ފަރަގު މީޑިއާ

ޖުމުލަ 92 ބައިވެރީން ވާދަކުރި ބައިނަލްއަގުވާމީ ޤުރުއާން މުބާރާތަކުން ދިވެހިރާއްޖެއަށް ފަޚުރުވެރި ވަނައެއް ލިބިއްޖެއެވެ. މި ވަނަ ރާއްޖެއަށް ލިބުނީ މި މަހު ފަހަކުން 12އަށް މެލޭޝިއާގެ ވެރިރަށް ކުއަލާ ލުމްޕޯރުގައި ބޭއްވި 64ވަނަ "މެލޭޝިއަން އިންޓަނޭޝަނަލް އަލްގުރްއާން ރިސައިޓޭޝަން އެންޑް މެމޮރައިޒޭޝަން އެސެމްބްލީ" (އެމްޓީއެޗްކިއުއޭ) މުބާރާތުންނެވެ.

މެލޭޝިއާގައި ބޭއްވި ބައިނަލްއަޤްވާމީ މި ޤުރުއާން މުބާރާތުގައި ރާއްޖެ ތަމްސީލްކުރީ މި އަހަރު ރާއްޖޭގައި ބޭއްވި ކީރިތި ޤުރުއާން ކިޔެވުމުގެ 36ވަނަ ޤައުމީ މުބާރާތުން ޙާފިޡުންގެ ބައިން އެއް ވަނަ ހާސިލްކޮށްފައިވާ ފާޠިމަތު ޝާޔާ ޒާހިރެވެ. މި މުބާރާތުގައި ފާޠިމަތު ޝާޔާ ވަނީ މުޅި މުބާރާތުން ތިންވަނަ ހޯދައިފައެވެ.

މި މުބާރާތުގައި 71 ގައުމަކުން 92 ބައިވެރިއަކު ވާދަކުރިއެވެ. އެއީ ބަލައިގެން ކިޔެވުމުގެ ގޮފީން 53 ބައިވެރިއަކާއި ނުބަލައި ކިޔެވުމުގެ ގޮފީން 39 ބައިވެރިއެކެވެ. މިއިން ކޮންމެ ބައަކުން ވެސް އެއް ވަނަ ހޯދާ ދަރިވަރަކަށް 40 ހާސް ރިންގިޓާއި 12 ހާސް ރިންގިޓުގެ އަގުހުރި ރަން ބާރއަކާއި އެހެނިހެން އިނާމުތަކާއި ސެޓުފިކެޓު ދެއްވައެވެ.

ފާޠިމަތު ޝާޔާ ޒާހިރަކީ މި ދިޔަ އަހަރުގެ އެޕުރީލު މަހު މިޞްރުގައި ބޭއްވި ގުރުއާން މުބާރާތަކުން ދެވަނަ ހޯދައިފައިވާ ދަރިވަރެއްކަން ވެސް މި ފުރުޞަތުގައި ފާހަގަކޮށްލަމެވެ.

ކޮންމެއަކަސް މިހައި ގިނަ ގައުމުތަކަކުން ވާދަކުރި މުބާރާތެއްގައި ދިވެހިރާއްޖެއިން ތިންވަން ހޯދުމަކީ ވަރަށް ބޮޑު ކަމިޔާބީއެކެވެ. ޝާޔާ މި ހޯދި ކާމިޔާބީއަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވަނީ މަރުބާ ވިދާޅުވެފައެވެ. ވަޒީރު ވިދާޅުވީ ޝާޔާ ހޯދި ކާމިޔާބީއަކީ ރާއްޖެއަށް ލިބުނު ފަޚުރެއްކަމަށެވެ.

މި ކާމިޔާބީ ފާހަގަކޮށް ކީރިތި ޤުރުއާނާ ބެހޭ ޤައުމީ މަރުކަޒުގެ ފަރާތުން ވަނީ ޝާޔާގެ ބައްޕައާ ގުޅުއްވައި ތަހުނިޔާ އަދާކުރައްވައިފައެވެ.

