އަލްއުސްތާޒު ޢަބްދުލްޢަޒީޒު ޖަމާލު އަބޫބަކުރު
2 މާރިޗް 2026
މަރިޔަމް ޝަޣަފު: ޚިދުމަތުގެ ޔުނިފޯމުގައި އިނާމަކާ އެކު . . .
ގިނަ ފަހަރަށް ބައިނަލްއަގުވާމީ އިނާމެއް ލިބިއްޖެ ނަމަ، އޭނާއަކީ ވަރަށް ޚާއްޞަ މީހެއްކަމަށް އަމިއްލައަށް ގަބޫލުކުރެވެއެވެ. އަދި އާދައިގެ މީހުންނަށް ވަގުތު ދިނުން ވެސް އުނދަގޫވެއެވެ. މި ފަދަ މަގާމެއް ލިބުމުން އެއް ބަޔަކު ފަޚުރުވެރިވާ އިރު، އަނެއް ބަޔަކަށް އެ ފަދަ ޝަރަފެއް ލިބުނަސް އޭނާގެ ސާދާކަމަކަށް ބަދަލެއް ނާދެއެވެ. ރިޓްޒް-ކާލްޓަން މޯލްޑިވްސް، ފަރި އައިލެންޑުގެ މަރިޔަމް ޝަޣަފަށް 2026ވަނަ އަހަރުގެ ފޯރބްސް ޓްރަވަލް ގައިޑް އެމްޕްލޯޔީ އޮފް ދަ ޔިއަރ (އެންމެ ރަނގަޅު މުވައްޒަފު)ގެ ގޮތުގައި މުޅިދުނިޔޭން ހޮވައިލެވުނު ހަ ފައިނަލިސްޓުންގެ ތެރޭގައި ހޮވުމަކީ ކުޑަ ކާމިޔާބީއެއް ނޫނެވެ. އެހެނީ މި ކަމަށް މުވައްޒަފުން ހޮވަނީ ފަތުރުވެރީންގެ ގޮތުގައި ފޯރބްސްގެ އޮޑިޓަރުން ރިސޯޓަށް އައިސް މުވައްޒިފުންގެ ޚިދުމަތް މުރާގިބުކޮށް ވަޒަންކޮށް ތަހުލީލުކޮށްގެންނެވެ. އެއީ އޮޑިޓަރެއްކަން އެނގެނީ ވެސް އޭނާގެ ދަތުރު ނިންމައި އެނބުރި އޭނާގެ މަންޒިލަށް ގޮސް އެ ކަން ބަޔާންކޮށް މެސެޖުކުރީމައެވެ. މި ފަދަ ޝަރަފުވެރި ލިސްޓަކަށް ޝަޣަފުގެ ނަން އެރިޔަސް އޭނާގެ ސާދާކަމަކަށް ބަދަލެއް ނާދެއެވެ. އެ ކަމަކު މިއީ ހަގީގަތުގައި ކުޑަ ކާމިޔާބީއެއް ނޫނެވެ. އެހެނީ، ޝަޤަފަށް މި ޝަރަފު ލިބިވަޑައިގަތީ މުޅި ދުނިޔޭން ހޮސްޕިޓަލިޓީ ދާއިރާއިން ހޮވައިލެވުނު 100 ބައިވެރީންގެ ތެރެއިން އެންމެ ހަ ފައިނަލިސްޓުން ހޮވި އިރު އޭގައި ހިމެނިވަޑައިގެންނެވެ.
