އަލްއުސްތާޒު ޢަބްދުލްޢަޒިޒު ޖަމާލު އަބޫބަކުރު

ދުނިޔެއަށް ކުރިމަތިވެފައިވާ ބޮޑެތި މައްސަލަތަކަށް ބައިނަލްއަޤްވާމީ މުޖުތަމަޢުން އޮތީ އެކަށީގެންވާ މަސައްކަތެއް ނުކޮށް، އެ ކަމާ އަޅައިނުލައިކަމަށް ރައީސުލްޖުމްހޫރިއްޔާ ޑރ. މުޙަންމަދު މުޢިއްޒު ވިދާޅުވި ވިދާޅުވުމަކީ އދ. ލަދުގަންނަވައިލި ކަމެކެވެ. އެ މަނިކުފާނު އެންމެ ބޮޑަށް ބާރުލައްވައި ވާހަކަފުޅުދެއްކެވި މައްސަލައަކީ ފަލަސްތީނު ރައްޔިތުންނާ ދެކޮޅަށް އިސްރާއިލުން ހިންގާ ޢުދުވާނުގެ މައްސަލައެވެ. ފަލަސްތީނުގެ ނަސްލު ނައްތައިލުމަށް ޓަކައި ޔަހޫދީން ޣައްޒާގައި ހިންގަމުންދާ ނަސްލުހޭދު މިހާރުން މިހާރަށް ހުއްޓުވައި، ފަލަސްޠީނުގެ މިނިވަން ދައުލަތެއް ޤާއިމްކޮށްދޭން މުޅި ދުނިޔެއަށް ރައީސުލްޖުމްހޫރިއްޔާ ޑރ. މުޙަންމަދު މުޢިއްޒު އިއްޔެ ރޭ ވަނީ ގޮވައިލައްވައިފިއެވެ.

