ފަރަގު މީޑިއާ ސައްޔާޙުން އިހުގައި ދިވެހީން ސިފަކޮށްފައިވަނީ ސާދާކަމާއި ސާފުތާއިރުކަމާއި ދީނަށް ލޯބިކުރުމާއި މެހުމާނުދާރީއަދާކުރުމުގެ ނަމޫނާ ބަޔެއްގެ ގޮތުގައެވެ. މިއަދު ވެސް ދިވެހިރާއްޖޭގެ ފަތުރުވެރިކަމުގެ ޚިދުމަތުގެ އެންމެ މުހިންމު އެއް އުންސުރަކީ މެހުމާނުދާރީއެވެ. އިއްޔެ މި ވަނީ އެ ތާރީޚު އަލުން އަނބުރައި އިޢާދަވެފައެވެ.

އިހަވަންދިއްޕޮޅުގައި ގާއިމުކުރެވިފައިވާ "ކަނޑުބޯޓުފަހަރަށް ޚިދުމަތް ފޯރުކޮށްދިނުމުގެ މުންތަޒަމް ނުވަތަ އުތުރު މެރިޓައިމް ސަރވިސް (ޔޫ.އެމް.އެސް)ގެ ޚިދުމަތް ހޯދުމަށް ފުރަތަމަ އައި އުޅަނދު އިއްޔެ ހެނދުނު އިހަވަންދިއްޕޮޅުގައި ބަނދަރުކުރުމާއެކު، ދިވެހީން މި ވަނީ އެ މީހުންގެ ސަގާފަތުގައިވާ މެހުމާނުދާރީގެ ފުރިހަމަކަން ދައްކައިލައި ތާރީޚު އަލުން އަނބުރައި އިޢާދަކޮށްފައެވެ.

ކަނޑު ބޯޑުފަހަރަށް ޚިދުމަތްދޭން ތަޢާރަފުކުރި ބައެއް ޚިދުމަތްތައް ހޯދާން އިއްޔެ ހެނދުނު އިހަވަންދިއްޕޮޅަށް ބަނދަރުކުރީ ޕެނަމާއަށް ނިސްބަތްވާ "ޖިއަން ޖިއޭ" (JIAN JIE) ނަމަކަށް ކިޔާ ތެޔޮ ޓޭންކަރެކެވެ. މި ތެޔޮބޯޓް ދަތުރުކުރަމުންދަނީ އަބޫ ދާބީއިން ފުރައިގެން ޗައިނާއަށް ދާށެވެ. އިހަވަންދިއްޕޮޅަށް ބަނދަރުކުރި "ޖިއަން ޖިއޭ" ބޯޓުން ބަދަލުވާ ފަޅުވެރީން ވަނީ އިއްޔެ ހަވީރު އުލިގަމަށް ފައިބައި އުލިގަމުގައި ހަދައިފައިވާ  ފަޅުވެރީންގެ އަރާމުޚާނާ ސަރަހައްދު (ސީމަންސް ރެސްޓް އޭރިޔާ) ހުޅުވުމަށް ބޭއްވި ރަސްމިއްޔާތުގައި ބައިވެރިވެފައެވެ.

ބޯޓުގެ ފަޅުވެރީންނަށް އުލިގަމުން ވަނީ ހޫނު މަރުހަބާއެއް ކިޔައިފައެވެ. ފަޅުވެރީންނަށް މަރުހަބާކިޔުމަށް ޓަކައި ބޮޑުބެރުގެ ހަރަކާތްތައް ބާއްވައިފައި ވެއެވެ. މި ރަސްމިއްޔާތުގައި އެމް.ޕީ.އެލްގެ ޗީފު އެގްޒެކަޓިވް އޮފިސަރ އަލްފާޟިލް މުޙައްމަދު ވަޖީހު އިބްރާހީމާއި ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު އަލްފާޟިލް އަލީ މޫސާއާއި އުލިގަމު ކައުންސިލްގެ ރައީސް އަލްފާޟިލް އަޙްމަދު މުއާޒް މުޙައްމަދު ބައިވެރިވެވަޑައިގަތެވެ. މި ޙަރަކާތުގައި އުލިގަމުގެ ގިނަ އަދަދެއްގެ ރައްޔިތުން ވެސް ވަނީ ބައިވެރިވެފައެވެ.

އުލިގަމުގައި ހުޅުވި ފަޅުވެރީންގެ އަރާމުޚާނާ ސަރަހައްދަކީ އުލިގަމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ޤާއިމްކޮށްފައިވާ ބައިނަލްއަގުވާމީ ބޯޓުފަހަރާއި ބަނދަރުގެ ސަލާމަތީ ދޮރޯށީން އެތެރެވާ އުޅަނދު ފަހަރުގެ ފަޅުވެރީން، އެ ރަށުގައި މަޑުކޮށް، އަރާމުކޮށްލައި ބައެއް ކުޅިވަރުތައް ކުޅެވޭގޮތަށް ހަދައިފައިވާ ތަނެކެވެ.

