އީރާނަކަށް ވެސް އަދި އިސްލާމީ އެހެން ޤައުމުތަކަށް ވެސް، އެއްވެސް ވަރަކަށް ދައްޖާލީ އިޒުރޭލުގެ ނުބައިކަމާއި، މަކަރުވެރިކަން އަދި ވެސް ދަސްވެފައެއް ނުވެއެވެ. އެހެންނޫން ނަމަ، ރައްކާތެރިކަމުގެ ފިޔަވަޅުތަކާ ނުލައި، ވެރިކަމުގެ ބާރުތަކުގެ އެންމެ މަތީ ފަށަލައިގެ އިސްވާރުންތަކެއް އެއް ތަނަކަށް އެއްވެ، ދިފާޢީ ކައުންސިލުގެ ބައްދަލުވުމެއް ބާއްވަންވީ ކީއްވެގެންހެއްޔެވެ؟ ހަ ފަރާތުން ދިޔައީ ހަނގުރާމައިގެ ބެރު ޖަހަމުންނެވެ. ޑޮނަލްޑް ޓުރަންޕު ދިޔައީ، ސީދާ ޢަލީ ޚާމަނާއީގެ "ލައިވް ލޮކޭޝަން" (ނުވަތަ އެ އިރަކު ހުންނަވާ ތަން) ވަގުތުން ވަގުތަށް ހާމަކުރެވިދާނެކަމަށް ބުނަމުންނެވެ. ވީމާ، އީރާނުން ރައްކާތެރިކަމުގެ ފިޔަވަޅުތައް އަޅައިފައި ނުވަނީ ކީއްވެގެންހެއްޔެވެ؟

މި ސުވާލުތަކުގެ ޖަވާބު ވަރަށް ސާފެވެ. އިޒުރޭލުގެ ޖާސޫސީ އިދާރާ މޮސާޑުން ވަނީ އީރާނުގެ ވެރިކަމުގެ އެންމެ އެތެރޭގެ ފަށަލަތަކުގެ ތެރެއަށް ފުންކޮށް ވަދެފައެވެ. ބައެއް ފަރާތްތަކުން ބުނެފައިވާ ގޮތުގައި، މޮސާޑުގެ އޭޖެންޓުން ވަނީ، އާޔަތު الله ޢަލީ ޚާމަނާއީއާ ގާތް ގުޅުމެއް ބާއްވައިގެން، އޭނާގެ އަމިއްލަފުޅު ތަކެތިވެސް ވަގަށް ނަގައިފައެވެ. މިއީ، ރަމުޒީ ނުވަތަ ޙަޤީޤީ މެސެޖަކަށް ވިޔަސް، އެ މެސެޖުން ހާމަކޮށްދެނީ މޮސާޑުގެ އޭޖެންޓުން، އީރާނުގެ ވެރިކަމުގެ ނިޒާމު ތަސްވީތުކޮށްފައިވާ މިންވަރެވެ.

ޙަޤީޤަތަކީ އީރާނުގެ ވެރިކަމުގެ ނިޒާމުގެ ތެރެއަށް، މޮސާޑުގެ ޖާސޫސުން ވަނީ ވަރަށް ބޮޑަށް ވަދެފައެވެ. ޚުދު އީރާނުގެ އިންޤިލާބީ ގާޑުންގެ ތެރޭގައިވެސް، އިޒުރޭލަށް މަޢުލޫމާތު ފޯރުކޮށްދޭ ޖާސޫސުން ދަނީ ޙަރަކާތްތެރި ވަމުންނެވެ. ހިޒުބު اللهގެ އިސްވާރު ޙަސަން ނަސްރު اللهއާއި، ހިޒުބު اللهގެ އިސްދާނަކަމުގެ ތެރޭގައި ހިމެނޭ އެހެން ފަރާތްތަކަށް ފާއިތުވި ދެ އަހަރެއްހައި ދުވަހުގެ ތެރޭގައި ކުރިމަތިވި ހިތާމަވެރި ޙާދިސާތަކުން ވެސް ދައްކުވައިދެނީ ހަމަ އެއް މަންޒަރެކެވެ.

އެމެރިކާގެ ރައީސް [ކުޑަކުދިންގެ ޚާއްޞަ ޑޮކްޓަރު] ޑޮނަލްޑް ޓުރަންޕު އަމިއްލައަށް ވެސް ފޮނިކަނޑަމުން ބުނެފައިވަނީ އީރާނުގެ ސުޕްރީމް ލީޑަރަށް [އަހަރެމެންގެ ޖާސޫސީ މަޢުލޫމާތާއި، ތަޖުރިބާކާރު ޓްރެކިން ނިޒާމުތަކުން ދުރުހެލިވާން ނުކުޅެދިފައިވާ]ކަމަށެވެ. ޓުރަންޕުގެ އިޝާރާތަކީ، އެއީ ކުރިއަރައިފައިވާ ސަރވޭލަންސާއި، ފޯނު ޓްރެކިންގއާއި، އެކި ތަންތަނުގައި ހަރުކޮށްފައިވާ އާލާތްތަކާއި، އަދި އީރާނުގެ އިސްވާރުންނާއި ގާތް ގުޅުން އުފައްދާފައިވާ އިންސާނީ މަސްދަރުތަކެވެ. އެ ފެންވަރަށް އީރާނުގެ ވެރިކަމުގެ ނިޒާމުގެ އެންމެ އެތެރެއަށް ވަދެގަތުމަކީ އެކްސިޑެންޓެއްގެ ސަބަބުން ދިމާވާނެ ކަމެއްނޫނެވެ. އެ ކަމަށް ބޭނުންވަނީ، އީރާނުގެ ވެރިކަމުގެ އެތެރޭގެ ފަށަލައިގައި ހިމެނޭ މީހުންނެވެ.

