ފަރަގު މީޑިއާ

"ރައްކާވެ ތިބިއްޔާ ދަތުރެވެ." މިއީ ދިވެހީން ބޭނުންކޮށް އުޅޭ ހަރުބަހެކެވެ. މާނައަކީ ރައްކާތެރިކަމާއި ސަލާމަތްތެރިކަމާއެކު ހިކިފަސް ތަނެއްގައި ތިބިއްޔާ ދަތުރުކުރާނެ ފުރުޞަތު ލިބޭނެއެވެ. ކަނޑުގަދަ ވިއްސާރަ މޫސުމުގައި ކަނޑުދަތުރުފަތުރަށް ފުރުމަކީ ރައްކާތެރި ކަމެއް ނޫނެވެ.

މިއަދު ރީނދޫ ސަމާލު ނެރެފައި އޮއްވައި ވެސް ބައެއް އުޅަނދުތައް މާލެއިން ފުރައިގެން ދަތުރުކުރާކަމަށް "ފޮލޯމީ" އެޕުން ދައްކައެވެ. ހައި އިސްޕީޑު ލާންޗުފަހަރާއި މުދާ އުފުލާ ބޯޓުފަހަރެވެ. ތެދުފުޅެކެވެ. ރޭވިފައިވާ ދަތުރެއް ލަސްވުމަކީ ދަތުރުކުރާން ހަމަޖެހިފައިވާ ބަޔަކަށް ވަރަށް ގިނަ ގެއްލުމާއި ތަކުލީފުތަކެއް ކުރިމަތިވާނޭ ކަމެކެވެ. ނަމަވެސް މޫސުމާ ބެހޭ އިދާރާއިން މޫސުމާ ބެހޭ ގޮތުން އާންމުކުރާ މައުލޫމާތަށް ސަމާލުކަން ނުދީ ދަތުރުކުރުމަކީ ހިރާސް ބޮޑުކަމެކެވެ. އެ ފަދަ ދަތުރަކުން (ދެރަ ގޮތެއް މިންވަރު ނުކުރައްވާށިއެވެ!) ދެރަ ގޮތެއް ދިމާވެއްޖެ ނަމަ، ލިބޭ ގެއްލުމާއި އުފުލާންޖެހޭ ތަކުލީފު އަންދާޒާކޮށްލާކަށް ވެސް ނޭނގޭނެއެވެ. ވީމާ މޫސުމާ ބެހޭ ގައުމީ އިދާރާގެ އިރުޝާދުތަކަށް ތަބާވުމަކީ މުހިންމު ކަމެކެވެ. އާދޭހެވެ! "ރައްކާވެ ތިބިއްޔާ ދަތުރެވެ."

މިއަދު ކުރިއަށް އޮތް ހުރިހާ ވަގުތެއްގައި ވެސް މުޅި ރާއްޖޭގެ ކަނޑުތައް ވަރަށް ގަދަވާނެކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކުރައްވައިފައެވެ.

މޫސުމާ ބެހޭ ޤައުމީ އިދާރާއިން ޢާންމުކޮށްފައިވާ ގޮތުގައި ކުރިއަށް އޮތް ގަޑިތަކުގައި ރާއްޖޭގެ ބޮޑު ބަޔަކަށް ބޯކޮށް ވާރޭވެހި ވައިގަދަވެ ކަނޑުތައް ގަދަވާނެކަމަށް ލަފާކުރެވެއެވެ. އަދި ދިޔަވަރު ބޮޑުވާ ވަގުތުތަކުގައި އުދައިގެ އަސަރުކުރުން އެކަށީގެންވާތީ މޫސުމަށް ޚާއްސަ ސަމާލުކަމެއް ދިނުމަށް ވެސް މޫސުމާ ބެހޭ ޤައުމީ އިދާރާއިންވަނީ އިލްތިމާސްކުރައްވައިފައެވެ.

މޫސުމާ ބެހޭ ގައުމީ އިދާރާގެ އިސްވެރިޔަކު ފަރަގު މީޑިއާއަށް ރޭ މަޢުލޫމާތުދެއްވި ގޮތުގައި މިއަދުން ފެށިގެން ކުރިއަށް އޮތް ހަފުތާއެއްހައި ދުވަހު ރާއްޖެއަށް ވިއްސާރަކުރާނެކަމަށް ނިމުތުކުރެވެއެވެ. އޭނާ ވިދާޅުވި ގޮތުގައި ރާއްޖެ ސަރަޙައްދުގައި ހުޅަނގު މޫސުމުގެ ބާރު މި ދުވަސްކޮޅު ވަނީ ވަރަށް ގަދަވެފައެވެ. މި ކަމުގެ ސަބަބުން ކުރިއަށް އޮތް ހައެއްކަ ދުވަހު ވެސް އުތުރާއި މެދުރާއްޖޭގެ އަތޮޅުތަކަށް މޫސުން ގޯސްވާނެކަމަށް ނިމުތުކުރެއްވެނީއެވެ.

