ތަރުޖަމާ: އިސްމާޢީލް މުބާރަކް

ބުނެވޭ ގޮތުގައި އުރުދުންގެ "ބާދިޔަތު" (ރަށްފުށު) ހިސާބުގައި ވަރަށް މުއްސަނދި މީހަކު އުޅުނެވެ. ވިޔަފާރިއާއި މާލީ ކަންކަން ބެލެހެއްޓުމުގައި އޭނާ އަވަދިނެތި ގިނަ ވަގުތު އުޅޭންޖެހުމުގެ ސަބަބުން ގޭގައި ޢާއިލާއާ އެކު ވަގުތު ހޭދަކޮށް، އަނބިމީހާއާއި އާއިލާއާ އެކު، އިށީނދެ ވާހަކަ ދައްކައިލާނެ ވަގުތެއް ނުލިބެއެވެ.

އެހެންނަމަވެސް އޭނާގެ ގޭ ކައިރީގައި, ކިރިޔާ ދިރިއުޅުން ކުރިއަށް ގެންދެވޭ ވަރުގެ ފަގީރު އަވަށްޓެރިއަކު ދިރިއުޅުމުގައި އުފާވެރިކަމާ އެކު އުޅެމުން ދިޔައެވެ.  އެ އަވަށްޓެރިޔާ ކޮންމެ ދުވަހަކު ވެސް އަނބިމީހާއާއި އާއިލާގެ މެންބަރުންނާ އެކު، ގިނަ ވަގުތު ހޭދަކޮށް މަޖާކޮށް އުފާވެރިކަމުގައި އުޅެމުން ގެންދެއެވެ.

މުއްސަނދި މީހާގެ އަނބިމީހާއަށް މި ފަގީރު އާއިލާ ފެނިގެން އެކަމާ ހުރެ، އެ މީހުންނަށް ހަސަދަވެރިވިއެވެ. އޭނާއަށް ގެއްލިފައިވާ އުފަލަށް ޓަކައެވެ. "ނިކަން ބަލާށެވެ. މުއްސަނދިކަން ލިބިފައިވަނީ ތިމަންނާއަށެވެ. އެކަމަކު ޢާއިލާއާ އެކު އުފާވެރި ދިރިއުޅުމެއް މި އުޅެނީ އެއްވެސް އެއްޗެއް ނެތް ފަގީރުންނެވެ." މުއްސަނދި މީހާގެ އަންހެނުންގެ ހިތަށް އެރިއެވެ.

އެއްދުވަހަކު ފިރިމީހާ ގާތުގައި  އެ  އަންހެން މީހާ  ބުންޏެވެ.  މި ހުރިހައި ފައިސާއާއި މުދާތަކުން އަހަރުމެންނަށް ކުރަނީ ކޮން މަންފާއެއްހެއްޔެވެ؟ އެކަކު އަނެކަކާ ދިމާއަށް ހަތަރުކަޅި ހަމަކޮށް ބަލައި ވާހަކަދައްކައިލާނެ  ވަގުތުކޮޅެއް ވެސް އަހަރުމެންނަށް ނުލިބެއެވެ. ކަން މި ހެން އޮތް އިރު، މި ގެޔާ ޖެހިގެން މިހިރަ ގޭގައި އުޅޭ  ފަގީރު  އާއިލާ،  ދުނިޔޭގެ އެއްވެސް ކަންބޮޑުވުމެއް ޚިޔާލެއް ވެސް ނެތެވެ. ޢާއިލާޔާ ރައްޓެހިންނާ އެކު އެއުޅެނީ ކޮންފަދަ އުފަލެއްގައިހެއްޔެވެ؟ މި ހުރިހައި ގިނަ މުދަލާއި ފައިސާއިން އަހަރެމެންނަށް ކުރަނީ  ކޮން ފައިދާއެއްހެއްޔެވެ؟ ފައިސާ މި ހޯދަނީ ކީއްކުރާންހެއްޔެވެ؟ އެ މީހުންނަކީ ފައިސާ ނެތި އިންތިހާއަށް އުފާވެރިކަމާ އެކު ހިތްހަމަ ޖެހިގެން އުޅޭ ބަޔެކެވެ .

