ޔޫނާނީ ބޭސްވެރިކަމުގެ ނަޒަރިއްޔާތުގައި، ހަށިގަނޑުގެ ދިފާޢީ ނިޒާމަކީ ހަމައެކަނި ވަކި ގުނަވަނަކަށް ނުވަތަ ވަކި އޮނިގަނޑަކަށް ނިސްބަތްވާ އެއްޗެއް ނޫނެވެ. އޭގެ ބަދަލުގައި، އެއީ މުޅި ދިރިހުރި މަޚުލޫޤުގެ އެކި ގުނަވަންތަކާއި ނިޒާމުތައް ގުޅިގެން މަސައްކަތްކުރާ ފުރިހަމަ ހަރަކާތެކެވެ. ބަލިޖައްސާ ލަޝްކަރުތަކަކީ ކޮންމެ ދިމާއަކުން ވެސް ހަށިގަނޑަށް ހަމަލާދީފާނެ ބާރުތަކަކަށް ވާތީ، ހަށިގަނޑުގެ ރައްކާތެރިކަން ވެސް ހުންނާންވާނީ މުޅި ނިޒާމަށް ފެތުރިފައިވާ ވަށައިޖެހޭ ރައްކާތެރިކަމެއްގެ ގޮތުގައެވެ.

އިންސާނާގެ ޒާތީ އައިޑެންޓިޓީ (Physis) ބޭރު ދުނިޔެއާ ވަކިކޮށްދެނީ، އޭނާ އުފެދުނު ހަތާ (ސެލް)އިން ފެށިގެން ވާރުތަވެފައިވާ ޚާއްޞަ ޖީން އަދި ފުރާނައިގެ ބާރެވެ. އެހެންކަމުން، ދިފާޢީ ނިޒާމަކީ ހަށިގަނޑުގެ އޮނިގަނޑާއި ދިރިހުރުމަށް ބޭނުންވާ މުހިންމު މަސައްކަތްތަކަށް ނުރައްކާކުރާ ކޮންމެ ބޭރުގެ ނުފޫޒަކާ ދެކޮޅަށް ހަށިގަނޑުން ހިންގާ ހަރަކާތްތެރި ދިފާޢީ ހަނގުރާމައެވެ.

ޔޫނާނީ ބޭސްވެރިކަމުގައި ދިފާޢީ ބާރު މާނަކުރަނީ ހަށިގަނޑުގެ ފިޒިއޮލޮޖިކަލް ތިން ބާރެއްކަމަށްވާ "ވައިޓަލް" (ފުރާނައިގެ ބާރު)، "ނެޗުރަލް" (ޤުދުރަތީ ބާރު)، އަދި "ސައިކިކް" (ނަފުސާނީ ބާރު) ގުޅިގެން ކުރާ މަސައްކަތެއްގެ ގޮތުގައެވެ.

މީގެ ތެރެއިން "ވައިޓަލް ފެކަލްޓީ"(Vital Faculty) އަކީ ދިފާޢީ އިޖާބަ ވިލަރެސްކުރުމުގައި އެންމެ މުހިންމު ދައުރު އަދާކުރާ ބާރެވެ. މީގެ މައިގަނޑު އަސާސަކީ "ތައިމޮސް" (Thymos) އެވެ. މިއީ ހަށިގަނޑުގެ ހަކަތައާއި މެޓަބޮލިކް ހޫނު އެކުލެވިގެންވާ ބާރެކެވެ. މި ބާރު އުފެދެނީ ތައިމަސް ގްލޭންޑުންކަމަށްވާ އިރު، ހިތާއި ލޭގެ ޒަރީޢާއިން މުޅި ހަށިގަނޑަށް ފެތުރިގެންދެއެވެ. މިއީ ބައްޔާއި އިންފެކްޝަނާ ދެކޮޅަށް މަސައްކަތްކުރުމަށް ޓަކައި ހަށިގަނޑަށް ލިބިފައިވާ ވިސްނުންތެރި ޤާބިލުކަމެކެވެ. މި ނިޒާމު ފުރިހަމައަށް މަސައްކަތްކުރުމަށް ޓަކައި ނޭވާލުމާއި، ލޭ ދައުރުވުމާއި، ހަތާތަކުގެ މެޓަބޮލިޒަމް ރަނގަޅަށް ހުންނާންޖެހެއެވެ. ޒަމާނީ ސައިންސްގެ ބަހުން ނަމަ މިއީ "ސެލް-މީޑިއޭޓެޑް އިމިއުނިޓީ" ނުވަތަ ޓީ-ސެލްތަކާއި ވައިޓް ބްލަޑް ސެލްތަކުން ބަލިތަކާ ހަނގުރާމަކުރާ ކުރުމެވެ.

