އާދޭހެވެ! އީރާނާއި އެމެރިކާގެ ކުރިމަތިލުން ނިމުމުގެ ކޮޅުމައްޗެއް ވެސް އަދި ފެންނާކަށް ނެތެވެ. އެމެރިކާއިން ބޭނުންވަނީ، ތިމަންނަމެންނަށް [ކާމިޔާބުވެއްޖެ]ކަމަށް ބުނެ މި ހަނގުރާމައިން ނުކުންނާށެވެ. ބާލިވީކަމަށް އެއްބަސްވުމަކީ ދުނިޔޭގެ [އެންމެ މަތީ ބާރު]ކަމަށް ދަޢުވާކުރާ އެމެރިކާއަކަށް ކުޅަދާނަ ކަމެއް ނޫނެވެ. މި ފަދަ ގޮތަކަށް ހަނގުރާމަ ނިންމައިލައިފި ނަމަ، ސިޔާސީ ގޮތުން ޓުރަންޕަށް ދައްކާންޖެހޭ އަގު ވަރަށް ބޮޑުވާނެއެވެ. އެހެންކަމުން އެމެރިކާއިން މަސައްކަތްކުރަނީ ބާރުގެ ބޭނުންކޮށް ބިރުދައްކައިގެން އީރާނު އަމާންދޭށެވެ!

ނަމަވެސް މަސްރަޙު ދިރާސާކުރާ ފަރާތްތަކުން ބުނާ ގޮތުގައި އީރާނުން އޮތީ އަމާންދޭ ގޮތަކަށް ނޫނެވެ. [ހަނގުރާމަ] ހުއްޓާނެކަމަށް އީރާނުން ބުނަނީ އެ މީހުން ހުށަހެޅި ޝަރުތުތައް އެމެރިކާއިން ގަބޫލުކޮށްފި ނަމައެވެ.

ދެ ފަރާތުން މަޝްވަރާގެ މޭޒު ދޮށަށް ނުދިޔަޔަސް ޕާކިސްތާނަށް ދެ ގައުމުން ލިޔުން ފޮނުވައިގެން މަޝްވަރާތައް އެބަ ހިނގައެވެ. އީރާނުން ބުނާ ގޮތުގައި އެ މީހުންގެ އެންމެ ފަހުގެ 14 ނުކުތާގެ ހުށަހެޅުން މިހާރު ވަނީ ޕާކިސްތާނު މެދުވެރިކޮށް ހުށައަޅައިފައެވެ.

އީރާނުން އެންމެ ފަހުން ހުށަހެޅި ހުށަހެޅުމުގެ މައިގަނޑު ނުކުތާތަކަކީ ދާއިމީކޮށް ހަނގުރާމަހުއްޓުމާއި އެމެރިކާއާއި އިސްރޭލުން އިސްވެ އީރާނަށް ޙަމަލާނުދޭނެކަމުގެ ޔަގީންކަންދިނުމާއި އީރާނުގެ ވަށައިގެން ހުރި ގައުމުތަކުގައި އެމެރިކާއިން ގާއިމުކޮށްފައިވާ އެމެރިކާގެ ބާރުތައް އަނބުރައި ގެންދިޔުމާއި އެމެރިކާއާ ދެކޮޅަށް އަޅައިފައިވާ އިގުތިސާދީ ދަތިކުރުމުގެ ހުރިހައި ފިޔަވަޅުތަކެއް ވަގުތުން އުވައިލުމާއި އީރާނުގެ ބަނދަރުތައް ހިސާރުކޮށްގެން އެމެރިކާއިން އޮތް އޮތުން ނިމުމަކަށް ގެނައުމާއި އަދި 30 ދުވަހުގެ ތެރޭގައި ރަސްމީ އެއްބަސްވުމެއް އެކުލަވައިލައި މި މައްސަލަ މުޅީން ހައްލުކުރުމެވެ.

އީރާނުގެ ތަސްނީމް ނޫސް އެޖެންސީ ބުނާ ގޮތުގައި އީރާނުގެ ހުށަހެޅުމަށް އެމެރިކާއިން ދިން އިޖާބަ ޕާކިސްތާނު މެދުވެރިވެގެން މިހާރު އީރާނަށް ވަނީ ލިބިފައެވެ. އީރާނުގެ ޚާރިޖިއްޔާގެ ތަރުޖަމާނު ވިދާޅުވެފައިވަނީ އެމެރިކާއިން ދިން އިޖާބަ މިހާރު މުރާޖާކުރައްވަމުން ގެންދަވާކަމަށެވެ.

