ބަރަކާތްތެރި ރަމަޟާން މަހު ކެއުމުގެ ކަންތައް ބަހައްޓާންޖެހޭ އެންމެ ޞިއްޙީ ގޮތަކީ އަދި ދީނީ ގޮތުން ވެސް އެކަށިގެންވާ ގޮތަކީ ކޮބައިތޯ ބަލައިލާން ޖެހެއެވެ. ރޯދަމަހަކީ ކެއުން ގިނަ ކުރުމުގެ ބަދަލުގައި ކެއުން މަދުކުރާން ޖެހޭ މަހެއްކަން އަޅުގަނޑުމެން ހަނދާނެއް ނުހުރެއެވެ. ޞިއްޙީ މާހިރުން ޚާއްޞަކޮށް ކަނާދުވާރުން ބަޔާންކުރާ ގޮތުގައި ރޯދަމަހު ގެންގުޅޭންޖެހޭނީ މިންހަމަ ތަވާޒުނު ކެއުމެކެވެ. އެއީ ފައިބަރާއި ޕްރޮޓީނާއި މުއައްގަދު ކާބޯހައިޑްރޭޓުސް ހިމެނޭ ކެއުމެކެވެ. ރޯދަވީއްލުމުން ފެށިގެން ހާރު ކެއުމާ ދެމެދު ހަށިގަނޑަށް ބުރަނުވާ ގޮތަކަށް ކެއުމުގެ ކަންތައް އިންތިޒާމުކޮށްލާންޖެހޭނެއެވެ. ހަށިގަނޑަށް ބޭނުންވާ ފެން ހަމައަށް ލިއްބައިދޭން ސަމާލުވާން ޖެހޭނެއެވެ. ތެއްލި އެއްޗިއްސާއި ފޮނިގަދަ ތަކެއްޗާއި ލޮނުގަދަ ކެއުމުން ދުރުހެލިވާންޖެހޭނެއެވެ.

ރޯދަވީއްލާން އެންމެ ރަނގަޅީ ކަދުރުންނެވެ. ތިން އޮށްކަދުރު ފުދޭނެއެވެ. ނުވަތަ ފިނިނުކުރާ ފެންފޮދަކުން ވެސް ރޯދަވީއްލިދާނެއެވެ. އަދި ލަސްލަހުން ކާން ސަމާލުވާން ޖެހޭނެއެވެ. ތެއްލި ކާތަކެތީގެ ބަދަލުގައި ފިހުނު ނުވަތަ އުއްސައިފައި ހުންނަ ކާނާއަށް އިސްކަންދޭންޖެހޭނެއެވެ. މި ގޮތުގެ މަތީން ކާ އިރު ކެއުން ބަހައްޓާން ޖެހޭ ގޮތަށް ތަންކޮޅެއް ތަފުސީލުކޮށް ބަލައިލާނަމެވެ.

ރޯދަވިއްލުން (އިފުތާރު)

ލުއި ކެއުމަކުން ފަށާށެވެ! އެއީ ދެތިން ކަދުރު އޮށާކާއި ފެންފޮދެކެވެ. ނުވަތަ ލުއި ސުރުވާ ވެސް ބޮވިދާނެއެވެ. އެއީ ހަށިގަނޑަށް ހަކަތަ ލިއްބައިދިނުމަށް ޓަކައެވެ. ނަމަވެސް ބަނޑު ފުރެންދެން ކައިގެންނެއް ނުވާނެއެވެ. ކާންޖެހޭނީ ބަނޑުފުރާކަށް ނޫނެވެ. ހައި ފިލުވައިލާށެވެ.

މިންހަމަ ކަނާދު ކެއުން: [ކާލު – ކާލު – ދެބައިކުޅައެއްބައި] ތަރީގާ ބޭނުންކުރާށެވެ! އެއީ ¼ ޕްރޮޓީން (މަސް، ކުކުޅު، ތޮޅި އޮށް)، ¼ ގޮވާން، އޯޓުސް ފަދަ ތަކެތި، ½ ތަރުކާރީ އާއި މޭވާ

ގިނައިން ނުކެއުން: މާ ގިނައިން ނުކާށެވެ! އަދި ކާންވާނީ ލަސްލަހުން މަދުމަދުންނެވެ. ނަމާދު ވަގުތުތަކަށް މެދުކަނޑައިލާށެވެ! އޭރުން ބަނޑުހައިކަން ކެނޑި ހަށިގަނޑަށް ބޭނުންވާ ވަރަށް ކެވިއްޖެކަން އިޙުސާސްކުރެވޭނެއެވެ.

ކާބޯތަކެތި ތައްޔާރުކުރުމުގެ ތަރީގާ: ގަދަޔަށް ތަކެތި ތެއްލުމުގެ ބަދަލުގައި ފިހާށާއި އުއްސާން ސަމާލުކަން ދޭށެވެ!

ހާރުކެއުން (ސުހޫރު)

ހާރުކެއުން ދޫކޮށްނުލާށެވެ! ހާރުކެއުން ވީހައި ބޮޑަކަށް ފަޖުރާ ކައިރިވަންދެން ލަސްކޮށްލާށެވެ! މިއީ މުޅި ދުވާލު ހަށިގަނޑަށް ބޭނުންވާ ހަކަތަ ލިއްބައިދޭ ކެއުމެކެވެ. ސުންނަތްކަން ގަދަވެގެންވާ ކަމެކެވެ.