ރައީސުލްޖުމްހޫރިއްޔާ މި ކަމަށް ގޮވައިލެއްވީ އދ.ގެ އާންމު މަޖިލީހުގެ 79ވަނަ ޖަލްސާގައި އެ މަނިކުފާނު ދެއްވި ތަޤުރީރުގައެވެ. ރައީސުލްޖުމްހޫރީއްޔާ ޑރ. މުޙަންމަދު މުޢިއްޒުގެ ތަޤުރީރުގައި ވަނީ މީގެ ކުރީން ރާއްޖޭގެ އިސްވާރަކު ފަލަސްޠީނުގެ މައްސަލައަށް އަލިއަޅުއްވައިނުލައްވާ ވަރަށް، އެ މައްސަލައާ ބެހޭ ގޮތުން އަލިއަޅުއްވައިލައްވައި ވަރަށް ވަރުގަދައަށް ވާހަކަފުޅުދައްކަވައިފައެވެ. އެ މަނިކުފާނުގެ ވާހަކަފުޅުގައި، ޔަހޫދީން ޣައްޒާގައި ހިންގަމުންދާ ނަސްލުހޭދު ވަރަށް ބޮޑަށް ކުށްވެރިކުރެއްވިއެވެ. އަދި މިއީ ޔަހޫދީން ހިންގަމުންދާ ނިރުބަވެރި ޢަމަލުތަކެއްކަމަށް އެ މަނިކުފާނު ވަނީ ތަޤުރީރުގައި ވިދާޅުވެފައެވެ. އެ މަނިކުފާނުގެ ވާހަކަފުޅުގައި، އިސްކޫލުތަކާއި، ހަސްފަތާލުތަކާއި، އިންސާނީ އެހީތެރިކަން ފޯރުކޮށްދޭ ތަންތަނަށް ޔަހޫދީން ހަމާލާދީ ހާހުން ހާހުން މީހުން މަރަމުންދާ އިރު، އެ ކަން ނުހުއްޓުވި މިހާރު އެ ޖަރީމާތައް ލުބުނާނާއި ހިސާބަށް ފުޅާވެފައިވާކަން ފާހަގަކުރެއްވިއެވެ. އަދި މި ޢަމަލުތައް މީހުންގެ ލޯތަކަށް ފޮރުވާން ނޫސްވެރީން މަރަމުންދާކަން ވެސް އެ މަނިކުފާނު ފާހަގަކުރެއްވިއެވެ. އެހެންކަމުން ޔަހޫދީ ދައުލަތް މި ނިރުބަވެރި ޢަމަލުތަކަށް ޖަވާބުދާރީކުރުވާން ޖެހޭކަމަށް ވެސް އެ މަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، ފަލަސްޠީނުގެ މައްސަލައަށް ހައްލެއް ހޯދައިދޭން ދުނިޔޭގެ ޤައުމުތަކުން މަސައްކަތްކުރާން ޖެހޭކަން ފާހަގަކުރެއްވިއެވެ. މިނިވަން ދައުލަތެއްގެ ގޮތުގައި ފަލަސްޠީނުގެ ދައުލަތް ޤާއިމްކޮށް، އދ. ފުރިހަމަ މެންބަރުކަން އެ ޤައުމަށް ލިބޭކަން ޔަޤީން ކުރަންޖެހޭކަމަށް ވިދާޅުވިއެވެ. "1967ގެ ކުރީގެ ސަރަހައްދީ އިމާ އެއް ގޮތަށް މިނިވަން ފަލަސްޠީނުގެ ދައުލަތެއް އަޅުގަނޑުމެން ޤަބޫލުކުރަން. އެއީ އިރުމަތީ ޤުދުސް ފަލަސްޠީނުގެ ވެރިރަށްކަމަށް ބަލައިގެން. ފަލަސްޠީނުގެ އަޚުންނާއި އުޚުތުން މި ޢާންމު މަޖިލީހުގައި [ފަހަތުގައި ނަމަވެސް] ތިބޭން މިއަދު ފުރުސަތު ދެއްވީތީ އަޅުގަނޑުމެން މަރުހަބާދަންނަވަން. ދެން އަޅުނގަނޑުމެން ޔަޤީންކުރާން ޖެހެނީ ފަލަސްޠީނަށް އދ.ގެ ފުރިހަމަ މެންބަރުކަން ލިބުން." ރައީސުލްޖުމްހޫރިއްޔާ ވިދާޅުވިއެވެ. ރައީސް ވިދާޅުވި ގޮތުގައި ފަލަސްޠީނުގެ ވަފުދު އދ.ގެ ޢާންމު މަޖިލީހިގައި ތިބޭން ޖެހޭނީ ކުޅިބަލާން ތިބޭ މަންދޫބުންގެ ގޮތުގައެއްނޫނެވެ. ފަލަސްތީނުގެ އަޚުން ތިބޭންޖެހޭނީ އެހެން ގައުމުތަކާ އެއް ސަފެއްގައި އދ.ގެ ފުރިހަމަ މެންބަރުންގެ ގޮތުގައެވެ.

