އަޒީޒު ޖަމާލު

ކޮންމެ އަހަރަކު އޮކްޓޫބަރު މަހު 14ވަނަ ދުވަހަކީ "ބައިނަލްއަގުވާމީ އީ-ކުނީގެ ދުވަސް (އިންޓަރނޭޝަނަލް އީ-ވޭސްޓް ޑޭ)"ގެ ގޮތުގައި ފާހަގަކުރާ ދުވަހެވެ. މި ދުވަސް ދުނިޔޭގައި ފުރަތަމަ ތަޢާރަފުކުރެވުނީ 2018ވަނަ އަހަރު، އެ އަހަރު ބޭއްވި ވޭސްޓް ފްރަމް އިލެކްޓްރިކަލް އެންޑް އިލެކްޓްރޯނިކް (weee) ފޯރަމްގައި ނިންމި ނިންމުމެއްގެ ނަތީޖާއެއްގެ ގޮތުންނެވެ. އެއީ މި ފަދަ އާލަތްތައް ބޭނުންކުރާ މީހުންގެ މެދުގައި އެ ފަދަ ތަކެތި ރިސައިކަލް ކުރުމުގެ ހޭލުންތެރިކަން އުފެއްދުމުގެ މަގުސަދުގައެވެ.

މި ދުވަސް ބައިނަލްއަގުވާމީ ގޮތުން 2018ވަނަ އަހަރު ތަޢާރަފުކޮށް ފާހަގަކުރަމުން އައިކަމަށް ވިޔަސް މި ދުވަސް ދިވެހިރާއްޖޭގައި މި އަހަރު މި ފާހަގަކުރަނީ ފުރަތަމަ ފަހަރަށެވެ. މުޅީން އަލަށެވެ.

މި ދުވަސް މި އަހަރު ފާހަގަކުރުމުގެ ގޮތުން ހައްދުންމަތީ އަތޮޅު ކައުންސިލާއި "ކްލީން މޯލްޑިވްސް" ގުޅިގެން ހައްދުންމަތީގައި މި ފެށޭ އޮކުޓޫބަރު 14ވަނަ ދުވަހު (ބައިނަލްއަޤުވާމީ އީ-ކުނީގެ ދުވަހު) ވަރަށް ޚާއްޞަ ޕެނަލް ޑިސްކަޝަނެއް ބާއްވާ ގޮތަށް މިހާރު ވަނީ އިންތިޒާމުކުރެވިފައެވެ. މި ޑިސްކަޝަން ބާއްވަނީ ހަތަރު ބޭފުޅުންގެ މައްޗަށް އެކުލެވޭ، ތަޖުރިބާކާރުންގެ ޚާއްޞަ ޕެނަލެއްގެ މެދުގައެވެ. މި ޕެނަލް ޑިސްކަޝަން އޮންނާނެކަމަށް "ފަރަގު" މީޑިއާއަށް މަޢުލޫމާތު ލިބިފައިވަނީ ހައްދުންމަތީ ގަމުގައި ނުވަތަ އިސްދޫގައެވެ. ވަކި ރަށެއް އަޅުގަނޑުމެންނަކަށް އަދި ކަށަވަރެއް ނުވެއެވެ.

މި ޑިސްކަޝަންގައި ޕެނަލިސްޓުންގެ ގޮތުގައި ތިއްބަވާނީ މި ދާއިރާގެ ތަޖުރިބާކާރު މާހިރުންނެވެ. މި ބޭފުޅުންނަކީ، އިގުތިޞާދާއި މުއާޞަލާތާ ބެހޭ ތަޖުރިބާކާރު މާހިރެއްކަމުގައިވާ، (ޕިކް މޯލްޑިވްސްގެ ފައުންޑަރ) އަލްއަޚު ރިޢާޔަތު ޢަބަދުލްމަޖީދާއި، ވޭސްޓް މެނޭޖްމެންޓް ކޯޕަރޭށޝަން (ވެމްކޯ)ގެ މެނޭޖިންގ ޑިރެކްޓަރ އަލްއަޚު މުޖުތަބާ ޖަލީލާއި، ކުރީގެ މިނިސްޓަރ އޮފް ސްޓޭޓް ފޮރ އެންވައިރަންމެންޓް، ކްލައިމެޓް ޗޭންޖް އެންޑް ޓެކްނޮލޮޖީ އަލްއަޚު މުޙަންމަދު ޝަރީފާއި، މިނިސްޓަރ އޮފް ކްލައިމެޓް ޗޭންޖް، އެންވައިރަންމެންޓް އެންޑް އެނަރޖީގެ ނާއިބު އަލްއަޚު އަހުމަދު ނިޒާމެވެ.

