ފަރަގު މީޑިއާ

ޣައްޒާއާއި ލުބުނާނާއި އިސްރާއީލާއި މުޅި ސަރަހައްދުގައި ހިނގާ ހަނގުރާމަ ވަގުތުން ހުއްޓައިލާން ގޮވައިލައި ބައިނަލްއަގުވާމީ 154 މުއައްސަސާއަކުން ސޮއިކޮށް އދ.ގެ ގައުމުތަކަށް ވަރުގަދަ އިލްތިމާސެއް ފޮނުވައިފިއެވެ. ނޯވެޖިއަން ރެފިޔުޖީ ކައުންސިލްގެ ވެބްސައިޓްގައި ޝާއިޢުކުރައްވައިފައިވާ ގުޅިފައިވާ މި ބަޔާން ފަށައިފައިވަނީ ”އަހަރެމެން، ތިރީގައި ސޮއިކޮށްފައިވާ ހުރިހައި ޖަމްޢިއްޔާތަކުން އދ.ގެ މެންބަރު ހުރިހައި ގައުމަކަށް މި ގޮވައިލަނީ ޣައްޒާއާއި ލުބުނާނާއި އިސްރާއީލާއި މުޅި ސަރަހައްދުގައި ހިނގާ ހަނގުރާމަ ވަގުތުން ހުއްޓައިލާށެވެ." މި ޢިބާރާތުންނެވެ.

އެ ބަޔާނުގައި ދުނިޔޭގެ މަރުޖާތަކާ ޙަވާލާދީ، ފާހަގަކޮށްފައިވާ ގޮތުގައި:

އިސްރާއީލުގެ ޢަމަލުތަކުގެ ސަބަބުން ފަލަސްޠީނުގެ 43 ހާހަށް ވުރެ ގިނަ މަދަނީން ވަނީ ޝަހީދުކޮށްލައިފައެެ. އަދި ލުބުނާނުގައި ދެ ހާހަށްވުރެ ގިނަ މީހުން މަރައިލައިފައިވެއެވެ.އިސްރާއީލީ ބާރުތަކުން ޣައްޒާގެ %84 ސަރަހައްދަކުން މީހުން ވިސްސިވިހާލިކޮށްލައިފައިވެއެވެ. އަދި ލުބުނާނގުގެ %25 ސަރަހައްދުން މީހުން ވަނީ ބޭރުކޮށްފައެވެ. މި ކަމުގެ ސަބަބުން ޣައްޒާގެ އާބާދީގެ 90 އިންސައްތަ މީހުން ވަނީ ވިއްސިވިހާލިކޮށްލައިފައެވެ.

ހަމަ މި ފަދައިން ލުބުނާނުގެ އާބާދީއިން، އަށް ލައްކައަށް ވުރެ ގިނަ މީހުންވަނީ ވިއްސިވިހާލިކޮށްލައިފައެވެ. ފަލަސްތީނުގެ ހަތަރު ލައްކައަށް ވުރެ ގިނަ މީހުން ވަނީ ބޮމުގެ ޙަމަޅާއާ ގުޅިގެން އުތުރު ޣައްޒާއަށް ކާނާއާއި ފެނާއި ތެލާއި ބޭސް ލިބުން މަނާކުރުމުގެ ސަބަބުން ނުރައްކާތެރި ޙާލަތެއްގައެވެ.

އެހީ ފޯރުކޮށްދިނުމުގެ މަސައްކަތުގައި އުޅުނު ފަލަސްޠީނާއި ބައިނަލްއަގުވާމީ ޚިދުމަތްތެރީންގެ ތެރެއިން 300 މުވައްޒަފުންނާއި 1000 ޞިއްޙީ ޚިދުމަތްތެރީން ފަލަސްޠީނު ސަރަޙައްދުން މަރައިލައިފައިވާ އިރު، ލުބުނާނުގެ މި ފަދަ ޚިދުމަތްތެރީންގެ ތެރެއިން 95 މީހުން އިސްރާއީލުގެ ބާރުތަކުން ވަނީ މަރައިލައިފައެވެ. އަދި ލުބުނާނުގައި ސުލްޙަ ބަލަހައްޓާ އދ.ގެ ވަފުދަށް ވެސް އިސްރާއީލުން ގެންދަނީ ޙަމަލާ ދެމުންނެވެ.

