އިންޑިއާގެ ބޮޑުވަޒީރު 2017 ޖުލައި 4ގައި އިންޑިއާގެ ބޮޑުވަޒީރު ދަތުރުކުރެއްވި މަތީންދާބޯޓު ތައްލު އަބީބުގެ ރަށް ބޭރުގައި އޮންނަ ގުރިއޯން އެއަރުޕޯޓަށް ޖެއްސި އިރު، އެތާ ވިނަގަނޑު މަތީގައި ފަތުރައިފައި އޮތް ރަތް ދޫލައިގެ އަނެއްކޮޅުގައި ނަތަންޔާހޫ ހުއްޓިގެން ހުއްޓެވެ.

މިނިޓުތަކެއް ފަހުން މި ދެ އިސްވާރުން ވަރަށް އިޙުތިރާމާ  އެކު ބަޣަލްގީރުކޮށް ބައްދައިލިއެވެ. އެއަރުޕޯޓުގައި ވާހަކަދައްކާން ތިބެފައި މޯދީ ބުނީ އޭނާގެ ދަތުރަކީ [މަގުގެ ހުރަސްތައް ނައްތައިލާ ދަތުރެއް]ކަމަށާއި އެއީ އިންޑިއާގެ ބޮޑުވަޒީރަކު އިސްރާއީލަށް ދިޔަ ފުރަތަމަ ފަހަރުކަމަށެވެ. މި ކަމާ ގުޅިގެން ނަތަންޔާހޫ ހަނދާންކޮށްދިނީ 2014ވަނަ އަހަރު ނިއުޔޯކުގައި ބޭއްވި ފުރަތަމަ ބައްދަލުވުމުގެ މަތީންނެވެ. އޭނާ ބުނީ [އިންޑިއާ އާއި އިސްރާއީލާ ދެމެދު ބާކީ ހުރި ފާރުތައް ތަޅައިލާން އެ ދަތުރުގައި އެއްބަސްވި]ކަމަށެވެ.

އޭގެ ނުވަ އަހަރު ފަހުން ދެވަނަ ދަތުރަށް އިސްރާއީލަށް ފުރާން ތައްޔާރުވަމުންދާ އިރު، ކުރީން ކަނޑައެޅި އަމާޒަށް ވާސިލުވެވިފައިވާކަމަށް ވަރަށް ފުރިހަމައަށް ދައުވާކުރެވޭނެކަމަށް މުޙައްލިލުން ބުނެއެވެ. އެއް ޒަމާނެއްގައި އިންޑިއާގައި ވަރަށް ފޮރުވިގެން، އޭގެ ފަހުން ވެސް ސިއްރުން ކުރިއަށް ގެންދިޔަ ގުޅުމަކީ މިހާރު އިންޑިއާގެ އެންމެ އާންމު އެކުވެރިކަމުގެ ތެރެއިން އެއް އެކުވެރިކަމެވެ. މިއީ މިއަދު ވަންހަނާކުރެވޭން ނެތް ހަގީގަތެކެވެ. އިސްރާއީލުން ޣައްޒާއާ ދެކޮޅަށް ކުރި ނަސްލު ނައްތާލުމުގެ ހަނގުރާމައިގައި ހިންގި ހަނގުރާމައިގެ ޖަރީމާތަކާ ގުޅިގެން 2024ވަނަ އަހަރުގެ ފަހުކޮޅު އިސްރާއީލުގެ ބޮޑުވަޒީރު ހައްޔަރުކުރުމުގެ އަމުރެއް ބައިނަލްއަގުވާމީ އަދާލަތުގެ ކޯޓުން ނެރުނު ނަމަވެސް މޯދީ ވަނީ ނަތަންޔާހޫ އަކީ [ވަރަށް ގާތް އެކުވެރިއެއް]ކަމަށް ވަރަށް ގިނަ ފަހަރަށް ސިފަކޮށް އެ އަމުރު ތަންފީޒު ނުކުރާނެކަމަށް ބުނެފައެވެ.