މުއްސަނދި މީހާ އިރުކޮޅަކު ވިސްނައިލުމަށް ފަހު، އަނބިމީހާއާއި ޢާއިލާއަށް ވަގުތު ހުސްކުރާން ވަޢުދުވިއެވެ. ދެން އޭނާގެ ވަގުތުގެ ބައެއް ޚާއްޞަކުރާނީ އެ މީހުންނާ އެކު ހަމަހިމޭންކަމުގައި ގޭގައި މަޖާކޮށް އުފާވެރިކޮށް އުޅޭން ކަމުގައި ބުންޏެވެ.

ޖެހިގެން އައި ދުވަހު މުއްސަނދި މީހާ އޭނާގެ ފަގީރު އަވަށްޓެރިޔާ އޭނާގެ ގާތަށް އައުމަށް ދައުވަތު ދިނުމަށް މީހަކު ފޮނުވިއެވެ.

އެ ދައުވަތު ލިބުމުން އެ ފަގީރުމީހާ ހައިރާންވިއެވެ. ސަބަބަކީ އަވައްޓެރީންނަށް ދަޢުވަތުދިނުމަކީ އެއީ ކުރިއަކުން  އޭނާގެ ހުންނަ އާދައެއް ނޫނެވެ. އަދި ކުރީން އޭނައަކީ އަވައްޓެރީން އުޅޭކަމުގެ އިހުސާސްވެސްވާ މީހެއް ނޫނެވެ.

އެ ފަގީރު މީހާ އައިސް ވަނުމުން މުއްސަނދި މީހާ އޯގާތެރިކަމާއި ނިޔަނެތިކަމާއި މަޑުމައިތިރިކަމާ އެކު އޭނާއާ ވާހަކަ ދައްކަމުން ބުންޏެވެ.

ތިޔައީ އަހަރެންގެ ބޭބެއެއް ފަދައިން އަހަރެން ދެކޭ މީހެކެވެ.  ގޭގައި ގިނަވަގުތު އިށީންދެ އިންނަ ތަން އަހަރެން ދެކެމެވެ. ކުރާނެ މަސައްކަތެއް  ނެތީހެއްޔެވެ؟  މުޅި ދުވަހު ގޭގައި އިށީންދެ އިންނަނީ، ވަޒީފާއެއް ނުލިބޭތީހެއްޔެވެ؟

އެ ނިކަމެތި މީހާ ބުންޏެވެ:  އަޚާއެވެ! އާނއެކެވެ. ކުރާނެ މަސައްކަތެއް ނެތުމުން  ގިނަ ވަގުތު ގޭގައި އާއިލާއާ އެކު އުޅެނީއެވެ.

މުއްސަނދި މީހާ އޭނާއަށް ބުންޏެވެ: އަހަރެން ތިބާއަށް ކުޑަ ވިޔަފާރިއެއް ފަށާން ރައުސްމާލެއްގެ ގޮތުގައި  ފައިސާކޮޅެއް ދީފާނަމެވެ.

ކޮންމެ ދުވަހަކު އެއަށް ކުކުޅުބިސްގަނެގެން އެ  ވިއްކައިގެން އެއިން ފައިދާ ހޯދައި، އެ ގޮތަށް މަސައްކަތްކޮށް އެއިން ލިބޭ ފައިދާއިން ދަރިންނަށް ކާންދީ ހަދާންވީ ނޫންހެއްޔެވެ؟

އަހަރެންގެ ފައިސާ އަހަންނަށް އަނބުރައި ދޭނީ ތިބާގެ ހާލަތު ރަނގަޅުވުމުންނެވެ. މަސައްކަތް ކުރިއަށް ގެންދެވޭވަރު ރައުސްމާލެއް ތިބާގެ އަތުގައި އިތުރުވުމުންނެވެ.

ފަގީރު މީހާ ވަރަށް އުފަލުން މި ގޮތާ އެއްބަސްވެއްޖެއެވެ. އެއީ މަސައްކަތެއް ކޮއްގެން ޢާމްދަނީ ހޯދައި  ދިރިއުޅުން  ރަނގަޅުކުރުމަށް ލިބުނު ވަރަށް ރަނގަޅު ފުރުސަތެއްކަމަށް ފަގީރު މީހާ ޤަބޫލުކުރިއެވެ. އެހެންކަމުން، މުއްސަނދި މީހާގެ އަތުން ފައިސާ ނަގައިގެން އޭނާ އެނބުރި ގެއަށް ދިޔައެވެ.

