ޑރ. ޢަބްދުލްޣަފޫރު ޢަބްދުއްރަޙީމް

ތިޔަ ފެނިވަޑައިގަންނަވާ ތަސްވީރުގައި އެ ވަނީ އެމެރިކާގެ ބިލިޔަނަރެއް ކަމުގައިވާ ޖޭމްސް ހަވާޑް މާޝަލާއި އޭނާގެ އެންމެ ފަހުގެ އަނބިމީހާ އެނާ ނިކޯލް ސްމިތެވެ. މި ދެ މީހުން ކައިވެނިކުރީ 1994ގައެވެ. އޭރު މާޝަލްގެ އުމުރަކީ 89 އަހަރެވެ. ނަމަވެސް، 26 އަހަރުގެ އެނާއަށް މާޝަލް ފެނުނީ 89 ބިލިޔަން ޑޮލަރުގެ މީހެއްގެ ގޮތުގައެވެ. ޝައްކެއް ނެތް ގޮތުގައި މާޝަލްއަކީ ބިލިޔަނެރެކެވެ. ކޮންމެ އަކަސް، މި ދެ މީހުންގެ ކައިވެނީގެ ތެރޭގައި އެނާ ކުރެން، އޭނާ މާޝަލްއާ ކައިވެނިކުރީ ކޮން ކަމެއް މާޝަލް ކިބައިން ފެނިގެންތޯ ސުއާލުކުރުމުން، އެނާ ބުނިކަމަށް ވެއެވެ. "އަހަންނަށް އޭނަގެ އަސާގަނޑާއި އޭނާގެ ދެ ލޯ ރީތިވެ، އެ އަސާގަނޑާއި އެ ދެ ލޯ ދެކެ ލޯބިވެވުނީއެވެ." އާޚިރުގައި ކަންތައް ދިމާވީ އެނާ އެދުނު ގޮތަށްކަމަށް ދެންނެވިދާނެއެވެ.

އެ ދެ މީހުންގެ ކައިވެންޏަށް ދޮޅު އަހަރު ވެސް ނުވަނީސް. 1995ގައި މާޝަލް މަރުވިއެވެ. ނަމަވެސް، އޭގެ އަގުކަމުގައި 8.6 ބިލިޔަން ޑޮލަރު ބެލެވުނު މާޝަލްގެ ތަރިކައިން އެންމެ ލާރިއެއް ވެސް އެނާއަކަށް ނުލިބެއެވެ. އޭނައަށް ލިބުނުކަމަށް ވަނީ އޭނާ ލޯބިވިކަމަށް ބުނި މާޝަލްގެ އަސާގަނޑެވެ. ފަހުން، މާޝަލްގެ ތަރިކައިން ބައެއް އެނާއަށް ލިބޭން ޖެހޭނެކަމަށް ބުނެ ދައުވާކުރިއެވެ. ނަމަވެސް އެ ކަން ކާމިޔާބުނުވެ ދިޔުމުން، އޭނާ ވެސް ޑުރަގުގެ މަސްތީ ހާލަތެއްގެ ސަބަބުން 2007ގައި މަރުވީއެވެ.

ބުނެވޭ ގޮތުގައި މާޝަލްގެ ތަރިކަ މުދާ ހޯދާން އުޅުމުގެ މައްސަލަ ބެލެވެނީ އަމިއްލައަށް މަރުވާން ޖެހުނު އެންމެ ހިތާމަވެރި މަޝްހޫރު ދެވަނަ މައްސަލަކަމުގައެވެ. މި ހިސާބަށް ވާހަކަ ދިޔުމުން، މި ފަދަ މައްސަލަތަކުގެ ތެރެއިން އެއްވަނައަށް އައި މައްސަލަ ނުދަންނަވައިފި ނަމަ، ކިޔުންތެރިން އަޅުގަނޑު ކުށްވެރިކޮށްފާނެއެވެ. ނަމަވެސް އެއްވަނައަށް އަންނަ މައްސަލަ ދެންނެވިޔަސް އެއީ ވެސް ހިތްޕުޅުހަމަނުޖެހުމުގެ ސަބަބަކަށް ވެދާނެއެވެ.

ކޮންމެ ގޮތެއް ވިޔަސް، އެއްވަނައަށް ދިޔަ މައްސަލަ ދަންނަވާން ޖެހެއެވެ. މި ފަދަ އަމިއްލަ މަރުވުމެއް މެދުވެރިކުރުވި އެންމެ މަޝްހޫރު މައްސަލަ ގުޅެނީ އަމިއްލަ ފަރުދަކު ދަންޖެހި މަރުވުމަކާއެއް ނޫނެވެ. ގައުމެއްގެ މަރާއެވެ. 2008ގައި ރާއްޖެއަށް ގެނެވުނު ގިނަ ޕާޓީގެ ޑިމޮކުރަސީ މެދުވެރިކުރުވި ގައުމުގެ ދަންޖެހުމުގެ ހިތާމައާއެވެ. އެ ކަމުގެ ސަބަބުން، ނުމީހުން މީހުންނަށް ވިއެވެ. މުރައްކަބު ޖާހިލުން ބޮޑެތި އިލްމުވެރިންނަށް ވިއެވެ. ނާގާބިލު މީހުންނަށް ގައުމުގެ ހިންގުމުގެ އެންމެ އިސް ސަފުތަކުގައި ފައި ހަމަކޮށްލެވޭ ގޮތް ވިއެވެ. އަދި، ވެރިކަމުގެ ގޮނޑިއާ ހަމައަށް ވާސިލުވާ ކޮންމެ ޕާޓީއެއްގެ ނަޒަރުގައި ވެރިކަން ކުރާން އިންތިޚާބުވުމަކީ ގާނޫނީ ގޮތުން، ގައުމު ވެސް ވިއްކައިލައި ގައުމުގެ ހަރުމުދަލާއި ޚަޒާނާ އަމިއްލަ ބޭނުމުގައި ހުސްކޮށްލާން ލިބޭ ރަނުގެ ފުރުސަތެކެވެ. މިހެން ވުމުން، އެނާ ނިކޯލް ސްމިތު ވެސް ފައިސާގެ ދަހިވެތިކަމުގައި އަމިއްލައަށް މަރުވާން ދިމާވިހެން، ގިނަ ޕާޓީގެ ޑިމޮކުރަސީގެ ސަބަބުން ދިވެހިރާއްޖެއަށް ވެސް ހަމަ އެ ދަތުރު ޖެހުނީއެވެ.

___________________________________