(2026 ސެޕްޓެންބަރު 06ވަނަ ދުވަހުގެ ޢަދަދާ ގުޅޭ)

"އިބްރާހީމް! އަހަރެންގެ ފައި ކަނޑައިގެން ހިނގައްޖެ!" މަރިޔަމްގެ ކުއްލި ހަޅޭކުގެ އަޑާއެކު އިބްރާހީމް މާޒީގެ ޚިޔާލުތަކުން ހޭލައިގަތެވެ.

މަރިޔަމް ހުރީ ތިރިވެ، އޭނާގެ ފައިތިލައިގައި އަތްއަޅައިގެންނެވެ. ކަށިގަހެއްގައި އަޅައިގަނެ، އޭނާގެ ފައިން ގަދަޔަށް ލޭ އޮހެމުންދިޔައެވެ. ޖަންގަލީގެ ތެރެއިން ފުލުހުންގެ ބައްތިތަކުގެ އަލި އެ މީހުންނާ ދާދި ކައިރިއަށް ފޯރަމުންދިޔައެވެ. އިބްރާހީމް އެއްވެސް ޖެހިލުމެއް ނެތި މަރިޔަމް އޭނާގެ އަތްދަނޑިމައްޗަށް އުފުލައިލިއެވެ. އަދި ހުރި ބާރެއްލައިފައި އަތިރިމައްޗާ ދިމާއަށް ދުއްވައިގަތެވެ.

ގަސްތަކުގެ ތެރެއިން ނިކުމެ، އަތިރިމަތީގެ ދޮން ވެލިގަނޑަށް ފިޔަވަޅު އެޅުނު ވަގުތު، ރާޅުތަކުގެ ތެރޭގައި އޮތް ކުޑަ ޑިންގީ އިބްރާހީމަށް ފެނުނެވެ. ނަމަވެސް، އެ ޑިންގީގެ ކައިރީގައި، ކަޅު ކޯޓެއްލައިގެން، އަތަށް ފިސްތޯލައެއް ހެޔޮވަރުކޮށްލައިގެން ހުރި ބިޔަ ސޫރައެއް ފެނުމުން އިބްރާހީމްގެ ފިޔަވަޅުތައް ގަނޑުވިއެވެ.

އެއީ އަމްޖަދެއް ނޫނެވެ. އެއީ މުޅިން އެހެން ނުރައްކާތެރި މީހެކެވެ!

މަރިޔަމްގެ ޝައްކުތައް

ކަޅު ކޯޓެއްލައިގެން ހަތިޔާރާއެކު ހުރި ބިރުވެރި ސޫރައަށް ބަލަހައްޓައިގެން ހުރިއިރު، މަރިޔަމްގެ ސިކުނޑީގައި އެނބުރެމުން ދިޔައީ ބިންގަރާހުގެ ހަނި ކޮޓަރީގައި ހޭދަކުރި ދުވަސްތަކުގެ ހިތްދަތި ހަނދާންތަކެވެ. އެއީ އޭނާގެ ހިތުގައި ފިރިމީހާއާ މެދު ނުތަނަވަސްކަމާއި ޝައްކުގެ އޮށްތައް އިންދުނު ދުވަސްތަކެވެ. އިބްރާހީމަކީ ކުށްވެރިއެއް ނޫންނަމަވެސް މަރްޔަމްގެ ހިތުގައި ވަސްވާސްތައް އުފެދޭން ފެށީ އުޅޭން ޖެހުނުގޮތުންނެވެ.

