ޢަޒީޒު ޖަމާލު

މިސްކިތްތަކުގެ އިމާމުންނަށް ޚާއްސަކުރައްވައިގެން މަހާސިންތާއެއް ބޭއްވުމަކީ ތާރީޚީ ކަމެކެވެ. މިއީ ދިވެހިރާއްޖޭގައި ފުރަތަމަ ފަހަރަށް ބާއްވާ މި ފަދަ މަހާސިންތާއެވެ. މިއަދު ހެނދުނު އިސްލާމީ މަރުކަޒުގެ ޖަލްސާކުރާ މާލަމުގައި ފަށައިގެން މިއަދުގެ ނިޔަލަށް ބާއްވާ މަހާސިންތާއަކީ މިސްކިތްތަކުގެ އިމާމުންނާއި ޚަޠީބުންނަށް ކުރިމަތިވާ އުނދަގޫތަކާއި ދަތިތައް ދެނެގަނެ އެ ކަންކަމަށް ހައްލު ހޯދައިދިނުމާ އެކު، އިމާމުންނަށް ބޭނުންވާ ދީނީ އަދި އިދާރީ ބައެއް ދާއިރާތަކުން އިމާމުންގެ ސިކުނޑިފުޅުތައް ތާޒާކޮށްލައްވައި އިމާމުންގެ ދައުރާއި މުހިންމުކަމާއި އިސްލާމްދީނުގައި މިސްކިތްތަކާއި އިމާމުންގެ ޚާއްޞިއްޔަތުގެ މައްޗަށް ހޭލުންތެރިކަން އިތުރުކުރުމުގެ މަގުސަދުގައި މި އަހަރު ރާއްޖޭގެ ތާރީޚުގައި ވެސް މުޅީން އަލަށް ފައްޓަވައިގެން ކުރިއަށް ގެންދަވާ މަހާސިންތާއެކެވެ. އިމާމުންގެ މަހާސިންތާ 2024ގައި 500އަށް ވުރެ ގިނަ އިމާމުންނާއި ޚަޠީބުން ބައިވެރިވެވަޑައިގަނެއެވެ. މީގެ ތެރޭގައި މަހާސިންތާއަށް މާއްދީ ގޮތުން ޙާޒިރުވެވަޑައިގަތް 208 އިމާމުންނާއި ދާދިވަރުކޮށް ބައިވެރިވެވަޑައިގަންނަވާ 300 އިމާމުން ހިމެނެއެވެ. މިއީ ތާރީޚީ މޭލުގަލެކެވެ.

މަހާސިންތާގެ ފުރަތަމަ ދަންފަޅީގައި ވަޒީރު ޑރ. ޝަހީމް މަޢުލޫމާތުދެއްވަނީ (ފޮޓޯ: އިސްލާމިކް ސްޓޫޑިއޯ)<br>

މި މަހާސިންތާ އިފުތިތާޙުކުރުމަށް ޓަކައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ މި މަހާސިންތާގެ މަޤްސަދަކީ އިމާމުން ތަމްރީނުކުރުމާއި ޒުވާން އިމާމުންގެ ޖީލެއް މުޖުތަމަޢުއަށް ނެރުންކަމަށެވެ. އަދި އިމާމުންނާއި އިސްލާމީ ކަންތައްތަކާ ބެހޭ ވުޒާރާއާ ގުޅުން ބަދަހިކުރައްވައި، އިމާމުންގެ ހުށައެޅުންތައް އަޑުއަހައި، މަޝްވަރާކުރެއްވުމަކީ ވެސް މި މަހާސިންތާގެ ބޭނުމެއްކަމަށް ވަޒީރު ވިދާޅުވިއެވެ. ހަމައެއާ އެކު އިމާމުންގެ ދައުރު ފުޅާކުރުމަށް ޓަކައި މަސައްކަތްޕުޅުކުރެއްވުމަކީ ވެސް މި މަހާސިންތާގެ މަގުސަދެއްކަމަށް ވަޒީރު ވިދާޅުވިއެވެ. އަދި މިސްކިތްތައް ބެލެހެއްޓުމުގައި ކައުންސިލްތަކާ ގުޅިގެން މަސައްކަތްކުރަންޖެހޭ ގޮތާއި މުޖުތަމަޢުގެ އެކި ކަންކަމުގައި އިމާމުންގެ ބައިވެރިވުން މުހިންމުކަން އިމާމުންނަށް އަންގައިދިނުމަކީ  ވެސް މި މަހާސިންތާގެ މަގުސަދެކެވެ. މީގެ އިތުރަށް ރާއްޖޭގެ މިސްކިތްތަކަކީ އަޅުކަންކުރާން މީހުން ދާހިތްވާ ތަނަކަށް ހެއްދެވުމަށް އިމާމުންނަން ކުރެވިދާނެ ކަންކަން އަންގައިދިނުމުގައި އިމާމުންގެ ދައުރަކީ ކޮބައިކަން އިމާމުންނަށް ހަނދުމަފުޅުކޮށް އެރުވުމަކީވެސް މިމަހާސިންތަގެ ބޭނުމެކެވެ.

