ފަރަގު މީޑިއާ

މާވަށު ކައުންސިލުން ހާމަކުރައްވައިފައި ވަނީ މާވަށު އިސްކޫލުގެ ހުރިހައި ކުލާސްތަކެއް އޭސީކުރުމަށް ޓަކައި ކުރާންޖެހޭ ތައްޔާރީތައް މިހާރު ވަމުންދާކަމަށާއި އެ ކަމަށް ޓަކައި އެ ކައުންސިލުގެ މަސައްކަތު ތާވަލުގައި ހިމަނުއްވައިގެން -/200،000 ރ. (ދެ ލައްކަ ރުފިޔާ) މިހާރު ބަޖެޓުކުރައްވައިފައިވާކަމަށެވެ.

މާވަށު ކައުންސިލުގެ ރައީސް އަލްފާޟިލް އަޙުމަދު މޫސާ ވިދާޅުވެފައިވާ ގޮތުގައި، ހުރިހާ ކުލާހެއް އޭސީކޮށް ނިންމާން އަދި އިތުރަށް ލައްކައެއްހައި ރުފިޔާ ބޭނުންފުޅުވާ ކަމަށާއި އެ ފައިސާ ހޯއްދަވާން ހެޔޮއެދޭ ފަރާތްތަކުގެ އެހީތެރިކަން ހޯއްދަވަމުން އެބަ ގެންދަވާ ކަމަށެވެ. އަދި އޭނާ ވިދާޅުވެފައިވަނީ، އޭސީ ހަރުކުރުމާއި އެއާ ގުޅިގެން ކުރާންޖެހޭ މަސައްކަތްތައް ކުރާނީ އެ ކައުންސިލުގެ މުވައްޒަފުންނާއި އިސްކޫލާއި ފެނަކައާއި ގެމް ޖަމިއްޔާގެ މެންބަރުންކަމަށެވެ.

އަޙުމަދު މޫސާ ވިދާޅުވީ، މާވަށު ސުކޫލު އޭސީކުރުމަށް ޓަކައި ހިންގަވާ މަޝްރޫޢަށް 35 އެއަރ ކޮންޑިޝަނަރ ބޭނުންފުޅުވާކަމަށާއި ކޮންމެ ކުލާހެއްގައި 18 ބީޓޫޔޫގެ ދެ އޭސީ ހަރުކުރައްވާން ޖެހޭ އިރު، ބީލަމުގެ އުޞޫލުން އޭސީ ހޯއްދެވުމުގެ މަސައްކަތް ވެސް މިހާރު ކުރިއަށް އެބަ ގެންދަވާ ކަމަށެވެ.

މާވަށު އިސްކޫލު އޭސީކުރެއްވުމުގެ މަޝްރޫޢު ކުރިއަށް ގެންދަވާން ތަޢުލީމާ ބެހޭ ވުޒާރާގެ ހުއްދަ ވެސް މިހާރު ވަނީ ލިބިވަޑައިގެންފައިކަމަށް އަޙުމަދު މޫސާ ވިދާޅުވިއެވެ. "އަދި މި އަހަރު ނިމުމުގެ ކުރީން މި މަޝްރޫޢު ފުރިހަމަކުރައްވައި ނިންމާލެވޭނެކަމަށް" އުންމީދުކުރައްވާކަމަށް ވެސް އޭނާ ވިދާޅުވިއެވެ.

400އާ ކައިރިކުރާ އަދަދެއްގެ ދަރިވަރުންނަށް ގުރޭޑް 1ން 12އާ ހަމައަށް ކިޔަވައިދެމުން ގެންދާ މާވަށު ސުކޫލަށް ބޭނުންވާ އެހީތެރިކަން އެ ކައުންސިލުން ފޯރުކޮށްދެއްވަމުން ގެންދަވާކަމަށް ވެސް މާވަށު ކައުންސިލުން ވަނީ ވިދާޅުވެފައެވެ.

އެއަރ ކޮންޑިޝަން ކުރެއްވުމަށް ޓަކައި މިހައި ބޮޑެތި ޚަރަދުތައް ކުރައްވާއިރު، އިސްކޫލަށް އެންމެ ބޮޑަށް ބޭނުންވާ އެއް ޚިދުމަތްކަށްވާ ކުތުބުޚާނާއެއް ޢިމާރާތްކުރުމުގެ މަސައްކަތް މާވަށު ކައުންސިލާއި މާވަށު އިސްކޫލު ގުޅިގެން ކުރައްވާނެ ނަމަ ހާދަހާ ރަނގަޅޭ ހިތަށް އަރައެވެ. އަދި ޕަބްލިކް ލައިބްރަރީއެއް ޤާއިމުކުރެއްވުމަކީ ކައުންސިލަށް ލާޒިމުކަމަކަށް ވާތީ، މި ކަން މާވަށު އިސްކޫލާ ގުޅިގެން ހަރުދަނާ އުޞޫލެއްގެ މަތީން ކުރެއްވިދާނެކަމަށް "ފަރަގު" އުންމިދުކުރެއެވެ.