ބިންގަރާހުގައި އުޅުނުއިރު، އާދަމްގެ އުޅުމަށް އައިސްފައިވާ ބަދަލުތައް މަރިޔަމްގެ ދެ ލޮލަށް ސިއްރެއް ނުވެއެވެ. އާދަމް އަބަދުވެސް އިންނަނީ ކޮންމެވެސް ބޮޑު ކަމަކަށް ފާރަވެރިވެ، ބިރުން ސިއްސައިގެންދާ ހާލެއްގައެވެ. ކުޑަ އަޑަކަށް ވެސް އޭނާ މޭގައި އަތްއަޅާލައެވެ. އެއީ ސަރުކާރުގެ ސިއްރު މިޝަނެއްގައި އުޅޭ މީހެއްގެ މޫނުމަތީން ފެންނާނެ ފަދަ ސާބިތުކަމެއް ނޫނެވެ. އެއީ ކޮންމެވެސް ބޮޑު ކުށަކުން ސަލާމަތްނުވެވި، ފިލައިގެން އުޅޭ ކުށްވެރިއެއްގެ ސިފައެވެ.

މަރިޔަމްގެ ޝައްކުތައް އިތުރުވީ އެއް ދުވަހަކު އާދަމް ނިދައިފައި އޮއްވައި، އޭނާގެ ދަބަސް ތެރެއިން ފެނުނު ސިއްރު ލިޔެކިޔުންތަކެއްގެ ސަބަބުންނެވެ. އޭގެ ތެރޭގައި ހުރީ މީގެ ވިހި އަހަރު ކުރީގެ ކޯޓު އަމުރުތަކަކާއި، ނޫސްތަކުގެ ބައެއް ކަރުދާސްކޮޅުތަކެވެ. އެ ނޫސްތަކުގައި ވަނީ ރަށުގެ ބޮޑު ވިޔަފާރިވެރިއަކު މަރައިލި ހާދިސާގެ ޚަބަރުތަކެވެ. އެ ޚަބަރުތަކުގައިވާ ފޮޓޯއިން ފެންނަނީ "އިބްރާހީމް ނަސީމް" ކިޔާ މީހެކެވެ. އެ ފޮޓޯއާ އާދަމްގެ ހަށިގަނޑުގެ ބައްޓަމާ ހުރި އެއްގޮތްކަން ފެނި، މަރިޔަމްގެ ހިތް ތެޅިލިއެވެ.

[އޭނާ އަހަންނަށް އެ ދެއްކީ ކޮންފަދަ ބޮޑު ކެހިވެރިކަމެއް ހެއްޔެވެ؟] މަރިޔަމް އަމިއްލަ ނަފްސާ ސުވާލުކުރިއެވެ. ނަމަވެސް، އޭނާ އެ ޝައްކުތައް ހިތުގެ ފުންމިނުގައި ފޮރުވައިގެން ހުރީ އާދަމް ދެކެވާ ތެދުވެރި ލޯތްބެއްގެ ސަބަބުންނެވެ. އޭނާ ބޭނުންވީ އާދަމްގެ ދުލުން އަމިއްލައަށް އެ ހަގީގަތް ކިޔައިދޭނެ ދުވަހަކަށެވެ. ރޭގައި މާސްކު ނެގި ވަގުތަކީ އެ ހުރިހާ ޝައްކުތަކެއް ހަގީގަތަކަށް ބަދަލުވެ، އޭނާގެ މުޅި ދުނިޔެ ސުންނާފަތިވި ވަގުތެވެ.

[މަރީ... ހާސްނުވޭ.] އިބްރާހީމް މަރިޔަމްގެ ކަންފަތް ކައިރީގައި މަޑުމަޑުން ބުނެލިއެވެ. އޭނާ މަރިޔަމް ވެލިގަނޑުމަތީގައި ބޭންދުމަށް ފަހު، ކުރިއަށް ފިޔަވަޅެއް އެޅިއެވެ.

ޑިންގީ ކައިރީގައި ހުރި ބިޔަ ސޫރަ މަޑުމަޑުން ކުރިއަށް ހިނގައިގަތެވެ. އަތިރިމައްޗަށް ވެރިވެފައި އޮތް ފަނޑު ހަނދުގެ ހަނދުވަރުގެ އަލީން އެ މީހާގެ މޫނު ފާޅުވިއެވެ. އެއީ އަމްޖަދުގެ ދަށުން މަސައްކަތްކުރާ، ނަމަވެސް އަމްޖަދުގެ ކޮރަޕްޝަނާ މެދު އަބަދުވެސް ޝައްކުކުރާ ޒުވާން، ހަރުދަނާ ފުލުސް އޮފިސަރު ނާއިލެވެ!