ލަހުން ހަޖަމުވާ ބާވަތުގެ ކާތަކެތި: އޯޓުސް ކަހަލަ ފައިބަރު ގިނަ ކާނާއާއި މުށިކުލައިގެ ޕާނާއި މޭވާ ފަދަ ތަކެއްޗަށް އިސްކަންދޭށެވެ! މި ބާވަތުގެ ކާނާއިން ހަށިގަނޑަށް ބޭނުންވާ ހަކަތަ ލިއްބައިދޭނީ ލަސްލަހުންނެވެ.

ޕްރޮޓީން ލބޭ ކަހަލަ ކާނައަށް ވެސް ކޮންމެވސް ވަރަކަށް ސަމާލުކަން ދޭށެވެ! ބިހާއި ކިރާއި (ޔޯގަޓާއި ޗީޒް) ފަދަ ބާވަތްތަކާއި އެކި ބާވަތުގެ މަދު ވެސް ކެއުމުގައި ހިމަނާންވާނެއެވެ.

ހަށިގަނޑަށް ބޭނުންވާ ފެން ލިއްބައިދިނުން: ގިނައިން ފެނާއި ދިޔާ ތަކެތި ބޯންޖެހޭނެއެވެ. ނަމަވެސް ކޮފީއާއި ކެފެއިން ހުންނަ ބާވަތުގެ ދިޔާ ތަކެތި ވީވަރަކުން ނުބުއިން އެދެވިގެންވެއެވެ. އޭގެ ސަބަބުން ފެން މަދުކޮށްދޭނެތީއެވެ.

އާންމު އިރުޝާދެއް:

ހަށިގަނޑަށް ބޭނުންވާ ފެން ލިއްބައިދިނުމުގެ އިސްތިރާޖު: ރޯދަވީއްލުމުން ފެށިގެން ހާރުދަމާ ދެމެދު މަދުވެގެން އަށް ތަށި ފެން ބުއިން ރަނގަޅެވެ. އޭރުން ދުވާލު ހަށިގަނޑުން ފެން މަދުވުމުން ރައްކާތެރިކޮށްދޭނެއެވެ.

ލޮނާއި ހަކުރު ހުދޫދުކުރުން: ވީ ވަރަކުން ލޮނުގެ ބައި މަދުކުރާށެވެ! އަދި އެއްގަމު މަހުގެ ބާވަތްތަކުން ހަދައިފައި ހުންނަ ކާނާގެ ބާވަތްތައް ވެސް ވީ ވަރަކުން މަދުކުރާށެވެ! އަދި މެޓާ ފަދަ ފޮނިގަދަ ތަކެއްޗާ ވެސް ދުރުހެލިވާން ޖެހޭނެއެވެ. އެހެން ނޫނީ، ކަރުހިއްކުމާ ކުރިމަތިލާން ޖެހޭނެއެވެ. އަދި ފަލަވުމަށް ވެސް މަގު ފަހިވާނެއެވެ.

ޙަރަކާތްތެރި ދިރިއުޅުމުގެ ވައްޓަފާޅި: ލުއި ކަސްރަތުކުރާން ވެސް ސަމާލުކަންދޭން ޖެހޭނެއެވެ. ޚާއްޞަކޮށް ކައިގެން ހިންގައިލުމަކީ އެދެވިގެންވާ ކަމެކެވެ.

މި ގޮތަށް ރޯދަމަހުގެ ކެއުން ބައްޓަންކުރެވިއްޖެ ނަމަ، ސުންނަތަށް ވެސް އަދި ޞިއްހަތަށް ވެސް ސަމާލުކަންދެވުނީއެވެ.

ބައެއް ލަފުޒުގެ މާނަ:

ކަނާދު      ނ.    ދިރުންހުރި ކޮންމެ އެއްޗެއްގެ ދިރުން ދެމެހެއްޓުމަށާއި ހެދިބޮޑުވުމަށާއި ގުނަވަންތައް މަސައްކަތްކުރުމަށް ބޭނުންވާ ކާނާގެ އެންމެހައި އުންސުރު. nutrients

ކާލު         ނ.    ހަތަރުބައިކުޅަ އެއްބައި.  quarter

އިސްތިރާޖު    ނ.    ލަނޑުދަނޑިއެއް ހާސިލުކުރުމަށް ރާވާ ރޭވުން ނުވަތަ ބޭނުންކުރާ ހިކުމަތް.   strategy

އުއްސުން    މ.    (1) އާވީން ކެއްކުން. (2) ހަނޑުލުފުށް ނުވަތަ ގޮނދަންފުށް މޮޑެފައި އެފުށްގަނޑު އާވީން ނޫނީ ފެނުކައްކައިގެން ހިސާބަކަށް ރޯފިލުވުން. steam

ފަޖުރު      ނ.    ފަތިސްވަގުތުވަމުން އަންނައިރު އިރުމަތިފަރާތު އުދަރެހުން އަރާ ދޮންކުލަ. ފަތިހުގެ އަލި. dawn

ތަވާޒުނު     ނ.    ވަކި ކޮޅަކަށް ނުވަތަ ވަކި އަތަކަށް ބުރަނުވެ ހަމައަށް ހުންނަ ހުރުން ނުވަތަ އޮންނަ އޮތުން. balance

ތަރީގާ      ނ.    ކަމެއް ކުރުމުގެ މަގު ނުވަތަ ގޮތް. method