ރައީސްގެ ތަގުރީރު ދުނިޔޭގެ މީޑިއާ ތަކުގެ ފަލަ ސުރުޚީތަކަށް އެރިއެވެ.<br>

ފަލަސްޠީނު މައްސަލައިގައި ރާއްޖެއިން ގެންދަނީ ބައިނަލްއަޤްވާމީ އެކި މަންސަތަކުގައި އަބަދު ވެސް ވަކާލާތުކުރައްވަމުންނެވެ. އަދި އިސްރާއީލުގެ ނަސްލުހޭދު ހުއްޓުވާން މީގެ ކުރީން ވެސް ރައީސުލްޖުމްހޫރިއްޔާ ޑރ. މުޙަންމަދު މުޢިއްޒު ވަނީ ބައިނަލްއަގުވާމީ މުޖުތަމަޢަށް ގޮވައިލައްވައިފައެވެ. ރައީސުލްޖުމްހޫރިއްޔާގެ އިތުރަށް ސަރުކާރުގެ އިސްވެރީން ވެސް ބައިނަލްއަޤުވާމީ އެކި މަންސަތަކުގައި ގެންދަވަނީ އެ ކަމަށް ހަރުއަޑުފުޅުން ވަކާލާތުކުރައްވަމުންނެވެ. އދ.ގެ ޢާންމު މަޖިލީހުގެ 79 ވަނަ ޖަލްސާގައި ދެއްވި ތަޤުރީރު ފައްޓަވަމުން ރައީސުލްޖުމްހޫރިއްޔާ ވަނީ ދުނިޔެއަށް މި ވަގުތު ބޮޑެތި މައްސަލަތަކެއް ކުރިމަތިވެފައިވާކަން ފާހަގަކުރައްވައިފައެވެ. އަދި އެ މައްސަލަތަކުގެ ސަބަބުން އަސަރުނުކުރާ ޤައުމެއް ނެތްކަމަށް ވެސް އެމަނިކުފާނު ވިދާޅުވިއެވެ. ނަމަވެސް އެ ހުރިހާ މައްސަލަތަކެއް ބޮޑުވަމުންދާ އިރު، ދުނިޔެ އޮތީ އެކަށީގެންވާ މަސައްކަތެއް ނުކޮށް، އެ ކަމާ އަޅައިވެސްނުލައިކަމަށް ރައީސުލްޖުމްހޫރިއްޔާގެ ތަޤުރީރުގައި ފާހަގަކުރެއްވިއެވެ. "އަޅުގަނޑުމެން ބޭނުންވަނީ ހަމަޖެހުމުގައި އޮތް އދ.އެއް. ނުތަނަވަސްކަމުގައި އޮތް އދ.އެއް ނޫން" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ތަޤުރީރުގައި ވިދާޅުވީ ރާއްޖެއަށް މިނިވަންކަން ލިބުނުތާ 75 އަހަރުފުރުން 2040 ވަނަ އަހަރު ފާހަގަކުރާން ތައްޔާރުވަމުންދާ އިރު، ރާއްޖޭން ހާސިލުކުރާން ބޭނުންވާ ލަނޑުދަނޑިތަކެއް އެބަހުރިކަމަށެވެ. އަދި އދ.ގައި އެ މަނިކުފާނު ތަޤުރީރުކުރައްވާ އިރު، ރާއްޖެއާ މެދު ދެކޭ ތަސައްވުރެއް އޮތްކަން ވެސް އެމަނިކުފާނު ފާހަގަކުރެއްވިއެވެ. ރާއްޖޭގެ މިނިވަންކަމަށް 75 އަހަރު ފުރޭ އިރު، ރާއްޖެއަކީ އެންމެ ބޮޑަށް ތަރައްޤީވެފައިވާ ޤައުމުތަކުގެ ލިސްޓުގައި ހިމެނޭ ޤައުމަކަށް ހެއްދެވުމަކީ އަމާޒެއްކަމަށް ރައީސުލްޖުމްހޫރިއްޔާ ވިދާޅުވިއެވެ. "20240ވަނަ އަހަރު އަންނާންވާ އިރަށް ރާއްޖެއަކީ އެންމެ ބޮޑަށް ތަރައްޤީވެފައިވާ ޤައުމަކަށްވުމަކީ އަޅުގަނޑުގެ އުންމީދު." ރައީސުލްޖުމްހޫރިއްޔާ ވިދާޅުވިއެވެ. ރައީސުލްޖުމްހޫރިއްޔާ ވިދާޅުވީ އެންމެ ބޮޑަށް ތަރައްޤީވެފައިވާ ޤައުމަކަށް ހެދުމަކީ އުނދަގޫ މަސައްކަތެއްކަމަށް ހީވިޔަސް، އަމާޒެއް އޮވެގެން މަސައްކަތްކޮށްފި ނަމަ، އެއީ ހާސިލުނުކުރެވޭނެ ކަމެއް ނޫންކަމަށެވެ. އަދި ދަތި އުނދަގޫ މަރުހަލާތައް ކަޑައްތުކޮށްގެން ކާމިޔާބަށް ވާސިލުވުމަށް މަސައްކަތްކުރުމަކީ ރާއްޖެއަށް އާ ކަމެއް ނޫނެވެ.