ނާއިލް އޭނާގެ އަތުގައި އޮތް ފިސްތޯލަ ތިރިކޮށްލިއެވެ. [އިބްރާހީމް ނަސީމް... ކަލޭ ފިލާން އުޅޭނެ ކަމެއް ނެތް. އަހަރެން މިތަނަށް މިއައީ ކަލޭ ހައްޔަރުކުރާކަށް ނޫން. އަހަންނަށް އެނގޭ ކަލެއަކީ ކުށްވެރިއެއް ނޫންކަން. އަހަރެން ބޭނުންވަނީ އަމްޖަދުގެ އަސްލު ސޫރަ މުޅި ދުނިޔެއަށް ބޭޒާރުކޮށްލަން. އަހަންނަށް އެހީވޭ!]

އިބްރާހީމްގެ ދެލޯ ބޮޑުވިއެވެ. ފުލުހުންގެ ތެރޭގައި އޭނާގެ ހަގީގަތް އެނގޭ، އަދި އޭނާއަށް އެހީވާން ބޭނުންވާ މީހަކު ހުރެދާނެކަމަކަށް އޭނާ ހީއެއް ނުކުރެއެވެ. ނަމަވެސް، އެ ވަގުތު ޖަންގަލީގެ ތެރެއިން ބަޑީގެ ބާރު އަޑެއް އިވިގެންދިޔައެވެ.

"ބަންގް"

ޝާހިދަށް އައި އިންޒާރު

ޖަންގަލީގެ ތެރެއިން ގޮވި ބަޑީގެ ގަދަ އަޑާއެކު، އަތިރިމަތީގައި ތިބި ދޫނިތައް ހާލިތަކުން އުދުއްސައިގަތީ ބިރުވެރި ހަޅޭކަކާ އެކީގައެވެ. އޮފިސަރު ނާއިލް ވަގުތުން ފަސް އެނބުރި ޖަންގަލީގެ ކަޅު އަނދިރިގަނޑާ ދިމާއަށް ބަޑި ދިއްކުރިއެވެ. އިބްރާހީމް ވިސްނުންތެރިކަމާ އެކު މަރިޔަމް ގޮވައިގެން ޑިންގީގެ ފުރަގަހަށް ތިރިވިއެވެ. ނަމަވެސް، އެ ބަޑީގެ އަޑަކީ އެ މީހުންނާ ދިމާއަށް ޖެހި ބަޑިއެއް ނޫނެވެ. އެއީ ޖަންގަލީގެ މާ އެތެރެއިން، ރަށުގެ މީހުން އުޅޭ ހިސާބާ ކައިރިން އިވުނު އަޑެކެވެ.

އެ ވަގުތު، މުޅިން އެހެން ދިމާއެއްގައި، އަމިއްލަ ކޮޓަރީގެ ހޫނު މާހައުލުގައި އިން ޝާހިދުގެ ހިތް ވަނީ ނާމާން ބިރުވެރިކަމެއްގެ ތެރޭގައެވެ. އޭނާގެ ފޯނަށް އައި ސިއްރު މެސެޖު ކިޔައިފައި، އޭނާގެ ސިކުޑިއަށް ނުރައްކާތެރި ސިގްނަލެއް ދެމުންދާ ކަހަލައެވެ.

"އަމްޖަދަށް އެ ފެނިއްޖެއްޔާ ކަލޭ ދުނިޔޭގައި ހުންނާނެ އެންމެ ފަހު ރެޔަށް އެ ރޭ ވާނެ!" އެ ބަސްތައް އޭނާގެ ކަންފަތް ދޮށުގައި އިންޒާރުދެމުން ދިޔައެވެ.

