްފަހަރު ބާއްވަމުން އަންނަ މުބާރާތެކެވެ. އެންމެފަހުން ބޭއްވުނު ތިލައުތުރު ރަންތާޖު ޤުރްއާން މުބާރާތް ބާއްވާފައިވަނީ ހއ. މާރަންދޫގައެވެ.

މި މުބާރާތަކީ ކީރިތި ޤުރްއާން ކިޔެވުމުގެ 37 ވަނަ ޤައުމީ ޤުރްއާން މުބާރަތުގައި ހއ. އަތޮޅު ތަމްސީލުކުރާނެ ބައިވެރީން ހޮވުމަށް ބާއްވާ މުބާރާތެކެވެ. މި މުބާރާތުގެ ފަނޑިޔާރުކަން ކޮށްދެއްވަނީ އަލްޙާފިޡާ ލަޠީފާ އަޙްމަދާއި އަލްޙާފިޡާ ނާޝިދާ މުޙައްމަދާއި އަލްޤާރީ ޢަބްދުﷲ ޢިމާދެވެ. މި މުބާރާތް ކުރިއަށް ދިޔައީ 2024 އޮކްޓޫބަރު 24ން ފެށިގެން މިއަދުގެ ނިޔަލަށެވެ. މި މުބާރާތް ނިންމުމުގެ ރަސްމިއްޔާތު އޮތީ މިއަދު (2024 އޮކްޓޫބަރު 26ވީ ހޮނިހިރު ދުވަހު) ހެނދުނު 9:00ގައެވެ.

މުޅި މުބާރާތުން އެއްވަނަ ޙާޞިލްކުރި އިހަވަންދޫ ނަސްރަތަށް ސިޓީތަކާ ބެހޭ ވަޒީރު އިނާމުދެއްވަނީ (ފޮޓޯ: ތިލައުތުރު އަތޮޅު ކައުންސިލް)<br>

މުބާރާތުގެ ވަކިވަކި ބައިވެރީންގެ ތެރެއިން އެކި ވަނަވަނައަށް އައި ބައިވެރީންނަކީ:

މުޅި މުބާރާތުން އެއްވަނަ: އާމިނަތު ނަޞްރަތު އަލިދޯދި ހއ. އިހަވަންދޫ

މުޅި މުބާރާތުން ދެވަނަ: ޙުސައިން ޔަމާން އަޒީމް ހއ. އަތޮޅު ތަޢުލީމީ މަރުކަޒު

މުޅި މުބާރާތުން ތިންވަނަ: ޒުމްރާ އަޙްމަދު ސާވަން ހއ. ދިއްދޫ

ރަށްރަށުގެ ކައުންސިލްތަކަށް ބަލާ އިރު މުޅި މުބާރާތުން ވަރަށް ފުރިހަމަ އެއްވަނައެއް ޙާޞިލުކުރީ ވެރިކަންކުރާ ދިއްދޫއެވެ. މުޅި މުބާރާތުން ދެވަނަ ލިބިފައިވަނީ އިހަވަންދޫއަށެވެ. މުޅި މުބާރާތުން ތިންވަނަ ލިބިފައިވަނީ ހޯރަފުށްޓަށެވެ.

_________________________________________