ފަރަގު މީޑިއާ

ކޮންމެ އަހަރަކު އޮކްޓޫބަރު މަހު 14ވަނަ ދުވަހަކީ "ބައިނަލްއަގުވާމީ އީ-ކުނީގެ ދުވަސް (އިންޓަރނޭޝަނަލް އީ-ވޭސްޓް ޑޭ)"ގެ ގޮތުގައި ފާހަގަކުރާ ދުވަހެވެ. މި ދުވަސް ދުނިޔޭގައި ފުރަތަމަ ތަޢާރަފުކުރެވުނީ 2018ވަނަ އަހަރު، އެ އަހަރު ބޭއްވި ވޭސްޓް ފްރަމް އިލެކްޓްރިކަލް އެންޑް އިލެކްޓްރޯނިކް (weee) ފޯރަމްގައި ނިންމި ނިންމުމެއްގެ ނަތީޖާއެއްގެ ގޮތުންނެވެ. އެއީ މި ފަދަ އާލަތްތައް ބޭނުންކުރާ މީހުންގެ މެދުގައި އެ ފަދަ ތަކެތި ރިސައިކަލް ކުރުމުގެ ހޭލުންތެރިކަން އުފެއްދުމުގެ މަގުސަދުގައެވެ.

މި ދުވަސް ބައިނަލްއަގުވާމީ ގޮތުން 2018ވަނަ އަހަރު ތަޢާރަފުކޮށް ފާހަގަކުރަމުން އައިކަމަށް ވިޔަސް މި ދުވަސް ދިވެހިރާއްޖޭގައި މި އަހަރު މި ފާހަގަކުރީ ފުރަތަމަ ފަހަރަށެވެ. މުޅީން އަލަށެވެ.

ރާއްޖޭގައި މުޅިން އަލަށް ފާހަގަކުރާ އީ-ކުނީގެ ދުވަހުގެ ހަރަކާތްތައް، ތަޖުރިބާކާރުންގެ ޕެނަލް ޑިސްކަޝަނާއެކު ހައްދުންމަތީގައި ބޭއްވިކަމީ ހައްދުންމައްޗަށް ލިބުނު ވަރަށް ބޮޑު ޝަރަފެކެވެ. އެ ދަންފަޅިތައް އިއްޔެ ހެނދުނު ފަށައި، ރޭ ވަނީ ހުރިހައި ޙަރަކާތެއް ނިންމަވައިލައްވައިފައެވެ.

ރާއްޖޭގައި ފުރަތަމަ ފަހަރަށް މި ދުވަސް ފާހަގަކުރުމަށް ޓަކައި، މިއަހަރުގެ ހަރަކާތްތައް ބޭއްވީ ރާއްޖޭގެ އެންމެ ބޮޑު ރަށްކަމަށްވާ ހައްދުންމަތީ ގަމުގައެވެ. މި ދުވަހާ ގުޅިގެން ބޭއްވި ހަރަކާތްތައް އިންތިޒާމުކޮށްފައިވަނީ، ހައްދުންމަތީ ގަމު ކައުންސިލާއި ”ކްލީން މޯލްޑިވްސް“ ގުޅިގެންނެވެ.

އީ-ކުނީގެ ދުވަހުގެ ހަރަކާތްތައް ބާއްވައިފައިވަނީ ހައްދުންމަތީ ގަމުގައި ހުންނަ އިހައްދޫ ސްކޫލުގެ ޖަލްސާކުރާ މާލަމުގައެވެ. ހޯލުގަ އެވެ. އިއްޔެ ހެނދުނު ވަނީ ފެށުމުގެ ރަސްމިއްޔާތަކާ އެކު، އީ-ކުންޏާ ބެހޭ ގޮތުން މައުލޫމާތު ދެއްވުމުގެ ދަންފަޅިތަކެއް ބާއްވަވައިފައެވެ.

މައުލޫމާތު ދެއްވުމުގެ ދަންފަޅީގައި އެންމެ ފުރަތަމަ މަޢުލޫމާތު ދެއްވައިފައިވަނީ އީ-ކުނީގެ ސަބަބުން ތިމާވެއްޓަށް ލިބޭ ގެއްލުމުގެ މައްޗަށެވެ. މި ސެޝަން ނަންގަވައިދެއްވީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ އެންވަޔަރަމެންޓް މެނޭޖަރ، އަލްފާޟިލް ޙުސައިން އަރުބާން ފައްވާޒެވެ. އަދި އީ-ކުނި ނައްތައިލުމާ ގުޅޭ ގޮތުން މަޢުލޫމާތުދެއްވީ ކްލީން މޯލްޑިވްސްގެ ބޯޑު މެންބަރު، އަލްފާޟިލާ އާއިޝަތު އުޝްނާ ނަސީމެވެ.