ޝާހިދު މޭޒުމަތީގައި އޮތް ސިލިކޯން މާސްކަށް ބަލައިލިއެވެ. އޭނާއަށް ކުރެވެމުންދިޔައީ ކުށްވެރިއެއްގެ އިހުސާސެވެ. އޭނާ ނެގި އެންމެ ފޮޓޯއަކުން، ރަށުގެ ހަމަހިމޭންކަން ގެއްލި، ބޮޑު ތޫފާނެއް މި އޮތީ އުފެދިފައެވެ. އޭނާ ލެޕްޓޮޕް ކުރިމަތީގައި އިށީނދެ، އެ ފޮޓޯ އަލުން ދިރާސާކުރާން ފެށިއެވެ. އޭނާ ބޭނުންވީ އަމްޖަދާ ބެހޭ ގޮތުން އެ މެސެޖުގައި އެ ބުނި ބަހުގެ ޙަޤީޤަތް ހޯދާށެވެ.

ކުއްލިއަކަށް، ކޮޓަރީގެ ބޭރުން ފިޔަވަޅެއްގެ އަޑު އިވުނެވެ. އެއީ މަންމަގެ ފިޔަވަޅުގެ އަޑެއް ނޫނެވެ. އެއީ ބަރު، ހަރުކަށި ފިޔަވަޅުތަކެކެވެ. ޝާހިދު ވަގުތުން ލެޕްޓޮޕް ލައްޕާލައި، މޭޒުމަތީގައި އޮތް މާސްކު ނަގައި ކައިރީގައި ހުރި ފޮތް ހަރުގަނޑުގެ ފުރަގަހަށް ކޮއްޕާލިއެވެ.

"ބަންގް! ބަންގް!"

މިފަހަރު އިވުނީ މަޑުމަޑު ޓަތްކެއް ނޫނެވެ. ކޮޓަރީގެ ބޭރު ދޮރުގައި މީހަކު ވަރަށް ބާރަށް ޖެހިގަތް އަޑެވެ. ޝާހިދު ހިތްހުއްޓޭ ފަދަ ހާލެއްގައި ގޮސް ދޮރު ހުޅުވައިލިއެވެ. ކުރިމަތީގައި ހުރީ ފުލުސް އޮފިސަރު އަމްޖަދެވެ. އޭނާގެ މޫނުމަތީން ފެންނަނީ ރުޅިވެރިކަމުގެ އިންތިހާއެވެ. އޭނާ ވަނީ ވާރެއާ ތެމި ފޯވެފައެވެ. ހިނދުކޮޅެއްގެ ތެރޭގައި ޝާހިދު ކޮޓަރި ތެރެއަށް ކޮށްޕައިލުމަށް ފަހު އަމްޖަދު އެތެރެއަށް ވަދެ ދޮރު ތަޅުލިއެވެ.

"ކޮބާ އެ އެއްޗެހި؟" އަމްޖަދުގެ އަޑު ގުގުމައިގެންދިޔައެވެ. އޭނާ ޝާހިދުގެ ގަމީހުގެ ގިރުވާނުގައި ހިފައި ބާރުކޮށްލިއެވެ.

"ކޮން... ކޮން އެއްޗެއްތޯ އޮފިސަރު؟" ޝާހިދު ގަދަކަމުން ނޭވާލަމުން ބުންޏެވެ.

