ބިހުގެ ގޮބޮޅިއަކީ ކޮލެސްޓްރޯލް މަތިވުމަށް މެދުވެރިވާ މައިގަނޑު ސަބަބުކަމަށް ޒަމާނުއްސުރެ ކުރަމުން އައި ދަޢުވާތައް ސައިންސްވެރީން މިހާރު މިވަނީ ބަދަލުކޮށްފައެވެ. އައު ދިރާސާތަކުން ދައްކާ ގޮތުގައި ބިހަކީ ކުރީން ހީކުރި ވަރަށް ވުރެ ސިއްހަތަށް ފައިދާހުރި އެއްޗެކެވެ.

ކޮލެސްޓްރޯލްގެ ބިރުވެރިކަން މިހާރު ނެތީތަ؟

1960ގެ އަހަރުތަކުން ފެށިގެން ސިއްހީ މާހިރުން ލަފާދެމުން އައީ ދުވާލަކު ކޮލެސްޓްރޯލް ބޭނުންކުރާ މިންވަރު 300 މިލިގުރާމަށް ވުރެ އިތުރު ނުކުރުމަށެވެ. އެ ދުވަސްވަރު ބެލެވުނީ ބިހުގެ ގޮބޮޅިއަކީ ކޮލެސްޓްރޯލް އިންތިހާއަށް މަތި އެއްޗެއް ކަމަށާއި، އޭގެ ސަބަބުން ހިތުގެ ބަލިތައް ޖެހުމުގެ ފުރުސަތު ބޮޑުވާކަމަށެވެ.

ނަމަވެސް، 2016 ވަނަ އަހަރު މި އިރުޝާދުތަކަށް ބަދަލު ގެނެވުނެވެ. ސަބަބަކީ ކެއުމުގައި ބޭނުންކުރާ ކޮލެސްޓްރޯލާއި ހިތުގެ ބަލިތަކާ ދެމެދު ސީދާ ގުޅުމެއް އޮތްކަން ސައިންޓިފިކު ދިރާސާތަކުން ސާބިތުނުވުމެވެ. މާހިރުން މިހާރު ބުނާ ގޮތުގައި ލޭގައި ކޮލެސްޓްރޯލް މަތިވުމުގެ އަސްލު ތަޅުދަނޑިއަކީ "ސެޗުރޭޓަޑް ފެޓް" (Saturated Fat) ނުވަތަ ސަރުބީއެވެ.

ބިސް ކެއުމުން ލިބޭ ފައިދާ

]ބިހަކުން ލިބޭ ގިނަ ކަނާދު ހުންނަނީ އޭގެ ގޮބޮޅީގައި.] ނިއު ޔޯކްގެ އަލްބަރޓް އެއިންސްޓައިން ކޮލެޖް އޮފު މެޑިސިންގެ ޕްރޮފެސަރު ކީތު އައްޔޫބު ވިދާޅުވިއެވެ. ބިހުގެ ގޮބޮޅި ދޫކޮށްލުމަކީ ހަށިގަނޑަށް ބޭނުންވާ މުހިންމު މާއްދާތަކަކުން މަހުރޫމްވުމެވެ. އެއް ބިހުގައި ގާތްގަނޑަކަށް ތިން ގުރާމު ޕުރޮޓީންގެ އިތުރަށް ކެލްސިއަމާއި ވިޓަމިންޑީއާއި ސިކުނޑީގެ ދުޅަހެޔޮކަމަށް ބޭނުންވާ "ކޯލީން" (Choline) އެކުލެވިގެންވެއެވެ.

ލޭގައި ކޮލެސްޓުރޯލު މަތިވަނީ ކީއްވެ؟

ހަށިގަނޑުގެ ލޭގައި ހުންނަ ކޮލެސްޓުރޯލުގެ ބޮޑުބައި އުފައްދަނީ ސީދާ ފުރަމޭ (Liver) އިންނެވެ. މީގައި އިންސާނާގެ ޖީންސް ނުވަތަ އާއިލީ ސިއްހީ ތާރީޚު ބޮޑު ދައުރެއް އަދާކުރެއެވެ. ލޭގެ ކޮލެސްޓުރޯލްގެ 60 އިންސައްތައާއި 80 އިންސައްތައާ ދެމެދުގެ މިންވަރެއް ބިނާވަނީ ވާރުތަވާ ސިފަތަކަށެވެ. ކެއުމުގެ ސަބަބުން އަސަރުކުރަނީ ގާތްގަނޑަކަށް 20 އިންސައްތައާއި 40 އިންސައްތައާ ދެމެދުގެ މިންވަރަކަށެވެ.

މާހިރުން ވިދާޅުވާ ގޮތުގައި ބިހަކީ މައްސަލައެއް ނޫނެވެ. މައްސަލައަކީ ބިހާ އެކު އަހަރެމެން ކާ އެހެން ބާވަތްތަކެވެ. މިސާލަކަށް ބިސް ތެލުލާ އިރު ބޭނުންކުރާ ބަޓަރު ނުވަތަ ބިހާ އެކު ކާ [ބޭކަން] ފަދަ ތަކެއްޗެވެ. މި ބާވަތްތަކުގައި ހުންނަ ސަރުބީއަކީ ލޭގެ ކޮލެސްޓްރޯލްގެ މިންވަރު މަތިކުރުވާ ސަބަބެކެވެ. (ބޭކަން އެއީ މުސްލިމުން ކާނެ އެއްޗަކަށް ނުވާތީ، ޙަރާމް އެއްޗަކަށް ވާތީ، އެ ކަމުގެ ނުރައްކަލެއް މުސްލިމުންނަކަށް ނޯންނާނެތާއެވެ.) 

ދުވާލަކު ކިތައް ބިސް ކެވިދާނެ؟

އެމެރިކަން ހާރޓް އެސޯސިއޭޝަނުން ލަފާދޭ ގޮތުގައި ސިއްހަތު ސަލާމަތުން ހުރި މީހަކަށް ދުވާލަކު އެކެއް ނުވަތަ ދެ ބިސް ކެއުމަކީ ރައްކާތެރި ކަމެކެވެ. ނަމަވެސް:

ކޮލެސްޓްރޯލް މަތި މީހުން: ހަފުތާއަކު ހަތަރު ގޮބޮޅިއަށް ވުރެ އިތުރު ނުކުރުން ރަނގަޅެވެ.

ކޮލެސްޓްރޯލް މަތި ނޫން އާންމު މީހުން: ހަފުތާއަކު ހަ ބިސް ކެއުމަކީ އެންމެ އެކަށޭނަ މިންވަރެވެ.

ކޮލެސްޓުރޯލްގެ މައްސަލަ ހުންނަ މީހުން ބިސް ތެލުލުމަށް ޓަކައި ބަޓަރުގެ ބަދަލުގައި ޒައިތޫނިތެޔޮ (އޮލިވް އޮއިލް) ނުވަތަ ތަރުކާރީ ތެޔޮ (ވެޖިޓަބަލް އޮއިލް) ބޭނުންކުރުމަށާއި، ބިހާ އެކު ފައިބަރު ގިނަ ތަކެތި (މިސާލަކަށް ތަރުކާރީ ނުވަތަ ބީންސް) ބޭނުންކުރުމަށް މާހިރުން އިރުޝާދުދެއެވެ. ފައިބަރަކީ ހަށިގަނޑަށް ކޮލެސްޓުރޯލް ދަމައިގަތުން ކުޑަކޮށްދޭ މާއްދާއެކެވެ.

ޙަވާލާދޭ އަސްލު ލިޔުން: ނޭޝަނަލް ޖިއޯގްރަފިކް