އަބާ މުޙަންމަދު

"ވޭޕް މަނާކުރުމާ ދެކޮޅަށް އިހުތިޖާޖުކުރުމުގެ ގޮތުން މާލޭގައި ވޭޕް ވިއްކާ ފިހާރަތައް ބަންދުކޮށްފި"ކަމަށް އޮންލައިން ނޫހެއްގައި އިހައް ދުވަހު ޚަބަރެއް ލިޔެފައި އޮތީ ރަނގަޅަށްބާވައޭ ހިތަށް އެރިއެވެ. އަޅުގަނޑު ހިތުން އެ ޚަބަރުގެ ސުރުޚީ އޮންނާންވީ "ވޭޕް މަނާކުރުމަށް ތާއީދުކުރުމުގެ ގޮތުން މާލޭގައި ވޭޕް ވިއްކާ ފިހާރަތައް ބަންދުކޮށްފި" މިހެންނެވެ. ސަބަބަކީ، މި ފަދަ ފިހާރަތައް ބަންދުކުރުމުން ސަރުކާރުގެ އެ ސިޔާސަތު ތަންފީޒުކުރުމަށް އެހީތެރިވެވޭތީއެވެ. ސަރުކާރުން އެ ފަދަ ފިހާރަތަކަށް ޝުކުރުވެރިވާނެކަން ކަށަވަރެވެ.

މި އަހަރު ނޮވެމްބަރ 15އިން ފެށިގެން ވޭޕާއި ވޭޕްގެ އާލާތްތައް ރާއްޖެ އެތެރެކުރުން މަނާކުރައްވާ ގޮތަށް ސަރުކާރުން ނިންމަވައި، ޑިސެމްބަރު 15އިން ފެށިގެން ވޭޕްގެ އެފަދަ ހުރިހާ އެއްޗެއް ރާއްޖޭގައި ވިއްކުމާއި ބޭނުންކުރުން މަނާ ކުރައްވާން ސަރުކާރުން ނިންމެވި ނިންމެވުމަކީ ވަރަށް ރަނގަޅު، އަދި ހިތްވަރުގަދަ ނިންމެވުމެކެވެ. ވޭޕްގެ ވިޔަފާރި ކުރާ ފަރާތްތަކުން އެ ކަމަށް ފަހިވާ ގޮތަށް އެ ފަދަ ތަކެތި ވިއްކާ ފިހާރަތައް ބަންދުކުރުމަކީ އެ ސިޔާސަތަށް ދެއްވި ވަރަށް ބޮޑު ތާއީދެކެވެ.

ވޭޕް މަނާކުރި ގޮތަށް ދުންފަތާއި ސިނގިރޭޓު ވެސް މަނާ ކުރައްވާންވީއެވެ. ދުންފަތާއި ސިނގިރޭޓް މުޅިން މަނާނުކުރެވޭ ނަމަ، އާންމު ތަންތާނގައި ދުންފަތުގެ އިސްތިއުމާލް ނުކުރެވޭ ގޮތަށް ޤާނޫނަށް ބަދަލުގެންނަވާން ސަރުކާރުން ވަނީ ނިންމަވައިފައިކަމަށް މަޢުލޫމާތު ލިބިފައިވެއެވެ. ދުންފަތާއި ސިނގިރޭޓާއި ސުއްޓާ ފަދަ ތަކެތީގެ މާމޫލު  ދެ ގުނަކުރައްވާން ވެސް ސަރުކާރުން ނިންމަވައިފައިވާކަމަށް ވެސް އެނގިފައި ވެއެވެ.

ޑިސެންބަރު 15އިން ފެށިގެން ވޭޕު މަނާކުރައްވާން ނިންމެވުމާއެކު، މި ބާވަތުގެ ކަންކަމުގެ ނާޖާއިޒު ފައިދާ ނަގާން ވެސް ބަޔަކު މަސައްކަތްކޮށްފާނެއެވެ. އެ މުއްދަތުގެ ކުރީން ގިނަ ޢަދަދެއްގެ ވޭޕު ގެނެސް، މަނާވާ ތާރީޚުން ފެށިގެން އަގުބޮޑުކޮށް ވަގަށް ވިއްކާން ވެސް ބަޔަކު މަސައްކަތްކޮށްފާނެއެވެ. އެހެންކަމުން މި މުއްދަތުގެ ކުރީން މި ބާވަތުގެ ތަކެތީގެ މާމޫލު ބޮޑުކުރައްވާން ވެސް މިހާރު ނިންމަވައިފައިވާކަމަށް މަޢުލޫމާތު ލިބެއެވެ. އެނގިފައިވާ ގޮތުގައި ސަރުކާރުން މި މުހިންމު ފިޔަވަޅު އެޅުއްވީ ކަމާ ގުޅުން ހުރި ހައެއްކަ ޖަމުޢިއްޔާއެއްގެ ލަފާގެ މަތީންނެވެ.

މިއީ ސިއްޙީ ދާއިރާގެ ފަރާތްތަކުގެ އިތުރަށް މުޖުތަމަޢުގެ ލާބައާއި މަންފާއަށް އިސްކަންދޭ ފަރާތްތަކުން އުފަލާއި ޝުކުރުވެރިކަމާ އެކު ބަލައިގަންނާނެ ކަމެއްކަން ކަށަވަރެވެ. މި ފަދަ ތަކެތި ވިއްކާ ފިހާރަތައް ބަންދުކުރި ކުރުމަކީ މި ސިޔާސަތު ތަންފީޒުކުރެއްވުމަށް ސަރުކާރަށް ލިބިވަޑައިގަތް ވަރަށް ބޮޑު އެހީތެރިކަމެއްކަން ކަށަވަރެވެ.  ރައްޔިތުންގެ ފައިދާ އާއި ލާބައަށްޓަކައި ސަރުކާރުން ކުރާ މިފަދަ ކަންކަމަށް ތާއީދުކުރުމަކީ ޑިމޮކްރެޓިކް ނިޒާމެއްގައި ވަރަށް މުހިންމު ކަމެކެވެ.

ސަރުކާރުން ކުރައްވާ ކަންކަމުގައި އިސްލާޙުކުރާން ހުންނަ ކަންކަމަށް ބިނާކުރަނިވި ގޮތެއްގައި ފާޑުކިޔާ ފަދައިން މި ބާވަތުގެ ފައިދާ ހުރި ކަންކަމަށް ތާއީދުކޮށް އެއްބާރުލުން ދޭ ތަން ފެންނަކަމީ ކިހައި މަތިވެރި އުފަލެއްތޯއެވެ؟ މި ކަމަށް ޓަކައި، ވޭޕުވިއްކާ ފިހާރަތައް ބަންދުކުރީތީ، އެ ފަރާތްތަކަށް ތަހުނިޔާ ދަންނަވަމެވެ. ވޭޕާއި ދުންފަތުގެ ބާވަތްތައް ފިޔަވައި ކޮންމެވެސް އެހެން މުދަލެއް އެ ފިހާރަތަކުގައި ވިއްކާން ފަށާނެކަމަށް އުންމީދުކުރަމެވެ.

މާމޫލު     ނ.    ރާއްޖެއަށް އެތެރެކުރާ މުދަލުން ސަރުކާރަށް ނަގާ ބައި ނުވަތަ މި ފަދަ މުދަލުން ސަރުކާރަށް ނަގާ ފައިސާ.