ފަރަގު މީޑީއާ

ރާއްޖޭގެ އެކި ކަންކޮޅުތަކުގައި ކީރިތި ޤުރުއާނުގެ ޢިލްމާއި ފަންނު ފަތުރައި ކީރިތި ޤުރުއާނަށް ރައްޔިތުންގެ ހިތްތަކުގައި އޮންނަ ލޯބި އިތުރުކުރުމަށް ޓަކައި އިސްލާމީ ކަންތައްތަކާ ބެހޭ ވުޒާރާއާއި ކީރިތި ޤުރުއާނާ ބެހޭ ގައުމީ މަރުކަޒުން ހިންގަވާ ޙަރަކާތްތަކަށް ރާއްޖޭގެ އެކި ކަންކޮޅުތަކުން އެއްބާރުލުން ދެއްވާ ތަން ފެނުމަކީ އުފާވެރި ކަމެކެވެ. ސަރުކާރުގެ އިތުރަށް އެކިއެކި އަމިއްލަ ޖަމުޢިއްޔާތަކާއި ލޯކަލް ކައުންސިލްތަކުން ވެސް މި ބާވަތުގެ ޙަރަކާތްތައް އަންނަނީ ހިންގަމުންނެވެ.

މި ހަފުތާ ފެށުނީ މި ފަދަ މުބާރާތެއްގެ ނަތީޖާއާ އެކުގައެވެ. މި ފަދަ އެހެން މުބާރާތެއް މިއަދު ހައްދުންމަތީގައި ފަށަނީއެވެ. އާދޭހެވެ! ހައްދުންމަތީ ކައުންސިލުން އަތޮޅު ހުރިހައި ސުކޫލު މަދަރުސާތަކަށާއި އާންމުންނަށް ވެސް ބައިވެރިވެވޭ ގޮތަށް ހުޅުވައިލައިގެން ސިލްސިލާ ގޮތެއްގައި ބާއްވަމުންގެންދާ ކީރިތި ޤުރުއާން ކިޔެވުމުގެ އަތޮޅު މުބާރާތް މި އަހަރު ފަށާ ގޮތަށް ހަމަޖެހިފައިވަނީ މިއަދުއެވެ.

މިއަހަރުގެ މުބާރާތުގައި ސުކޫލުތަކުގެ ބަޔާއި އާންމުބައިގައި ޖުމްލަ 205 ބައިވެރީން ވާދަކުރާނެކަމަށް އަތޮޅު ކައުންސިލުން ވަނީ ވިދާޅުވެފައެވެ. މި މުބާރާތުގެ ކިޔެވުން ކުރިއަށްދާނީ ސުކޫލުތަކުގެ ބަޔާއި އާންމުބައި ވަކިން ކޮންމެ ބައެއްގެވެސް ބަލައިގެން ކިޔެވުމުގެ ބަޔާއި ނުބަލައި ކިޔެވުމުގެ ބައިވެސް ހިމެނޭ ގޮތަށް އެކި ގިންތިތަކަކަށް ބަހައިލެވިގެންނެވެ. މި މުބާރާތުގެ ޓައިޓަލް ސްޕޮންސަރއަކީ އަލްބުރޫޖު ހޯލްޑިންގްސް ޕްރައިވެޓް ލިމިޓެވެ. ކޯ-ސްޕޮންސަރަކީ އަލްހިޖުރަ ޓްރެވަލް އެންޑް ޓްއާސްއެވެ. މުބާރާތުގެ ސުމޭކު ބައިވެރިއަކީ ދިވެހިރާއްޖޭގެ ގުޅުން ޕްރައިވެޓް ލިމިޓެޑް (ދިރާގު)އެވެ. ލ. ގަމުގައި ހުންނަ އިހައްދޫ ސުކޫލުގެ ޖަލްސާކުރާ މާލަމުގައި ބާއްވާ ގޮތަށް ހަމަޖެހިފައިވާ މި މުބާރާތުގެ މެހުމާނުދާރީ އަދާކުރަނީ އިހައްދޫ ސުކޫލުންނެވެ.

މި މުބާރަތަށް މި އަހަރު ބޮޑެތި އިނާމުތަކެއް ވެސް ވަނީ ހުށަހެޅިފައެވެ. ސުކޫލުތަކުގެ ބައިގެ ބަލައިގެން ކިޔެވުމުގެ ގޮފީގެ އެއްވަނައަށާއި ނުބަލައި ކިޔެވުމުގެ ގޮފީގެ އެއްވަނައަށް ހޮވޭ ދަރިވަރުންނަށް އިނާމެއްގެ ގޮތުގައި އަލްބުރޫޖު ހޯލްޑިންގްސްގެ ފަރާތުން ޢުމްރާ ދަތުރެއް ދޭނެއެވެ. އަދި އާންމުންގެ ބައިގެ ދެ ގޮފި އެއްކޮށް އެއްވަނައަށް ހޮވޭ ފަރާތަކަށް ވެސް އިނާމެއްގެ ގޮތުގައި ޢުމްރާ ދަތުރެއް ދޭނެއެވެ. މި އިނާމަކީ އަލްހިޖުރަ ޓްރެވަލްސް އެންޑް ޓުއަރސްގެ ފަރާތުން ދޭ އިނާމެކެވެ.

މީގެ އިތުރަށް ވެސް ތަފާތު އިނާމުތަކާއި ހަނދާނީ ލިޔުން ކޮންމެ ވަނައަކަށް ވެސް ދޭ ގޮތަށް ވަނީ ހަމަޖެހިފައެވެ. މުބާރާތުގެ ކިޔެވުން ފަށާން ހަމަޖެހިފައިވަނީ މިއަދު ހަވީރު ހަތަރެއް ޖަހާއިރު އިހައްދޫ އިސްކޫލުގައެވެ.

މި މުބާރާތް ކުރިއަށް ދާނީ މިއަދުން ފެށިގެން މި މަހު 26ގެ ނިޔަލަށްކަމަށް ޚަބަރު ލިބިފައިވެއެވެ. މިއަދު މި މުބާރާތް ފެށޭ އިރު، މި ހަފުތާގެ ހޮނިހިރު ދުވަހު ވަނީ މި ފަދަ ޤުރުއާން މުބާރާތެއް ބ. އަތޮޅުގައި ނިންމައިލައިފައެވެ. އެ ޚަބަރު "ފަރަގު"ން ތިޔަ ބޭފުޅުން ވާނީ ވިދާޅުވެފައެވެ.

ހައްދުންމަތީ އަތޮޅު ކައުންސިލަކީ ވަރަށް ގިނަ ޙަރަކާތްތަކެއް ހިންގާ، ވަރަށް ޙަރަކާތްތެރި ކައުންސިލެއްކަން ފާހަގަކުރެވެއެވެ.