"އޮޅުވައިލާން ނޫޅޭ ބާޣީ! އިބްރާހީމް ނަސީމް ގުދަން ކައިރިން ފިލި އިރު، ކަލޭ އެ ތަނުގައި ހުރީމެއްނު؟ އޭނާ ވައްޓައިލައިފައި ދިޔަ ސިއްރު މާސްކު ކޮބާ؟ އަދި ކަލޭގެ އަތުގައި ހުރި ފޮޓޯތަކުގެ އަސްލު ކޮޕީ ކޮބާ؟" އަމްޖަދު އޭނާގެ ޖީބުން ފިސްތޯލަ ނަގައި ޝާހިދުގެ ނިތްކުރީގައި ޖެއްސިއެވެ. އެ ފިސްތޯލައިގެ ފިނިކަން ޝާހިދުގެ ސިކުނޑިއަށް ވާސިލްވުމާ އެކު، މަރުގެ ބިރުވެރިކަން އޭނާ ވަށައިލިއެވެ.

"އަޅުގަނޑު.... އަޅުގަނޑު އަތަކު އެއްވެސް އެއްޗެއް ނެތް." ޝާހިދު ދޮގުހެދިއެވެ. ނަމަވެސް އޭނާގެ ދެލޯ ކުއްލިއަކަށް ފޮތް ހަރުގަނޑާ ދިމާއަށް ދަތުރުކުރިއެވެ.

އަމްޖަދަކީ މަކަރުވެރި ޖާސޫސެކެވެ. އޭނާ ޝާހިދުގެ ނަޒަރު ހުއްޓުނު ދިމާ ވަގުތުން ދެނެގަތެވެ. އެ ވަގުތު ޝާހިދު ބިމަށް ވައްޓައިލުމަށް ފަހު، އަމްޖަދު ހަރުގަނޑާ ދިމާއަށް ގޮސް ފޮތްތައް އުކައިލިއެވެ. އަދި އޭގެ ފުރަގަހުން ސިލިކޯން މާސްކު ނެގިއެވެ. އަމްޖަދުގެ މޫނުމައްޗަށް ނުރައްކާތެރި ހިނިތުންވުމެއް ވެރިވިއެވެ.

[މިހިރީއެއްނު... ވިހި އަހަރުވީ މަގޭ ސިއްރު ފޮރުވައިދިން ހަތިޔާރު.] އަމްޖަދު މާސްކަށް ބަލަހައްޓައިގެން ހުރެ ބުންޏެވެ. އޭނާ އެނބުރި ޝާހިދާ ދިމާއަށް ބަލައިލިއެވެ. އޭނާގެ ދެލޮލުގައި ހުރީ މަކަރުވެރިކަމެވެ.

[ޝާހިދު... ކަލެއަށް މި މާސްކު ފެނުމަކީ ކަލޭގެ ނިމުން. ވިހި އަހަރު ކުރީން އެ ވިޔަފާރިވެރިޔާ މަރައިލީ މަގޭ އަމިއްލަ އަތުން. އެ ކަން އިބްރާހީމްގެ ބޮލުގައި އަޅުވައި، މި މާސްކު ދީފައި އޭނާ ފޮނުވައިލީ މަގޭ ސަލާމަތަށް. މިއަދު ކަލޭގެ ސަބަބުން އެ ހުރިހައި ކަމެއް ބޭޒާރުވާކަށް އަހަރެން ފުރުސަތެއް ނުދޭނަން.]

އަމްޖަދު ބަޑީގެ ކޮޅު ހިއްލައިލައި، ޝާހިދުގެ ބޮލަށް ބާރަށް ބަޑިޖެހިއެވެ. ޝާހިދުގެ ދެލޯ މެރި މުޅި ދުނިޔެ އަނދިރިވެގެން ބިމަށް ވެއްޓުނެވެ.