އެއްވެސް ޝައްކެއް ނެތް ގޮތުގައި މި ކާމިޔާބީއަކީ ބެލެނިވެރީންނާއި ދިވެހި ސަރުކާރު ގުޅިގެން ކުރި މަސައްކަތުގެ ނަތީޖާއެވެ. މި މަތިވެރި ކާމިޔާބީއަށް ޓަކައި ފަރަގު މީޑިއާގެ ފަރާތުން ވެސް ޝާޔާއަށާއި ޝާޔާގެ ޢާއިލާއަށް ތަހުނިޔާ ރައްދުކުރަމެވެ. އަދި ޤުރުއާނުގެ ޢިލްމު ފެތުރުއްވުމަށް ޓަކައި ކީރިތިޤުރުއާނާ ބެހޭ ޤައުމީ މަރުކަޒާއި އިސްލާމީ ކަންތައްތަކާ ބެހޭ ވުޒާރާއިން ކުރައްވާ ބުރަ މަސައްކަތް ފާހަގަކޮށް މި ފުރުޞަތުގައި ދިވެހި ސަރުކާރަށް ވެސް ޝުކުރުދަންނަވަމެވެ.

ނަތީޖާ ފާޅުކޮށް ވަނަވަނައަށް އައި ފަރާތްތަކަށް އިނާމު ދިނުމަށް ޓަކައި ކުއާލާ ލުމްޕޯރގެ ވޯލްޑް ޓްރޭޑް ސެންޓަރގައި މި ދިޔަ ހުކުރުވިލޭރޭ ބޭއްވި ޚާއްޞަ ޖަލްސާ ޝަރަފުވެރިކޮށްދެއްވީ މެލޭޝިއާގެ ބޮޑު ރަސްގެފާނު (ޔަންގ ޑި ޕަރްތުއާން އަގޮންގ) ސުލްޠާން އިބްރާހީމާއި ރާނީ ރާޖާ ޒަރިތު ސޯފިއާއެވެ. މީގެ އިތުރަށް ސަބާހ އިސްޓޭޓްގެ ރަސްގެފާނު ތޫން ޖަޢުފަރު މާހިރުއްދީނާއި އެ ރަދުންގެ އަނބިކަނބަލުން ތޮހ ޕުއާން ނޫރުލިދާއާއި ބޮޑުވަޒީރު އޮފީހުގެ ދީނީ ކަންތައްރަކާ ބެހޭ ވަޒީރު ދާތޫ މުޙަންމަދު ނަޢީމް މުޚުތާރު ވެސް މި ރަސްމިއްޔާތުގައި ބައިވެރިވަވަޑައިގެން ބައެއް ވަނަތަކަށް އިނާމުދެއްވިއެވެ.

މި މުބާރާތުގެ ކިޔެވުމަށް އިންސާފުކުރެއްވީ 15 ފަނޑިޔާރުންގެ ޓީމަކުންނެވެ. މި ޓީމުގައި ހިމެނިވަޑައިގަތީ މަޣުރިބުކަރައާއި ތުރުކީވިލާތާއި ސަޢޫދީ ޢަރަބިއްޔާއާއި އިންޑޮނޭޝިއާގެ ޤާރީންނެވެ. އިންސާފުކުރެއްވުމުގައި ފަނޑިޔާރުން ސަމާލުކަންދެއްވި މައިގަނޑު ހަތަރު ދާއިރާއަކީ ތަޖުވީދާއި ފަޞާޙާއާއި އަޑު ކޮންޓްރޯލްކުރުމާއި ހިތުންކިޔުމުގެ ބަރާބަރުކަމެވެ.

މި މުބާރާތަކީ މެލޭޝިއާ ސަރުކާރުން ވަރަށް ޚާއްޞަ އިސްކަމެއް ދެއްވައިގެން ކޮންމެ އަހަރަކު ބާއްވަމުން އަންނަ މުބާރާތެކެވެ.