އިސްރާއީލާ އެކު އިންޑިއާއިން މި ބާއްވާ ގާތް ގުޅުން އިންޑިއާގެ ޑިޕްލޮމެޓުންނާއި އޮފިޝަލުން ވަނީ މި ގުޅުމުގެ ޢަދުލުވެރިކަމާއި އިންސާފުވެރިކަން ދެއްކުމަށް ޓަކައި މި ގުޅުމަކީ އިޙުސާސީ ޢަމަލީ ގުޅުމެއްކަމަށާއި މިއީ މަރުކަޒީ ގޮތުން އިންޑިއަށް ފައިދާ ހުރި ގުޅުމެއްކަމަށް ސިފަކޮށްފައެވެ. –އަދި ފަންނިއްޔާތާއި އަސްކަރީ ތަޖުރިބާއާ އެކު، އެ މީހުންނަށް އަޅައިނުލެވި ދޫކޮށްލެވިފައިވާ  މާ ގިނަ ކަންތައްތަކެއް ހުރިކަމަށް ވެސް އެ މީހުން ބުނެއެވެ.

ނަމަވެސް މިއީ ފަލަސްތީނަށް، އަދި އިންޑިއާއާ އެ ގައުމާ ދެމެދު އޮތް ގުޅުމަށް ނޭދެވޭ އަސަރުކުރާނެ އަދި ބައެއް ތަޖުރިބާކާރުން ބުނާ ގޮތުގައި އިންޑިއާގެ ހަރުދަނާކަމާއި ޢަމަލީ އަޚުލާގަށް ބައިނަލްއަގުވާމީ ދުނިޔޭގައި ނޭދެވޭ އަސަރެއްކުރި ކަމެއްކަމަށް ތަޙުލީލުކުރާ ފަރާތްތަކުން ބުނެއެވެ.

ވިސްނުމާއި ފިކުރުގެ ގުޅުމެއް

އިސްތިޢުމާރުގެ ފަހުގެ ދުނިޔޭގެ ނިޒާމުގައި ފަލަސްތީނާ އެއްކޮޅަށް ވަރުގަދައަށް ވަކާލާތު ކުރި އިންޑިއާއަކީ ފަލަސްތީނުގެ މިނިވަންކަމަށް އެ ގައުމުގެ އަޣުލަބިއްޔަތު (ގިނަ) އިސްވާރުން ތާއީދުކުރި ގައުމެކެވެ. 1947ވަނަ އަހަރު އިންޑިޔާއިން ވަނީ ފަލަސްތީނު ބައިބައި ކުރުމަށް އދ.އިން ނިންމި ނިންމުމަށް ވަރަށް ސާބިތުކަމާ އެކު ދެކޮޅުހަދައިފައެވެ. އަދި އޭގެ ހަތަރު ދަހަރު ފަހުން 1988ވަނަ އަހަރު އިންޑިއާ ހިމެނުނީ މުސްލިމު ނޫން ގައުމަކުން ފަލަސްތީނު ދައުލަތް ބަލައިގަތް ދައުލަތްތަކުގެ ތެރެއިން އެއް ދައުލަތަށެވެ.

ފިނި ހަނގުރާމަ ނިމުމުން – އިންޑިއާ ރަސްމީކޮށް އިއްތިހާދު ނެހެދި ނަމަވެސް ރޫސީވިލާތާ ދިމާއަށްޖެހިލައި މަސައްކަތްކުރި ނަމަވެސް ފަހުން އައިސް އެ މީހުންގެ ޢަމަލުތަކަށް ބަދަލެއް ގެންނަން މަޖުބޫރުވިއެވެ. އެމެރިކާގެ މަސައްކަތާ އެކު އެމެރިކާއާ ގުޅިގެން ކުރި މަސައްކަތުގެ އިތުރަށް އިންޑިއާއިން ވަނީ 1992ވަނަ އަހަރުގެ ޖެނުއަރީ މަހު އިސްރާއީލާއެކު ޑިޕްލޮމެޓިކް ގުޅުންތައް ވެސް ގާއިމްކޮށްފައެވެ.

