އަބާ މުޙަންމަދު

ދިވެހިރާއްޖޭގެ އިގުތިސާދީ ދޮރޯށިކަމަށް މިހާރު ނަން ދީފައިވާ ސަރަހައްދުކަމުގައިވާ އިހަވަންދިއްޕޮޅުގައި ބައިނަލްއަގުވާމީ ބޯޓުފަހަރަށް ތެޔޮއަޅައިދިނުމުގެ ޚިދުމަތް ރަސްމީކޮށް އިއްޔެ ހަވީރު އެ ވަނީ ފަށައިފައެވެ.  މިއީ މި ފަދަ ޚިދުމަތެއް ދިވެހި ސަރުކާރުން ރާއްޖޭގައި ފެށި ފުރަތަމަ ފަހަރެވެ. މީގެ ކުރީން އައްޑޫގައި އިނގިރޭސީން ގާއިމުވެ ތިބި ދުވަސްވަރު މި ޚިދުމަތް ވަނީ އިނގިރޭސި މަނަވަރުތަކަށް ފޯރުކޮށްދީފައެވެ. އިނގިރޭސިބަހުން މި ޚިދުމަތަށް ކިޔަނީ ބަންކަރިންގ ސަރވިސްކަމަށް ވިޔަސް އޭރު ދިވެހީން މި ޚިދުމަތަށް ކިޔަނީ މަނަވަރުފަހަރަށް ތެޔޮ އަޅައިދިނުމުގެ ޚިދުމަތެވެ. ނަމަވެސް މި ޒަމާނުގައި ދިވެހީންނަށް ރީތީ ދިވެހި ނަންތަކަށް ވުރެ އިނގިރޭސި ނަންތައްކަމަށް ވާތީ މި ކިޔަނީ "ބަންކަރިންގ ސަރވިސް"އެވެ.

ކޮންމެއަކަސް ކަނޑު ބޯޓުފަހަރަށް ތެޔޮ އަޅައިދިނުމުގެ ބައިނަލްއަގުވާމީ ޚިދުމަތް ރަސްމީކޮށް ފައްޓަވައިދެއްވީ، ރައްޔިތުންގެ މަޖިލިހުގެ ހއ. އަތޮޅުގެ މެންބަރުންކަމަށްވާ ހޯރަފުށީ ދާއިރާގެ މެންބަރު އަލީ މޫސާއާއި ދިއްދޫ ދާއިރާ މެންބަރު ޢަބްދުއްލަޠީފު މުޙަންމަދާއި ބާރަށު ދާއިރާގެ މެންބަރު އިބްރާހިމް ޝުޖާޢާއި ކެލާ ދާއިރާގެ މެންބަރު ޢަބްދުﷲ ޝަރީފާއި އިހަވަންދޫ ދާއިރާގެ މެންބަރު އަޙުމަދު ނަސީރެވެ.

ބައިނަލްއަގުވާމީ ބޯޓުފަހަރަށް ތެލުގެ ޚިދުމަތް ރާއްޖޭން ފޯރުކޮށްދިނުމަކީ ޒަމާނުއްސުރެ ދެކެމުން އައި ހުވަފެނެކެވެ.  މިއަދު އެ ކަން ހަގީގަތަކަށް ވީ ދުނިޔޭގެ ހަކަތައިގެ ވިޔަފާރިކުރާ އެންމެ ބޮޑު އެއް ކުންފުނި ވިޓޯލާ ގުޅިގެންނެވެ. ވިޓޯލަކީ މިހާރު ވެސް ސިންގަޕޫރާއި އިމާރާތާއި މޮރިޝަސްގައި ވެސް ތެލުގެ ޚިދުމަތް ދިނުމުގައި ތަޖުރިބާކާރު ކުންފުންޏެކެވެ.