އީ-ކުންޏާ ބެހޭ ތަޖުރިބާކާރުން<br>

އިއްޔެ ބޭއްވި ޕެނަލް މަޝްވަރާތަކުގައި ޕެނަލިސްޓުންގެ ގޮތުގައި ތިއްބެވީ އިގުތިޞާދާއި މުއާޞަލާތާ ބެހޭ ތަޖުރިބާކާރު މާހިރެއްކަމުގައިވާ، ޕިކް މޯލްޑިވްސްގެ ފައުންޑަރ އަލްފާޟިލް ރިޢާޔަތު ޢަބަދުލްމަޖީދާއި، ވޭސްޓް މެނޭޖްމެންޓް ކޯޕަރޭޝަން (ވެމްކޯ)ގެ މެނޭޖިންގ ޑިރެކްޓަރ މުޖުތަބާ ޖަލީލާއި، ކުރީގެ މިނިސްޓަރ އޮފް ސްޓޭޓް ފޮރ އެންވައިރަންމެންޓް، ކްލައިމެޓް ޗޭންޖް އެންޑް ޓެކްނޮލޮޖީ، އަލްފާޟިލް މުޙަންމަދު ޝަރީފާއި، މިނިސްޓަރ އޮފް ކްލައިމެޓް ޗޭންޖް، އެންވައިރަންމެންޓް އެންޑް އެނަރޖީގެ ނާއިބު އަޙުމަދު ނިޒާމެވެ.

މިއަދުގެ ހަރަކާތްތަކުގައި ގަމު ކައުންސިލްގެ ރައީސް އަލްފާޟިލް އަޙުމަދު ޒަކީއާއި، ގަމު ކައުންސިލްގެ މެންބަރުންނާއި ޙަމަދު ބިން ޚަލީފާ އާލް ޘާނީ ސްކޫލްގެ ޕްރިންސިޕަލް އަލްފާޟިލް މުޙަންމަދު ޝައުކަތާއި އިހައްދޫ ސްކޫލްގެ ޕްރިންސިޕަލް، އަލްފާޟިލް މުޙަންމަދު ނަޒީލް ވަނީ ބައިވެރިވެވަޑައިގެންފައެވެ. މީގެ އިތުރަސް، ގަމު ވެމްކޯ މުވައްޒަފުން ވެސް ވަނީ މި ދަންފަޅިތަކުގައި ބައިވެރިވެވަޑައިގެންފައެވެ.

އީ-ކުނީގެ ދުވަސް ފާހަގަކުރުމުގެ ގޮތުން ބޭއްވި ކުރެހުމުގެ މުބާރާތެއް އިއްޔެ ވަނީ ބާއްވައިފައެވެ. މި ހަރަކާތްތަކާ އެކު ނިންމުމުގެ ރަސްމިއްޔާތު ވެސް ރޭ ވަނީ އިހައްދޫ ސްކޫލުގެ ޖަލްސާކުރާ މާލަމުގައި ބާއްވައިފައެވެ.

އިލެކްޓްރޯނިކްސް އާއި އިލެކްޓްރިކް އާލަތްތައް ބޭނުންކުރުން މިއަދު އިތުރުވެފައިވާ އިރު، ބޭނުންކޮށް އެއްލައިލާން ޖެހޭ މި ފަދަ ކުދިބުނީގެ ސަބަބުން އިންސާނުންގެ ޞިއްޙަތަށާއި ތިމާވެއްޓަށް ވަރަށް ބޮޑެތި ގެއްލުންތަކެއް ލިބެއެވެ. ވީމާ، ރައްކާތެރިކަމާ އެކު މި ފަދަ ކުނިބުނި ނައްތައިލެވޭ ގޮތްތަކާއި، އުކައިލެވޭ މި ފަދަ ތަކެތީން އެހެން ބޭނުންތަކެއް ކުރެވޭނެ ގޮތްތަކެއް އަޅުގަނޑުމެން ވަނީ ދަސްކުރާން ޖެހިފައެވެ. އެހެންކަމުން ހައްދުންމަތީގައި މި ބޭއްވި ދަންފަޅިތަކުން ރައްޔިތުންނަށް ވަރަށް ބޮޑު ހޭލުންތެރިކަމެއް ލިބިއްޖެކަމަށް މި ދަންފަޅިތަކުގައި ބައިވެރިވި މީހުން ވަނީ ބުނެފައެވެ.