މެލޭޝިއާގައި މި ބޭއްވި ބައިނަލްއަގުވާމީ މުބާރާތުން ވަރަށް ޚާއްޞަ އެހެން ކަމެއް "ފަރަގު" މީޑިއާއަށް ފާހަގަކުރެވުނެވެ. މި މުބާރާތަކީ ބައިނަލްއަގުވާމީ މުބާރާތަކަށް ވިޔަސް މުޅި މުބާރާތުގެ ހުރިހައި ލިޔެކިޔުންތަކެއް މެލޭޝިއާގެ ޤައުމީ ބަހުން ލިޔެފައިވާކަމެވެ. ތިޔަ ފެނިވަޑައިގަންނަވާ ފޮޓޯއިން ފާހަގަކުރެއްވޭނެ ގޮތުގައި އެންމެ މަތީގައި އެ ވަނީ މުބާރާތުގެ ނަން މެލޭޝިއާގެ ސަގާފީ އަކުރުކަމުގައިވާ ޖާވީ އަކުރުން ލިޔެފައެވެ. އޭގެ ތިރީގައި އިނގިރޭސިބަހުން މުބާރާތުގެ ނަން ލިޔެފައި ވިޔަސް ދެން އެހެން ހުރިހައި މަޢުލޫމާތެއް ލިޔެފައި ވަނީ ހަމައެކަނި މޭލޭ ބަހުން ލެޓިން އަކުރުންކަމެވެ. ތެމްޕަތު ކަތިގާ (Tempat Ketiga) (ވަނަ: ތިންވަނަ)، މަރްކާހ (Markah) (ލިބުނު މާކުސް ނުވަތަ ސްކޯރ)، ނަމާ (Nama) (ނަން)، ނެގާރާ (negara) (ގައުމު)، މި ހުރިހައި މަޢުލޫމާތެއް ލިޔެފައި ވަނީ ހަމައެކަނި މެލޭބަހުންކަމެވެ. އެހެން ބަހަކުން މި މަޢުލޫމާތު ލިޔެފައި ނުވެސް ނެތްކަމެވެ.

މިއީ ދިވެހީން ބޭރު ގައުމުތަކުން ދަސްކުރާން ވެއްޖެ ފިލާވަޅެއްކަމެއް ދިވެހީންނަކަށް ނޭނގެއެވެ. ދިވެހީންނަށް ހީވަނީ ދިވެހިރާއްޖޭގައި ބޭރު މީހުން ބައިވެރިވާ ގޮތަށް އެއްވެސް ކަމެއް ބޭއްވިޔަސް ދިވެހިބަހުން ލިޔުމަކީ ހަރާންކަމެއް ހެންނެވެ. އަދި ދިވެހިބަހުން ލިޔެފި ނަމަ، ބޭރު މީހުން މަލާމާތްކުރާނެހެންނެވެ. ނަމަވެސް ކަން އޮތީ އޭގެ އަނެއް ކޮޅަށެވެ. އެ ބަޔެއްގެ ގައުމީ ބަހުން ނުލިޔުނީމާ ބޭރު މީހުން ކުރާނީ މަލާމާތެވެ. ދިވެހިބަހާއި ދިވެހި ގައުމިއްޔަތަށް ދިވެހީން ސަމާލުކަން ނުދޭކަން ސާފުވުން ފިޔަވައި އެހެންކަމެއް އެ ފަދަ ކަންކަމުން ދޭހައެއް ނުވާނެއެވެ.

އެހެން ބަހަކުން ލިޔުމަކީ މައްސަލައެއް ނޫނެވެ. ނަމަވެސް ދިވެހިރާއްޖޭގައި އޮންނަ ކަމެއްގައި ދިވެހިބަސް ބޭނުންނުކުރުމަކީ މައްސަލައެކެވެ. ވީމާ، ބައިނަލްއަގުވާމީ މުބާރާތްތަކުން ވަނަތައް ހޯދާ އިރު, ގައުމިއްޔަތުގެ މި ފަދަ ކަންކަމާ މެދު ވެސް ދިވެހީން ސަމާލުކަން ދޭން އެބަ ޖެހެއެވެ. އަދި ދިވެހިބަހާ ބެހޭ ވުޒާރާއިން ވެސް މި ފަދަ ކަންކަމަށް ދައުލަތުގެ މުއައްސަސާތައް ހޭލުންތެރިކުރުވާން އެބަ ޖެހެއެވެ. ގައުމިއްޔަތު ދިރުވައި އާލާކުރުމަށް ޓަކައި މި ފަދަ ކަންކަމަށް ސަމާލުކަން ދޭން ޖެހޭނެއެވެ. (ގިނަ މަޢުލޫމާތު: މެލޭޝިއާގެ ރަސްމީ ނޫސް އެޖެންސީ "ބަރްނާމާ")

_____________________________