ޖަންގަލީގެ ހޯދުން

ޝާހިދުގެ ކޮޓަރީގެ ތަޅުންގަނޑުމަތީގައި އޭނާ ހޭނެތިފައި އޮތްއިރު، ބޮލުން އޮހެމުންދިޔަ ހޫނު ލޭގެ ތިކިތައް ދަމައިލި ރޮނގެއް ފަދައިން ތަޅުމަށް ފެތުރެމުންދިޔައެވެ. އަމްޖަދު ކާމިޔާބީގެ ނުރައްކާތެރި ހިނިތުންވުމަކާ އެކު، ސިލިކޯން މާސްކާއި ޝާހިދުގެ މެމޮރީ ކާޑު ޖީބަށްލައިގެން ކޮޓަރިން ނިކުމެ، ވިއްސާރައިގެ ތެރެއަށް ނިކުތެވެ. އޭނާގެ މިސްރާބު މިހާރު ހުރީ ސީދާ ޖަންގަލީގެ ތެރެއަށެވެ. އެނބުރި އަތިރިމައްޗަށް ގޮސް، އިބްރާހީމް ނަސީމްގެ ދޫ އަބަދުގެއަބަދަށް ބަންދުކޮށްލުމަށެވެ.

އެ ވަގުތު، ރަށުގެ މިދިލި ޖަންގަލީގެ ތެރޭގައި ފުލުހުންގެ ބޮޑު ފައުޖެއް ދިޔައީ ބައްތިތަކުގެ އަލީން މުޅި ސަރަހައްދު ފާސްކުރަމުންނެވެ. ގަސްތަކުގެ ފަތްތަކުގައި ވާރޭގެ ތިކިތައް ޖެހޭ އަޑާއި، ކަނޑުގެ ރާޅުތައް ގޮނޑުދޮށަށް ބާރަށް ޖެހޭ އަޑު ފިޔަވައި އިތުރު އަޑެއް މުޅި ސަރަހައްދަކު ނެތެވެ.

[އެޕްލާން-1 ގެ ހުރިހާ ސަރަހައްދެއް ބަންދުކުރޭ! އެއްވެސް ދިމާއަކުން މީހަކު ފެނިއްޖެއްޔާ ވަގުތުން ޝޫޓްކުރޭ!] ވޯކީޓޯކީން އިވެމުންދިޔައީ އަމްޖަދު ކުރީން ދީފައިވާ ހަރުކަށި އަމުރުތަކެވެ. ފުލުހުންނަށް ހީވެފައި އޮތީ އެ މީހުން މި ހޯދަނީ މީގެ ވިހި އަހަރު ކުރީން މީހަކު މަރައިލައިފައި ފިލައިގެން އުޅޭ ނުރައްކާތެރި ކުށްވެރިއެއްކަމަށެވެ.

ނަމަވެސް، ޖަންގަލީގެ ދެކުނު ފަރާތު އަތިރިމަތީގެ ހިމޭންކަމުގެ ތެރޭގައި، ޑިންގީގެ ނިވަލުގައި ތިބި އިބްރާހީމާއި މަރިޔަމްގެ ކުރިމަތީގައި ހުރި އޮފިސަރު ނާއިލް ހުރީ ސާބިތު ކަމާއެކީގައެވެ. އޭނާ ޖަންގަލީގެ ތެރެއިން އިވުނު ބަޑީގެ އަޑަށް ސަމާލުވެ، ކަންފަތް ދިށްކޮށްލިއެވެ.

"އިބްރާހީމް... އެ ބަޑީގެ އަޑަކީ އަމްޖަދު މި ސަރަހައްދަށް ކައިރިވަމުންދާކަމުގެ ނިޝާނެއް." ނާއިލްގެ އަޑުގައި ހުރީ ސީރިއަސްކަމެވެ.

"އޭނާ ފުލުހުންގެ މުޅި ޓީމު މި ދިމާއަށް އަނބުރައިލައިފި. އަހަރެމެންނަށް މި ތަނުން ސަލާމަތްވާން ލިބޭނީ މަދު މިނެޓުކޮޅެއް."

"އެކަމަކު އަހަރެމެން ދާނީ ކޮންތާކަށް؟" މަރިޔަމް ބިރުން ރޮމުން، އިބްރާހީމްގެ އަތުގައި ބާރަށް ހިފަހައްޓައިލިއެވެ.

"އޭނާ އަހަރެމެން މަރައިލާނެ!"

(ނުނިމޭ)