އޭނާގެ ކާމިޔާމީ ފާހަގަކޮށް [ފަރަގު]ގެ [މީހުން] ކޮލަމުގައި މަގާލެއް ލިޔެލާން އޭނާގެ ކިބައިން ބަސްދީގަތުމެއް ހޯދާން ބޭނުން ވާހަކަ ދަންނަވައިލުމުން ]ބޭނުމީ ކިތައް މިނިޓުތޯ[ ސުވާލުކޮށްލެއްވިއެވެ. 10-15 މިނިޓުކަމަށް ކުރު މެސެޖަކުން އަޅުގަނޑު ދެންނެވި ތަނާ މާ ގިނަ އިރެއް ނުވަނީސް އަޅުގަނޑާ އޭނާ ގުޅުއްވިއެވެ. ނަމަވެސް އަޅުގަނޑު އުޅުނީ ދަތުރެއްގެ މަތީގައިކަމަށްވާތީ އެ ކޯލު ނެގޭ ގޮތެއް ނުވިއެވެ. އެ ކަމާ ވަރަށް ދެރަވެގެން އަޅުގަނޑު ގުޅައިލީމެވެ. އެ ގަޑީގައި ވެސް އަޅުގަނޑު އުޅުނީ ވަރަށް އަވަދިނެތިއެވެ. ގުޅައިފައި އެހެން ދެންނެވީމާ ވެސް ވަރަށް ސާދާ ގޮތަކަށް ވިދާޅުވީ މިރޭ 10:00 ކިހިނެއްވާނެތޯއެވެ؟ އަޅުގަނޑު އެ ގަޑި ރަނގަޅުކަމަށް ދަންނަވައި، ވަރަށް ސަމާލުވެގެން 10:00ގައި ގުޅައިލީމެވެ. ހީވީ އަޅުގަނޑުގެ ކޯލުގެ އިންތިޒާރުގައި ހުންނެވިހެންނެވ. ދެވަނަ ރިންގާ އެކު ފޯނު ނަންގަވައިފިއެވެ. އަޅުގަނޑު ކުރި ކޮންމެ ސުވާލަކަށް ޖަވާބުދެއްވަމުން ގެންދެވި ގޮތުން އަޅުގަނޑަށް އިޙުސާސްކުރެވުނީ އަޅުގަނޑުގެ ހަމަ ގާތް ރައްޓެއްސަކާ ވާހަކަދައްކައިލެވުނުހެންނެވެ. އެއްވެސް ދުރުކަމެއް އަބުއި ކަމެއް ނެތި ވަރަށް އިޚުލާޞްތެރިކަމާ އެކު ވާހަކަފުޅުދައްކަވަމުން ގެންދެވިއެވެ. އެހެންކަމުން ޝަޣަފަކީ ހަގީގަތުގައި ވެސް [ފަރަގު] މުވައްޒަފެއްކަން އަޅުގަނޑަށް ދެނެގަނެވުނެވެ.
ނިޒާމީ ތަޢުލީމުގެ މަރުޙަލާ ނިންމެވުމަށް ފަހު 2013ގައި ޝެވަލް ބްލޯންކް ރަންދެލީގައި ހައުސްކީޕިނގ ކޯޑިނޭޓަރެއްގެ ވަޒީފާއާ ގުޅިވަޑައިގަތީ ކޮންމެހެން ފަތުރުވެރިކަމުގެ ދާއިރާގައި ޚިދުމަތްކުރައްވާން ކުރީން ރާއްވަވައިފައި އޮވެގެނެއްނޫނެވެ. މާލޭގައި އުޅުއްވުމުގެ ސަބަބުން އަމިއްލަ އަތޮޅުކަމުގައިވާ އައްޑޫ ސިޓީއާ ހިސާބަކަށް ބީރައްޓެހިވުމާއި، މާލޭގެ ހަލަބޮލިކަމާ ހުރެ، މި ދެ މާހައުލާ ދުރު ތަނެއްގައި ދިރިއުޅުއްވުމުގެ ޚިޔާލު އައުމަކީ، މެހުމާނުދާރީ (ހޮސްޕިޓަލިޓީ) ޚިދުމަތުގެ ދާއިރާއާ ގުޅިވަޑައިގަތް ސަބަބުކަމަށް ވެދާނެއެވެ. ދުވަސްކޮޅެއް ފަހުން ބަޓްލަރެއްގެ ވަޒީފާއަށް ބަދަލުވެވަޑައިގެން [މެހުމާނުން]ނާ ތަންކޮޅެއް ގާތުން މަސައްކަތްކުރައްވާން ދިމާވުމުން މި ދާއިރާއަށް އިތުރަށް ޝައުޤުވެރިވެވަޑައިގަންނަވާ ގޮތް ވިއެވެ.
