(ބޯ) ފެނަކީ އިންސާނާގެ ހަށިގަނޑަށް ބޭނުންވާ އެންމެ އަސާސީ އެއް މާއްދާއެވެ. ފެނުގެ ސަބަބުން ކާތަކެތި ހަޖަމުކުރާން ފަސޭހަވެއެވެ. އަދި ހަށިގަނޑުގައި (ގޮހޮރުގައި) އުފެދޭ ވިހަކަމާއި ކުނިބުނި ސާފުކޮށްދިނުމަށް އެހީތެރިވެދެއެވެ.. 

ފެނަކީ ހަމައެކަނި އިންސާނާގެ ހަށިގަނޑަށް އެންމެ ބޭނުންތެރި ނުވަތަ އަސަސީ އެއްޗެއް ނޫނެވެ. އެހެނަސް އެއީ ހަށިގަނޑަށް އެންމެ ފައިދާ ހުރި މާއްދާ ވެސް މެއެވެ. ސިނކުޑިއަކީ 85 އިންސައްތަ ފެނުން ވާ ގުނަވަނެކެވެ. މަސްގަނޑަކީ 75 އިންސައްތަ ފެނުންވާ އެއްޗެކެވެ. އަދި ކަށިގަނޑުގައި 22 އިންސައްތައަށް ފެން އެކުލެވިގެން ވެއެވެ. އެހެންކަމުން ތިމާގެ ހަށިގަނޑަށް ބޭނުންވާ މިންވަރަށް ފެން ލިބިދިނުމަކީ ތިމާގެ ޞިއްޙަތަށް އެންމެ ފައިދާ ހުރި ގޮތެވެ.

ތިބާގެ ހަށިގަނޑަށް ބޭނުންވާ މިންވަރަށް ފެން ބޮވޭ ހެއްޔެވެ؟ ކަރުހިއްކައިގަތުމަކީ އިންސާނާގެ ހަށިގަނޑަށް ފެން ބޭނުންވެއްޖެކަން ދެނެ ގަނެވޭނެ އޮތް ހަމައެކަނި ގޮތެއް ނޫނެވެ. ތިމާގެ ހަށިގަނޑަށް ފެން (އިތުރަށް) ބޭނުންވާކަން ދެނެގަނެވޭނެ ތަފާތު ޢަލާމާތްތައް ވެއެވެ. މީގެ ތެރޭގައި:-

- ބޮލުގައި ރިއްސުން ނުވަތަ ބޯއެނބުރުން.

- ބަނޑުހައިވުން.

- ވަރުދެރަވުން ނުވަތަ މާބޮޑަށް ވަރުބަލިވުން.

- ކުޑަކަމުދާ ނަޖިހުގައި ކުލަގަދަ ވެފައި، ގަދަޔަށް ވަސްދުވުން.

- ބަނޑު ހަރުވުން، މި ފަދަ އެތައް ޢަލާމާތަތލެއް ވެއެވެ.

ހަށިގަނޑަށް ބޭނުންވާ މިންވަރަށް ފެން ނުބޮވޭ ނަމަ، ހަށިގަނޑަށް ދިމާވާ ބޮޑެތި މައްސަލަތަކުގެ ތެރޭގައި، ކިޑްނީގައި ހިލަ އުފެދުން، ޢުމުރަށް ވުރެ ތިމާގެ ބުރުސޫރަޔާ ހަށިގަނޑުން މުސްކުޅިކަމަށް ދެއްކުން، ލޭ މައްޗަށް ދިއުން، ހަޖަމުކުރުމުގެ މައްސަލަތައް ދިމާވުން، ތަފާތު ވައްތަރުވައްތަރުގެ ކެންސަރުޖެހުން، ޑިޕްރެޝަން އަދި ފިކުރު ބޮޑުވެ ކަންބޮޑުވުން ހިމެނެއެވެ. ކިޑްނީގައި ހިލައުފެދުން ފިޔަވައި ދެން ބަޔާން ކުރެވުނު ކަންތައްތަކަކީ (ހަމައެކަނި ބޭނުންވާ މިންވަރަށް) ފެން ނުބުއިމުން ދިމާވާ ކަންތައްތަކެއް ނޫނެވެ. އެހެނެސް ބޭނުންވާ މިންވަރަށް ފެން ނުބޯ ނަމަ، (އެހެން ސަބަބަކާ ހުރެ މިކަންތައްތައް ދިމާ ވިޔަސް،) މި ކަންތައްތައް ބޮޑަށް ގޯސް ވެއެވެ. އެހެނީ ހަށިގަނޑުގައި އުފެދޭ ކޮންމެ ބަޔޯކެމިކަލް ރިއެކްޝަނެއް ހެން ބިނާވެގެންވަނީ ފެނުގެ މައްޗަށެވެ. ތިމާގެ ހަށިގަނޑަށް ބޭނުންވަނީ ކިހައި ފެނެއްހެއްޔެވެ؟ ހަށިގަނޑަށް ފެން ބޭނުންވާ މިންވަރު އެކި މީހުންނަށް ތަފާތު ވެގެން ވެއެވެ. އަދި ޢުމުރާއި ކެއިން ބުއިމަށް ބޭނުންކުރާ ތަކެއްޗާއި ދިރިއުޅުމުގެ ކަންތައްތައް ހުންނަ ގޮތުން، ފެން ބޭނުންވާ މިންވަރު ތަފާތު ވެގެން ދެއެވެ. އެވްރެޖްކޮށް ކޮންމެ ދުވަހަކުވެސް އަށްތަށިފެން ނުވަތަ ފެން އެކުލެވޭ ދިޔާ ބުއިން ބޯންވާނެއެވެ.

