އަބާ މުޙަންމަދު

ރައީސުލްޖުމްހޫރިއްޔާ ޑރ. މުޙަންމަދު މުޢިއްޒު އެމެރިކާގެ ނިއުޔޯކަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށް ފަހު މިއަދު ހެނދު މާލެވަޑައިގަތީ މި ކުޑަކުޑަ ދިވެހިރާއްޖޭގެ އަޑު އެތައް މަންސައެއްގައި ދުނިޔެއަށް އިއްވަވައިފައެވެ. އެ މަނިކުފާނު އެމެރިކާއަށް ވަޑައިގަތީ އދ.ގެ އާންމު މަޖިލީހުގެ 79ވަނަ ބައްދަލުވުމުގައި ބައިވެރިވެވަޑައިގަތުމަށް ޓަކައެވެ. އެމެރިކާއަށް ކުރެއްވި މި ދަތުރުފުޅުގައި އދ. ގެ ޢާންމު މަޖިލީހުގެ 79ވަނަ ޖަލްސާގައި ތަޤުރީރުކުރެއްވުމުގެ އިތުރަށް  އެމަނިކުފާނު ވަނީ އދ.ގެ ސަލާމަތީ މަޖިލީހުގައިވެސް ތަޤުރީރު ކުރައްވައިފައެވެ. މިއީ ރާއްޖޭގެ ރައީސުލްޖުމްހޫރިއްޔާގެ މަގާމުގައި ހުންނެވި ބޭފުޅަކު، އދ.ގެ ސަލާމަތީ މަޖިލީހުގައި ތަޤުރީރު ކުރެއްވި ފުރަތަމަ ފަހަރެވެ.

އދ.ގެ ޢާންމު މަޖިލީހުގައި ރައީސް ދެއްވި ތަޤުރީރުގައި މި ކުޑަކުޑަ ދިވެހިރާއްޖެއިން ވަނީ ބާރުގަދަ މެސެޖުތަކެއް ދުނިޔެއަށް ދެއްވައިފައެވެ. އިސްރާއީލުގެ ނިރުބަވެރިކަމާއި އެ މީހުން ހިންގާ ނަސްލުހޭދު ހުއްޓުވާން ދުނިޔެއަށް ގޮވައިލައްވައިފައެވެ. އަދި ބައިނަލްއަޤުވާމީ މުޖުތަމަޢުން އިސްރާއީލުގެ އަނިޔާވެރި ބޮޑުވަޒީރު ބިންޔާމީން ނަތަންޔާހޫ ޒިންމާދާރުކުރުވާން ޖެހޭކަމަށް ހަރުއަޑުފުޅުން އެ މަނިކުފާނު ވަނީ ގޮވައިލައްވައިފައެވެ. ފަލަސްޠީނަށް މިނިވަން ދައުލަތެއް ކަށަވަރުކޮށްދެއްވާން ވެސް އެ މަނިކުފާނު ގޮވައިލެއްވިއެވެ.

މި ތަޤުރީރުގެ އިތުރަށް ވެސް މި ދަތުރުފުޅުގައި އެ މަނިކުފާނުވަނީ މުހިންމު މައުޟޫޢުތަކަކަށް ގިނަ ތަޤުރީރުތަކެއް ދެއްވައިފައެވެ. އަދި އދ.ގެ އާންމު މަޖިލީހުގެ 79ވަނަ ބައްދަލުވުމުގެ ހަވާސާގައި ބޭއްވުނު މުހިންމު ބައެއް ބައްދަލުވުންތަކުގެ ރިޔާސަތުގައި ކޯ-ޗެއާއެއްގެ ހައިސިއްޔަތުން އެމަނިކުފާނު ވަނީ އިސް ދައުރެއް އަދާކުރައްވައިފައެވެ. މީގެ އިތުރަށް އެ މަނިކުފާނު ވަނީ އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެ ވަޑައިގަތް އެކި ވަފުދުތަކުގެ އިސްވާރުންނާ ބައްދަލުކުރައްވައި، ވަކިވަކި މަޝްވަރާތައް ވެސް ބާއްވަވައިފައެވެ. އަދި ނިއުޔޯކްގައި ދިރިއުޅެމުންދާ ދިވެހިންނާ ވެސް އެ މަނިކުފާނު ވަނީ ބައްދަލުކުރައްވައިފައެވެ.

