ޢަބްދުލްޢަޒިޒު ޖަމާލު އަބޫބަކުރު

ރައްޔިތުންގެ މަޖިލީސް 2024ގެ އިންތިޚާބުގެ ހާމަވެފައިވާ ވަގުތީ ނަތީޖާތައް ދައްކާ ގޮތުން ސަރުކާރު ހިންގާ މައި ޕާޓީ ޕީޕްލަސް ނޭޝަނަލް ކޮންގްރެސް (ޕީއެންސީ)އަށް 70 ގޮނޑި ކާމިޔާބުކުރެވުމާއެކު މަޖިލީހުގެ "ބޮޑު އަޣުލަބިއްޔަތު" އެ ޕާޓީއަށް ލިބުނުކަމީ ސަރުކާރަށް ލިބުނު ވަރަށް މަތިވެރި ކާމިޔާބީއެކެވެ. މި ކާމިޔާބީއަށް ޓަކައި އެ ޕާޓީގެ ރައީސް އަދި ރާއްޖޭގެ ރައީސުލްޖުމްހޫރިއްޔާ ޑރ. މުޙަންމަދު މުޢިއްޒަށް "ފަރަގު މީޑިއާ"ގެ ފަރާތުން ވަރަށް ހޫނު މަރުޙަބާއަކާއި ތަހުނިޔާއެއް އަރިސްކުރަމެވެ. އަދި އެ ޕާޓީގެ މުޤައްރިރު (ޗެއަރ ޕާރސަން) އަދި ރައީސުލްޖުމްހޫރިއްޔާގެ އިސް މުޝީރު (ސީނިއަރ އެޑްވައިޒަރ ޓު ދަ ޕްރެޒިޑެންޓް) ޢަބްދުއަރަޙީމު ޢަބްދުﷲ ވެސް މި މަރުޙަބާއާއި ތަހުނިޔާގައި ޝާމިލުކުރަމެވެ.

މަޖިލީހުގެ "ބޮޑު އަޣުލަބިއްޔަތު" (ސުޕަރ މެޖޯރިޓީ) އަކީ ޤާނޫނުއަސާސިއަށް ބަދަލު ގެނައުމުގެ ބާރުލިބޭ ފަދަ ބޮޑު އަޣުލަބިއްޔަތެކެވެ. 20ވަނަ ރައްޔިތުންގެ މަޖިލީހުގައި 93 މެންބަރުން ތަމްސީލުކުރައްވާތީ އެ ޢަދަދަކަށް ވާނީ 70 އެވެ. ޕީއެންސީއަށް އެކަނި މި ޢަދަދަށް ގޮނޑި ލިބިފައި ވާއިރު، ޕީއެންސީގެ ތާއީދާ އެކު މަޖިލިހަށް ވާދަކުރެއްވި ސިޔާސީ ތިން ލީޑަރުން ވެސް ވަނީ ގޮނޑި ކާމިޔާބު ކުރައްވައިފައެވެ. އެއީ ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްއެންޕީގެ ލީޑަރު މުހައްމަދު ނާޒިމާއި އެމްޑީއޭގެ ރައީސް އަހުމަދު ސިޔާމް މުހައްމަދެވެ. އެހެންކަމުން ދާއިމީ ނަތީޖާ އިޢުލާނުކުރާ އިރު ގޮނޑިއެއް މަދުވިޔަސް ސަރުކާރަށް އަޣުލަބިއްޔަތު ގެއްލުމުގެ ފުރުޞަތެއް ނެތެވެ.

ޕީއެންސީގެ ރައީސް ޑރ. މުޙަންމދު މުޢިއްޒު (ވ)އާއި ޗެއަރޕާރސަން ޢަބްދުއްރަޙީމް ޢަބްދުﷲ (ކ)<br>

މިއީ ރާއްޖޭގެ ބަރުލަމާނީ ހަޔާތުގައި ރައްޔިތުންގެ މަޖިލިހުގެ ތެރެއިން ސިޔާސީ އެއް ޕާޓީއަކަށް މިހާ ބޮޑު އަޣުލަބިއްޔަތެއް ލިބުނު ފުރަތަމަ ފަހަރެވެ.

ޕީއެންސީއަށް ލިބުނު މެޖޯރިޓީއާ އެކުގައި ގާނޫނުއަސާސީ އިސްލާހުކުރުމުގެ ފުރިހަމަ ބާރު ލިބޭނެއެވެ. އަދި މުހިންމު ގާނޫނުތައް މަޖިލީހުގައި ފާސްކުރުން ވެސް ވާނީ ވަރަށް ފަސޭހަ ކަމަކަށެވެ.

