އީރާނުގެ ރޫޙީ ލީޑަރު އާޔަތުﷲ ޢަލީ ޚަމަނާއީ އާއި އޭނާގެ އަންހެން ދަރިކަނބަލުންނާއި ދަނބިދަރިކަލުންނާއި ކާފަ ދަރިކަލުން ޝަހީކުކޮށްލި ޚަބަރަކީ ބަޔަކަށް އުފާވެރިޚަބަރަކަށް ވިޔަސް އެއީ އިސްލާމީ އުންމަތުގެ ހެވަތަށް އެދޭ މީހުންގެ ހިތްތަކުން ލޭކަރުނަ ހިލުވައިލާނެ ހިތާމަވެރި ޚަބަރެކެވެ. އެހެނީ މިއަދު އެ މަނިކުފާނު ހިމެނިވަޑައިގެންފައިވަނީ މުސްލިމުންގެ ހިތްތަކުގެ ރަސްގެފާނުކަމުގައެވެ. މުސްލިމުންގެ އުންމީދުކަމުގައެވެ. މުސްލިމުންގެ ނަމުގައި ތިބެ މުސްލިމުންގެ ތެރޭގައި ބައިބައިމުން އުފައްދާން މާލީ ގޮތުން އެހީތެރިވާ އީރާނުގެ އަވައްޓެރި ގައުމުތަކަށް މިއީ އުފާވެރި ޚަބަރަކަށް ވެދާނެއެވެ. ނަމަވެސް މި ކަމުން ޚުދު އެ ގައުމުތަކަށް ވެސް ލިބޭނީ ކޮޅުނެތްކޮޅަށް ގެއްލުމެވެ.

ޚާމަނާއި ޝަހީދުވުމަކީ އިސްރާއީލުން އުންމީދުކުރާ ވަރުގަދަ ބޮޑު އިސްރާއީލުގެ ތަޞައްވުރު ހަގީގަތަކަށް ހަދާން މަގުފަހިކޮށްދޭނެ ކަމެކެވެ. އަދި ފަލަސްޠީނުގެ ޤަޟިއްޔާ އިތުރަށް އޮޅުންބޮޑުންވާނެ ކަމެއްމެއެވެ. 

ކޮންމެއަކަސް ޢުމުރުފުޅުން 86 އަހަރުގެ އާޔަތުﷲ ޢަލީ ޚާމަނާއީ ޝަހީދުކޮށްލައިފިއެވެ. އެއީ އީރާނުގެ އެންމެ މަތީ ވެރިޔާއެވެ. އެ މަނިކުފާނާ އެކު، އެ މަނިކުފާނުގެ އަންހެން ދަރިކަލުންނާއި ދަނބިދަރިކަލުން ވެސް ވަނީ ޝަހީދުކޮށްލައިފައެވެ. އަދި ކާފަދަރިކަލަކު ވެސް ވަނީ ޝަހީދުވެފައެވެ. އިރާނުގެ ދައުލަތުގެ މީޑީއާއިން ރޭ ފަތިހު މި ޚަބަރު ވަނީ ކަށަވަރުކޮށްދީފައެވެ. މަޢުލޫމާތު ލިބިފައިވާ ގޮތުގައި އިސްރާއީލާއި އެމެރިކާ ގުޅިގެން ޚާމަނާއީ ދިރިއުޅުއްވާ ގެކޮޅަށް ދިން ވަރުގަދަ ޙަމަލާއެއްގައެވެ. 

ޝަހީދު ޚާމަނާއީގެ ޢާއިލާގެ ބޭފުޅުންގެ އިތުރަށް ދެކުނު އީރާނަށް ދިން ޙަމަލާއެއްގައި 108 މީހަކު ވަނީ ޝަހީދުކޮށްލައިފައެވެ. މީގެ އިތުރަށް 24 ޕްރޮވިންސަކުން 201 މީހުން ޝަހީދުކޮށްލައިފައިވާކަމަށް ވެސް ޚަބަރު ލިބެއެވެ.

