ފަރަގު މީޑިއާ

ދިވެހިރާއްޖޭގެ ވެރިރަށް މާލެ ހިމެނޭ ގޮތަށް ދިވެހިރާއްޖޭގެ 22 ރަށެއްގައި 29 މިސްކިތެއްގައި ކުޑަކުދީންނަށް ޤުރުއާން ކިޔަވައިދނުމުގެ ޚާއްޞަ ޕްރޮގްރާމެއް މިއަދު އިސްލާމީ ކަންތައްތަކާ ބެހޭ ވުޒާރާއިން ފައްޓަވައިފިއެވެ. މި ޕްރޮގްރާމް ފައްޓަވައިދެއްވީ އިސްލާމީ މަރުކަޒުގެ ސެމިނާރު ކޮޓަރި 1ގައި މިއަދު 10:00ގައި ދާދިވަރުކޮށް ބޭއްވި ޚާއްޞަ ރަސްމިއްޔާތެއްގައި އިސްލާމީ ކަންތައްތަކާ ބެހޭ ވަޒީރު ޑރ. މުޙަންމަދު ޝަހީމު ޢަލީ ސަޢީދެވެ.

މި ރަސްމިއްޔާތުގައި އިމާމުންނާއި މުދައްރިބުންނާ މުޚާޠަބު ކުރައްވައި ވަޒީރު ވިދާޅުވީ، މި ކަމަކީ އިސްލާމީ ވުޒާރާގެ އެއްވެސް މަޖުބޫރީއެއް އެއްވެސް އުޖޫރައެއް ނެތި ﷲގެ ދަރުމަ އެދިގެން ހިލޭ ސާބަހަށް އިމާމުން ކުރައްވާ ހެޔޮ ޢަމަލެއްކަމަށެވެ. އަދި މީސްތަކުންކުރެ އެންމެ ހެޔޮ ބަޔަކީ ޤުރުއާން އުނގެނި އެ ޤުރުއާން އުނގަންނައިދޭ މީހާކަން ޙަދީޘުގެ އަލީގައި ހާމަކުރެއްވިއެވެ.

ވަޒީރުގެ ވާހަކަފުޅު ކުރިއަށް ގެންދަވަމުން ވިދާޅުވީ ރާއްޖޭގެ އެތައް ސަރަހައްދެއްގައި ހިލޭ ސާބަހަށް ޤުރުއާން ކިޔަވައިދޭން ޝައުގުވެރިވާ ފަރާތްތަކެއް ތިބިކަމީ އުފާ ކުރައްވާކަމެއްކަމަށާއި އަދި [އިރާދަކުރެއްވިއްޔާ] މި މަތިވެރި ދީނީ މަސައްކަތުން ޢިލްމީ މޮޅު ދަރީންތަކެއް އުފެދޭނެކަމަށެވެ. އެ މަނިކުފާނު ވިދާޅުވި ގޮތުގައި ޤުރުއާން ކިޔަވައިދިނުމުގެ އިތުރަށް ނަމާދުގައި ކިޔާތަކެތި ދަސްކޮށްދީ ރަނގަޅު ތަރުބިއްޔަތު ދަސްކޮށްދިނުމަކީ ޤުރުއާން ކުލާހަކުން ހާސިލްވާނެއެވެ. އަދި ތިމާއަށް ލިބިފައިވާ އިލްމެއް އެހެންބަޔަކަށް އަގަކާ ނުލައި ފޯރުކޮށްދިނުމުގެ މަތިވެރިކަން ހާމަކުރައްވަމުން ޢިލްމު ފެތުރުމުގެ ހުރިހައި ކަމަކީ ފައިސާއާ ގުޅިފައިވާ ކަމަކަށް ވެގެން ނުވާނެކަމަށް ވެސް އެމަނިކުފާނު ވިދާޅުވިއެވެ.

މިއީ ކުރީން ރާއްޖޭގެ ސަގާފަތުގައި އޮތް ޤުރުއާންކިޔެވުމާއި ކިޔަވައިދިނުމުގެ ރީތި އަލުން ދިރުވައި އާލާކޮށް ރީތިކޮށް ޤުރުއާންކިޔަވާ ޤާރީންނާއި ޙާފިޒުން އުފައްދަވައި، މުޅި ރާއްޖޭގައި ޤިރާއަތުގެ ޢިލްމާއި ޤުރުއާނުގެ ޢިލްމު ފެތުރުއްވުމަށް ހިންގަވާ ޚާއްޞަ ޕްރޮގްރާމެކެވެ. ރަށްރަށުގެ ކައުންސިލުތަކުގެ އެއްބާރުލެއްވުމާ އެކު، ހިލޭ ސާބަހަށް ހިންގަވާ ޕްރޮގްރާމެއްކަން ފާހަގަކޮށްލެވެއެވެ.