އީރާނުން މީގެ ކުރީން ވަނީ މޮސާޑަށް އެއްބާރުލުންދޭ ފަރާތްތަކާއި، އެތެރޭގެ ލީކުތައް ފައިދާހުރި ގޮތެއްގައި ނައްތައިލާން ދަތިތަކެއް ކުރިމަތިވެ، އޭގެ ނަތީޖާއެއްގެ ގޮތުން އެކަމަށް އީރާނުން ވަނީ ބޮޑު އަގެއް ދައްކައިފައެވެ. މަތިންދާބޯޓު ޙަމަލާތަކާއި، މިސައިލު ހަމަލާތަކުގައި އީރާނުގެ އިސް ކޮމާންޑަރުންނާއި، މަތީ ފަންތީގެ އެތައް އޮފިޝަލުންނެއް ވަނީ ޝަހީދުވެފައެވެ. އެ ހައި އަޑިއަށް ޖާސޫސުން ވާސިލުވުމުން، ހަނގުރާމައިގެ މައިދާނަކީ ހަމައެކަނި ބޭރުފުށުގެ މައިދާނެއް ނޫނެވެ. އެއީ ސީދާ [ގޭތެރޭގެ] މައްސަލައެކެވެ. ވީމާ ފުރަތަމަ ހަނގުރާމަކުރާންޖެހޭނީ އެތެރޭގައި ވަކިހިއްޕައިގެން ތިބި ޚާއިނުންނާއެވެ. އިސްލާމީ އުންމަތަށް ބަލައިލާ އިރު، އެ އުންމަތުގެ ކޮންމެ ދިމާއަކުން ފެންނަނީ، މުނާފިޤުކަމާއި، ދޮގުވެރިކަމާއި، އަދި ޚިޔާނާތެވެ.

އިސްލާމީ އުންމަތުގެ މިއަދުގެ ބަލި ފަޔަކީ މުނާފިޤުކަމާއި ޢަޤީދާގެ ބަލިކަށިކަމެވެ. ބަޔަކު އެއްބަސްވިޔަސް ނުވިޔަސް މުސްލިމު ގައުމުތައް ތިބީ އެމެރިކާއަށް އަޅުވެތިވެފައެވެ. އީރާނުގެ ރޫޙީ ލީޑަރު ޝަހީދުކޮށްލުމުން އެ ކަމާ ދެކޮޅަށް އެއްޗެކޭ ބުނެ، ދިދަ ބައިދަނޑިއަށް ތރިކޮށްލާން ކެރުނު މުސްލިމު ގައުމަކީ ކޮބައިތޯއެވެ؟ މިއަދު ސަޢުދީ ޢަރަބިއްޔާ ރުޅިއަތުވެދާނެތީ އެއްވެސް ގައުމަކަށް އެ ކަން ކުރާކަށް ނުކެރުނެވެ. ޚާމަނާއީ އަވަހާރަކޮށްލީ ސުޢޫދީގެ ރުހުން އޮވެގެންކަމަށް، ކަށަވަރުނުވާ ބައެއް މަސްދަރުތަކުން ޚަބަރު ލިބެއެވެ. ސުޢޫދީ ޢަރަބިއްޔާ އޮތީ އެމެރިކާގެ މުށުތެރޭގައެވެ. މުޅި އިސްލާމީ އުންމަތުގެ ހާލަކީ މިއީއެވެ.

އެމެރިކާއަށް ބޯނުލަނބާ، އެ މީހުންނަށް އަޅުވެތިނުވާ ގައުމެއް ނަމަ، އެ ފަދަ ގައުމުތައް އެ ގެންދަނީ ގިއްގަޅުވައިލަމުންނެވެ. އިރާގެވެ. ލީބިޔާއެވެ. ސޫރިއާއެވެ. މިހާރު އީރާނެވެ. ނަމަވެސް މިހާރު އެމެރިކާގެ އިސްތިރާޖު ބަދަލުކޮށްފިއެވެ. މިހާރު ބަލަނީ އެ މީހުންގެ ފިކުރު ގަބޫލުނުކުރާ އެ މީހުންނަށް ބޯ ނުލަނބާ ގައުމުތަކުގައި ތިބި އެ ފަދަ މީހުން ނައްތައިލާށެވެ. މި ފަދަ މީހުން ނައްތައިލުމަށް ފަހު އެ މީހުން ޖަހާހައި ބެރަކަށް ނަށާ މީހަކު ވެރިއަކަށް ލައިގެން އެ ގައުމުގެ މުއްސަނދިކަން ފޭރޭށެވެ. ސޫރިއާގެ ބައްޝާރުގެ ވެރިކަން ދުއްވައިލުމަށް ފަހު އިންދައިފައި އެ ވަނީ އެ ފަދަ [ޔަހޫދީ] ވެރިކަމެކެވެ.

ވީމާ، އީރާނުގެ އަދި މުސްލިމު ހުރިހައި ގައުމެއްގެ އެތެރެކޮއިލާ ހަމައަށް ދުޝްމަނުން ވާސިލުވަނީ ޚާއިނުންނާއި ޣައްދާރުން ގިނަވުމުގެ ސަބަބުން އެ މީހުން ބޭނުންކޮށްގެންނެވެ.