މީގެ އިތުރ "ނެޗުރަލް ފެކަލްޓީ" (Natural Faculty) އަކީ "ހިއުމަރަލް އިމިއުނިޓީ" (Humoral Immunity)  ފޯރުކޮށްދޭ ބާރެވެ. މިއީ ކާނާ ހަޖަމުވުމުގެ ތެރެއިން އުފެދޭ "ރެޑިކަލް މޮއިސްޗަރ" (Radical Moisture) އިން ލިބިދޭ ދިފާޢެކެވެ. ހަށިގަނޑުގެ މި ދެ ބާރު (ހިއުމަރަލް އަދި ވައިޓަލް) އެކުގައި މަސައްކަތްކުރާ ނަމަ ދިފާޢީ ނިޒާމު ހުންނާނީ ދުޅަހެޔޮކޮށެވެ. ނަމަވެސް މި ގުޅުން ކެނޑިއްޖެ ނަމަ، އަމިއްލަ ހަށިގަނޑަށް ހަމަލާދިނުން ފަދަ ބަލިތައް ކުރިމަތިވެއެވެ. މިއީ ޒަމާނީ ސައިންސްގައި ބުނާ އެންޓިބޮޑީސްއާއި އިމިއުނޯގްލޯބިއުލިންސްގެ ދައުރާ އެއްގޮތް ކަމެކެވެ.

"ސައިކިކް ފެކަލްޓީ" (Psychic Faculty) އިން ހާމަކޮށްދެނީ އިންސާނާގެ ވިސްނުމާއި އިހުސާސްތަކުން ދިފާޢީ ނިޒާމަށް ކުރާ އަސަރެވެ. އުފާވެރިކަމާއި ނަފުސާނީ ހަމަޖެހުމަކީ ދިފާޢީ ބާރު ވަރުގަދަކޮށްދޭ ކަމެކެވެ. ނަމަވެސް ދާއިމީކޮށް ފިކުރުބޮޑުވުމާއި ނުތަނަވަސްކަމުގެ ތެރޭގައި އުޅުމަކީ ދިފާޢީ ނިޒާމު ބަލިކަށިކޮށްލާ ކަމެކެވެ. މިއީ މިއަދުގެ ސައިންސްވެރިން ގަބޫލުކުރާ "ސައިކޯނިއުރޯ އިމިއުނޮލޮޖީ" (Psychoneuroimmunology) އާ ވަރަށް ބޮޑަށް ގުޅޭ ފަލްސަފާއެކެވެ.

ޔޫނާނީ ބޭސްވެރިކަމުގައި "ހައިޖީނިކް އިމިއުނިޓީ"އަށް ވަރަށް ބޮޑު އިސްކަމެއް ދެއެވެ. މީގެ މާނައަކީ ހަށިގަނޑުގެ އެތެރެއާއި ބޭރުގެ ސާފުތާހިރުކަމާއި، ހަށިގަނޑުގެ މިޒާޖާއި "ހިއުމަރސް" (Humors) ތަކުގެ މެދުގައި ހުންނަ ހަމަހަމަކަމަކީ ބަލިތަކުން ރައްކާތެރިވުމަށް އޮތް އެންމެ ބޮޑު ބާރެވެ. ނުބައި ކާނާއާއި ތަޣައްޔަރުވެފައިވާ މާހައުލުގެ ސަބަބުން ހަށިގަނޑުގެ އެތެރެ ވިހަވަމުން އައިސް، ބަލިތަކަށް މަގުފަހިވެ، ބައްޔަށް ހަށިގަނޑު ތައްޔާރުވެއެވެ. މި ނަޒަރިއްޔާ ބުނާ ގޮތުން ޖަރާސީމުތައް ހަމަލާދެނީ ހަށިގަނޑުގެ އެތެރޭގެ ނިޒާމު ގޯސްވެފައި އޮންނަ ހާލަތްތަކުގައެވެ. އެހެންކަމުން، ދިފާޢީ ނިޒާމަކީ ހަމައެކަނި ބޭރުން އަންނަ ޖަރާސީމާ ހަނގުރާމަކުރުމެއް ނޫނެވެ؛ އެއީ ބަލިތަކަށް އުޅޭން އުނދަގޫވާނެ ފަދަ ސާފުތާހިރު އެތެރޭގެ މާހައުލެއް ދެމެހެއްޓުމެވެ.