މި ވާހަކަ އެމެރިކާއިން ރަސްމީ ގޮތުން އަދި ކަށަވަރުކޮށްދީފައެއް ނުވެއެވެ. ނަމަވެސް އިޒުރޭލުގެ [ކާން ނޫސް އެޖެންސީއަށް ދިން ބަސްދީގަތުމެއްގައި ޓުރަންޕު ބުނެފައިވާކަމަށް ރިޕޯޓުތައް ބުނަނީ އީރާނުގެ ހުށަހެޅުން ގަބޫލެއްނުކުރެވޭނެކަމަށެވެ. އީރާނުން ހުށަހަޅައިފައިވަނީ ހަނގުރާމަ މެދުކަނޑައިލައިފައި އޮތް އޮތުން ދިގުދަންމައިލުމުގެ ބަދަލުގައި އެކީ އެކައްޗަކަށް ހަނގުރާމަ ހުއްޓައިލުމަށެވެ. މީގެ ތެރޭގައި ލުބުނާނުގައި ހިނގަމުންދާ ހަނގުރާމަ ވެސް ހިމެނެއެވެ.

މީޑިއާގެ ޚަބަރުތައް ބުނާ ގޮތުގައި އީރާނުގެ ޚާރިޖިއްޔާގެ ތަރުޖަމާނު އިސްމާޢީލް ބަޣާއީ ވިދާޅުވެފައިވަނީ މި މަރުޙަލާގައި ނިޔުކުލިއަރު މަޝްވަރާތަކެއް ނުކުރެވޭނެކަމަށެވެ. އެ ވާހަކަތައް ބާއްވާންޖެހޭނީ ހަނގުރާމަ ހުއްޓައިލުމަށް ފަހު، ފަހުގެ މަރުޙަލާއަކަށެވެ.

ނަމަވެސް އެމެރިކާގެ ރައީސް ޑޮނަލްޑު ޓުރަންޕަކީ ބަލި ގަބޫލުކުރާން ތައްޔާރަށް ހުންނަ މީހެއް ނޫނެވެ. އޭނާގެ ނަޒަރުގައި އޭނާއަކީ ދުނިޔޭގެ އެންމެ މަތީ ބާރެވެ. ދުނިޔޭގެ ރަސްގެފާނެވެ. އެހެންކަމުން ހުރުމޫޒު ކަނޑުއޮޅި ބަންދުކޮށްފައި އޮތުން ގަދަބާރުން ނިމުމަކަށް ގެންނާން އޭނާ ވަނީފައިވިއްދައިފައެވެ.

މި ދިޔަ އާދީއްތަ ދުވަހު ޓުރަންޕު ބުނެފައިވަނީ ހުރުމޫޒު ކަނޑުއޮޅީގައި ތާށިވެފައި ހުރި އާގުބޯޓުފަހަރު ނިސްބަތްވާ ގައުމުތަކުގެ އެދުމުގެ މަތީން އެމެރިކާގެ އަސްކަރީ އެހީތެރިކަމާ އެކު އެ ބޯޓުތައް އެ ތަނުން ނުކުންނާނެ ފުރުސަތު ހޯމަދުވަހުން ފެށިގެން ފަހިކޮށްދޭނެއެވެ. މި ދެންނެވި ފަދަ ގައުމުތައް ޓުރަންޕު ސިފަކޮށްފައިވަނީ [ވަކި ފަރާތަކަށް ނުޖެހޭ އަދި މި ކަމުގައި ބައިވެރިނުވާ މަޢުޞޫމު] ގައުމުތަކުގެ ގޮތުގައެވެ.

[އީރާނާއި މެދުއިރުމައްޗާއި އެމެރިކާގެ ރަނގަޅަކަށް ޓަކައި، މި ބުނި ގައުމުތަކަށް މިހާރު އަހަރެމެން އަންގައިފައިވާނީ އެ ގައުމުތަކުގެ އަގުބޯޓުފަހަރަށް މިނިވަންކަމާ އެކު ހުރުމޫޒު ކަނޑުއޮޅި ހުރަސްކުރުމުގައި ހޯމަދުވަހުން ފެށިގެން އަހަރެމެން މަގުދައްކައި އެހީތެރިވެދޭނެކަމަށެވެ.] މީސްމީޑިއާގައި ޓުރަންޕު ކުރި ޕޯސްޓެއްގައި ބުނެފައިވެއެވެ.