ޑރ. ޢަބްދުލްޣަފޫރު ޢަބްދުއްރަޙީމް

1. ޝުކުރުވެރިކަމުގެ އިހުސާސަކީ އިލާހީ މާތް އިހުސާސެކެވެ. ފުދި ރުހިފައިވާ ހިތަކަށް ޝުކުރުވެރިވާން ފަސޭހަވެއެވެ. ޝުކުރުވެރިކަމުން ހިތް ފުރައިލިކަމުގައި ވިޔަސް، ހިތް ފަޅައިގެންނެއް ނުދެއެވެ. އެކަމުގެ ސަބަބުން، ހިތަށް ހޫނުކަމާއި ދިރުން ލިބެއެވެ.

2. އަބަދުމެ މި ދުއާކުރުން މަތީ ދެމިހުންނާށެވެ. "އޭ އަޅުގެ ސާހިބުވަންތަ ރަސްކަލާކޮ! އަޅާއަށް ދިރުން ދެއްވިފަދައިން ޝުކުރުވެރި ހިތެއް ވެސް މި އަޅާއަށް ދެއްވާނދޭވެ!"

3. ޝުކުރުވެރިވާން ހަނދާން ނެތިއްޖެ މީހާ، ހަޔާތުގެ ދަތުރުގައި ނިދައިފިއެވެ.

4. ޝުކުރުވެރިވުމަކީ އުފާވެރިކަމަށް ގެންގޮސްދޭ އެންމެ ކުރު މަގެވެ.

5. ކަލޭގެ ހަޔާތް ހެޔޮ މަގަށް އަނބުރައިލާން ބޭނުން ނަމަ، ޝުކުރުވެރިވެވޭތޯ މަސައްކަތްކުރާށެވެ! ޝައްކެއްނެތް ގޮތުގައި، ވަރަށް ވެސް ބޮޑު ހެޔޮ ބަދަލެއް ކަލޭގެ ހަޔާތަށް އެ ކަން ގެނެސްދޭނެއެވެ.

6. ކިތަންމެ ކުޑަ ހެޔޮ ކަމެއް ކަލެއަށް ލިބުނު ކަމުގައި ވިޔަސް، އެ ކަމަށް ޝުކުރުވެރިވުމުގެ އާދަ ހިފޭތޯ މަސައްކަތްކޮށް، އަބަދުވެސް، ޝުކުރުވެރިވާން ދަސްކުރާށެވެ! ކަލޭގެ ކުރިއެރުމަށް އެތައް ކަމެއް މެދުވެރިވެފައި އޮތް އިރު، އެ ކަމުގެ ހައްގު ފަރާތްތަކަށް، އެ ހުރިހާ ކަމެއް ލިބިދިންކަމަށް ޓަކައި ޝުކުރުވެރިވާން ޖެހެއެވެ.

7. އިރު އޮއްސުމުގެ ކުރީން، ޝުކުރުއަދާކުރާނޭ ކޮންމެ ވެސް މީހަކު ހޯދާށެވެ. ދުނިޔަވީ ހަޔާތުގައި، އެހެން މީހެއްގެ އެހީއާ ނުލައި އެއްވެސް މީހަކަށް ކުރިއަށް ދެވޭކަށް ނޯވެއެވެ.

8. ކަލެއަށް ލިބިފައި އޮތް ނިއުމަތްތަކާ މެދު ވިސްނައި ފިކުރުކޮށްލާށެވެ. ހަމަ ޔަގީނުން ވެސް، ކޮންމެ މީހަކަށް ވެސް ކޮންމެ ވެސް ނިއުމަތެއް ނުވަތަ ނިއުމަތްތަކެއް، ލިބިފައި އޮންނާނެއެވެ. މިއާ ޚިލާފަށް ކުރިމަތިވާ ބަދުނަސީބު ގޮތްތަކާ މެދު މާ ބޮޑަށް ވިސްނައި ފިކުރު ނުކުރާށެވެ. ޝައްކެއްނެތް ގޮތުގައި ބަދުނަސީބު ހާލަތްތަކާ ކުރިމަތިލާން ޖެހޭ ބައެއް ވެސް އުޅެއެވެ.

9. ހަޔާތުގެ މަގުގައި ހިނގަމުންދާ އިރު، ދޭތެރެދޭތެރެއިން މަޑުޖައްސައިލާން ޖެހެއެވެ. އަހަރުމެންނަށް އެހީވި މީހުންގެ މަތީން ހަނދާންކޮށް އެ މީހުންނަށް ޝުކުރުއަދާކުރުމަށް ޓަކައެވެ.

10. ޝުކުރުއަދާކުރާ ހިތަކީ އުފާވެރި ހިތެކެވެ. އެހެނީ، ޝުކުރުވެރިކަމާއި ހިތާމަވެރިކަމުގެ އިހުސާސު، އެއްފަހަރާ އަހަރުމެންނަކަށް ނުކުރެވެއެވެ.

11. ނަބަވީ އިރުޝާދެއްގައި އޮވެއެވެ: "މީސްތަކުންނަށް ޝުކުރުވެރި ނުވާ މީހާ މާތްﷲއަށް ވެސް ޝުކުރުވެރި ނުވެއެވެ."

އެހެންވީމާ، މާތްﷲއަށް ޝުކުރުވެރިވާން އެދޭ ނަމަ، މީސްތަކުންނަށް ވެސް ޝުކުރުވެރިވާށެވެ.

______________________________