ރައީސުލްޖުމްހޫރިއްޔާގެ މި ދަތުރުފުޅު ނިންމަވައިލެއްވުމުގެ ކުރީން ރައީސުލްޖުމްހޫރިއްޔާ ވަނީ ޕްރިންސްޓަން ޔުނިވަރސިޓީގެ ޕްރިންސްޓަން ސްކޫލް އޮފް ޕަބްލިކް އެންޑް އިންޓަރނޭޝަނަލް އެފެއަރޒްގައި ތަޤުރީރު ކުރައްވާފައެވެ. މި ތަޤުރީރަށް ފަހު ދަރިވަރުން ދެންނެވި ސުވާލުތަކަށް ޖަވާބު ވެސް ދެއްވިއެވެ. އަދި އެމަނިކުފާނު ވަނީ، ނިއު ޔޯކްގައި ހުންނަ ގޫގްލްގެ މައި އޮފީހަށްވެސް ޒިޔާރަތް ކުރައްވައި އެތާގެ މަސައްކަތްތައް ބައްލަވައިލައްވައި އެ ކުންފުނީގެ ވެރީންނާ އެކު މަޝްވަރާތަކެއް ވެސް ބާއްވަވައިފައެވެ.

ޕްރިންސްޓަން ޔުނިވަރސިޓީގައި ރައީސުލްޖުމްހޫރިއްޔާތަގުރީރުކުރައްވަނީ<br>

އދ.ގެ އާންމު މަޖިލީހުގެ 79 ވަނަ ޖަލްސާގައި ބައިވެރިވެވަޑައިގަތުމަށް ޓަކައި، ރައީސުލްޖުމްހޫރިއްޔާ އެމެރިކާގެ ނިއުޔޯކަށް ފުރައިވަޑައިގަތީ މި މަހުގެ 20ވަނަ ދުވަހުއެވެ. މިއީ ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު އދ.ގެ އާންމު މަޖިލީހުގައި ބައިވެރިވަޑައިގަތް ފުރަތަމަ ފަހަރެވެ. އަދި އދ.ގެ ސަލާމަތީ މަޖިލީހުގެ ބައްދަލުވުމެއްގައި ތަޤުރީރުކުރެއްވުމުގެ ފުރުޞަތު ދިވެހިރާއްޖޭގެ ރައީސަކަށް ފުރަތަމަ ލިބިވަޑައިގަތުމުގެ ޝަރަފު ވެސް ލިބިވަޑައިގަތީ އެ މަނިކުފާނަށެވެ. އަދި އެމަނިކުފާނުގެ މި ދަތުރުފުޅު ދިމާވީ، ދިވެހިރާއްޖެ، އދ.ގެ މެންބަރު ޤައުމަކަށް ވިތާ 59 އަހަރު ފުރުނު މުނާސަބާއާ ވެސްމެއެވެ.

މިއަދު ހެނދުނު ރައީސުލްޖުމްހޫރިއްޔާ ރާއްޖެ ވަޑައިގަތީ، ދިވެހިރާއްޖެއަކީ ދިވެހިރާއްޖެއަކީ ބިންކުޑަޔަސް ބައި މަދަސް ދިވެހީންނަށް ދުނިޔޭގެ ކުރިމަތީގައި ހައްގު ބަސް ބުނާންކެރޭނެކަން މުޅި ދުނިޔެއަށް ސާބިތުކޮށްދެއްވައި ރާއްޖެއަށް ޝުހުރަތު ހޯއްދަވައިދެއްވައިފައެވެ. ރަޢިސުލްޖުމްހޫރިއްޔާ ޑރ. މުޙަންމަދު މުޢިޒު އދ.އަށް ކުރެއްވި ދަތުރުފުޅުގައި މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބުރާހީމާއި، ޚާރިޖީ ކަންތައްތަކާ ބެހޭ ވަޒީރު މޫސާ ޒަމީރު ހިމެނިވަޑައިގަންނަވާ ހެން ދައުލަތުގެ އިސް ވަފުދެއް ބައިވެރިވިއެވެ.

__________________________________

އިސްވާރު      ނ.     (1) އިސްވެ ހުންނަ މީހާ (2) ވެރިޔާ

މަންސަ       ނ.     (1) ވަކި މައުޟޫޢަކަށް ގިނަބައެއްގެ ތެރޭގައި ޚިޔާލު ހުށަހެޅުމުގެ ނުވަތަ މަޝްވަރާކުރުމުގެ ފުރުސަތު. (2) ބަޔަކާ މުޚާޠަބުކުރުމަށް މީހާ އޭގެ ފަހަތުގައި ހުއްޓި ހުންނަ އުސްމޭޒެއް ފަދަ އެތި. (3) ޖަލްސާއެއްގައި ޚާއްޞަ ބަޔަކު ތިބެން ހަދާ އިސްޓޭޖު ނުވަތަ އަށި.