ކުރީން ދަންނަވައިލެވުނު ފަދައިން، ސެންޓަރ ފޮރ ހަޔަރ ސެކަންޑަރީ އެޖޫކޭޝަން (CHSE) ނިންމަވައިލެއްވުމަށް ފަހު ޝަޣަފު ފުރަތަމަ މަސައްކަތްކުރެއްވީ ރާއްޖޭގެ ލަގްޒަރީ ހޮޓެލް ރިސޯޓެއްކަމަށްވާ [ޝެވަލް ބްލޯންކް ރަންދެލީ]ގައެވެ. އެ ތަން 2013 ޖުލައި މަހު ހުޅުވި އިޙުތިފާލުގައި ވެސް ބައިވެރިވެވަޑައިގަތެވެ. ފަހުން ރިޓްޒް ކާލްޓަން، ފަރި އައިލެންޑްސްއާ ގުޅިވަޑައިގަތީ 2021ގައި އެ ތަން ހުޅުވުމާ ގުޅިގެންނެވެ.
ހޮސްޕިޓަލިޓީ ދާއިރާގައި ޝަޣަފު މަސައްކަތްކުރައްވަނީ ކޮންމެހެން ވަޒީފާއެއް އަދާކުރައްވާ ގޮތަކަށް ނޫނެވެ. ކުރީން އުޅުއްވި ޝެވާލް ބްލޯންކް ރަންދެލީގައި ވެސް، އަދި މިހާރު މަސައްކަތްކުރައްވާ ރިޓްޒް ކާލްޓަން، ފަރި އައިލެންޑްސްގައި ވެސް ޝަޣަފު މަސައްކަތްޕުޅުކުރައްވަނީ އެ މަސައްކަތަކީ އޭނާގެ [ޕެޝަން]އަކަށްވާތީ ވަރަށް ކުރައްވާ ހިތްޕުޅުން ކުރައްވާ މަސައްކަތެއްގެ ގޮތުންނެވެ. އެއީ، މި ރީތި އާދަޔާ އޭނާގެ ނަމުގެ މާނައާ ގުޅޭލެއް ބޮޑުކަމުންކަމަށް ވެދާނެއެވެ. ހަގީގަތުގައި ޝަޣަފު (شَغَفُ)ގެ އެއް މާނައަކީ ވެސް ޕެޝަނެވެ. ޝަޣަފަށް އެ ކަން ވެސް އެނގިވަޑައިގަނެއެވެ.
ޗުއްޓީއެއް ލިބިވަޑައިގަތަސް މާލޭގެ ހަލަބޮލި މާހައުލުގައި ނުވަތަ އަމިއްލަ ރަށުގެ ބީރައްޓެހި ވެށީގައި ދުވަސް ހޭދަކުރައްވާން ޝައުޤުވެރިވެވަޑައިނުގަންނަވާތީ އަބަދު ވެސް ދުނިޔޭގެ އާ ގައުމަކަށް ވަޑައިގަންނަވާން އިސްކަންދެއްވާ ޝަޣަފު ވިދާޅުވީ މިހާރު ދުނިޔޭގެ 70އަށް ވުރެ ގިނަ ގައުމަށް ވަޑައިގެންނެވިއްޖެކަމަށެވެ. އާދޭހެވެ! ތަފާތު ސަގާފަތްތަކާއި އާދަކާދައާ ބެހޭ، ވަރަށް ގިނަ ތަޖުރިބާ އޭނާ ވަނީ ޙާޞިލުކުރައްވައިފައެވެ. އެހެންކަމުން އެކި ސަގާފަތްތަކުން ރާއްޖެއަށް ޒިޔާރަތްކުރާ ފަތުރުވެރީންނަށް ޚިދުމަތްކުރެއްވުމުގައި ވަރަށް ބޮޑު ފަސޭހައެއް މި ކަމުން ވެސް ޝަޣަފަށް ލިބިވަޑައިގަނެއެވެ.