އިހަވަންދިއްޕޮޅު ސަރަހައްދުގައި ބާއްވާ ބޯޓަކުން މި ޚިދުމަތް ދޭނީ އެމްޕީއެލް ކުންފުންޏާ ގުޅިގެންނެވެ. ބައިނަލްއަގުވަމީ ބޯޓްތަކަށް ބޭނުންވާ ތެޔޮ ފޯރުކޮށްދިނުމުގެ މަސައްކަތް ކުރާނީ ސީދާ އެސްޓީއޯއިންނެވެ.

މި ޚިދުމަތް ދެނީ އެ ސަރަހައްދުގައި ދެ ބޯޓެއް ބާއްވާއިގެންނެވެ. އެއީ 3،258 ޓަނުގެ އެމްޓީ މެރިން އޭންޖަލް ކިޔާ ބޯޓަކާއި 3،929 ޓަނުގެ އެމްޓީ މެރިން ބެލާއެވެ. ތެލުގެ މި ޚިދުމަތް ދިނުމުގައި އަމަލީ ގޮތުން ހަރަކާތްތެރިވަނީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އާއި މޯލްޑިވްސް ޕޯޓްސް ލިމިޓެޑް (އެމްޕީއެލް)އިންނެވެ.

މި ޚިދުމަތް އިފުތިތާޙުކުރުމުގެ ރަސްމިއްޔާތުގައި ވާހަކަފުޅުދައްކަވަމުން އެސްޓީއޯގެ ސީއީއޯ ޝިމާދު އިބްރާހީމް ވިދާޅުވި ގޮތުގައި މުސްތަގުބަލުގައި ޒަމާނީ ފެންވަރުގެ ޚިދުމަތްތައް ގާއިމްކޮށް ޚިދުމަތް ދިނުމަކީ އެންމެ އިސްކަމެއް ދެއްވާނެ އެއް ކަންތަކެވެ.

އަދި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސިޔާސަތާ އެއް ގޮތަށް ރާއްޖޭގެ އިގުތިސާދު އިތުރަށް ފުޅާކޮށް، ރާއްޖެއަށް ބޭރުފައިސާ ވަންނާނެ ގޮތްތައް ހޯއްދަވާނެކަމަށް އިއްޔެ ޝިމާދު ވަނީ ވިދާޅުވެފައެވެ. އަދި ކުރިއަށް އޮތް ތާނގައި މި ޚިދުމަތާ އެކު ރާއްޖޭގެ އިގުތިސާދީ ހާލަތަށް ވަރަށް ބޮޑު ކުރިއެރުމެއް ލިބޭނެކަމަށް ވެސް އޭނާ ވިދާޅުވިއެވެ.

ތެލުގެ ޚިދުމަތާ ގުޅިފައިވާ އެހެން ޚިދުމަތްތައް ދިނުމަށްޓަކައި މޯލްޑިވްސް ޕޯޓްސް ލިމިޑެޓް (އެމްޕީއެލް)އިން ވަނީ "އުތުރު މެރިޓައިމް ސަރވިސަސް"ގެ ނަމުގައި ޚިދުމަތެއް ޤާއިމްކޮށްފައެވެ. އެއީ ތެލާއި ފެނުގެ އިތުރަށް ވެސް ކަނޑުދަތުރުފަތުރާ ބެހޭ ގިނަ ޚިދުމަތްތަކެއް ފޯރުކޮށްދިނުމަށް ޓަކައެވެ.

އިހަވަންދިއްޕޮޅުގައި މި ތަޢާރަފުކުރި ޚިދުމަތުގެ ތެރެއިން އުތުރުގެ ސަރަހައްދުން ދަތުރުކުރާ ބޯޓުފަހަރަށް ތެޔޮ ފޯރުކޮށްދިނުމުގެ އިތުރަށް ކުރިމަގުގައި ރާއްޖެއިން ދޭނެ އިތުރު ބައެއް ޚިދުމަތްތަކަކީ:

- ފަޅުވެރީން ބަދަލުކުރުމުގެ ޚިދުމަތާއި.