ފަސް އަހަރު ދުވަހުގެތެރޭގައި ރާއްޖެއިން ބޭރަށް 500 އިމާމުން ތަމްރީން ކުރުމަށް ފޮނުވަން މަސައްކަތްކުރަމުން އަންނަކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. ވަޒީރު މިފަދައިން ވިދާޅުވީ އިމާމުންގެ މަހާސިންތާ 2024 ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އެ މަނިކުފާނުގެ ވާހަކަފުޅުކުރިއަށް ގެންދަވަމުން އިމާމުންގެ މުހިންމުކަމާއި، އިމާމުކަމުގެ މަސްއޫލިއްޔަތު އަދާކުރުމަކީ ހެޔޮކަމެއްކަން ފާހަގަކުރައްވައި އެ ކަމުގެ ފައިދާތަކާ ގުޅޭ ގޮތުން ކީރިތި ޤުރުއާނާއި ރަސޫލާގެ ސުންނަތުގެ އަލީގައި ވަނީ ވާހަކަފުޅު ދައްކަވައިފައެވެ. އަދއިމާމުން އަދާކުރެއްވި ދައުރުގެ މައްޗަށް ތާރީޚީ ގޮތުން ވެސް ބައްލަވައިލެއްވިއެވެ. އިމާމުކަމުގެ މަތިވެރި މަޤާމަކީ ކައު ރަސޫލާއާއި ޚުލަފާއުއްރާޝީދޫންއާއި މަޒުހަބުތަކުގެ އިމާމުން ވެސް އަދާކުރެއްވި ވަޒީފާއެއްކަން ފާހަގަކުރައްވައި އެ މަނިކުފަނު ފުރަތަމަ އަދާކުރެއްވި ވަޒީފާއަކީ ވެސް ޠައިބާ އިމްކިތުގެ އިމާމުކަންކަމުގައި ވެސް ވިދާޅުވެ ކުރީގެ ހަނދުމަފުޅުތައް އާކުރެއްވިއެވެ. އަދި މިހާރުވެސް ދަމު ނަމާދާއި ތަރާވީޙު ނަމާދާއި އެ ނުޏް ނަމާދުރަކުގެ އިމާމުކަން ވެސް ކުރައްވާކަން ފާހަގަކުރެއްވިއެވެ.

އިމާމުންގެ މަހާސިންތާގައި ބައިވެރީން: 500އަށް ވުރެ ގިނަ އިމާމުން ބައިވެރިވެވަޑައިގަތެވެ. (ފޮޓޯ: އިސްލާމިކް ސްޓޫޑިއޯ)<br>

