ތަރުޖަމާ: އިސްމާޢީލް މުބާރަކު

ބުނެވޭ ގޮތުގައި އަންހެނަކު ނިދައިފައި އޮއްވައި ބިރުވެރި ހުވަފެނެއް އޭނާޔަށް ފެނުނެވެ. ހުވަފެނުގައި އޭނާއަށް ފެނުނީ އޭނާގެ ގާތްތިމާގެ މީހުންގެ ތެރެއިން ބޭބެއަކު ވަރަށް ވިހަގަދަ ހަރުފައެއް ވިހަލައިގެން ވަގުތުން މަރުވާ ތަނެވެ. އަނެއް ދުވަހު އެ ކަނބުލޭގެ އޭނާގެ ބޭބެގެ ގެއަށް ގޮސް އޭނާގެ ހުވަފެން ކިޔައިދިނެވެ. އެ އަންހެންމީހާ އެ ހުވަފެން ކިޔައިދިނުމަށް ފަހު، އޭނާގެ ބިރުވެރިކަން އޭނާގެ ބޭބެއަށް ފާޅުކޮށް، އޭނާގެ ވަށައިގެން ހިނގާ ކަންކަމަށް ސަމާލުކަންދިނުމަށް ނަސޭޙަތްދިނެވެ. އަދި  އަމިއްލަ ނަފުސާ މެދު ފަރުވާތެރިވާން އެދުނެވެ.

އެ އަންހެންމީހާގެ ބޭބެ އޭނާގެ އަންހެން ކޮއްކޮއަށް ބުންޏެވެ. އަހުރެން ބޮޑު ދެ ކަބުޝް ބަކަރި ކަތިލައި އެއިން ގާތްތިމާގެ މީހުންނާއި އަވައްޓެރީންނަށް ކާންދޭނަމެވެ. އޭރުން މާތް الله އަހުރެން ތިޔަ ހުވަފެނުގެ ސުންޕާކަމުން ސަލާމަތްކުރައްވައި، ތިޔަ ބިރުވެރިކަމުން ރައްކާތެރިކަން ދެއްވައިފާނެތެވެ.

އަދި އޭނާގެ ކޮއްކޮއަށް ވަޢުދުވީ ފަދައިން އެ ދުވަހުގެ ހަވީރު އޭނާ ބޮޑު ދެ ކަބުޝް ބަކަރި ކަތިލައި، ގާތް ތިމާގެ މީހުންނާއި އަވައްޓެރީންނަށް ދަޢުވަތުދީ، އުފާވެރި ހިތްގައިމު ކެއުމުގެ ޙަފުލާއެއް  ބޭއްވިއެވެ. މި ޙަފުލާގެ ސިއްރު އޭނާ ހާމައެއް ނުކުރެއެވެ. މީހަކު އެ ކަމާ ސުވާލުކޮށްފި ނަމަ، ވަރަށް ގިނަ ރައްޓެހިންނާ ގާތްތިމާގެ މީހުންނާއި ދިމާނުވާތީ އެއް ތަނަކުން ބައްދަލުކޮށްލާން ބޭއްވި ޙަފުލާއެއްކަމަށް އޭނާ ބުނެ އެ ސުވާލު ހުއްޓުވައެވެ. ހިނިތުންވެ ހުރެ، އެންމެނާ ހީނ ސަމާސާކޮށް އެ ޙަފުލާ ނިމުނު އިރު ކަތިލި ދެބަކަރީން ބާކީ ވެފައި އޮތީ އެންމެ ބަކަރި ފަޔެކެވެ. އެގޭ އެއްވެސް މީހަކަށް ކަތިލި ދެ ބަކަރީން މަސްކޮޅެއް ހައި ހިސާބު ވެސް ނުލިބުނެވެ.

އޭނާ ގޮނޑިއެއް ދަމައިލައިފައި ކާމޭޒު ކައިރީ އިށީނދެ ބާކީވެފައި އޮތް ބަކަރި ފައިން މަސްކޮޅެއް ނަގައި ރޮށި ކޮޅެއްގައި އޮޅައި ލުމަށްފަހު އަނގަޔާއި ދިމާކޮށްލުމާ އެކު، އޭނާގެ އަވަށްޓެރީންގެ ތެރެއިން މުސްކުޅި އަންހެނަކު އެ އަންހެން މީހާގެ މުސްކުޅި ކަމާއި ބަލި ޙާލަތު ހުރި ގޮތުން އެ ގެޔަށް ނާދެވިފައި ހުރިކަން ހަނދާންވެއްޖެއެވެ. އަދި އެ ވަގުތު އޭނާގެ ހިތަށް އެރިއެވެ. މި ބަކަރި ފައި ކެއުމުގެ ނަސީބު ވެސް ހުރީ މަށަކަށް ނޫނެވެ. އެ އަންހެންމީހާއަށެވެ. އެހެންވެ ޕާރުސަލް ކޮށްލައިގެން ކޮތަޅަކަށް ލައިގެން ގޮސް އެ އަންހެން މީހާޔަށް ދިނުމަށް ފަހު އޭނާ ބުންޏެވެ. މާފުކުރާށެވެ! ހުރިހައި އެއްޗެއް ހުސްވި އިރު ބާކީ އޮތީ މި ބަކަރި ފައި އެކަންޏެވެ. އެހެންވެ ނާދެވޭނެ ވާހަކަ ބުނިކަން ހަނދާންވެގެން އަވަހަށް މި ހިފައިގެން މި ގެޔަށް އައީއެވެ.