އީރާނަށް، އެމެރިކާއާއި އިސްރާއީލުން، އީރާނުގެ ޚާއިނުންގެ އެހީގައި، ދެމުން މި ގެންދާ އަނިޔާވެރި ބޭއިންސާފު ޙަމަލާގެ ރައްދުގައި އިސްރާއީލަށާއި މެދުއިރުމަތީގައި ހުރި އެމެރިކާގެ މަސްލަހަތުތަކަށް އީރާނުން ވެސް ވަރުގަދަ ޙަމަލާތަކެއް ދެމުން އެބަ ގެންދެއެވެ. މިހާތަނަށް އިސްރާއީލަށް ދިން ޙަމަލާތަކުގައި މަދަނީ ބޮޑެތި ގެއްލުންތަކެއް ލިބި އެތައް ސަތޭކަ ބަޔަކު ވަނީ ޒަޚަމުވެފައެވެ. އަދި ދެ މީހަކު މަރުވެފައިވާ ކަމަށް ވެސް ޚަބަރު ލިބެއެވެ. މިގެ އިތުރަށް، އީރާނުން ކުރީން ވެސް ބުނެފައިވާ ފަދައިން ޤަޠަރާއި ޢަރަބި އިމާރާތާއި، ކުވައިތާއި ބަހުރައިނާއި އުރުދުނާއި ސުޢޫދީ ޢަރަބިއްޔާއާއި އިރާޤުގައި ހުރި އެމެރިކާގެ އެތައް މަސްލަހަތަކަށް ވެސް ބޮޑެތި ގެއްލުންތަކެއް ވަނީ ދީފައެވެ.

އީރާނުގެ އެންމެ މަތީ އިސްވާރާ ބެހޭ ގޮތުން އަޅުގަނޑުމެން ވާހަކަދައްކާ އިރު އެއީ ހަމައެކަނި ދީނީ ލީޑަރުކަމަށް ހީކުރާ ހީކުރުމަކީ މީހުން ހަދާ އެންމެ އާންމު ގޯހެވެ. 

އޭނާއަކީ ސަރުކާރުގެ އެންމެ އިސް އިސްވާރެވެ. ކޮމާންޑަރ-އިން-ޗީފެވެ. އިޤްތިޞާދުގެ ވެރިޔާއެވެ. މުޅި މުޖުތަމަޢުގެ ވެރިޔާއެވެ. ދައުލަތުގެ ވެރިޔާއެވެ.

ހަމައެކަނި މިއީ އޭނާގެ ހައިސިއްޔަތެއް ނޫނެވެ. ޝިޢައީ ސިޔާސީ ފަލްސަފާގެ މައްޗަށް ބިނާކޮށްފައިވާ އީރާނުގެ ޤާނޫނުއަސާސީ ބުނާ ގޮތުން އީރާނުގެ އެންމެ މަތީ ލީޑަރަކީ މުސްލިމުންގެ އިމާމެވެ. އަދި އޭނާއަށް ދީނީ ފަތުވާދިނުމުގެ ހައްގުވެސް ވަނީ ލިބިދީފައެވެ.

އާޔަތުﷲ ޢަލީ ޚަމަނާއީއަކީ ވަރަށް ދީންވެރި ޢިލްމުވެރި ތަޤުވާވެރި ބޭފުޅެކެވެ. ދުނިޔޭ އިސްލާމީ ބައެއް ލީޑަރުން ޞުލްޙަކުރެއްވުމަށް ޓަކައި ވެސް އެ މަނިކުފާނު ވަނީ ކާމިޔާބު މަސައްކަތްޕުޅުތަކެއް ކުރައްވައިފައެވެ. އެ މަނިކުފާނަކީ އީރާނުގެ ކުރީގެ ލީޑަރ އާޔަތުﷲ ޢަލީ ޚުމައިނީގެ އަރިހުގައި އިސްލާމީ އިންޤިލާބުގައި މުހިންމު ދައުރެއް އަދާކުރައްވައިފައިވާ ބޭފުޅެކެވެ. އަދި އީރާނު-ޢިރާޤު ހަނގުރާމަ ހިނގި ދުވަސްވަރު އީރާނުގެ ރައީސަކަށް ވެސް ހުންނެވީ އެ މަނިކުފާނެވެ. ޚަމަނާއީއަކީ އާދައިގެ ބޭފުޅެއް ނޫނެވެ. އެއީ އީރާނުގައި ދީނީ އަދި ސިޔާސީ ވަރުގަދަ ތަނބެކެވެ. އެހެންކަމުން ޚާމަނާއި ނެތުމުގެ ހުސްކަން އެއީ އީރާނަށް ފޫބެއްދޭނެ ހުސްކަމެއް ނޫނެވެ.