މިހާރު ކުރަމުން މިދާ ވިއްސާރައިގައި މެދުރާއްޖޭގެ ރަށްތަކަށް ޢާންމު ގޮތެއްގައި ގަޑިއަކު 15 މޭލާއި 25 މޭލާ ދެމެދުގެ ބާރުމިނެއްގައި ވައިޖެހޭނެކަމަށާއި، ދެކުނުގެ އަތޮޅުތަކަށް 13 މޭލާއި 23 މޭލާއި ދެމެދުގެ ބާރުމިނުގައި ވައިޖެހޭނެކަމަށް މޫސުމާ ބެހޭ ގައުމީ އިދާރާއިން މިއަދު ވަނީ ނިމުތުކުރައްވައިފައެވެ. ދޭތެރެ ދޭތެރެއިން އަންނަ ކޮޅިގަނޑުގައި 45 މޭލާއި 55 މޭލާ ދެމެދުގެ ބާރުމިނަކަށް ވައިގަދަ ވާނެކަމަށް ވެސް ނިމުތުކުރައްވައިފައި ވެއެވެ. އެހެންކަމުން ކުރިއަށްއޮތް ގަޑިތަކުގައި ރާއްޖޭގެ ހުރިހާ އަތޮޅެއްގެ ކަނޑުތައް ވެސް ވަރަށް ގަދަވާނެކަމަށް މޫސުމާބެހޭ ގައުމީ އިދާރާއިން ނިމުތުކުރައްވައެވެ. އަދި ކަނޑުދަތުރުކުރުމުގައި ދަތުރަށް ފުރުމުގެ ކުރިން މޫސުމާއި ބެހޭ އެންމެ ފަހުގެ މަޢުލޫމާތު ހޯދާން ވަނީ އިލްތިމާސްކުރައްވާފައެވެ.

މިއަދު މޫސުން ގޯސްވާނެކަމަށް ލަފާކުރައްވައި ތިލަދުންމަތީން ފެށިގެން ހައްދުންމައްޗާ ހަމައަށް މޫސުމާ ބެހޭ ގައުމީ އިދާރާއިން ވަނީ މިއަދު (އޮކްޓޫބަރު 6ވަނަ ދުވަހު) މެންދުރު 11:00އިން ފެށިގެން މެންދުރުފަހު 3:00އާ ހަމައަށް ރީނދޫ ސަމާލު ނެރުއްވައިފައެވެ. ރީނދޫ ސަމާލުގެ މުއްދަތު އިތުރު ނުކުރައްވާނެކަމެއް ވެސް ނޭނގެއެވެ.

އެހެންކަމުން ކުރިއަށް އޮތް ގަޑިތަކުގައި ރާއްޖޭގެ ހުރިހާ އަތޮޅެއްގެ ކަނޑުތައް ވެސް ވަރަށް ގަދަވާނެކަމަށް ނިމުތުކުރެއްވޭތީ ކަނޑު ދަތުރަށް ފުރުމުގެ ކުރީން މޫސުމާ ބެހޭ އެންމެ ފަހުގެ މަޢުލޫމާތު ހޯއްދަވާން ދަތުރުކުރައްވާ ފަރާތްތަކަށް މޫސުމާ ބެހޭ އިދާރާއިން އިލްތިމާސްކުރައްވައެވެ.

އާދޭހެވެ! އަޅުގަނޑުމެންގެ ކާބަފައިން ބުނެފައިވަނީ ވަރަށް ބޮޑު ހަގީގަތެކެވެ. "ރައްކާވެ ތިބިއްޔާ ދަތުރެވެ." ވީމާ، މި ފަދަ ހަރުބަސްތަކަށް ސަމާލުކަން ދިނުމަކީ ކޮންމެހެން ކުރާން ޖެހޭނެ ކަމެކެވެ.

____________________________

ނިމުތު   ނ.    (1) ކުރާ ލަފާ ނުވަތަ އަންދާޒާ. (2) ވާން ހުންނަ ކަންކަން

ހިރާސް  ނ.    (1) ގެއްލުމެއް ލިބިދާނޭ ފަދަ ނުވަތަ ނުރައްކަލަކާ ކުރިމަތިލާން ޖެހިދާނޭ ފަދަ ކަމެއް. (2) ނުރައްކަލަކަށް ހުޅުވިދާނޭ ފަދަ ޙާލަތެއް. (3) ނޭދެވޭ ކަމެއް މެދުވެރިވުމުގެ ފުރުސަތު.

އުދަ    ނ.   (1) ގަދަ މޫސުމަށް ކަނޑުގެ އަޑީގައި އޮއި ބަދަލުވެގެން އަރާ ބާނި ހުންނަ ރާޅު. (2) ކަނޑުގެ ރާޅު އުފުލޭ އުފުލުން.