ރިސޯޓެއްގައި އުޅުއްވިޔަސް މުސްލިމު ދިވެހީންގެ ގިޔަމުތަކަށް ސަމާލުކަންދެއްވާ ޝަޣަފު ދުވަހަކު ވެސް، މުސްލިމުން ބުއިން ހުއްދަ ނޫން ބާވަތެއްގެ އެއްވެސް ބުއިމެއް ވެސް ނުހިއްޕަވައެވެ. ކޮންމެ ދުވަހަކު ވެސް ޑިއުޓީ ނިންމަވައިލެއްވުމަށް ފަހު، ދިރިއުޅުއްވާ މަރުކަޒަށް ވަޑައިގަންނަވަނީ ހިންގަވައިފައެވެ. ހޮބީއެއްގެ ގޮތުން ލަވައަޑުއައްސަވަނީ އެ ވަގުތުގައެވެ. މީގެ އިތުރަށް ވަގުތު ލިބިވަޑައިގަންނަވާ މިންވަރަކުން ފުޓުބޯޅަކުޅުއްވާން ވެސް އިސްކަންދެއްވައެވެ. މަސްބޭނުމާއި ފީނުމަކީ ވެސް ޝަޣަފުގެ ހޮބީއެވެ. ނަމަވެސް އެންމެ އިސްކަމެއްދެއްވާ ހޮބީއަކީ ބޭރު ގައުމުތަކަށް ދަތުރުފުޅުކުރެއްވުމެވެ. ދަންނަވަންތޯއެވެ! ޝަޣަފުގެ ވަރަށް އާދަޔާ ޚިލާފު އެހެން ހޮބީއެއް އަދި އެބަ އޮތެވެ. އެއީ އެހެން މީހުން ނުކުރާ ކަންކަން ކުރެއްވުމުގެ ޝައުޤެވެ. އެހެން ގޮތަކަށް ދަންނަވާ ނަމަ، ޝަޣަފަކީ އާހިތަވެރިއެކެވެ. (މި ލަފުޒުގެ މާނަ، ތިރީގައި، މާނަ ލިސްޓްގައި އޮންނާނެއެވެ.)
މި ސާދާ ޝަޚުޞިއްޔަތުގެ އެންމެ ތަފާތު އެއް ސިފައަކީ އެއްވެސް ކަމެއްގައި ކޯފާއިސްނުކުރެއްވުމެވެ. އެހެންކަމުން މީހުންނާ ގުޅިވަޑައިގެން މަސައްކަތްޕުޅުކުރެއްވުމަކީ މަރިޔަމް ޝަޣަފަށް ވަރަށް ފަސޭހަފުޅުކަމެކެވެ. ޝަޣަފުގެ ސުލޫކާއި އަޚުލާޤު، އޭނާގެ ޢާއިލާއަށް ރަނގަޅަށް އެނގޭތީ ރިސޯޓު ދާއިރާގައި އޭނާ މަސައްކަތްކުރައްވާން ޢާއިލާގެ ފުރިހަމަ ތާއީދު އޮވެއެވެ. ސ. ފޭދޫގައި ދިރިއުޅުއްވާ މަންމައާއި ބައްޕަ މާލެ ދުރުވާ ކޮންމެ ފަހަރަކު އެ ދެކަނބަލުންނާ ބައްދަލުކުރައްވާން ޝަޣަފު މާލެވަޑައިގަނެއެވެ.
ޝަޣަފުގެ ވަޒީފާގައި އެންމެ ހިތްޕުޅުހަމަޖެހެނީ ޝަޣަފު ޚިދުމަތްދެއްވާ ގިނަ ފަތުރުވެރީން އޭނާގެ ޚިދުމަތް ބަލައިގަނެ ޝުކުރުވެރިވާތީއެވެ. ރިޓްޒް ކާލްޓަން، [ފަރި އައިލެންޑްސް]އަށް އަންނަ ބައެއް ފަތުރުވެރީން ތަކުރާރުކޮށް އެ ރަށަށް އަންނަނީ އޭނާ އެ ރިސޯޓުގައި އުޅުއްވާތީކަމަށް ބުނުމުން ވަރަށް އުފާފުޅުވާކަމަށް ވިދާޅުވިއެވެ. އަދި ޚިދުމަތް ލިބިގަންނަ ވަރަށް ގިނަ ފަތުރުވެރީން އެނބުރި ރަށަށް ދިޔުމަށް ފަހުން ހަނދާންވެޔޭ މިސްވެޔޭ ކިޔައި މެސެޖުކުރުމަކީ އޭނާގެ ޚިދުމަތް ބަލައިގަންނަ ކަމެއްކަން ކަށަވަރެވެ.