އުލިގަމަށް އިއްޔެ ފޭބި ފަޅުވެރީންގެ ތެރޭގައި ހިމެނޭ "ޖިއަން ޖިއޭ" (JIAN JIE) ބޯޓުގެ ކެޕްޓަން ބުނެފައިވަނީ ބޯޓުދަތުރުކުރުމުގައި އޭނާ ހޭދަކުރި 20 އަހަރުގެ ތެރޭގައި "މިހައި ފުރިހަމަ މެހެމާނުދާރީއެއް އަދި ދުވަހަކު ވެސް ތަޖުރިބާކޮށްފައިނުވާ"ކަމަށެވެ.

"ވިހި އަހަރު ދުވަހު އަޅުގަނޑުމި ދާއިރާގައި މަސައްކަތްކޮށްފީން. އެކަމަކު އަދި މިހައި ތަނަށް ޒިޔާރަތްކުރި އެއްވެސް ގައުމަކުން، މިހައި ފުރިހަމަ މެހެމާންދާރީއެއް ތަޖުރިބާކުރެވިފައެއް ނެތް." ކެޕްޓަން ބުންޏެވެ.

އިހަވަންދިއްޕޮޅަށް ބަނދަރުކުރި އުޅަނދުން ވަނީ ފަޅުވެރީން ބަދަލުކުރުމުގެ ޚިދުމަތާއި ފެނާއި އެހެން ބައެއް ތަކެއްޗާއި ކުނި ނައްތާލުމާއި ބައެއް ސްޕެއަރ ޕާޓްސް ހޯދުން ފަދަ ޚިދުމަތަށް އެދިފައެވެ. އަދި މަރާމާތުގެ ބައެއް މަސައްކަތްތައް ވެސް ކުރާންޖެހޭތީ ފަސް ވަރަކަށް ދުވަހު އިހަވަންދިއްޕޮޅުގައި މި އުޅަނދު މަޑުކުރާނެކަމަށް ވަނީ ލަފާކޮށްފައެވެ. ފަޅުވެރީން ބަދަލުކުރުމުގެ ޚިދުމަތުގައި މި އުޅަނދުގައި މި ވަގުތު ތިބި ނުވަ ފަޅުވެރީން ރާއްޖޭ މަގުން ފުރުވައިލާނެއެވެ. އަދި ރާއްޖެއަށް ވައި މަގުން އަންނަ ހަ ފަޅުވެރީން ހއ. އަތޮޅަށް ގެންގޮސް، އެ ބޯޓަށް އެރުވުމުގެ އިންތިޒާމްތައް ވެސް ހަމަޖައްސައިދޭނެއެވެ. މި އުޅަނދަށް ޚިދުމަތް ފޯރުކޮށްދިނުމުގައި އެމް.ޕީ.އެލްގެ އިތުރަށް އަމިއްލަ ބައެއް ކުންފުނިތައް ވެސް ބައިވެރިވާނެކަމަށް ވަނީ މަޢުލޫމާތު ލިބިފައެވެ.

އުތުރުގައި ކަނޑު ބޯޓުފަހަރަށް ބޭނުންވާ ޚިދުމަތްތައް ފޯރުކޮށްދިނުމުގެ މި މަޝްރޫޢަކީ ދިވެހިރާއްޖޭގެ އިޤްތިސާދު ސިންދަފާސްކޮށް، ކަނޑުދަތުރުފަތުރުގެ ދާއިރާއިން އިޤްތިސާދަށް އިތުރު މަންފާ ހޯދުމަށް ޓަކައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސަރުކާރުން ވަރަށް ބޮޑު އިސްކަމެއް ދެއްވާ ކަމެކެވެ. މިއީ ކުރީގެ ބައެއް ސަރުކާރުތަކުން ކޮންމެވެސް ވަރަކަށް ޚިޔާލުކޮށްފައިވާ މަސައްކަތެއް ނަމަވެސް ސިޔާސީ އަދި ޚާރިޖީ ބައެއް ސަބަބުތަކާ ހުރެ، ޢަމަލީ މަސައްކަތްކުރާން ނުކެރިފައި އޮތް މަޝްރޫޢެކެވެ. ވީމާ އަދުގެ ސަރުކާރުގެ މި ހިތްވަރުގަދަ ތަޞައްވުރީ މަސައްކަތަށް ތަހުނިޔާ ދަންނަވަމެވެ.