އޭގެ ފަހުން ދިފާޢީ މައިދާނުގައި އެ ގުޅުންތައް ބަދަހިކޮށްފައިވާއިރު، ފާއިތުވި އަހަރުތަކުގައި އެހެން މައިދާންތަކުގައި ވެސް އެ ގުޅުން ވަނީ ބަދަހިކޮށް ފުޅާކޮށްފައެވެ.

2014 ވަނަ އަހަރު އިންޑިއާގެ ވެރިކަމަށް މޯދީ އައުމަކީ ގުޅުންތަކަށް އެންމެ ބޮޑު ބަދަލެއް ގެނައުމަށް މެދުވެރިވި ސަބަބެއްކަން ސާބިތުވެއެވެ. އެހެނީ މޯދީގެ ހިންދޫ ގައުމިއްޔަތުގެ ބާރަތިޔާ ޖަނަތާ ޕާޓީ (ބީޖޭޕީ) ގެ ފިކުރު ބިނާވެފައިވަނީ އިންޑިއާއަކީ ދުނިޔޭގެ ހުރިހައި ކަންކޮޅެއްގައި ތިބި ހިންދޫންނަށް ޠަބީޢީ ވާސައަކަށް ހަދައި، އެއީ ހަމައެކަނި ހިންދޫ ގައުމަކަށް ހެދުމުގެ ތަސައްވުރުގެ މައްޗަށެވެ. އިސްރާއީލުގެ ހުރިހައި އިސްވާރުންގެ ފިކުރަކީ އިސްރާއީލާއި ފަލސްޠީނާއި މުޅި އެ ސަރަހައްދުގެ ބިމަކީ ހަމައެކަނި ޔަހޫދީންގެ ބިމެއްކަމުގައި ހެދުމުގެ ތަސައްވުރެވެ. މޯދީ އާއި އިސްރާއީލުން ވެސް ދެކޭ ގޮތުގައި [އިސްލާމީ ނިރުބަވެރިކަން] މިއީ މުސްލިމުންނާ ދެކޮޅަށް ގެންގުޅޭ ތަނަވަސް ސިޔާސަތުތައް ތަންފީޒުކުރުމަށް ބޭނުންވާ އެންމެ މުހިންމު ހަތިޔާރެވެ.

މޯދީގެ ވެރިކަމުގައި އިންޑިއާ ވަނީ އިސްރާއީލުން އެންމެ ގިނައިން ހަތިޔާރު ގަންނަ ގައުމަކަށް ވެފައެވެ. އަދި 2024ވަނަ އަހަރު އިސްރާއީލުން ޣައްޒާއާ ދެކޮޅަށް ހަނގުރާމަކޮށް ނަސްލުހޭދު ހިންގަމުން ދިޔަ އިރު، އިންޑިއާގެ ހަތިޔާރު އުފައްދާ ކުންފުނިތަކުން އިސްރާއީލަށް ރޮކެޓްތަކާއި ގޮވާތަކެތި ވިއްކައިފައިވާކަމަށް އަލްޖަޒީރާގެ ނޫސްވެރީން ކުރި މިނިވަން ތަހުގީގުން ސާބިތުވެއެވެ.

މޯދީގެ ކުރިއަށް އޮތް ދަތުރުގައި ދެ ގައުމުން ވަނީ ދިފާއީ ގުޅުން އިތުރަށް ފުންކޮށް ފުޅާކުރުމުގެ މަގުސަދުގައި ފަހުމުނާމާތަކެއްގައި ސޮއިކޮށް، މިސައިލުން ދިފާޢުވުމުގެ ނިޒާމެއް ދެ ގައުމު ގުޅިގެން ތަރައްގީކުރުމުގެ އެއްބަސްވުމެއްގައި ވެސް ސޮއިކުރާނެއެވެ.