ހަށިގަނޑުގެ ދިފާޢީ ބާރު ހަތަރު އުންސުރަށް (އަލިފާން، ވައި، ފެން، އަދި ވެލި) އަސަރުކުރާ ގޮތަށް ބަލާއިރު-

އަލިފާން (Fire) : މިއީ ހަށިގަނޑުގެ މެޓަބޮލިކް ހޫނާއި ހަޖަމުކުރުމުގެ ބާރެވެ. މީގެ ސަބަބުން ހުން އައުމާއި އިންފުލެމޭޝަން އުފެދެނީ ހަށިގަނޑު ސާފުކުރުމުގެ ތެރެއިންނެވެ.

ވައި (Air) : މިއީ ލެޔާއި، ފުރާނައިގެ ވަޔާއި، ހަންގަނޑާއި ފުއްޕާމޭގެ ދިފާޢީ ފަށަލައެވެ. މިއީ ބޭރުގެ ހަމަލާތަކުން ރައްކާތެރިކޮށްދޭ ފުރަތަމަ ހުރަހެވެ. –

ފެން (Water) : މިއީ ލިމްފެޓިކް ނިޒާމާއި ހަށިގަނޑުގެ ތެތް ފަށަލަތަކެވެ. މިއީ ދިފާޢީ ސެލްތައް ދިރިއުޅޭ އަދި ހަށިގަނޑު ސާފުކޮށްދޭ ތަނެވެ. –

ވެލި/ބިން (Earth) :މިއީ ހަށިގަނޑުގެ ބޭރުގެ ފަށަލަތަކާއި ގޮހޮރުގެ ބެކްޓީރިއާތަކުގެ ހަމަހަމަކަމެވެ.

އިންސާނާގެ މިޒާޖު (ސެންގުއިން، ފުލެގްމެޓިކް، ކޮލެރިކް، އަދި މެލަންކޮލިކް) އާއި ދިފާޢީ ނިޒާމާ ގުޅުމެއްވާކަމަށް ޔޫނާނީ ބޭސްވެރިކަމުގައި ބުނެއެވެ. މިސާލަކަށް "ސެންގުއިން" މިޒާޖުގެ މީހުންގެ ދިފާޢީ ބާރު ވަރުގަދަވާ އިރު، "ފުލެގްމެޓިކް" މިޒާޖުގެ މީހުންގެ ހަށިގަނޑުގައި ތެތްކަން ގިނަވުމުގެ ސަބަބުން ދިފާޢީ އިޖާބަ ލަސްވެދާނެއެވެ. ހަމައެހެންމެ، އުމުރާ އެކު ދިފާޢީ ބާރު ބަދަލުވަމުންދެއެވެ. ތުއްތުއިރު ބަލިކަށިކޮށް ހުރެފައި، ޒުވާން އުމުރުގައި ވަރުގަދަވެ، ދުވަސްވީ އުމުރުގައި އަނެއްކާ ވެސް ބަލިކަށިވެދާނެއެވެ.

ބަލިތަކުން ދިފާއުވުމަށް އިންތިހާއަށް އެންޓިބަޔޮޓިކްސް ބޭނުންކުރުމާއި ދިފާޢީ ނިޒާމު ދަށްކޮށްލާ ބޭސްތައް ބޭނުންކުރުމަކީ ހަށިގަނޑުގެ ޤުދުރަތީ ދިފާޢު ބަލިކަށިކޮށްލާ ކަމެކެވެ. އޭގެ ބަދަލުގައި، މި ފަލްސަފާގައި ބާރުއަޅަނީ ރަނގަޅު ކާނާއާއި، ކަސްރަތާއި، ނަފުސާނީ ދުޅަހެޔޮކަމާއި، އަދި ފަތްޕިލާވެލީގެ ބޭސްތައް ބޭނުންކޮށްގެން ޤުދުރަތީ ގޮތުން ދިފާޢީ ބާރު ވަރުގަދަކުރުމަށެވެ.

ދިފާޢީ ނިޒާމަކީ އިންސާނާގެ ހަށިގަނޑާއި، މިޒާޖާއި، ނަފުސާނީ ދުޅަހެޔޮކަމާއި، އަދި އޭނާ ދިރިއުޅޭ މާހައުލާ ގުޅިފައިވާ ފުރިހަމަ ފޭރާމެކެވެ.

ހަތާ

ވިލަރެސްކުރުން