ފަރަގު މީޑިއާ

ތިލަދުންމަތީ އުތުރުބުރީ އަތޮޅު ކައުންސިލަކީ އަބަދު ވެސް ތަރައްގީއަށް ޓަކައި ވަރަށް ބޮޑަށް މަސައްކަތްކުރާ ކައުންސިލެއްކަމަށް ދެންނެވުމަކީ އެހެން ކައުންސިލަކުން އެ ގޮތަށް މަސައްކަތް ނުކުރެޔޭ ދެންނެވުންކަމަކަށް ނުވާނެއެވެ. ހއ. އަތޮޅުގެ ކައުންސިލުތަކުގައި މަސައްކަތްކުރާ މުވައްޒަފުންނަށް ތާޒާކުރުމުގެ ކޯސްތަކާއި ހުނަރުވެރިކުރުމުގެ ތަމްރީނު ޕްރޮގްރާމްތައް އަތޮޅު ކައުންސިލުން ހިންގަވައެވެ. ތަފާތު މަހާސިންތާތައްކާއި މަސައްކަތު ބައްދަލުވުންތައް ބާއްވަވައެވެ.

ހއ. އަތޮޅު ކައުންސިލުން ވިދާޅުވާ ގޮތުގައި އެއީ ކައުންސިލުން ރައްޔިތުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅުކުރުމަށް ޓަކައި ކުރާ ކަމެކެވެ. މި ގޮތަށް މުވައްޒަފުންނަށް އަޕް-ސްކިލްއާއި ރި-ސްކިލް ތަމްރީނުތައްދީގެން އެކަނި، ފަރުޖައްސައިލާކަށް އެ ކައުންސިލަކުން ބޭނުންފުޅެއް ނޫނެވެ. މިހާރު ކައުންސިލުން އަމާޒުހިއްޕަވައިފައި ވަނީ ސީދާ ކައުންސިލުން ޚަރަދުކުރައްވައިގެން މުވައްޒިފުންގެ ތަޢުލީމީ ފެންވަރު މަތިކުރެއްވުމަށް ޓަކއި ކޮލެޖް/ޔުނިވަރސިޓީތަކުގެ ޑިގްރީ ޕްރޮގްރާމްތަކުގައި ބައިވެރިކުރައްވާށެވެ.

ހއ. އަތޮޅު ކައުންސިލްގެ މި ދެންނެވި ސިޔާސަތުގެ ދަށުން އެ ކައުންސިލުން ނިންމަވައިފައި ވަނީ ކޮލެޖު/ޔުނިވަރސިޓީތަކުން ހިންގާ ފަންނީ ކޯސްތަކުގައި ހއ. އަތޮޅުގެ ކައުންސިލްތަކުގެ މުވައްޒަފުން ބައިވެރިކުރައްވައި އެ ފަރާތްތަކަށް މާލީ އެހީތެރިކަން ފޯރުކޮށްދެއްވައިގެން އެ ކަމަށް މުވައްޒަފުން ޝައުޤުވެރިކުރުއްވާށެވެ. އަތޮޅު ކައުންސިލްގެ ހަތަރުވަނަ ދައުރުގެ 139ވަނަ ޖަލްސާއިން ފާސްކުރެއްވި މި ސިޔާސަތުގެ ދަށުން މި ކަމަށް ބޭނުންވާ ފަރާތަތަކުން ކުރިމަތިލާން މީގެ ކުރީން ވަނީ އެ ކައުންސިލުން ފުރުޞަތު ހުޅުވައިލައްވައިފައެވެ. މި ޕްރޮގްރާމުގެ ދަށުން މި އަހަރު ހުޅުވައިލެއްވި ފުރުޞަތުގައި އެ ކަމަށް އެދި ހުށައެޅި ދެ މުވައްޒަފުންނަށް އިއްޔެ ވަނީ މާލީ އެހީތެރިކަން ފޯރުކޮށްދެއްވައިފައިކަމަށް އެ ކައުންސިލުން މިއަދު ޚަބަރު ލިބިއްޖެއެވެ.