- ތަކެތި ގުދަންކުރުމާއި އަދި ސްޕެއަރ ޕާޓްސްއާއި މަރާމާތުގެ ޚިދުމަތާއި

- ސާފު ބޯފެން ފޯރުކޮށްދިނުމުގެ ޚިދުމަތެވެ.

މިއީ ވިސްނުންތެރިކަމާއި ޙިކުމަތްތެރިކަމާ އެކު ދެމެހެއްޓެނިވި ގޮތެއްގައި ކުރެވިއްޖެ ނަމަ ރާއްޖޭގެ އިގުތިސާދަށް ބޮޑު އިންގިލާބެއް އަންނާނެ ޚިދުމަތެއްކަމަށް ބެލެވެއެވެ.

ތެޔޮ ފޯރުކޮށްދިނުމުގެ ޚިދުމަތަކީ މި އަހަރު ޖުލައި މަހުގެ ތެރޭގައި ބޮޑުތިލަދުންމަތީގައި ފައްޓަވާން ސަރުކާރުން އަމާޒުކުރެއްވިޚިދުމަތަކަށް ވިޔަސް އިދާރީ ބައެއް ދަތިތަކާ ހުރެ ހިސާބަކަށް ލަސްވީއެވެ. ނަމަވެސް މިއަދު މި ކަން މި ވަނީ ހަގީގަތަކަށް ހައްދްވައިފައެވެ.  ދުނިޔޭގެ ބޮޑެތި ބޯޓުފަހަރު އާންމުކޮށް ދަތުރުކުރާ ސަރަޙައްދުތަކުގައި އެ ފަދަ ޚިދުމަތެއް ފެށިއްޖެ ނަމަ ބޯޓުފަހަރު އެ ތަންތަނަށް މަޑުކޮށް ތެޔޮ އަޅައި ހަދައެވެ. މި ގޮތަށް ތެޔޮ ވިއްކުމަކީ ރަނގަޅު ފައިދާއެއް ލިބޭ ޚިދުމަތެއްކަމުން މިއީ ރާއްޖޭގެ އިޤްތިޞާދު ފުޅާކުރުމަށް ޓަކައި މުހިންމު ސިނާޢަތަކަށްވާނެކަމަށް ސަރުކާރުން އުންމީދުކުރައްވައެވެ. މި ކަމުގެ މުސްތަގުބަލު ވަރަށް ފަހިކަމަށް މި ޚިދުމަތް ދިނުމުގައި ދުނިޔޭގެ އެންމެ މަޝްހޫރު އެއް ކުންފުނިކަމަށްވާ ވިޓޯލްއިން ވަނީ އިއްޔެ ބުނެފައެވެ.

އެސްޓީއޯ އިން މި ވަގުތަށް ފޯރުކޮށްދޭނީ ޑީސަލާއި ލޯ ސަލްފަރ ތެލެވެ. އޭގެ ތެރެއިން ޑީސަލް ފޯރުކޮށްދޭނީ ޔޮޓްތަކާއި ލަގްޒަރީ ބޯޓުތަކަށެވެ. ކާގޯ ބޯޓުތަކާއި އެ ނޫން ކޮންޓެއިނަރު ބޯޓުތަކަށް ލޯ ސަލްފަރ ތެޔޮ ފޯރުކޮށްދޭނެކަމަށް އެސްޓީއޯގެ ސީއީއޯ ސިމާދު ވިދާޅުވިއެވެ.

އިހަވަންދިއްޕޮޅުގައި އިއްޔެ އިފުތިތާޙުކުރި ބައިނަލްއަގުވާމީ ބޯޓުފަހަރަށް ތެޔޮއަޅައިދިނުމުގެ ޚިދުމަތް ރަސްމީކޮށް އިއްޔެ ހަވީރު ފެށީ ހއ. ހޯރަފުށީގައި ބޭއްވި ޚާއްޞަ ރަސްމިއްޔާތެއްގައެވެ.