އައްޝައިޚު ޝަފީޢު ޢަބްދުﷲ

އެއް ޒަމާނެއްގައި އުޅުނު ވަރަށް މޮޅު ވަޑިއެކެވެ. އޭނާ ވަޑާންކުރުމުގައި މުޅި ޢުމުރު ހޭދަކުރިއެވެ. މި ގޮތުގައި ދިގު މުއްދަތެއް ފާއިތުވުމަށް ފަހު، ޤުދުރަތީ ޤާނޫނުގައި އޮންނަ ގޮތުން މާވަޑިޔާއަށް ވެސް މުސްކުޅި ޢުމުރުގެ ހަރުފަތްތަކަށް އަރާން ޖެހުނެވެ. މުސްކުޅިކަމާ އެކު، މަސައްކަތުގައި ލިބި ހުރި ތޫނުފިލިކަމުގެ މައްޗަށް ލޯބޯ ކޮށިވުމުގެ އުނިކަން މަތިވެގެން ދިޔުމުން، މަސައްކަތާ ދުރަށް ގޮސް، ޙަޔާތުގައި ބާކީ އޮތް ދުވަސްތައް އަނބިދަރީންނާ އެކު ހޭދަކުރާން އޭނާ ނިންމިއެވެ.

މަސައްކަތް ހުއްޓައިލާން ނިންމުމަށް ފަހު، މާވަޑިޔާ މަސައްކަތްކުރަމުން ދިޔަ ކުންފުނީގެ ވެރިޔާއަށް މި ވާހަކަ ނަންގަތެވެ. ލިބެމުން ދިޔަ މުސާރަ ދެން ނުލިބޭނެތީ އެ ކަމާ ދެރަވާކަމަށާއި، އެހެން ނަމަވެސް ޢުމުރުން ދުވަސްވުމުގެ ސަބަބުން، ދެން އިތުރަށް ވަޑާންކުރުމުގެ މަސައްކަތުގައި ނޫޅެވޭނެކަމަށް ވެސް ނަންގަތެވެ.

މާވަޑިޔާގެ ވާހަކަތައް އަޑުއަހައިފައި، ކުންފުނީގެ ވެރިޔާ އެދިލެއްވީ، ވަޑިކަމުގެ އާލަތްތަކާއި ހަތިޔާރުތައް އަތުން ދޫކޮށްލުމުގެ ކުރީން، އަދި އެއް ގެ އަޅައިދިނުމަށެވެ. މާވަޑިޔާ އެ ކަމަށް އެއްބަސްވިއެވެ. އެއީ އޭނާގެ ވެރިޔާއަށް ކޮށްދޭ އެންމެ ފަހު މަސައްކަތުގެ ގޮތުގައި ދެކިގެންނެވެ. ނަމަވެސް، ވަޑާންކުރުމުގެ މަސައްކަތަށް އަލްވަދާއު ކިޔުމަށް ފަހު އަނބިދަރީންނާ އެކު، ހަޔާތުގައި ދެން އޮތް ދުވަސްތަކުގައި އުޅޭން ބޭނުންވެފައި ހުރެވުނުލެއް ބޮޑުކަމުން، ހަވާލުވެވުނު އެންމެ ފަހުގެ މަސައްކަތަށް އެހާ ބޮޑު އަހައްމިއްޔަތެއް ދެވޭ ގޮތެއް ނުވިއެވެ. ގެ އަޅަމުން ދިޔައީ މާވަޑިޔާގެ ހަގީގީ ފެންވަރާ ނިސްބަތް ކުރާ ނަމަ، ފަރުވާ ކުޑަ ގޮތަކަށެވެ. ގެ އެޅުމުގައި ބޭނުންކުރަމުން ދިޔައީ އަވަހަށް އަތުޖެހުނު އެއްޗެއް ހޯދާ އުސޫލުން، ފެންވަރު ދަށް ތަކެއްޗެވެ. މާވަޑިޔާގެ މަސައްކަތުގައި އޭގެ ކުރީން ނަމަ، ބޭނުން ނުކުރާނޭހައި ނޭކަ ތަކެއްޗެވެ. މި ކަހަލަ ގޮތަކަށް ގޭގެ މަސައްކަތްކޮށް ނިންމުމަށް ފަހު، ކުންފުނީގެ ވެރިޔާއާ ގެ ހަވާލު ކޮށްފިއެވެ.

ގޭގެ މަސައްކަތް ނިންމައި، ވެރިޔާއަށް އެ ކަން އެންގި ދުވަހު، ވެރިޔާ މާވަޑިޔާގެ ގާތަށް ދުރުވެ، އައު ގޭގެ ތަޅުދަނޑި މާވަޑިޔާގެ އަތަށް ދެއްވިއެވެ. އަދި ބުނުއްވިއެވެ. "މިއީ އަހުރެންގެ ގާތުގައި ދިގު މުއްދަތެއްގައި، އިޚުލާޞްތެރިކަމާ އެކު މަސައްކަތް ކުރި ކަމަށް ޓަކައި، އަހަރެން ދޭ ހަދިޔާއެކެވެ."

ދަންނާށެވެ! އިންސާނާއަކީ ވެސް މި ވާހަކައިގައި އުޅުނު މާވަޑިޔާގެ މަގާމުގައި ހުރި މީހެކެވެ. ﷲ ސުބުޙާނަހޫ ވަތަޢާލާ އިންސާނާ ދުނިޔެއަށް ފޮނުއްވައި، ހެޔޮ ޢަމަލުތަކާއި ހެޔޮ ދިރިއުޅުމެއްގެ "ގެއެއް" ބިނާކުރާން އެންގެވިއެވެ. އެ މަސައްކަތް ފުރިހަމަޔަށް ކޮށްފި ނަމަ، އެ ގޭގެ ތަޅުދަނޑި އިންސާނާގެ ކަނާއަތަށް ލިބޭނީ އުޚުރަވީ ޙަޔާތުގައި، މަޙުޝަރުގެ މައިދާނުގައެވެ. އެ ތަޅުދަނޑީން ހުޅުވައިލެވޭނީ ރިވެތި އަދި ފުރިހަމަ ގަނޑުވަރެއްގެ ދޮރޯށްޓެވެ. މާބަގީޗާތަކުގެ ބުސްތާނެއްގެ ދޮރޯށްޓެވެ. ހިނގަހިނގައި ހުންނަ ފެންއާރުތަކާއި ރީތި ރާގުރާގަށް ލަވަ ކިޔާ ދޫނިތަކާއި، ހެޔޮ އެކުވެރީންގެ ސުހުބަތުން ފަޅުފިލައިފައިވާ ގަނޑުވަރެއްގެ ދޮރޯށްޓެވެ. އެކަމަކު، މިއަދު އިންސާނާ ބިނާކުރާން ޖެހޭ ގޭގެ މަސައްކަތުގައި ފަރުވާކުޑަކޮށްފި ނަމަ، އެ ދުވަހަކުން އޭނާގެ ވައަތަށް ލިބޭނީ ޖިފުޓިގަނޑަކަށް ވެސް ނުފުދޭ ފަދަ، ފަޅު، އަނދިރި، ކަނު ތަނެއްގެ ތަޅުދަނޑިއެވެ. އެ ތާނގައި އުފާވެރިކަމެއް، ބާއްޖަވެރިކަމެއް، އަލިކަމެއް، ލޯތްބެއް ނޯންނާނެއެވެ.

___________________________________