މީގެ ފަސް އަހަރު ކުރީން 19ވަނަ މަޖިލީހުގައި އެމްޑީޕީއިން ވަނީ 65 ގޮނޑި ކާމިޔާބު ކޮށްފައެވެ. އެކަމަކު، މި ފަހަރުގެ އިންތިޚާބުގައި އެ ޕާޓީއަށް ލިބިފައިވަނީ އެންމެ 15 ވަރަކަށް ގޮނޑިއެވެ. އެމްޑީޕީގެ ވަރަށް ގިނަ ނުފޫޒު ގަދަ މެންބަރުންނަށް ވެސް މި އިންތިޚާބުގައި ގޮނޑިއެއް ކާމިޔާބުކުރެއްވޭ ގޮތެއް ނުވިއެވެ. އަދި ބޮޑެތި ސިޓީތަކާއި އާބާދީ ބޮޑު ރަށްތަކާއި އެހެން ބައެއް ރަށްރަށުން ވެސް ޕީއެންސީއިން ވަނީ އަޣުލަބިއްޔަތު ހޯދައިފައެވެ.

މާލެއާއި އައްޑުއަތޮޅާއި، ފުވައްމުލަކާއި ކުޅުދުއްފުށީން ގިނަ އަދަދެއްގެ ގޮނޑި ޕީއެންސީއިން ކާމިޔާބުކުރިއެވެ. މި ފަހަރުގެ އިންތިޚާބުގައި ދަ ޑިމޮކްރެޓްސް ހިމެނޭ ހެން ބައެއް ސިޔާސީ ޕާޓީތަކުގެ ކެންޑިޑޭޓުންނަށް ވަނީ ބޮޑު ނާކާމިޔާބީއަކާ ކުރިމަތިލާން ޖެހިފައެވެ. ދަ ޑިމޮކްރެޓްސްއަށް އެއްވެސް ގޮނޑިއެއް ކާމިޔާބެއް ވެސް ނުކުރެވުނެވެ.

ރައްޔިތުންގެ މަޖިލީހުގެ އިންތިޚާބު 2024 ގެ ވަގުތީ ނަތީޖާ ދައްކާ ގޮތުން ޕާޓީތަކަށް ގޮނޑިތައް ބެހިފައިވާ ގޮތް <br>

މި ފަހަރުގެ ބަރުލަމާނީ ޕްރައިމަރީގައި ޕީއެންސީއަށް ބައެއް ގޯސްތައް ނުހެދުނު ނަމަ، އެމްޑީޕީއަށް ލިބުނީހީ އަދި މިއަށް ވުރެ ވެސް މާ މަދު ގޮޑިކޮޅެކެވެ. އެމްޑީޕީގެ ވެރިކަމުގައި ގައުމަށް ލިބުނު ގެއްލުންތަކުގެ ސަބަބުން ގިނަ ބަޔަކު ތިބީ އެ ޕާޓީ ދެކެ ފޫހިވެފައެވެ. ޕްރައިމަރީ ބޭއްވި ގޮތުން ބައެއް ދާއިރާތަކުން މީހުން ގަބޫލުނުކުރާ ފަދަ ފުރަދާރުންނަށް ޕީއެންސީއިން ޓިކެޓު ދޭން ޖެހުމުގެ ސަބަބުން ދުވަހަކު ވެސް އެމްޑީޕީއަށް އެއްވެސް އިންތިޚާބަކުން ކާމިޔާބުކުރެވިފައި ނުވާ ބައެއް ދާއިރާއިން ގޮނޑި ލިބިފައި އެބަ ހުއްޓެވެ. ޕްރައިމަރީގައި ވޯޓު ހޯދުމަށް ޓަކައި އެމްޑީޕީގައި ތިބި މެންބަރުން ވަގުތީ ގޮތުން ޕީއެންސީއަށް ވައްދައިގެން ޕްރައިމަރީ ކާމިޔާބުކުރުމުގެ ސަބަބުން ޢިލްމީ ގާބިލުކަމާއި މަގުބޫލުކަމާއި ތަނަވަސްކަމާއި މީހުން ބަލައިގަތުމާއި މިއިން އެއްވެސް ކަމެއް ނެތް، އަދި މީހުން ނުވެސް ދަންނަ "ކުދީން"ނަށް ޓިކެޓް ދިނުމުގެ ސަބަބުން އެ ފަދަ ފުރަދާރުން ރައްޔިތުން ބަލައިނުގަތްކަން ވެސް ހާމަވިއެވެ.