އދ. މަޖިލީހުގައި ރައީސުލްޖުމްހޫރިއްޔާ ދެއްވި ތަގުރީރަކީ މިހާތަނަށް ރާއްޖޭގެ ވެރިއަކު އެ މަޖިލީހުގައި ދެއްވި އެންމެ ހިކުމަތްތެރި، އެންމެ މޮޅު ތަގުރީރުގެ ގޮތުގައި އެތައް ބަޔަކު ދަނީ ސިފަކުރަމުންނެވެ. އެ ތަގުރީރުގައި ރާއްޖެއާމެދު އެމަނިކުފާނު ގެންގުޅުއްވާ ތަސައްވުރާއި، އުންމީދުތަކާއި މައްސަލަތަކަށް ހޯއްދެވޭނެ ޙައްލުތަކުގެ އިތުރަށް ދުނިޔޭގެ ބޮޑެތި މައްސަލަތަކަށް އަލިއަޅުއްވައިލައްވައި ވާހަކަފުޅުތައް ތަރުތީބުކުރެއްވި ގޮތަށް ވެސް ދުނިޔޭގެ މީޑިއާގެ ބޮޑު ސަމާލުކަމެއް ވަނީ އައިސްފައެވެ.

އާދޭހެވެ! ރައީސްގެ އެ ވާހަކަފުޅު ދުނިޔޭގެ މަޝްހޫރު ހުރިހައި މީޑިއާއެއްގެ ފަލަ ސުރުޚީއަށް އެރިއެވެ. ކުޑަ ޖަޒީރާ ޤައުމެއްގެ އިސްވާރަކު ދެއްކެވީ ދުނިޔޭގެ ވަރުގަދަ އިސްވާރުންނަށް ވެސް ދައްކާން ނުކެރިފައި ހުރި ވާހަކަތަކެއްކަމަށް ދުނިޔޭގެ މީޑިއާތަކުން ރިޕޯޓްކުރިއެވެ. އަލްޖަޒީރާއާއި ރަޝިއާގެ އާރްޓީ (ރަޝިއާ ޓުޑޭ)އާއި މިނޫން ވެސް މަޝްހޫރު ބައިނަލްއަޤްވާމީ މީޑިއާތަކާއި އެކި ޤައުމުތަކަށް ނިސްބަތްވާ ޚަބަރު ފަތުރާ ވަސީލަތްތަކުން ރައީސްގެ އެ ވާހަކަފުޅުތައް ގެނެސްދިނެވެ. ރައީސްގެ ތަގުރީރުގެ ބައެއް ބައިތައް މީސްމީޑިއާގައި ވެސް ވިރަވިއެވެ.