މުޅި ޣައްޒާގެ ޞިއްޙި ނިޒާމު އެކީއެކަށް ހަލާކުކޮށްލުމަށް ފަހު، މިހާރު ލުބުނާނު ފަނާކުރުމުގެ މަސައްކަތް އިސްރާއީލުގެ ލަސްކަރުތަކުން ގެންދަނީ ކުރަމުންވެ. ޢަދަދު ނުކުރެވޭ ފަދަ ގިނަ ކުޑަކުދީންނާއި އަންހެނުން ވަނީ ކަނާދު މަދުވުމާއި ބަނޑުހައިހޫނުކަމުގެ ވޭނާ ކުރިމަތިލާންޖެހިފައެވެ.

އޮކްޓޫބަރު ހަތްވަނަ ދުވަހު ޙަމާސުން ދިން ޙަމަލާގައި އިސްރާއީލުން މަރުވެފައިވަނީ އެންމެ 1200 މީހުންނެވެ. ލުބުނާނާއި ފަލަސްތީނުގެ ހަތިޔާރުއެޅި ޖަމާޢަތްތަކުގެ ޙަމަލާގައި އެތައް ޑަރުޖަނެއްގެ ބަޔަކު އިސްރާއީލުން މަރުވި އިރު، އިސްރާއީލުން ވެސް 140000 މީހުން ވިއްސިވިހާލިވެފައިވެއެވެ. އަދިވެސް ޙަމާސުން އަސީރުކޮށްފައި ތިބި މީހުންގެ ތެރެއިން 101 މީހަކު ރަހީނުކޮށްފައި ތިބި އިރު ފަލަސްތީނުގެ އެތައް ހާސް ބަޔަކު އިސްރާއީލުން ޖަލަށްލައިފައި ވެއްޖެއެވެ.

މި ކަންކަން މިހެން ހުރުމާއެކު އެއްވެސް ޝަރުތެއްނެތި ހަނގުރާމަ ހުއްޓާން ގޮވައިލުމާއެކު އިސްރާއީލަށް ހަތިޔާރު ފޯރުކޮށްދިނުން ހުއްޓައިލާން ވެސް އދ.ގެ މެންބަރު ހުރިހައި ގައުމުތަކަކަށް މި ބަޔާނުގައި ގޮވައިލައިފައި ވެއެވެ.

އަދި ބަޔާން ނިންމައިލަމުން ހުރިހައި ދައުލަތެއްގެ ވެރީންނާއި ސަރުކާރުތަކުގެ ވެރީންނަށް ގޮވައިލައިފައިވަނީ އެއްވެސް ޝަރޫޠެއް ނެތެ ހަނގުރާމަ ހުއްޓުމަށާއި ހަތިޔާޜު ފޯރުކޮށްދިނުން މެދުކަނޑައިލާށެވެ. މަދަނީންނާ ދެކޮޅަށް ހިނަގާ ޢުދުވާނު ހަމަ މިހާރުން މިހާރަށް ހުއްޓާން ޖެހޭކަމަށް ވެސް މި ދިގު ތަފުޞީލީ ބަޔާނުގައި ގޮވައިލައިފައިވެއެވެ.

މަރުޖާ     ނ.    ޞައްޙަ ސަނަދަކުން ކަށަވަރުވާ މަސްދަރު

ކަނާދު    ނ.     ދިރުންހުރި ކޮންމެ އެއްޗެއްގެ ދިރުން ދެމެހެއްޓުމަށާއި ހެދިބޮޑުވުމަށާއި ގުނަވަންތައް މަސައްކަތްކުރުމަށް ބޭނުންވާ ކާނާގެ އެންމެހައި އުންސުރު.