އަނެއް ދުވަހު ހެނދުނު ބާޒާރަށް ގޮސް ކުކުޅުބިސް ގަނެގެން، ބިސް ގަނެވިއްކުމުގެ ވިޔަފާރިފެށިއެވެ.  ހުސްވަގުތުތަކުގައި އާއިލާގެ މީހުންނާ އެކު، އިށީނދެގެން ވާހަކަދައްކާން އިނުމުގެ ބަދަލުގައި އެ ބިސްތައް  ފެނަށް އަޅައި، ނުބައިވެފައި ހުންނަ ބިސްތައް ނަގައި ބިސްތައް ތަރުތީބުކޮށް، ބޮޑެތި ބިސްތައް އެއް ފަރާތަކަށް އަޅައި ކުދި ބިސްތައް ވަކިކޮށް ތަފާތު އަގުގައި ވިއްކުމަށް ޓަކައި މަޝްޣޫލުވިއެވެ.

އެތައް ދުވަހެއް ފަހުން މުއްސަނދި މީހާ އޭނާގެ ގޭގެ ބެލްކަނީން އޭނާގެ ފަގީރު އަވަށްޓެރިޔާއަށް ބަލައިލި އިރު، އޭނާ ބިސް ގުނުމާއި ގިންތިކުރުމުގައި އަވަދިނެތި އުޅެނިކޮށް އޭނާއަށް ފެނި ނުބައި ލާނެއް ގޮތަކަށް ހިނިއަތުވެއްޖެއެވެ. އަދި ހަމަ އެ ވަގުތު އޭނާގެ އަނބިމީހާއަށް ގޮވައިލިއެވެ.

އަދި  އަނބިމީހާއަށް ބުންޏެވެ:   ޢާއިލާޔާ އެކު ވަގުތު ހޭދަކުރާކަމަށް ތިބުނާ  މީހާގެ ޙާލަކީ  މިއީހެއްޔެވެ؟ މިހާރު އޭނާ މިއޮއް ގަންނަ ގަނޑެއް ނިކަން ބަލައިބަލާށެވެ! އަންހެންމީހާ ބަލައިލި އިރު، އެ ފަގީރުމީހާ ބިސް ކޭސްތަތަކެއް އެއްކޮށްގެން، އެ ހާލަތުގައި އަވަދިނެތި އުޅޭ ތަން ފެނުމުން އޭނާ ހުރީ ހައިރާންވެފައެވެ. އެ ފަގީރު މީހާޔަށް  އައި ބަދަލު ފެނިފައެވެ .

އޭނާ އެމީހާއާ ޙަސަދަވީ އުފާވެރިކަން މިހާރު އޭނާގެ ކިބައިން ގެއްލުވައިލީ ކޯއްޗެއް މެދުވެރިވެގެން ކޮންސަބަބަކާ ހުރެކަމެއް އޭނާއަކަށް ނޭނގުނެވެ. އޭނާގެ ފިރިމީހާ އޭނާއަށް މަލާމަތުގެ ހުސް ހިނިތުންވުމަކުން ބަލާން ހުރެފައި އެ ކަން ފޮރުވާން އަނެއް ފަރާތަށް މޫނު އަނބުރައިލިއެވެ.

ހަވާ ނަފުސުގެ އެދުންތަކުގެ ސަވާރީއަކަށް އިންސާނާ ބަދަލުވެގެން ދިޔުމުން ދެން އިތުވެގެންދާނީ ހާސްކަމާއި ނުތަނަވަސްކަމެވެ. ހިތާމަޔާއި ހިތްދަތިކަމެވެ. މީހުންނަށް ތިމާމެންގެ މުދަލާއި ޢިއްޒަތާއި ތަނަވަސްކަން ދެއްކުމަށް ވުރެ، ފުދިގެން ފަގީރު ޙާލުގައި ވެސް ޢާއިލީ ލޯތްބާއި ރައްޓެހީންގެ އެކުވެރިކަމާ އެކު، ދިރިއުޅުން ހޭދަކުރުމުން ފުރާނައަށް ލިބޭ އުފަލާއި ހިތްހަމަޖެހުން މާބޮޑެވެ.

__________________________________

މަޞްދަރު:

الحكايات من الصحراء