މި ބޭފުޅުން މަޢުލޫމާތުދެއްވައި ޚިޔާލު ބަދަލުކުރައްވާނީ މި ފަދަ ކުނިބުނި ބަލަހައްޓާނެ ގޮތުގެ މައްޗަށާއި މި ފަދަ ކުނީގެ އަދުގެ ޙާލަތު އޮތް ގޮތާއި މި ފަދަ ކުނިބުނީގެ ސަބަބުން ތިމާވެއްޓާއި އިންސާނާގެ ސިއްޙަތަށް ފޯރާނެ އަސަރުގެ މައްޗަށާއި ފުރިހަމަ ގޮތުގައި ކުނި ރިސައިކަލްކުރާނެ ގޮތާއި ކުނި ނައްތައިލާނެ ތަރީގާގެ މައްޗަށެވެ. މީގެ އިތުރަށް ކުނި ނައްތައިލުމުގެ ސިޔާސަތާއި ގަވާއިދުތަކުގެ މައްޗަށް ވެސް މި ބޭފުޅުން އަލިއަޅުއްވައިލައްވާނެއެވެ. އަދި މި ފަދަ ތަކެތި އުފައްދާ ފަރާތްތަކާއި ބޭނުންކުރާ މީހުންގެ ދައުރާއި އަދި އީޖާދިއްޔަތާއި އަދި މި ފަދަ ކުނިބުނި މެނޭޖުކުރުމަށް ކުރިމަގުގައި އަންނާނެ ބަދަލުތަކުގެ މައްޗަށް ވެސް އަލިއަޅުއްވައިލައްވާނެއެވެ.

މި ޕެނެލް ޑިސްކަޝަން ހުށަހަޅުއްވައިދެއްވާނީ (މޮޑަރޭޓްކުރައްވާނީ) ކްލީން މޯލްޑިވްސްގެ މުއައްސިސް އަދި ރައީސް އަލްއުޚުތު ޙަފްސަތު ޢަލީމެވެ.

މީގެ އިތުރު ކަންތައްތަކެއް ވެސް އީ-ކުނީގެ ދުވަހާ ގުޅުވައިގެން ހައްދުންތީގައި ބާއްވާ ގޮތަށް ސަރުކާރުން ހަމަޖައްސަވައިފައިވާކަމަށް ވެސް ޚަބަރު ލިބިފައި ވެއެވެ.

ބައިނަލްއަގުވާނީ އީ-ކުނީގެ ދުވަސް ރާއްޖޭގައި ފުރަތަމަ ފަހަރަށް ފާހަގަކުރާއިރު، މި ކަމަށް ހައްދުންމަތި ޚިޔާރުކުރެއްވިކަމީ ހައްދުންމައްޗަށް ލިބުނު ޝަރަފެކެވެ. އަދި އެއީ ތަރައްގީގެ ކުރިމަގު އެންމެ ފަހިކޮށް އޮތް އަތޮޅަކީ އެއީކަމަށް "ކްލީން މޯލްޑިވްސް"އިން ގަބޫލުކުރާ ކަމުގެ ހެތްކެކެވެ. މި ކަމާ ބެހޭ އިތުރު މަޢުލޫމާތު އަދި ގެނެސްދެވޭނެއެވެ.