އެމެރިކާއާއި އިސްރާއީލުން ޚާމަނާއީ ޝަހީދުކޮށްލުމަށް ފަހު ވެސް އެ މީހުންގެ އަނިޔާވެރިކަމުގައި އަލައެއް ނުކެނޑުނެވެ. މިހާރު އިންޒާރުދެމެން ގެންދަނީ ދުވަހަކު ވެސް ނުދޭ ވަރުގެ ބާރުގަދަ ޙަމަލާއެއްދީ އީރާނު ފުނޑުފުނޑުކޮށްލާނެކަމަށެވެ.

އަނެއްކޮޅުން އިސްރާއީލުގެ ދިފާޢީ ވަޒީރުވަނީ ޚާމަނާއީ ޝަހީދުވުން އެއީ ބޮޑު ޢިދެއްކަމަށް ހަދައި މުނާސަބަތު ފާހަގަކޮށްފައެވެ. އަދި ނަތަންޔާހޫއާއި އެ ގައުމުގެ އަސްކަރީ ބާރުތަކަށް ތަހުނިޔާ ކިޔައިފައެވެ. [އިސްރާއީލު ހަލާކުކޮށްލާން އުޅުނު މީހާ ހަލާކުވެއްޖެ.] އެލްސްގައި ކާޓްޒް ކުރި މެސެޖެއްގައި ބުނެފައި ވެއެވެ. އަދި ފުރހަމަ ބާރާ އެކު ޙަމަލާ ކުރިއަށް ގެންދާނެކަމަށް ވެސް އޭނާ ބުނެފައިވެއެވެ.

ނަމަވެސް ކުރީން ހީކުރެވުނު ގޮތާ ޚިލާފަށް ޢަލީ ޚާމަނާއީ ޝަހީދުކޮށްލެވުނަސް އަދި އީރާނުގެ ވެރިކަމުގެ ނިޒާމު ބަދަލެއް ނުކުރެވުނެވެ.

އީރާނުގެ ސުޕްރީމްނޭޝަނަލް ސެކިޔުރިޓީ ކައުންސިލްގެ ސެކްރެޓަރީ ޢަލީ ލަރިޖާނީ ވިދާޅުވެފައިވަނީ މި ޚުޠޫރަތްތެރި ދަނޑިވަޅުގައި އީރާނު ދެބައިކޮށްލާން އިސްރާއީލުން އެބަ މަސައްކަތްކުރާކަމަށެވެ. ނަމަވެސް އެ ފުރުޞަތު ނުދޭނެކަމަށާއި ނަމަވެސް އެބައިމީހުންގެ ދެމި އޮތުމަށް ޓަކައި ބޮޑެތި ގައުމުތައް ކުދިކޮށް ފޮތިފޮތކޮށްލުމަކީ އިއސްރާއީލުގެ ސިޔާސަތެއްކަމަށް ވެސް އޭނާ ވިދާޅުވިއެވެ.

[އެމެރިކާއާއި ޞަހުޔޫނީން އީރާނުގެ ޤައުމީ ހިތް އަންދައިލައިފިއެވެ. އަހަރެމެން ވެސް އެބައިމީހުންގެ ހިތްތައް އަންދައިލާނަމެވެ.] އެނާ އިތުރުކޮށްލެއްވިއެވެ.