މިއަދު އިސްލާމީ ކަންތައްތަކާ ބެހޭ ވަޒީރު ދެއްކެވިވާހަކަފުޅުގައި އިމާމުން ތަމްރީންކުރެއްވުމަށް ޓަކައި އިސްލާމީ ކަންތައްތަކާ ބެހޭ ވުޒާރާއިން ކުރައްވާ މަސައްކަތްޕުޅުގެ މައްޗަށްވެސް އަލިއަޅުއްވައިލެއްވިއެވެ. ވަޒީރު ވިދާޅުވީ، މި އަހަރުގެ މިހައި ތަނަށް އާ މަންހަޖުގެ ތެރެއިން 400 އިމާމުންނަށް ތަމްރީން ދެއްވައިފައިވާކަމަށެވެ. އަދި ރާއްޖޭން ބޭރަށް 60 އިމާމުން ފޮނުއްވައިގެން ތަމްރީނުކޮށްފައިވާނެކަން ފާހަގަކުރައްވައި ވަޒީރު ވިދާޅުވީ އަހަރު ނިމުމުގެ ކުރީން 100 އިމާމުން ރާއްޖޭން ބޭރަށް ފޮނުވައިގެން ތަމްރީންކުރުމަށް މަސައްކަތްކުރައްވަމުން ގެންދަވާކަމަށެވެ. އަދި އެ މަނިކުފާނު ވިދާޅުވީ [ރައީސުލްޖުމްހޫރިއްޔާ ޑރ. މުޙަންމަދުގެ ރިޔާސީ ފަސް އަހަރުގެ] މި ދައުރުގައި ކޮންމެ އަހަރަކު 100 އިމާމުން ރާއްޖޭން ބޭރަށް ފޮނުވައިގެން ތަމްރީން ކުރުމަށް ޢަމާޒުކޮށްފައިވާކަމަށާއި، މި ފަސް އަހަރު ދުވަހުގެ ތެރޭގައި 500 އިމާމުން ރާއްޖޭން ބޭރުން ތަމްރީންކުރައްވާނެކަމަށެވެ. އިމާމުންނަށް ދިމާވާ ދަތިތައް ހައްލުކުރުމަށް އިސްލާމީ ކަންތައްތަކާ ބެހޭ ވުޒާރާއިން ކުރެވެން ހުރި ހުރިހާ މަސައްކަތްތަކެއް ކުރައްވާނެކަމުގެ ޔަޤީންކަންވެސް ވަޒީރު ވަނީ ދެއްވާފައެވެ. އަދި މި އަހަރުގެ ތެރޭގައި މަދުވެގެން 1000 ޒުވާން ޚަތީބުން އުފައްދަވައި [ޚިދުމަތަށް] ނެރުއްވާނެކަމަށް ވެސް އެ މަނިކުފާނު ވިދާޅުވިއެވެ.

އިމާމުންގެ މަހާސިންތާ 2024ގެ ފުރަތަމަ ދަންފަޅީގައި މަޢުލޫމާތުދެއްވީ ޚުދު އިސްލާމީ ކަންތައްކާ ބެހޭ ވަޒީރު ޑރ. މުޙަންމަދު ސަޢީދު ޢަލީ ސަޢީދާއި މަސްޖިދުއްސުލްޠާން މުޙަންމަދު ތަކުރުފާނުލްއަޢުޡަމުގެ އިސް އިމާމު އައްޝައިޚު މުޙަންމަދު ލަޠީފެވެ.

____________________________

މާއްދީ      ނއ.     (1) ލޮލަށް ފެންނަ ނުވަތަ އަތުން ހިފޭ ގޮތް ހުންނަ. (2) ރޫޙާނީ ގޮތުގެ އިދިކޮޅު ގޮތް ހުރި.

ދާދިވަރު     ނއ.     (1) މާއްދީ ހަގީގަތެއް ނެތި ސުމޭކު ވަސީލަތުން ހަގީގަތެއްކަމަށް ދައްކާ. (2) ހަގީގަތާ ވަރަށް ގާތް.

މޭލުގާ       ނ.      (1) ކަމެއްގެ ތާރީޚުގައި ނުވަތަ މީހެއްގެ ހަޔާތުގައި ހިނގައިފައިވާ މުހިންމު ހާދިސާއެއް. (2) ތަނަކާ ހުރި ދުރުމިން އަންގައިދޭން މަގުމަގުގެ އަރިމަތީގައި ހުންނަ ގާ ނުވަތަ ބޯޑު ހަރުކޮށްފައި ހުންނަ ދަނޑި.

އިދާރީ      ނއ.     އެ ތަނެއް ހިންގުމުގެ މަސައްކަތާ ގުޅޭ.