މަރިޔަމް ޝަޣަފަށް ލިބިވަޑައިގަތް އިނާމުގެ އިތުރަށް 2025ވަނަ އަހަރު ޝަޣަފުގެ ފުރަމަލައެއް، ބައިނަލްއަގުވާމީ ނޫހެއްގައި ޝާއިޢުކުރި އިރު ޝަޣަފުގެ އޯގާވެރިކަމާއި ނިޔަނެތިކަމާއި ހިތްޕުޅު ހެޔޮކަން ފާހަކަކޮށްފައިވެއެވެ.
ޝަޣަފާ ވާހަކަދައްކައިލާން ލިބުނު 15 ވަރަކަށް މިނިޓުގެ ފުރުޞަތުގައި ވެސް އޭނާގެ ހިތްޕުޅުތިރިކަމާއި އޯގާވެރިކަމާއި ސާދާކަން އަޅުގަނޑަށް ފާހަގަކުރެވުނެވެ. ޝަޣަފު ގިނަ އަންހެން ޒުވާނުންނާ ވަރަށް [ފަރަގު]ކަން އަޅުގަނޑަށް ވެސް ފާހަގަކުރެވުނެވެ. ޝަޣަފުގެ ސާދާކަމާއި ކަންކަމާ މެދު ކަންބޮޑުވެވަޑައިގެން ފިކުރުބޮޑުނުކުރައްވާކަމުން އަބަދު ވެސް ހުންނަވަނީ ވަރަށް އުފާފުޅުން ވަރަށް ތާޒާކޮށެވެ. ޢުމުރުފުޅުން 32 އަހަރުގެ މި ތަފާތު ޒުވާނާ، ބަލާ ބެލުމަށް 25-26 އަހަރުކަމަށް ގިނަ މީހުންނަށް ހީވަނީ އެހެންވެގެންކަމަށް ވެދާނެއެވެ. އާދޭހެވެ! ފެންނަ ފެނުމަށް ބަލާ އިރު، ޝަޣަފުގެ ހަގީގީ އުމުރަށް ވުރެ ފެންނަނީ މާ ހަގުކޮށެވެ.
މަރިޔަމް ޝަޣަފަށް އަޅުގަނޑު އެދެނީ ހުރިހައި ވެސް ކާމިޔާބީއަކާއި ބާއްޖަވެރި ކުރިމަގެކެވެ!
ބައެއް ލަފުޒުގެ މާނަ:
ހޮބީ ނ. އަދާކުރާންޖެހިފައިވާ ވަޒީފާ ނުވަތަ ވާޖިބުގެ އިތުރަށް ކުރާ ހިތުން ޝައުޤުވެރިކަމާ އެކު ކުރާ ކަންތައް. hobby
އާހިތަވެރިޔާ ނ. އާދަޔާ ޚިލާފު ތަޖުރިބާތައްކުރާން ޝައުޤުވެރިކަމާއި ހިތްވަރާ އެކު ކުރިމަތިލާ މީހާ
ފުރަމަލަ ނ. މީހެއް ނުވަތަ މުއައްސަސާއެއް ނުވަތަ ގައުމެއް ތަޢާރަފުކޮށްދޭ ކުރު ބަޔާން. profile
ގިޔަމު ނ. ސަގާފަތާއި އާދަކާދައާއި އިޖުތިމާޢީ ގުޅުންތަކުގެ ތެރެއިން މުޖުތަމަޢެއްގައި ބަލައިގެންފައިވާ އަޚުލާގީ މީޔާރުތައް ނުވަތަ އާންމު މިންގަނޑުތައް. values
ސާދާ ނއ. (1) އާދައިގެ. (2) ޒީނަތްތެރިކުރުމެއް ނަލަހެދުމެއް ނެތް. (3) ކަންދެއްކުމެއް ބޮޑާކަމެއް ނެތް. (4) އޮޅުމެއް ނެތް. (5) ފަސޭހަ. simple
ސުލޫކު ނ. (1) އުޅޭ ގޮތް. (2) ޢަމަލުތައް ހުންނަ ގޮތް. (3) އަޚުލާޤު discipline