އަތޮޅު ކައުންސިލްގެ ރައީސް މޫސާ ޝަފީޤު (ކ)އާއި އަތޮޅު ކައުންސިލްގެ ސީނިއަރ ކައުންސިލް އޮފިސަރ އަލްފާޟިލާ ދީމާ ޙަސަނާ (ވ) އެއްބަސްވުމުގައި ސޮއިކުރައްވަނީ. (ފޮޓޯ: ހއ. އަތޮޅު ކައުންސިލް)<br>

އިއްޔެ މާލީ އެހީތެރިކަން ފޯރުކޮށްދެވިފައިވާ ދެ މުވައްޒަފުންގެ ތެރެއިން ކޮންމެ މުވައްޒަފަކަށް 37 ހާސް ފަސް ސަތޭކަ ރުފިޔާގެ ފައިސާގެ އެހީވަނީ ޙަވާލުކުރައްވައިފައެވެ. މި އަހަރު މި އެހީ ފޯރުކޮށްދެވުނު ދެ މުވައްޒަފުންނަކީ ހއ. އަތޮޅު ކައުންސިލްގެ ސީނިއަރ ކައުންސިލް އޮފިސަރ އަލްފާޟިލާ ދީމާ ޙަސަނާއި މި އަތޮޅު އިހަވަންދޫ ކައުންސިލްގެ ކައުންސިލް އޮފިސަރ އަލްފާޟިލް އިބްރާހީމް ސުހައިލެވެ. 

މާލީ އެހީތެރިކަން ފޯރުކޮށްދެއްވުމުގެ އެއްބަސްވުމުގައި ސޮއިކުރެއްވުމަށް ޓަކައި އިއްޔެ ހެނދުނު 10 ޖެހި އިރު، ހއ. އަތޮޅު ކައުންސިލްގެ ޖަލްސާކުރާ މާލަމުގައި ބޭއްވެވި ރަސްމިއްޔާތުގައި މި ދެ މުވައްޒަފުންގެ އިތުރަށް ކައުންސިލްގެ ފަރާތްޕުޅުން ސޮއިކުރެއްވީ ކައުންސިލްގެ ރައީސް އަލްފާޟިލް މޫސާ ޝަފީޤެވެ.

މިއީ، 2024 ވަނަ އަހަރު ހއ. އަތޮޅު ކައުންސިލުން ތައްޔާރުކުރައްވައިފައިވާ މަސައްކަތުގެ ތަދުބީރުގައި ހިމަނުއްވައިގެން ހިންގަވާ މަޝްރޫޢެކެވެ. މި މަޝްރޫޢު ހިންގަވާން އިސްވެ ދެންނެވުނު ފަދައިން ކައުންސިލުން ވަނީ ކުރީން ފާސްކުރައްވައިފައެވެ.

މި މަޝްރޫޢޫގެ މަގުސަދަކީ އަތޮޅު ކައުންސިލާއި ރަށު ކައުންސިލްތަކުގައި މަސައްކަތްކުރާ މުވައްޒަފުން ވަޒީފާގައި ކުރިއަށް ދިއުމަށާއި މުވައްޒަފުންގެ ތެރޭގައި އިސްވާރުކަން ކުރިއަރުވައި، މުވައްޒަފުންގެ ފެންވަރު މަތިކުރައްވައި، ފަންނީ ދާއިރާތަކުން ތަމްރީން ލިބިފައިވާ ޤާބިލް ބަޔަކަށް މުވައްޒަފުން ހެއްދެވުމެވެ. މި ކަމުގެ ސަބަބުން ކައުންސިލުތަކުން ރައްޔިތުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅުވެ ހަލުވިވާނެކަމަށް ކައުންސިލުން އުންމީދުކުރައްވައެވެ.

މި މަޝްރޫޢުގެ ނަތީޖާއަށް ބައްލަވައި ރާއްޖޭގެ އެހެން އަތޮޅު ކައުންސިލްތަކުން ވެސް މި ފަދަ މަޝްރޫޢުތައް ހިންގަވާނެކަމަށް "ފަރަގު" އުންމީދުކުރެއެވެ.

____________________________________________

މާލަން     ނ.    ގިނަބަޔަކު ޖަލްސާއެއް ކުރާން ބައްދަލުވުމަށް ޓަކައި ނުވަތަ ޝޯ އެއް ބަލާން ނުވަތަ ޕާޓީއެއް ބާއްވާން ބޭނުންކުރާ ބޮޑު ކޮޓަރިއެއް ނުވަތަ އިމާރާތެއް.

އިސްވާރު   ނ.    (1) އިސްވެ ހުންނަ މީހާ (2) ވެރިޔާ

ތަދުބީރު    ނ.    (1) ކަމެއްގެ މައްޗަށް ފުންކޮށް ވިސްނައި ރާވާ ރޭވުން. (2) ޙިކުމަތް.

މަޝްރޫޢު   ނ.    ވަކި މުއްދަތެއްގެ ތެރޭގައި ވަކި މަގުސަދުތަކެއް ޙާސިލު ކުރުމަށް ރާވާ ރޭވުން.

ނަތީޖާ     ނ.    ކުރި ކަމަކުން ޙާސިލުވި ކަމެއް.

ރަސްމިއްޔާތު ނ.    ވަކި ކަމަކަށް ޓަކައި ރަސްމީ ގޮތުން ބާއްވާ ޖަލްސާ