މުސްކުޅި އަންހެންމީހާ މި ކަމާ ވަރަށް ހިތްހަމަޖެހިގެން ޝުކުރުވެރިވިއެވެ. އަދި ބަކަރި ފައި ކައިލުމަށް ފަހު، ފައިގެ ކަށިގަނޑު ބޭރުގައި ހުރި ކުނިތަކެއްގެ ތެރެއަށް އެއްލައިލިއެވެ. އެ ރޭ  މީހުން ނިދައި ފައިހިލަވަޅު އޮބުނު ތަނާ ބޮޑު މާސިންގާ ކަޅުކުލައިގެ ދިހުންކުލަ އަރާ އެންމެ ވިހަގަދަ ނާގަހަރުފައެއް ބަކަރިމަހުގެ ވަސް ދުވައިގެން ހޯދަމުން އައިސް އެ ކަށިގަނޑުގައި އޮޅައިލިއެވެ. އަދި އޭގައި ނުނެއްޓި ބާކީހުރި މަސްކޮޅުކޮޅުގައި ކޮށާން ފެށިއެވެ. ކަމުންކަމުން ގޮސް ބަކަރި ފައި މުޅީން ދިރުވައިލުމަށް ޓަކައި ބަކަރި ފައި އޭގެ އަނގައިގެ ތެރެއަށް ދަމައިގަތެވެ. އެ ވަގުތު އެ ކަށިގަނޑު އޭގެ ކަރު ތެރެއަށް ވަދެ ހުރަސްވެ ތާށިވެއްޖެއެވެ.

އެތެރެއަކަށް ވެސް ބޭރަކަށް ވެސް ނުނިކުމު އަނގަ ތަން މިނަށް ހުޅުވި ހަރުފައަށް އެ ކަމުން ސަލާމަތް ނުވެވި ކަށިގަނޑު ބިންމައްޗަށް ވައްޓައިލުމަށް ޓަކައި ބޯ އުފުލާން ފެށިއެވެ. ފަހަތަށް ޖެހި ކުރިއަށް ޖެހި އެތައް އިރަކު އެ ކަމުން ސަލާމާތްވުމަށް މަސައްކަތްކުރި ނަމަވެސް، އޭތީގެ މަސައްކަތްތަކުން އެއްވެސް ކުރިއެރުމެއް ނުލިބި، ގޮތް ހުސްވެއްޖެއެވެ.

އެރޭ ފަތިސް ވެގެން އަައި އިރު ކުރީން ބުނެވި ދިޔަ މީހާގެ ގޭ ކުދިންނަށް އެ ގޭ ބިއްދޮށުން ޓޮއް ގޮއްވައި، ދޮރުގައި ޓަކިޖަހާ ފާޑުގެ  އަޑެއް އިވިފައި ވާތީ، އެ މީހުން އެ ވާހަކަ ބައްޕައަށް ކިޔައިދިނެވެ. އެކަމުގެ ހަގީގަތް ބަލާން އޭނާ ނުކުތް އިރު، އޭނާއަށް ފެނުނީ އެ ނާގަހަރުފަ އެ ހާލަތުގައި، އެ ބަކަރި ފައިގެ ކަށިގަނޑު އޭގެ ދަތްދޮޅީގައި ތާށިވެފައި ހުއްޓައެވެ.

އޭނާ އެ ހަރުފަ ވަގުތުން މަރައިލައި، އޭނާއަށް އަންނާން އޮތް ސުންޕާކަން ހަރުފައެއްގެ ގޮތުގައި މާތް ﷲ ދައްކަވައި އެ ސުންޕާކަމުން އޭނާ ސަލާމަތްކުރެއްވީތީ މާތްރަސްކަލާނގެ ޙަޟުރަތަށް ޙަމްދުކޮށް ޝުކުރުވެރިވިއެވެ.

އެ ވާހަކަ އަވައްޓެރީންނަށާއި ޢާއިލާގެ މީހުންނަށް އޭނާ އެއަށް ފަހު ކިޔައިދިނެވެ. އޭނާ ބުންޏެވެ. ޢަރަބި ބަހުގައި މިހެން އޮންނަނީ އެހެން ވެގެންނެވެ.  ("كثرت اللقم، تطرد النقم" ޞަދަޤާތް ގިނަކުރުމުން ބަލާއާއި މުސީބާތުގެ ސުންޕާކަން ދުރުކުރާނެތެވެ.)

_____________________________________