އދ.އަކީ ދުނިޔޭގެ ސުލްޙައާއި އިންސާފު ޤާއިމުކުރުމަށް ޓަކައި އެކުލަވައިލައި މަސައްކަތްކުރަމުންދާ އެންމެ ބޮޑު ބައިނަލްއަޤްވާމީ ޖަމާޢަތެވެ. އ.ދގެ މެންބަރު ޤައުމުތަކުގެ ޢަދަދު 193 އަށް އަރައެވެ. އދ.ގެ މެންބަރު ޤައުމެއްގެ ހައިސިއްޔަތު ދިވެހިރާއްޖެ އަށްލިބުނީ މީގެ 59 އަހަރުކުރިން ރާއްޖެއަށް މިނިވަންކަން ލިބުނުތާ ދެ މަސް ދުވަސް ފުރިހަމަ ނުވަނީހެވެ. އޭގެ ފަހުން ރާއްޖެއިން އަންނަނީ އދ.ގެ ބައްދަލުވުންތަކުގައި ބައިވެރިވެ، ރާއްޖެއާއި ދުނިޔޭގެ މައްސަލަތަކުގައި ވާހަކަދައްކަމުންނެވެ. ނަމަވެސް މީގެ ކުރީން ރާއްޖެއިން އދ.ގައި ދެއްކި ވާހަކަތަކާއި ބައްދަލުވުންތަކަށް ވުރެ ބޮޑު ސަމާލުކަމަކާއި ތަޢުރީފެއް ލިބުނީ، އދ.ގެ 79ވަނަ އާންމު މަޖިލީހުގެ ބައްދަލުވުމުގައި ރައީސުލްޖުމްހޫރީއްޔާ ޑރ. މުޙަންމަދު މުޢިއްޒު ދެއްވި ތަޤުރީރަށެވެ. އެއީ މީގެ ކުރީން ރާއްޖޭގެ އިސްވާރަކު ފަލަސްޠީނުގެ މައްސަލައަށް އަލިއަޅުއްވައިނުލައްވާ ވަރަށް އެ މައްސަލައަށް އަލިއަޅުއްވައިލައްވައި ވަރަށް ވަރުގަދައަށް ވާހަކަފުޅު ދައްކަވައިފައި ވާތީއެވެ. އެ މަނިކުފާނުގެ ވާހަކަފުޅުގައި، ޔަހޫދީން އިސްކޫލުތަކާއި، ހަސްފަތާލުތަކާއި އިންސާނީ އެހީތެރިކަން ފޯރުކޮށްދޭ ތަންތަނަށް ހަމާލާދީ ހާހުން ހާހުން މީހުން ޝަހީދުކުރަމުންދާ އިރު، އެ ކަން ނުހުއްޓުވި މިހާރު އެ ޖަރީމާތައް ލުބްނާނާއި ހިސާބަށް ފުޅާވެފައިވާކަން ފާހަގަކުރެއްވިއެވެ. އަދި މިޢަމަލުތައް ފޮރުވާން ނޫސްވެރީން މަރަމުންދާކަން ވެސް އެމަނިކުފާނު ފާހަގަކުރެއްވިއެވެ. އެހެންކަމުން ޔަހޫދީ ދައުލަތް މި ނިރުބަވެރި ޢަމަލުތަކަށް ޖަވާބުދާރީކުރުވާން ޖެހޭކަމަށް ވެސް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ތަޤުރީރުގައި، އިސްރާއީލުން ޣައްޒާގައި ހިންގަނީ ނަސްލުހޭދެއްކަމަށް ބަޔާންކުރައްވައި ވާހަކަފުޅުދެއްކި ނަމަ ވެސް ރާއްޖޭގެ ނޫސްތަކުން އެ ވާހަކަ ގެނައީ އެއަށް ވުރެ ލުއިކޮށް ގަތުލުއާންމެއްގެ ސިފައިގައެވެ. ގަތުލުއާންމަކީ ނަސްލުހޭދަށް ވުރެ ކުޑަ ކަމެކެވެ. އެހެނީ "ގަތުލުއާންމު"ގެ މާނައެއްކަމަށް ރަދީފުގައި އޮންނަނީ "ރަހުމުކުޑަ ގޮތެއްގައި ނުވަތަ އަނިޔާވެރިކޮށް އެތައް ބައިވަރު ބަޔަކު މަރައިލުމުގެ ޢަމަލު"ކަމަށެވެ. ނަމަވެސް "ނަސްލުހޭދު"ގެ މާނައެއްކަމަށް އޮންނަނީ "އިންސާނީ ނަސްލެއް ނައްތައިލުމަށް ޓަކައި ގަސްތުގައި މަރައި ހުސްކުރުމުގެ ޢަމަލު"ކަމަށެވެ. އިނގިރޭސިބަހުން ރައީސް ދެއްވި ތަގުރީރުގައި ބޭނުންފުޅުކުރެއްވީ "genocide" (ޖެނޮސައިޑް) މި ލަފުޒެވެ. "massacre" (މަސެކާރ)އެއް ނޫނެވެ. ދިވެހިބަހަށް ބަލާއިރު ޖެނޮސައިޑާ އެންމެ ގުޅޭ ދިވެހި ލަފުޒަކީ "ނަސްލުހޭދު"ކަން ކަށަވަރެވެ. އެއީ "އިންސާނީ ނަސްލެއް (ފަލަސްތީނުގެ ރައްޔިތުން) ނައްތާލުމަށް ޓަކައި ގަސްތުގައި މަރައި ހުސްކުރުމުގެ ޢަމަލެކެވެ. މަސެކާރއަކީ (ގަތުލުއާންމަކީ) މިސާލަކަށް ފޭލިގެއަކަށް ހަމަލާދީ އެއް ފަހަރާ ގިނަ ބަޔަކު މަރައިލުން ފަދަ ކަމެކެވެ. މަސެކާރއާ އެންމެ ގުޅޭ ދިވެހި ލަފުޒަކީ "ގަތުލުއާންމު"ކަން ކަށަވަރެވެ.  ނަމަވެސް  ޔަހޫދީން އެ ހިންގަނީ ހަމައެކަނި ގަތުލު އާންމެއް ނޫނެވެ. އެއީ އެއަށް ވުރެ ނުބައި ނުލަފާ ޢަމަލެކެވެ. ނަސްލެއް ނައްތައިލުމަށް ޓަކައި ހިންގާ ބޮޑުވެގެންވާ ޖަރީމާއެކެވެ. ވީމާ، ރައީސް ބޭނުންފުޅުކުރެއްވި ލަފުޒުގެ ތަރުޖަމާ ދިވެހި ނޫސްތަކުން ކޮށްފައި ހުރީ ރަނގަޅަކަށް ނޫނެވެ. އެ ލަފުޒުގެ ބާރު މާ ދަށްކޮށެވެ. އެއީ ގަތުލު އާންމެއް ނޫނެވެ. އެއީ ނަސްލުހޭދެކެވެ. ވީމާ ނޫސްވެރީން ވެސް ރަދީފަށް އަހުލުވެރިވާން އެބަ ޖެހެއެވެ. އެހެން ނޫން ނަމަ، ރައީސްގެ ތަގުރީރު އަޅުގަނޑުމެންނަށް މާނަކުރެވެނީ މާ ބާރުދެރަކޮށެވެ. އެ މަނިކުފާނުގެ އަސަރު ގަދަ ތަގުރީރުގެ އަސަރު މާ ކުޑަކޮށްލެވެނީއެވެ. ވީމާ ރައީސު ވިދާޅުވީ ޔަހޫދީން ހަމައެކަނި ގަތުލުއާންމެއް ހިނގައިލި ވާހަކައެއް ނޫނެވެ. ނަސްލުހޭދެއް ހިންގާވާހަކައެވެ. "genocide" (ޖެނޮސައިޑް) ހިންގާ ވާހަކައެވެ. އެންމެ މަތީ ދަރަޖައިގެ ނިރުބަވެރިކަމުގެ ވާހަކައެވެ. ނަސްލެއް ހުސްކޮށް ނައްތައިލުމަށް ޓަކައި މީހުންތައް މަރައި ހުސްކުރުމުގެ ޢަމަލު ހިންގާ ވާހަކައެވެ. ހަމައެކަނި އެއް ފަހަރާ ގިނަ ބަޔަކު މަރައިލުމަށް ފަހު އެ ކަން ނިންމައިލި ވާހަކައެއް ނޫނެވެ.