އިސްރާއީލުގައި ހުންނަ އިންޑިއާގެ ސަފީރު ޖޭޕީ ސިންގު ބުނެފައިވަނީ ބޮޑުވަޒީރު މޯދީގެ ދަތުރަކީ ވަރަށް ތާރީޚީ ދަތުރެއްކަމަށެވެ. [މޯދީގެ އެކުވެރި ނަތަންޔާހޫއާ ބައްދަލުކުރުމުގެ އިތުރަށް އިސްރާއީލުގެ ރައީސް އިސްހާޤު ހަރުޒުޤާ ވެސް ބައްދަލުކުރާނެއެވެ. އަދި އިސްރާއީލުގެ ބަރުލަމާދުގައި މޯދީ ތަގުރީރުކުރާނެއެވެ.] އޭނާ އިރުރަށް ބުނި ގޮތުގައި މޯދީގެ މި ދަތުރުގައި އެތައް ބައިވަރު އެއްބަސްވުންތަކެއްގައި ސޮއިކުރެވި ދެ ގައުމުގެ ގުޅުން މުޅީން އެހެން ފިޔަވައްސަކަށް ތަރަގީވާނެއެވެ.

ވޮޝިންޓަންގައި ހުންނަ ކްރައިސިސް ގްރޫޕްގެ އިސްރާއީލް ފަލަސްތީން ޑިޕާޓްމަންޓުގެ ޕްރޮޖެކްޓް ޑިރެކްޓަރު މެކްސް ރޮޑެންބެކް އަލްޖަޒީރާ ނޫހާ ވާހަކަދައްކަމުން ބުނެފައިވާ ގޮތުގައި

[އިސްރާއީލުގެ ބަރުލަމާނުގައި މޯދީ ދޭ ޚިޠާބު ޚާއްސަވަނީ ބާރަތިޔާ ޖަނަތާ ޕާޓީގެ ދަށުން ފާޅުކަން ބޮޑު ގޮތެއްގައި މުސްލިމުންނާ ދެކޮޅަށް އިސްރާއީލުން ގެންގުޅޭ ސިޔާސަތާއި އިސްރާއީލަށް ތާއީދުކުރާ ސިޔާސަތަކަށް ބަދަލުވުމުގެ މިންވަރު ދައްކުވައިދޭ ގޮތަށް ދޭ ތަގުރީރަކަށްވާތީއެވެ.]

ކޮންމެއަކަސް ނަތަންޔާހޫމުސްލިމުންނާ ދެކޮޅަށް ފަލަސްތީނު ބިމަކީ ޔަހޫދީންގެ ތާނެއްކަމަށް ހަދާން ގެންގުޅޭ [ގްރޭޓާރ އިސްރާއީލު]ގެ މަފުހޫމާއި އިންޑިއާ ސަރަހައްދުގެ ބިމަކީ ހަމައެކަނި ހިންދީންގެ ތަނެއްކަމަށް ހަދާން ގެންގުޅޭ [ގްރޭޓަރ އިންޑިއާ]ގެ މަފުހޫމާ ވަރަށް ބޮޑަށް ފާޓުވެއެވެ. އެހެންކަމުން މޯދީ އިސްރާއީލަށް މި ކުރާ ދަތުރުގެ ސަބަބުން އެ ދެ ގައުމުގެ ގުޅުން ވަރަށް ބޮޑަށް ބަދަހިވާނެކަމަށް ވަނީ ބެލެވިފައެވެ. އެހެނީ އެ ދެ މީހުން ވެސް މުސްލިމުންނާ ދެކޮޅަށް ގެންޅޭ ފަލްސަފާ އަކީ ހަމަ އެއް ފަލްސަފާއެކެވެ.