ޑރ. ޢަބްދުލްޣަފޫރު ޢަބްދުއްރަޙީމް

[މުދައްދިސަކަށް ވާތީ މިއަދު ދަރިވަރުންނާ ކުލާހުގައި ޙަވާލުކުރެވުނު މަސައްކަތްތައް ބައްލަވާން ފޮތްތައް ހިއްޕަވައިގެން ގެޔަށް ވަޑައިގެން] މޭޒު ދޮށުގައި ކުލާސް ކުދީންގެ ފޮތްތައް ތަސްހީހުކުރެއްވުމުގެ މަސައްކަތުގައި ބައްޕަ މަޝްޣޫލުވެ އިންނެވިއެވެ. ކައިރީގައި ބައްޕަގެ ފަސް އަހަރުގެ ކުޑަ ދަރިފުޅު ބައްޕައަށް 'އުނދަގޫކުރުމުގައި' އުޅެއެވެ. މޭޒުމަތީން އޭނާ ފޮތެއް ނަގައިފާނެއެވެ. ބައްޕަގެ އުނގަށް އަރައިފާނެއެވެ. ޖީބަށް އަތްބާނައިފާނެއެވެ.

ކޮންމެއަކަސް ކުޑަދަރިފުޅު ކުޑަކޮށް ދުރަށް ޖައްސައިލުމުގެ ގޮތުން ބައްޕަ، ދަރިފުޅާ  މަސައްކަތެއް ހަވާލުކުރެއްވިއެވެ. ބައްޕަގެ ކުރިމަތީގައި އޮތް ނޫސް ކަރުދާހެއްގައި ރާއްޖޭގެ ޗާޓެއް ކުރަހައިފައި އޮތެވެ. އެ ކަރުދާސް ގަނޑު ނަންގަވައިފައި ކަތުރަކުން ކުދިކުދި ބައިތަކަކަށް ކައްޕަވައިލައްވައިފައި ދަރިފުޅު އަތަށް އެ ބައިތައް ދެއްވައިފައި ބައްޕަ ވިދާޅުވިއެވެ: "ދަރިފުޅާއެވެ. މި ބައިތައް އަލުން ރަނގަޅަށް އަތުރައިލައި ރާއްޖޭގެ ޗާޓު އަލުން ބިނާކުރެވޭތޯ މަސައްކަތްކޮށްލައިބަލާށެވެ!"

ބައްޕަ ހީކުރެއްވީ ކުޑަ ދަރިފުޅަށް އެ ކަން ކުރެވޭނީ ވަރަށް ގިނަ އިރުންކަމަށެވެ. އެ ކަން ކުރާން ވަރަށް ގިނަ ވަގުތު ހޭދަވާނޭކަމަށެވެ. އަދި އެހެންވެ، ބައްޕަގެ މަސައްކަތުގައި ދަރިފުޅުގެ 'އުނދަގުލުން' ސަލާމަތްވެގެން ދެން ފޮތްތައް ތަޞްޙީޙުކުރައްވާން އިންނެވޭނޭކަމަށެވެ. ނަމަވެސް ކަންތައް ދިމާވީ އެހެންނެއް ނޫނެވެ. ހީޕުޅުކުރެއްވި ގޮތާ މުޅީން އިދިކޮޅަށެވެ. ދާދި ކުޑަކުޑަ ހިނދުކޮޅެއްގެ ތެރޭގައި އެ ކަރުދާސްތައް ރަނގަޅަށް އަތުރައިލައިގެން ރާއްޖޭގެ ޗާޓު ފުރިހަމަކޮށް، 'ރާއްޖެ ބިނާކޮށްފިއެވެ!' މަސައްކަތް ނިންމުމަށް ފަހު އަނެއްކާ ބައްޕަ އަރިހަށް އެ ކުއްޖާ އަތުވެއްޖެއެވެ.

ދެން، ބައްޕަ ހައިރާވެ ވަޑައިގެން އެއްސެވިއެވެ. "ދަރިފުޅު ހާދަ މޮޅެވެ! ދަރިފުޅަށް މިހާރު ރާއްޖޭގެ ޗާޓު އޮންނަ ގޮތް ހިތުން ހަމަ އެނގެނީ ހެއްޔެވެ؟" ދެން، ޖަވާބުގައި ދަރިފުޅު ބައްޕައަށް ދެންނެވިއެވެ. "ނޫނެކެވެ! އެ ގަނޑުގެ އަނެއް ފަރާތުގައި އޮތީ މީހެއްގެ ފޮޓޯއެކެވެ. އެ މީހާ ބިނާކުރުމުން ރާއްޖެ އޮންނާނީ ބިނާވެފައި ނޫންތޯއެވެ!"

ދެން، ބައްޕަ އަމިއްލަ ނަފުސާ މުޚާޠަބުކޮށް މިހެން ވިދާޅުވެވުނެވެ. 'ދަރިފުޅު އެބުނީ ހާދަހާވާ ބޮޑު ތެދެކެވެ. ތަނެއް ބިނާކުރާން ބޭނުންވަނީ އިންސާނާ ބިނާކުރާށެވެ. ދަރިފުޅު ބުނި ފަދައިން، މީހާ ބިނާކުރުމުން ރާއްޖެ ބިނާވާނެއެވެ. އެހެންވީމާ ރާއްޖެ ބިނާކޮށް ކުރިއަރުވާން ބޭނުން ނަމަ، އެންމެ ފުރަތަމަ ކުރާން ޖެހޭ ކަމަކީ ރާއްޖޭގެ މީހުން ބިނާކުރުމެވެ. މީހުން ހޭލުންތެރިކުރުވައި އުފެއްދުންތެރި ސިކުނޑިތަކެއްގެ ވެރި ބަޔަކަށް ހެދުމެވެ!" [ކޮންމެހެން ގިނަ އޭ-ސްޓާރތަކަކާއި އޭތަކެއް ހޯދުމެއް ނޫނެވެ.] [އެކަމަކު ހޭލުންތެރި، ހުނަރުވެރި، ފިކުރުކުރާން ދަންނަ، އުނެގެނުނު އެއްޗެއް ތިމާއާއި މުޖުތަމަޢުގެ ބޭނުންތަކަށް ޓަކައި ތަޠުބީޤުކުރާން ދަންނަ، ތެދުވެރި އިޚުލާޞްތެރި ފަރުދުންތަކެއް ބިނާކުރުމެވެ. އޭރުން އޮންނާނީ ޤައުމު ބިނާވެފައެވެ.]

_______________________________________