ރާއްޖޭގެ ހުރިހައި ރަށެއްގެ މިސްކިތްތަކުގައި ހިލޭ ސާބަހަށް ''މިސްކިތު ޤާރީ ކިލާސް'' ހިންގުމަކީ ރައީސުލްޖުމްހޫރިއްޔާ ޑރ. މުޙަންމަދު މުޢިއްޒުގެ ރިޔާސީ ވަޢުދުފުޅުގައި ހިމެނޭ މިސްކިތްތަކުގެ ދައުރު ފުޅާކުރުމުގެ މަގުސަދުގެ ތެރޭގައި ވެސް ހިމެނޭކަމެއް ކަމަށް ވަޒީރު ވިދާޅުވިއެވެ. އިސްލާމީ ކަންތައްތަކާ ބެހޭ ވަޒީރު ވިދާޅުވީ މި މަސައްކަތް ކާމިޔާބު ކަމާއެކު ކުރިއަށް ގެންދިއުމަށް ސަރުކާރުގެ އެއްބާރުލުން ލިބޭނެކަމަށެވެ. އަދި މިސްކިތްތަކުގެ ދޮރުތައް އަބަދުވެސް ހުންނާނީ މި ފަދަ މަތިވެރި މަސައްކަތްތަކަށް ހުޅުވިފައި ކަމަށެވެ. ކިޔަވާން އަންނަ ކުދީންގެ ސަލާމަތާއި ރައްކާތެރިކަން ކަށަވަރުކުރުމަކީ ވަރަށް މުހިންމު ކަމެއްކަން ފާހަގަކުރައްވައި ރިވެތި ގޮތުގައި އެ ކުދިންނާ މުޢާމަލާތް ކުރުމަށް ވަޒީރު ވަނީ އެދިވަޑައިގެންފައެވެ.

މިސްކިތްތަކުގެ އިމާމުންނާއި އަދި މަދު ރަށެއްގައި އިމާމުންކަމުގައި ހިމެނިވަޑައިނުގަންނަވާ ބޭފުޅުން ވެސް މި ފަދަ ކުލާސްތައް ނަންގަވައިދެއްވަނީ ހަމައެކަނި ﷲއަށް ޓަކައެވެ. އެ ކަލާންގެ ޙަޟުރަތުން ސަވާބާއި ދަރުމަ އެދިވަޑައިގެންނެވެ.

މިއަދު ތަޢާރަފުކުރެއްވި މިސްކިތު ޤާރީ ކިލާސްތަކުގެ ކިޔެވުން އޮންނާނީ އާންމު ގޮތެއްގައި ޢަސްރު ނަމާދަށް ފަހުގައްޔާއި މަޣުރިބު ނަމާދަށް ފަހުގައެވެ. ގިނަ މިސްކިތްތަކުގައި ކިލާސްތައް ބާއްވަނީ މަޣުރިބު ނަމާދަށް ފަހުގައެވެ.

މިއަދުގެ ރަސްމިއްޔާތުގައި ހުޅުމާލޭ ދެވަނަ ފިޔަވަހީގައި ހުންނަ މަސްޖިދު ޢުޘްމާން ބްނު ޢައްފާނިގައި އޮތް ކިލާހުގެ ތަންކޮޅެއް ދައްކައިލުން ވެސް އޮތެވެ. އެ ކުލާހުގައި ކިޔަވައިދެއްވީ މިސްކިތުގެ އިމާމު ޢަބްދުލްޙަމީދެވެ.

އެނގިވަޑާއިގަންނަވާނޭ ފަދައިން ރަށްރަށުގެ މިސްކިތްތަކުގައި މިސްކިތު ކިލާސް ބޭއްވުމަކީ 1980ގެ އަހަރުތަކުގައި ވަރަށް މަޝްހޫރުވެގެން ދިޔަ ޚިދުމަތެވެ. މަޢުހަދުއްދިރާސާތިލއިސްލާމިއްޔާއިން ހިންގެވި މި ކިލާސްތަކުން އުފަންވި ޤާރީން މިއަދު ޚިދުމަތުގައި ވެސް އެބަ އުޅުއްވައެވެ.

ރައީސުލްޖުމްހޫރިއްޔާ ޑރ. މުޙަންމަދު މުޢިއްޒުގެ ޤައުމީ ސިޔާސަތުގެ ދަށުން ރާއްޖޭގެ ކަންކޮޅުތަކުގައި އިސްލާމީ ރިސާލަތު ފެތުރުއްވުމުގެ ގިނަގުނަ މަސައްކަތްޕުޅުތަކެއް އިސްލާމީ ކަންތައްތަކާ ބެހޭ ވުޒާރާއިން ކުރައްވަމުން ގެންދަވާކަން ފާހަގަކޮށްލެވެއެވެ. ޤާރީންނާއި ޙާފިޡުންގެ އިތުރަށް އިމާމުންނާއި ޚަޠީބުން ތާޒާކުރެއްވުމާއި ޖަމާޢަތްތެރީން އުފެއްދެވުމާއި ޒަކާތާ ބެހޭ ގޮތުން ހޭލުންތެރިކަން އިތުރުކުރުމާއި ދީނީ މަޢުލޫމާތު ފެތުރުމުގެ ގިނަގުނަ ޙަރަކާތްތަކެއް މިހާރު ވެސް ކުރިއަށް އެބަ ގެންދަވައެވެ. އަދި ޒުވާން ޚަޠީބުން ތަމްރީނުކުރެއްވުމާއި ވަޤުފު ޢިމާރާތްތައް ބިނާކުރުން ވެސް ހިމެނެއެވެ.