___________________________________________

ނަސްލުހޭދު   ނ.     އިންސާނީ ނަސްލެއް ނައްތައިލުމަށް ޓަކައި ގަސްތުގައި މަރައި ހުސްކުރުމުގެ ޢަމަލު.

ގަތުލުއާންމު   ނ.     ރަހުމުކުޑަ ގޮތެއްގައި ނުވަތަ އަނިޔާވެރިކޮށް އެތައް ބައިވަރު ބަޔަކު މަރައިލުމުގެ ޢަމަލު.

އިސްވާރު    ނ.     (1) އިސްވެ ހުންނަ މީހާ (2) ވެރިޔާ

މީސްމީޑިއާ    ނ.    ގިނަބައެއްގެ މެދުގައި މައުލޫމާތާއި ޚިޔާލު ބަދަލުކޮށް، ގުޅުންތައް އުފައްދައި ދަމަހައްޓަން ބޭނުންކުރާ އިންޓަނެޓުގެ ވަސީލަތްތައް.

ވިރަވުން.    ނއ.     ޚަބަރެއް ނުވަތަ ވީޑިއޯއެއް ނުވަތަ ފޮޓޯއެއް ފަދަ އެއްޗެއް ޖާލުގެ ޒަރީއާއިން ހަލުވިކޮށް ފެތުރިގެން ދިއުން.

މަންސަ     ނ.      ވަކި މައުޟޫޢަކަށް ގިނަ ބަޔެއްގެ ތެރޭގައި ޚިޔާލު ހުށަހެޅުމުގެ ނުވަތަ މަޝްވަރާކުރުމުގެ ފުރުސަތު.

ނިރުބަވެރިކަން  ނ.     (1) އާދަޔާ ޚިލާފަށް އުފައްދާ ނުވަތަ ފަތުރާ ބިރުވެރިކަން. (2) ފައިދާއެއް ހޯދާން ނުވަތަ މަގުސަދެއް ހާސިލުކުރާން ދައްކާ ގަދަބަދަވިކަމާއި އާދަޔާ ޚިލާފަށް ގަންނަވާ ބިރު.