ހަށިގަނޑަށް ބޭނުންވާ ފެނުގެ 19 އިންސައްތަ އަހަރުމެން ކައި ހަދާ ތަކެތީން ލިބިދެއެވެ. އެންމެ ގިނަ ޢަދަދަކަށް ފެން އެކުލެވިގެންވަނީ ތަޒާ މޭވާޔާއި ތަރުކާރީ ފަދަ ތަކެތީގައެވެ. އެހެންކަމުން ގިނައިން މޭވާޔާއި ތަރުކާރީ ކެއި ވަރަކަށް ހަށިގަނޑަށް ގިނަ ފެން ލިބިދޭނެއެވެ. އަނެއް ކޮޅުން ބަލާ އިރު ގިނަ ޢަދަދަކަށް ހަކުރު އެކުލެވިގެންވާ ކާނާ ކެއުމަކީ ހަށިގަނޑަށް އިތުރު ފެންބޭނުންވާނެ ކަމެވެ. އެއީ ހަށިގަނޑަށް އިތުރުވާ ހަކުރާ އެކުވެ ދިޔާކޮށްދިނުމަށާއި އެ ހަކުރު ލޭގެ ތެރެއަށް ފޮނުވާދިނުމަށް އެހީތެރިވުމަށެވެ. ދިރާސާތަކުން ދައްކާ ގޮތުގައި ދޭތެރެ ދިގުކޮށް (ފެން ނުބޮއި ގިނަ ވަގުތު ހޭދަކުރުމަށް ފަހު) ގިނައިން ފެންބުއިމަށް ވުރެ، އަވަސް އަވަހަށް މަދު މިންވަރަކަށް ފެން ބުއިމުން، ހަށިގަނޑުގައި ގިނަ ވަގުތު ފެން (ހަރުލައި) ހުރުމަށް އެހީތެރިވެދެއެވެ. ގިނަ ޢަދަދަކަށް ހަކުރު އެކުލެވޭ ބުއިމެއްގެ ގޮތުގައި ފެން ބޯ ނަމަ ހަށިގަނޑުގައި ފެން ހަރުލައިފައި ހުންނަ ވަގުތު މަދުވެއެވެ. ތިބާ ގިނައިން، ނުވަތަ ހަށިގަނޑަށް ބޭނުންވާ މިންވަރަށް ފެން ބޯން ބޭނުން ނަމަ، ކޮންމެ ދުވަހަކު ވެސް ހެނދުނު އެންމެ ފުރަތަމަ ފެންތައްޓެއް ބޮއިލާށެވެ. ދެން ހާރބަލް ސައިތައްޓެއް ނުވަތަ ތާޒާ މިންޓް ނުވަތަ ލުނބޯ ނުވަތަ އިނގުރު އަޅައިގެން ފެން ބޯށެވެ. ތިމާއަކީ ފެން ބުއިމަށް އާދަވެއި ހުންނަ މީހެއް ނޫން ނަމަ، ކޮންމެ ދުވަހަކު ތިމާ ބޯ ޖޫހެއް ނުވަތަ އެހެންވެސް ބާވަތެއްގެ ބުއިމެއްގެ ބަދަލުގައި ފެންތައްޓެއް ބުއިމަށް ފަރިތަކުރާށެވެ. އަދި ދުވަސްތައް ފައިތުވާ ވަރަކަށް ފެން ބޯމިންވަރު އިތުރު ކުރާން މަސައްކަތްކުރާށެވެ. އަދި ތިމާގެ ކުޑަ ކަމުދާ ނަޖިސް ހުންނަނީ ކިހިނެއް (ކުލަދަކޮށް ވަސް ގަދަކޮށް، ނުވަތަ ކުލަ މަޑުކޮށް ވަސް މަޑުކޮށް)ތޯ ބަލާށެވެ. ހަށިގަނޑަށް ބޭނުންވާ މިންވަރަށް ފެން ބޯނަމަ ކުޑަ ކަމުދާ ނަޖިސް ހުންނަން ޖެހޭނީ ކުލަމަޑުކޮށް އަދި ވަސް ވެސް މަޑުކޮށެވެ.

ފެންބުއިމަކީ ޚާއްޞަކޮށް މި ރޯދަމަހު އިތުރަށް ސަމާލުކަން ދޭން ޖެހޭނޭ ކަމެކެވެ. ރޯދަވީއްލާ ވަގުތުން ފެށިގެން ހާރުކެއުމާ ދެމެދު ދޭތެރެ ދުރުނުކޮށް ފެން ބޯން އާދަކުރުން މުހިންމެވެ. މަދުވެގެން އާދައިގެ ބިއްލޫރިތަށީގެ އަށް ތަށި ފެން ބުއިމަކީ ވަރަށް މުހިންމު ކަމެކެވެ. އޭރުން ދުވާލު ރޯދައަށް ހުންނަ އިރު ކަރުހިއްކުން ވެސް ކުޑަކޮށްދޭނެއެވެ. އަދި ޞިއްޙީ ވަރަށް ގިނަ މައްސަލަތަކުން އޭރުން ސަލާމަތްވާނެއެވެ.