ވީމާ، ކުރިމަގުގައި ޕާޓީތަކުން ޓިކެޓުދޭ އިރު، މެރިޓް އުޞޫލުން މާކުސް ދީގެން ފުރަދާރުން ކަނޑައެޅުމުގެ މިންގަނޑެއް ގެންގުޅޭން ޖެހޭކަމަށް ގަބޫލުކުރެވެއެވެ. މި މިންގަނޑުގެ ތެރޭގައި، އެ މީހަކު ޕާޓީއަށް ޚިދުމަތްކުރި މުއްދަތާއި، ޕާޓީއަށް ވަފާތެރިކަން ސާބިތުކޮށްދީފައިވާ މިންވަރާއި، ތަޢުލީމީ ފެންވަރާއި، އަޚުލާޤާއި ސުލޫކަށާއި، ކުށުގެ ރެކޯޑާއި، ދައުލަތުގެ އެކި މަގާމުތަކުގައި ހޯދައިފައިވާ ތަޖުރިބާ ފަދަ ކަންކަމަށް ރިޢަޔަތްކުރުން މުހިންމެވެ. ރައްޔިތުންގެ މަޖިލީހަކީ ޒިންމާދާރު ގާބިލު އަދި ސުލޫކީ މުއައްސަސާއަކަށް ހެދުމަށް ޓަކައި ކުރިމަގުގައި މި ފަދަ ބަދަލެއް ގެންނާން އެބަ ޖެހެއެވެ. އަޅުގަނޑުމެންގެ ރައްޔިތުންގެ މަޖިލީހުގެ މެންބަރުންގެ ފެންވަރު ކަނޑައެޅުމުގައި ކޮންމެހެން އެމެރިކާއާއި ހުޅަނގުގެ އުޞޫލުތަކަށް ތަބާވާކަށް ނުޖެހެއެވެ. މިހާރު ވެސް ބޫޓާނާއި ތައިލެންޑް ފަދަ ބައެއް ގައުމުތަކުގައި ތަޢުލީމީ ވަކި ފެންވަރެއް ނެތި ރައްޔިތުންގެ މަޖިލީހަކަށް ވާދައެއް ނުކުރެވޭނެއެވެ. ވީމާ، އަޅުގަނޑުމެން ވެސް އަޅުގަނޑުމެންގެ ވެއްޓާ ގުޅޭ އުޞޫލަކުން މި ފަދަ މިންގަނޑުތަކެއް ކަނޑައަޅާން އެބަ ޖެހޭކަމަށް ގަބޫލުކުރެވެއެވެ.

ކޮންމެއަކަސް، ކޮންމެ ފަދަ ގޮތަކަށް މި ފަހަރުގެ ބަރުލަމާނީ ޕްރައިމަރީ ކަނޑައަޅައިގެން މަޖިލީހަށް ފުރަދާރުން ވާދަކުރެއްވި ނަމަވެސް ސަރުކާރު ހިންގާ މައި ޕާޓީއަށް މި ވަނީ "ބޮޑު އަޣުލަމިއްޔަތު" ލިބިފައެވެ. މި އަޣުލަބިއްޔަތުގެ ބޭނުން ހެޔޮ ގޮތުގައި ހިއްޕަވައިގެން ގައުމަށް ފައިދާހުރި މަސައްކަތްތަކެއް ކުރައްވާން ސަރުކާރަށް ވަރަށް ބޮޑަށް ފަސޭހަފުޅުވާނެއެވެ. އަދިވެސް އެއް ފަހަރު، ރައީސުލްޖުމްހޫރިއްޔާއަށާއި، ޕީއެންސީއަށާއި، މި ކާމިޔާބީ ސަރުކާރަށް ހޯއްދަވައިދެއްވުމުގައި ޝާމިލުވި އެންމެހައި ރައްޔިތުންނަށް މި މުނާސަބަތުގައި ތަހުނިޔާ ތަކުރާރުކޮށްލަމެވެ.

________________________________

ބައެއް ލަފުޒުގެ މާނަ:

އަޣުލަބިއްޔަތު  ނ.   (1) ދެބައިކުޅަ އެއްބަޔަށްވުރެ ގިނަބަޔަކު އެއްބަސްވާ އެއްބަސްވުން. (2) ދެބައިކުޅައެއްބަޔަށްވުރެ ގިނަވާ ގިނަވުން.

ޓިކެޓު      ނ.   ވަކި ސިފަޔަކަށް ކަރުދާހުން ތައްޔާރު ކޮށްފައި ހުންނަ އެއްޗެއް. މިއީ ވަކި ތަނަކަށް ވަނުމަށް ނުވަތަ ވަކި އެއްޗަކުން ދަތުރު ކުރުމަށް ޓަކައި ދޭ ހުއްދައެކެވެ.

ފުރަދާރު     ނ.   އިންތިޚާބަކަށް ކުރިމަތިލާ މީހާ.

މުޝީރު     ނ.    ކަމަކާމެދު ލަފާދޭ މީހާ ނުވަތަ ފަރާތް، ނުވަތަ ކަމަކާމެދު ލަފާއެއް ހޯދަން މަޝްވަރާކުރެވޭ މީހާ ނުވަތަ ފަރާތް.

އިސް      ނ.    ދަރަޖައިން މަތިވެރި.

މުގައްރިރު    ނ.    (1) މަޝްވަރާކޮށްގެން ކަންކަން ނިންމާ ކޮމެޓީީތަކުގައި ރިއާސަތު ބަލަހައްޓާ މީހާ. (2) ތަގުރީރުދޭ މީހާ.

ތަމްސީލުކުރުން މ.    (1) ތިމާގެ ރަށް ނުވަތަ ތިމާ އުޅޭ ދާއިރާއެއްގެ ފަރާތުން ބަސްކިޔައި ހެދުމަށް ތަނެއްގައި ނުވަތަ ކަމެއްގައި ބައިވެރިވުން. (2) ކަމެއް ނުވަތަ ވާހަކައެއް ޙަރަކާތްތަކާއި މަންޒަރުތަކާއެކު ދެއްކުން.